Ha Yini Swi Tika Ku Kombela Ku Rivaleriwa?

HI July 2000, Huvo leyi Endlaka Milawu ya le Xifundzheni xa California le United States yi humese nawu lowu nga ta endla leswaku vanhu va nga vi ni vutihlamuleri loko va ririsa munhu loyi a vavisekeke emhangwini swin’we na vona. Ha yini ku humesiwe nawu lowu? Ku xiyiwe leswaku loko eka mhangu yo karhi ku vaviseka vanhu kumbe ku onhaka swilo swo karhi, hakanyingi vanhu va kanakana ku kombela ku rivaleriwa hi ku chava leswaku ehubyeni ku nga ha anakanyiwa leswaku va pfumele nandzu. Hi hala tlhelo, lava va anakanyaka leswaku va fanele va hatla va rivaleriwa va nga ha hlundzuka, naswona mhangu leyi nga nyawuliki yi nga ha hundzuka mholovo leyikulu.

Ina, a swi bohi ku kombela ku rivaleriwa hikwalaho ka mhangu leyi nga vangiwangiki hi wena. Naswona minkarhi yin’wana ku nga ha va vutlhari ku xiya leswi hi swi vulaka. Xivuriso xa khale xi ri: “Ku tlula nawu a ku pfumaleki emaritweni yo tala, kambe loyi a tshamaka a kambela milomu yakwe u endla hi vutlhari.” (Swivuriso 10:19; 27:12) Hambiswiritano, u nga ha anakanyela u tlhela u pfuna.

Kambe, xana a hi ntiyiso leswaku vanhu vo tala va tshike ku kombela ku rivaleriwa, hambiloko va nga mangalelananga? Ekaya  wansati a nga ha titshandza a ku, ‘Nuna wa mina a nga si tshama a kombela ku rivaleriwa.’ Entirhweni ndhuna yi nga ha vilela yi ku, ‘Vatirhi va mina a va swi amukeli swihoxo swa vona, naswona a hi kanyingi va kombela ku rivaleriwa.’ Exikolweni mudyondzisi a nga ha ku, ‘Vana a va dyondzisiwanga ku vula leswaku ndzi kombela ku khomeriwa.’

Xivangelo xin’wana lexi endlaka munhu a kanakana ku kombela ku rivaleriwa ku nga ha va ku chava ku hlekuriwa. Hi ku chava ku bakanyeriwa etlhelo, a nga ha tshika ku phofula ndlela leyi a titwaka ha yona hakunene. Phela, munhu loyi a twisiweke ku vava a nga ha papalata munhu loyi a n’wi twiseke ku vava hi ku helela, a endla swi tika swinene ku kombela ku rivaleriwa.

Xivangelo xin’wana lexi endlaka van’wana va kanakana ku kombela ku rivaleriwa hileswi van’wana va nga riki na mhaka ni leswi van’wana va titwisaka xiswona. Va nga ha ku, ‘Ku kombela ku rivaleriwa a swi nge susi xihoxo lexi se ndzi xi endleke.’ Van’wana va kanakana ku kombela ku rivaleriwa hikwalaho ka leswi nga ha endlekaka. Va tivutisa, ‘Xana ndzi ta voniwa nandzu kutani ndzi komberiwa ku humesa mali yo riha?’ Hambiswiritano, xihinga lexikulu lexi sivelaka vanhu ku pfumela xihoxo xa vona i ku tikukumuxa. Munhu loyi swi n’wi tikelaka ku vula leswaku “ndzi kombela ku khomeriwa” a nga ha ku, ‘A ndzi lavi ku tekeriwa ehansi hi ku va ndzi pfumela xihoxo xa mina. Sweswo swi ta ndzi yisa ehansi.’

Ku nga khathariseki xivangelo xa kona, vo tala swa va tikela ku kombela ku rivaleriwa. Kambe xana swa boha ku kombela ku rivaleriwa? Hi byihi vuyelo bya ku kombela ku rivaleriwa?

[Xifaniso lexi nga eka tluka 3]

“Vana a va dyondzisiwanga ku vula leswaku ndzi kombela ku khomeriwa”

[Xifaniso lexi nga eka tluka 3]

“Vatirhi va mina a va swi amukeli swihoxo swa vona”

[Xifaniso lexi nga eka tluka 3]

“Nuna wa mina a nga si tshama a kombela ku rivaleriwa”