Hambetani Mi Tirha Hi Mbilu Yin’we
Hambetani Mi Tirha Hi Mbilu Yin’we
“Ndzi ta endla leswaku vanhu va hundzukela eka ririmi leri tengeke, leswaku hinkwavo va vitana vito ra Yehovha, va n’wi tirhela hi mbilu yin’we.”—SOFANIYA 3:9.
1. Sofaniya 3:9 yi hetiseka njhani?
NAMUNTLHA emisaveni hinkwayo ku vulavuriwa tindzimi ta kwalomu ka 6 000. Handle ka tona ku ni tindzimi-mpambukwa ta tindzimi to karhi. Hambiswiritano, ku nga khathariseki leswaku vanhu va vulavula tindzimi to hambana to tanihi Xiarabu ni Xizulu, Xikwembu xi endle nchumu wun’wana lowu hlamarisaka swinene. Xi endle leswaku vanhu hinkwako-nkwako va kota ku dyondza ni ku vulavula ririmi rin’we ro tenga. Leswi swi hetisisa xitshembiso lexi xi nyikiweke muprofeta Sofaniya: “[Mina Yehovha Xikwembu] ndzi ta endla leswaku vanhu va hundzukela eka ririmi leri tengeke [hi ku kongoma, “nomu lowu baseke,”], leswaku hinkwavo va vitana vito ra Yehovha, va n’wi tirhela hi mbilu yin’we.”—Sofaniya 3:9.
2. “Ririmi leri tengeke” i yini, naswona ri endle leswaku vanhu va kota ku endla yini?
2 “Ririmi leri tengeke” i ntiyiso wa Xikwembu lowu kumekaka eRitweni ra xona, ku nga Bibele. Ngopfu-ngopfu i ntiyiso lowu vulavulaka hi Mfumo wa Xikwembu, lowu nga ta kwetsimisa vito ra Yehovha, wu lwela vuhosi bya yena ni ku tisela vanhu mikateko. (Matewu 6:9, 10) Leswi ri nga rona ntsena ririmi leri baseke emisaveni, ririmi leri tengeke ri vulavuriwa hi vanhu va matiko hinkwawo ni va tinxaka hinkwato. Ri endla leswaku va kota ku tirhela Yehovha “hi mbilu yin’we.” Xisweswo va n’wi tirhela hi vun’we kumbe “hi ku twanana.”—Bibele—Mahungu Lamanene.
Vanhu Va Xikwembu A Va Fanelanga Va Va Ni Xihlawuhlawu
3. I yini lexi endlaka leswaku hi kota ku tirhela Yehovha hi vun’we?
3 Leswi hi nga Vakreste, ha wu tlangela swinene ntirhisano lowu nga kona exikarhi ka hina vanhu lava vulavulaka tindzimi to hambana-hambana. Hambileswi hi chumayelaka mahungu lamanene ya Mfumo hi tindzimi to tala, hi tirhela Xikwembu hi vun’we. (Pisalema 133:1) Leswi swi vangiwa hi leswi hi vulavulaka ririmi rin’we leri tengeke leswaku hi dzunisa Yehovha, ku nga khathariseki leswaku hi tshama etikweni rihi.
4. Ha yini vanhu va Xikwembu va nga fanelanga va va ni xihlawuhlawu?
4 Vanhu va Xikwembu a va fanelanga va va ni xihlawuhlawu. Muapostola Petro u swi veke erivaleni sweswo loko a chumayela ekaya ra Korneliyo ndhuna ya nyimpi ya Matiko hi 36 C.E., kutani a susumeteleka ku vula leswi: “Hakunene ndza swi xiya leswaku Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” (Mintirho 10:34, 35) Leswi sweswo swi nga ntiyiso, vandlha ra Vukreste a hi ndhawu yo kombisa xihlawuhlawu, kumbe ndhawu yo vumba mintlawa.
