“Tlhariha Eka Vumundzuku Bya Wena”

“Vanhu vo tala va tlanga hi malembe ya vuntshwa bya vona kutani loko se va kurile va vona maxangu.” Marito wolawo ma vuriwe hi Jean de La Bruyère, mutsari wa Mufurwa wa lembe-xidzana ra vu-17. Hakunene, muntshwa loyi a nga tiyisekiki a nga ha va n’hwarhi-mbirhi, a va ni gome a tlhela a hela matimba. Hi hala tlhelo, muntshwa loyi a tiomisaka nhloko a nga ha phikelela a endla swilo leswi nga riki swa vutlhari leswi nga ta n’wi endla a nga ha vi ni ntsako evuton’wini. Nakambe ku endla leswi a a nga fanelanga a swi endla kumbe ku dyoha hi vomu swi nga ha endla leswaku a cangayila.

Xana swilo swo tano swi nga papalatiwa njhani? Loko Rito ra Xikwembu ri tsundzuxa vantshwa lava nga tiyisekiki, ri ri: “Sweswi tsundzuka Mutumbuluxi wa wena Lonkulu emasikwini ya vujaha bya wena, masiku ya khombo ma nga si ta, kumbe ma nga si fika malembe lawa u nga ta vula ha wona u ku: ‘A ma ndzi tsakisi.’” (Eklesiasta 12:1) Loko u ri muntshwa, teka magoza lama tiyeke yo dyondza hi “Mutumbuluxi wa wena Lonkulu” loko wa ha ri muntshwa.

Kutani, xana Bibele yi nga va pfuna njhani vantshwa leswaku va papalata mahanyelo ya vuphukuphuku? Yi ri: “Yingisa xitsundzuxo u tlhela u amukela ndzayo, leswaku u ta tlhariha eka vumundzuku bya wena.” (Swivuriso 19:20) Bibele yi tlhela yi swi kombisa kahle leswaku ku ala vutlhari bya Xikwembu hikwalaho ka ku honisa kumbe hikwalaho ka ku xandzuka ka muntshwa kumbe munhu wa malembe wahi ni wahi swi tisa vuyelo byo vava. (Swivuriso 13:18) Kahle-kahle, ku yingisa minkongomiso ya Xikwembu swi ta endla leswaku hi va ni “masiku yo leha, malembe ya vutomi ni ku rhula,” ku nga vutomi lebyi enerisaka ni lebyi tsakisaka.—Swivuriso 3:2.