Swivutiso Swa Vahlayi

Xana ku ta va ku ri ku pfanganisa vupfumeri loko ku xaviwa muako eka vukhongeri byo karhi kutani wu hundzuriwa Holo ya Mfumo?

Hi ntolovelo, Timbhoni ta Yehovha ti papalata ku tipfanganisa ni vukhongeri byin’wana. Hambiloko ho xava muako wo tano, a swi vuli swona leswaku hi pfanganisa vupfumeri. Kambe swi fanele swi tekiwa ku ri ku xaviselana ntsena. Leswi a swi vuli swona leswaku vandlha ra Timbhoni ta Yehovha ri tihlanganisa ni ntlawa wun’wana wa vukhongeri leswaku ri ta aka ndhawu ya vugandzeri leyi nga ta tirhisiwa hi rona ni vukhongeri byebyo.

Hi swihi leswi Yehovha a swi langutaka ku ri ku pfanganisa vupfumeri? Xiya nkongomiso wa muapostola Pawulo: “Mi nga paniwi ni lava va nga riki vapfumeri. Hikuva ku lulama ni ku kala nawu swi ni xinakulobye xihi? Kumbe ku vonakala ni munyama swi hlangana kwihi? Ku tlula kwalaho, ku ni ntwanano wihi exikarhi ka Kreste na Beliyali? Kumbe munhu la pfumelaka u ni xiphemu xihi ni loyi a nga riki mupfumeri? Naswona tempele ya Xikwembu yi ni ntwanano wihi ni swifaniso swa hava? . . . ‘Hikokwalaho humani exikarhi ka vona, mi tihambanisa,’ ku vula Yehovha, ‘naswona tshikani ku khumba xilo lexi nga basangiki’; ‘kutani ndzi ta mi amukela.’” (2 Vakorinto 6:14-17) Xana Pawulo a a vula yini hi rito leri nge “xinakulobye” ni leri nge “hlangana”?

Xinakulobye lexi Pawulo a vulavulaka ha xona xi katsa vugandzeri ni ku tirhisana ni vagandzeri va swifaniso swa hava ni lava nga riki vapfumeri. U tsundzuxe Vakorinto malunghana ni ku nga ‘dyi etafuleni ra madimona.’ (1 Vakorinto 10:20, 21) Xisweswo, ku pfanganisa vupfumeri i ku hlanganyela evugandzerini kumbe ku va ni xinakulobye xa moya ni minhlangano yin’wana ya vukhongeri. (Eksoda 20:5; 23:13; 34:12) Loko ku xaviwa muako lowu a wu tirhisiwa hi nhlangano wa vukhongeri byo karhi, leswi swo endleriwa ntsena ku kuma muako lowu wu nga ta hundzuriwa Holo ya Mfumo. Loko wu nga si tirhisiwa tanihi Holo ya Mfumo, ku ta susiwa swilo hinkwaswo leswi fambisanaka ni vugandzeri bya mavunwa. Loko wu cinciwile, wa nyiketeriwa eka Yehovha leswaku ku ta gandzeriwa yena ntsena. Vugandzeri bya ntiyiso ni bya mavunwa a byi hlangani naswona a byi na xinakulobye.

Loko ku ri karhi ku buriwa hi vuxokoxoko bya ku xaviselana loku, vamakwerhu va fanele va hlangana ntsena hi timhaka to xaviselana ku nga ri swin’wana. Vandlha ra Vukreste ri fanele ri tsundzuka xitsundzuxo xa Pawulo xa ku nga “paniwi ni lava va nga riki vapfumeri.” Hambileswi hi nga titekiki hi tlakukile eka lava va tivulaka vapfumeri, hi papalata ku tihlanganisa na vona kumbe ku kuceteriwa hi vugandzeri bya vona. *

Ku vuriwa yini hi ku va vandlha ri hirha muako lowu nga wa nhlangano wa vukhongeri byo karhi? Ku hirha ku endla leswaku minkarhi hinkwayo ri tihlanganisa na byona, ku nga leswi swi faneleke swi papalatiwa. Hambi ku ri ku hirha muako wolowo leswaku wu tirhiseriwa xiendlakalo xin’we ntsena, huvo ya vakulu yi fanele yi anakanyisisa hi swivutiso leswi: Xana ku ta va ku ri ni swifaniso ni mimfungho ya vukhongeri endzeni kumbe ehandle ka muako? Xana vanhu va ndhawu yoleyo va ta hi teka njhani loko hi tirhisa muako wolowo? Xana va kona lava nga ta khunguvanyeka evandlheni loko hi tirhisa muako lowu? (Matewu 18:6; 1 Vakorinto 8:7-13) Vakulu va fanele va kambisisa swivutiso leswi kutani va endla xiboho. Loko va lava ku xava muako va wu hundzula Holo ya Mfumo va fanele va kongomisiwa hi mapfalo ya vona ni ya vanhu lavan’wana evandlheni.

[Nhlamuselo ya le hansi]

[Xifaniso lexi nga eka tluka 27]

Muako lowu, a wu ri sinagoga kutani wu xaviwa wu hundzuriwa Holo ya Mfumo