Un’wana Ni Un’wana Wa Amukeleka eHolweni Ya Mfumo
Xiviko Xa Vahuweleri Va Mfumo
Un’wana Ni Un’wana Wa Amukeleka eHolweni Ya Mfumo
LOKO a ri karhi a letela vadyondzisiwa va yena leswaku va ta chumayela, Yesu Kreste u va khutaze ku ‘chumayela va ri ehenhla ka tindlu.’ (Matewu 10:27) Ina, a va fanele va endla vutirheli bya vona bya Vukreste erivaleni, va ri karhi va voniwa hi mani na mani. Hi ku pfumelelana ni ndzayo leyi, ntirho wa Timbhoni ta Yehovha wu tlhela wu endliwa erivaleni. Leswi ti wu endlelaka erivaleni, Timbhoni ti kote ku hlula nkaneto naswona ku vulavuriwa hi ndlela leyinene ha tona.
Hambileswi eminhlanganweni ya vandlha ya Timbhoni ta Yehovha ku amukelekaka munhu un’wana ni un’wana, vanhu van’wana va kanakana ku ya eHolweni ya Mfumo hileswi ti vengiwaka. Sweswo swi tano eFinland. Van’wana va chava ku ya etindhawini letintshwa. Loko ku akiwa Holo ya Mfumo leyintshwa kumbe ku pfuxetiwa leyi nga kona, hakanyingi yi rhanga yi valangiwa. Ku nga ha endliwa matshalatshala yo hlawuleka, ku rhambiwa vaakelani leswaku va endzela Holo ya Mfumo va tlhela va ta hlamuseriwa kahle hi ntirho wa Timbhoni ta Yehovha.
Endhawini yin’wana, Timbhoni ti hlele ku endla tsima ra timagazini hi siku leri a ku ta valangiwa ha rona eHolweni ya Mfumo ya tona leyintshwa. Timbhoni timbirhi ti hlangane ni mukhalabye un’wana la vuleke leswaku u tsakisiwa hi ku hlaya timagazini ta Xihondzo xo Rindza ni Xalamuka! Vamakwerhu va n’wi byele hi mhaka yo valanga va tlhela va vula leswaku va nga n’wi yisa eHolweni ya Mfumo. Mukhalabye loyi u vule leswaku a ku na xiphiqo u ta famba na vona. Leswi nsati wa yena a a yingiserile, u huwelerile a ku: “Na mina ndzi ta famba na n’wina!”
Loko va nghena eHolweni ya Mfumo, wanuna loyi u halaharile kutani a ku: “A yi byihalanga nikatsongo. Ma tiva yi sasekile naswona yi ni ku vonakala. A ndzi byeriwe leswaku Holo leyi ya Mfumo a yi ta va yi byiharile!” Mpatswa lowu wu tshame nkarhinyana wo leha kutani wu kombela tin’wana ta tibuku leti a ti vekiwe kwalaho.
Vandlha rin’wana a ri lava ku tivisa eka phepha-hungu ra kwalaho hi mhaka ya ku valanga hi nkarhi wa ku nyiketeriwa ka Holo ya rona ya Mfumo. Loko ndhuna ya vahleri yi twa hi ta xiendlakalo xexo yi ringanyete leswaku ku tsariwa xihloko lexi vulavulaka hi mhaka leyi. Vamakwerhu va pfumerile, naswona endzhaku ka nkarhinyana, a ku ri ni xihloko lexi a xi ringana hafu ya tluka eka phepha-hungu rolero, lexi a xi vulavula kahle hi xiendlakalo xexo xi tlhela xi hlamusela mintirho ya vandlha ra Timbhoni ta Yehovha ra kwalaho.
Endzhaku ka loko xihloko xi humesiwile, Mbhoni leyi dyuhaleke yi hlangane ni muakelani wa yona loyi a nga te: “Eka phepha-hungu ra namuntlha a ku ri ni xihloko lexinene lexi a xi vulavula hi Timbhoni ta Yehovha!” Makwerhu loyi wa xisati u kote ku n’wi chumayela kutani endzhakunyana a n’wi fambisela broxara leyi nge Timbhoni Ta Yehovha Eka Lembe Xidzana Ra Vumakumembirhi.
Ku engetela eka ku ololoxa ku nga twisisi ko karhi malunghana ni Timbhoni ta Yehovha, malunghiselelo yo tano ya ku valanga ni ya minongonoko ya ku nyiketela eTiholweni ta Mfumo ma khutaze vahuweleri leswaku va rhamba vanhu vo tala eminhlanganweni. Ina, ematikweni yo tala, ku katsa ni le Finland, vanhu va dyondze leswaku eTiholweni ta Mfumo ta Timbhoni ta Yehovha ku nghena un’wana ni un’wana.