5. Ha yini swi hoxile ku hlanganyela eku vumbiweni ka mintlawa evandlheni?
5 Xichudeni xin’wana xa le kholichi xi vule leswi landzelaka malunghana ni riendzo ra xona eHolweni ya Mfumo: “Hakanyingi, tikereke ti koka vanhu va rixaka ro karhi. . . . Timbhoni ta Yehovha a ti tshame swin’we naswona a ku nga ri na mintlawa yo karhi.” Hambiswiritano, swirho swin’wana swa le vandlheni ra le Korinto wa khale a swi vumba mintlawa yo karhi. Leswi sweswo a swi vanga timholovo, a va lwisana ni moya lowo kwetsima wa Xikwembu, hikuva wona wu kondletela vun’we ni ku rhula. (Vagalatiya 5:22) Loko ho kondletela ku vumbiwa ka mintlawa evandlheni, hi ta va hi lwisana ni nkongomiso wa moya. Hikwalaho, a hi tsundzukeni marito ya muapostola Pawulo lama yaka eka Vakorinto: “Ndza mi khongotela, vamakwerhu, hi vito ra Hosi ya hina Yesu Kreste leswaku hinkwenu mi vulavula hi ku twanana, ni leswaku ku nga tshuki ku va ni ku avana exikarhi ka n’wina, kambe mi hlangana hilaha ku faneleke emianakanyweni yin’we ni le ndleleni yin’we ya ku ehleketa.” (1 Vakorinto 1:10) Pawulo u tlhele a kandziyisa mhaka ya vun’we eka papila ra yena leri yaka eka Vaefesa.—Vaefesa 4:1-6, 16.
6, 7. Yakobo u nyikele ndzayo yihi malunghana ni ku ya hi nghohe, naswona marito ya yena ma tirha njhani?
6 Ku languteriwe leswaku minkarhi hinkwayo Vakreste va nga yi hi nghohe. (Varhoma 2:11) Leswi van’wana evandlheni ra lembe-xidzana ro sungula a va va rhandza ngopfu vanhu lava fumeke, mudyondzisiwa Yakobo u tsarile: “Vamakwerhu, ripfumelo leri mi nga na rona eka Hosi ya hina Yesu Kreste, ku vangama ka hina, a ri fambisani ni swiendlo swa xihlawuhlawu, a hi swona ke? Hikuva, loko munhu la veheleke swingwavila swa nsuku etintihweni ta yena, a ambale swiambalo leswi hatimaka a nghena enhlengeletanweni ya n’wina, ivi ku nghena xisiwana lexi ambaleke swiambalo leswi thyakeke, kambe mi va ni tintswalo eka la ambaleke swiambalo leswi hatimaka kutani mi ku: ‘Wena tshama laha ndhawini leyinene,’ kutani eka la nga xisiwana mi ku: ‘Wena yimisa sweswo,’ kumbe: ‘Tshama lahaya vunavelweni bya milenge ya mina,’ ma tihambanisa hi mintlawa exikarhi ka n’wina naswona se mi vaavanyisi lava endlaka swiboho swo homboloka, a swi tano ke?”—Yakobo 2:1-4.
7 Loko swifumi leswi nga riki vapfumeri leswi veheleke swingwavila swa nsuku ni swiambalo leswi hatimaka swi ta enhlanganweni wa Vukreste swin’we ni swisiwana leswi nga riki vapfumeri leswi ambaleke swiambalo leswi thyakeke, swifumi a swi khomiwa kahle. A swi tshamisiwa ‘endhawini leyinene,’ kasi swisiwana a swi byeriwa ku yima kumbe ku tshama emilengeni ya un’wana. Kambe Xikwembu xi nyikele gandzelo ra nkutsulo ra Yesu eka swifumi ni le ka swisiwana xi nga yi hi nghohe. (Yobo 34:19; 2 Vakorinto 5:14) Hikwalaho loko hi lava ku tsakisa Yehovha naswona hi n’wi tirhela hi mbilu yin’we, a hi fanelanga hi ya hi nghohe kumbe ‘hi ndhundhuzela vanhu leswaku ku ta pfuneka hina.’—Yudha 4, 16.
Mi Nga Gunguli
8. Ku humelele yini loko Vaisrayele va gungurile?
8 Leswaku hi tshama hi ri ni vun’we naswona hi hambeta hi tsakeriwa hi Xikwembu, hi fanele hi yingisa ndzayo ya Pawulo: “Hambetani mi endla swilo hinkwaswo mi nga gunguli.” (Vafilipiya 2:14, 15) Vaisrayele lava pfumalaka ripfumelo lava ntshunxiweke evuhlongeni bya le Egipta va gungule hi Muxe na Aroni na hi Yehovha Xikwembu. Hikwalaho ka leswi, vavanuna hinkwavo lava nga ni malembe ya 20 ni ku tlula, a va nghenanga eTikweni leri Tshembisiweke kambe va file emalembeni ya 40 lawa Vaisrayele va ma heteke emananga, ku lo nghena ntsena lava a va tshembeka ku nga Yoxuwa, Kalebe ni Valevhi. (Tinhlayo 14:2, 3, 26-30; 1 Vakorinto 10:10) Wa nga vona vuyelo lebyi veke kona hikwalaho ko gungula!
9. Ku humelele yini hi Meriyamu loko a ta va a gungurile?
9 Leswi swi kombisa leswi nga humelelaka eka tiko hinkwaro leri gungulaka. Ku vuriwa yini loko ku gungula vanhu vo karhi ntsena? Meriyamu, sesi wa Muxe swin’we ni makwavo wa yena Aroni va gungurile: “Xana Yehovha u vulavule hi Muxe ntsena? Xana a nga vulavulanga na hi hina?” Rungula ra kona ri ya emahlweni ri ku: “Yehovha a a yingisile.” (Tinhlayo 12:1, 2) Vuyelo byi ve byihi? Xikwembu xi khomise Meriyamu tingana, loyi kumbexana a ri yena murhangeri wa kona. Njhani? Hi ku hlaseriwa hi nhlokonho ni ku tlhela a boheka ku tshama ehandle ka nxaxa ku ringana masiku ya nkombo kukondza a basisiwa.—Tinhlayo 12:9-15.
10, 11. Loko ku gungula ku nga xiyiwi ku nga vanga yini? Kombisa.
10 Ku gungula a hi ku vilela ntsena hi xihoxo xo karhi. Vanhu lava tshamelaka ku gungula va karhateka swinene hi mintlhaveko ya vona kumbe hi xikhundlha xa vona, va kokela nyingiso eka vona vini ku nga ri eka Xikwembu. Loko ku nga siveriwi, ku vanga timholovo exikarhi ka vagandzeri-kulorhi naswona ku sivela matshalatshala ya vona yo tirhela Yehovha hi mbilu yin’we. Leswi swi vangiwa hi leswi vanhu lava gungulaka minkarhi hinkwayo va boxaka swivilelo swa vona, va ri ni ntshembo wa leswaku van’wana va ta va tshandzisa.
11 Hi xikombiso, un’wana a nga ha sola ndlela leyi nkulu wo karhi a ti nyikelaka ha yona tinkulumo evandlheni kumbe ndlela leyi a byi hetisisaka ha yona vutihlamuleri byakwe. Loko ho yingisela munhu loyi a vilelaka, hi nga ha sungula ku anakanya ku fana na yena. Loko mbewu ya ku nga eneriseki yi nga si byariwa emianakanyweni ya hina, swi nga ha endleka ndlela leyi nkulu loyi a a tirha ha yona a yi nga hi karhati, kambe sweswi se ya hi karhata. Eku heteleleni, xin’wana ni xin’wana lexi nkulu loyi a xi endlaka hi ta xi vona xi nga ri xinene, kutani na hina hi nga ha sungula ku n’wi sola-sola. Mukhuva lowu a wu laveki evandlheni ra vanhu va Yehovha.
12. Ku gungula ku nga va ni vuyelo byihi eka vuxaka bya hina na Xikwembu?
12 Ku gungula hi vavanuna lava ntirho wa vona ku nga ku risa ntlhambi wa Xikwembu ku nga ha vanga leswaku hi rhukana. Ku gungula ko tano kumbe ku vula swo biha ha vona ku nga khumba vuxaka bya hina na Yehovha hi ndlela yo biha. (Eksoda 22:28) Varhuketeri lava nga hundzukiki a va nge yi dyi ndzhaka ya Mfumo wa Xikwembu. (1 Vakorinto 5:11; 6:10) Mudyondzisiwa Yudha u tsale hi ta lava gungulaka lava a va “honisa vuhosi naswona va tseketsela lava vangamaka,” kumbe vavanuna lava nga ni vutihlamuleri evandlheni. (Yudha 8) Xikwembu a xi nga va tsakeli vanhu volavo lava gungulaka naswona hi ta va hi tlharihile loko hi papalata mukhuva wa vona wo biha.
13. Ha yini ku nga ri swirilo hinkwaswo leswi hoxeke?
13 Hambiswiritano, a hi swirilo hinkwaswo leswi hlundzukisaka Xikwembu. A xi xi honisanga “xirilo xa ku vilela” hi Sodoma na Gomora kambe xi yi lovisile miti yoleyo yo homboloka. (Genesa 18:20, 21; 19:24, 25) Le Yerusalema, endzhakunyana ka Pentekosta ya 33 C.E., “Vayuda lava vulavulaka Xigriki va [n’unun’utele] Vayuda lava vulavulaka Xiheveru, hikuva tinoni ta vona a ti honisiwa eka mphakelo wa siku ni siku.” Hikwalaho, “lava 12” va lulamise xiyimo hi ku hlawula “vavanuna va nkombo lava ku tiyisekiwaka ha vona” “entirhweni lowu wu faneleke” wa ku phakela swakudya. (Mintirho 6:1-6) Vakulu va namuntlha a va fanelanga va ‘siva tindleve ta vona’ eka swirilo leswi faneleke. (Swivuriso 21:13) Ematshan’weni yo sola-sola vagandzeri-kulobye, vakulu va fanele va khutaza va tlhela va aka.—1 Vakorinto 8:1.
14. Leswaku hi nga gunguli, i mfanelo yihi leyi ngopfu-ngopfu hi yi lavaka?
14 Hinkwerhu ka hina hi fanele hi tshika ku gungula, hikuva moya wa ku gungula wu ni khombo hi tlhelo ra moya. Langutelo ro tano ri nga kavanyeta vun’we bya hina. Ku ri na sweswo, minkarhi hinkwayo a hi pfumeleleni moya lowo kwetsima leswaku wu humesa rirhandzu eka hina. (Vagalatiya 5:22) Ku yingisa ‘nawu wa vuhosi wa ku rhandzana’ swi ta hi pfuna leswaku hi hambeta hi tirhela Yehovha hi mbilu yin’we.—Yakobo 2:8; 1 Vakorinto 13:4-8; 1 Petro 4:8.
Tivonele Eka Ku Onha Van’wana Vito
15. U nga ku hambanisa njhani ku hleva ni ku onha van’wana vito?
15 Leswi ku gungula ku nga vangelaka rihlevo leri nga ni khombo, hi fanele hi tivonela malunghana ni leswi hi swi vulaka. Ku hleva i ku tivulavulela hi vanhu na hi timhaka ta vona. Kambe, ku lumbeta i ku vula mhaka ya mavunwa leyi xikongomelo xa yona ku nga ku onha ndhuma ya munhu un’wana. Ku vulavula ko tano ku bihile naswona a ku fambisani ni ku chava Xikwembu. Hikwalaho Xikwembu xi byele Vaisrayele xi ku: “U nga tshuki u rhendzeleka exikarhi ka vanhu varikwenu hi xikongomelo xa ku onha vito ra van’wana.”—Levhitika 19:16.
16. Xana Pawulo u te yini malunghana ni vanhu van’wana lava a va hleva, naswona ndzayo leyi yi fanele yi hi khumba njhani?
16 Leswi ku tivulavulela ku nga vangaka ku onha van’wana vito, Pawulo u va sole swinene vanhu van’wana lava a va hleva. Endzhaku ko boxa tinoni leti a ti fanelekela ku pfuniwa hi vandlha, u vulavule hi tinoni leti a ti dyondze “ku tshama hi mavoko, ti famba-famba hi tindlu; ina, a ti [nga] tshami hi mavoko ntsena, kambe [a] ti tlhela ti va vahlevi ni ku nghenelela etimhakeni ta vanhu van’wana, ti vulavula hi swilo leswi ti nga fanelangiki ku vulavula ha swona.” (1 Timotiya 5:11-15) Loko wansati la nga Mukreste a kuma leswaku u ni mboyamelo wo vulavula swilo leswi nga endlaka leswaku a onha van’wana vito, u fanele a yingisa ndzayo ya Pawulo yo ‘tiyimisela, a nga vi la lumbetaka.’ (1 Timotiya 3:11) Ina, vavanuna lava nga Vakreste va fanele va tivonela eka rihlevo leri nga ni khombo.—Swivuriso 10:19.
Tshikani Ku Avanyisa!
17, 18. (a) Xana Yesu u vule yini malunghana ni ku tshika ku avanyisa makwerhu? (b) Hi nga ma tirhisa njhani marito ya Yesu malunghana ni ku avanyisa?
17 Hambiloko hi nga lumbeti munhu, hi nga ha boheka ku endla matshalatshala lamakulu leswaku hi papalata ku avanyisa van’wana. Yesu u sole langutelo rero loko a ku: “Tshikani ku avanyisa leswaku mi nga avanyisiwi; hikuva ku avanyisa loku mi avanyisaka ha kona, mi ta avanyisiwa ha kona; naswona xipimo lexi mi pimaka ha xona, va ta mi pimela ha xona. Kutani, ha yini u languta xilavi lexi nga etihlweni ra makwenu, kambe u nga lemuki ntsandza lowu nga etihlweni ra wena? Kumbe, u nga vurisa ku yini eka makwenu u ku, ‘Ndzi pfumelele ndzi susa xilavi etihlweni ra wena’; kasi, waswivo, ku ni ntsandza etihlweni ra wena? Mukanganyisi! Sungula u susa ntsandza etihlweni ra wena n’wini, kutani u ta yi vona kahle ndlela yo susa xilavi etihlweni ra makwenu.”—Matewu 7:1-5.
18 A hi fanelanga hi lava ku susa “xilavi” lexi nga etihlweni ra makwerhu kasi vuswikoti bya hina byo vona kahle byi siviwe hi “ntsandza” wo fanekisela. Entiyisweni, loko hi yi twisisa ndlela leyi Xikwembu xi nga ni tintswalo ha yona, a hi nge avanyisi vamakwerhu. A hi nge swi koti ku va twisisa hi ndlela leyi Tata wa hina wa le tilweni a va twisisaka ha yona. A swi hlamarisi leswi Yesu a hi tsundzuxeke leswaku hi ‘tshika ku avanyisa leswaku hi nga avanyisiwi’! Loko hi swi twisisa kahle leswaku a hi hetisekanga hi ta tshika ku avanyisa hi ndlela leyi Xikwembu xi nga ta yi teka yi ri leyi biheke.
Va Tsanile Kambe Va Xiximeka
19. Hi fanele hi va teka njhani vapfumeri-kulorhi?
19 Loko hi tiyimiserile ku tirhela Xikwembu hi mbilu yin’we ni vapfumeri-kulorhi, a hi nge papalati ku va avanyisa ntsena. Hi ta va lavo rhanga eku va xiximeni. (Varhoma 12:10) Kahle-kahle, hi ta lava leswaku ku pfuneka vona vini hayi hina, naswona hi ta va endlela mintirho ya xiyimo xa le hansi hi ntsako. (Yohane 13:12-17; 1 Vakorinto 10:24) Hi nga wu hlayisa njhani moya wo tano lowunene? Hi ku swi tsundzuka leswaku mupfumeri un’wana ni un’wana i wa risima eka Yehovha nileswaku ha wu lava mpfuno wa yena, tanihi leswi xirho xin’wana ni xin’wana xa miri xi titshegeke hi xin’wana.—1 Vakorinto 12:14-27.
20, 21. Xana marito ya 2 Timotiya 2:20, 21 ma vula yini eka hina?
20 Hakunene, Vakreste i swibya swa vumba leswi nga tiyangiki leswi nyikiweke xuma xo kwetsima xa vutirheli. (2 Vakorinto 4:7) Loko hi ta endla ntirho lowu wo kwetsima leswaku ku dzunisiwa Yehovha, hi fanele hi va ni xiyimo lexi xiximekaka emahlweni ka yena ni N’wana wa yena. Loko hi tshama hi tengile emahanyelweni ni le moyeni hi ta tshama hi ri swibya leswi xiximekaka leswi nga tirhisiwaka hi Xikwembu. Emhakeni leyi Pawulo u tsarile: “Endlwini leyikulu a ku na swibya swa nsuku ni swa silivhere ntsena kambe ni leswi vatliweke hi ntsandza ni swa vumba, swin’wana i swa xikongomelo lexi xiximekaka kambe swin’wanyana i swa xikongomelo lexi nga xiximekiki. Hikokwalaho, loko munhu a papalata leswo hetelela, u ta va xibya xa xikongomelo xo xiximeka, xo kwetsima, lexi nga mpfuno eka n’wini wa xona, lexi lunghekeleke ntirho wun’wana ni wun’wana lowunene.”—2 Timotiya 2:20, 21.
21 Vanhu lava nga hanyiki hi ku pfumelelana ni swilaveko swa Xikwembu i ‘swibya leswi nga xiximekiki.’ Hambiswiritano, loko hi hanya hi ku chava Xikwembu hi ta va ‘swibya swa xikongomelo xo xiximeka, swo kwetsima, kumbe leswi hlawuriweke, leswaku swi endla ntirho wa Yehovha naswona swi lunghekele ntirho wun’wana ni wun’wana lowunene.’ Kutani swi fanerile leswaku hi vutisa: ‘Xana mina ndzi “xibya lexi xiximekaka”? Xana ndzi ni nkucetelo lowunene eka vapfumeri-kulorhi? Xana ndzi xirho xa vandlha lexi tirhaka hi mbilu yin’we ni vapfumeri-kulorhi?’
Hambetani Mi Tirha Hi Mbilu Yin’we
22. Xana vandlha ra Vukreste ri nga fanisiwa na yini?
22 Vandlha ra Vukreste ri fana ni ndyangu. Loko swirho hinkwaswo swa ndyangu swi gandzela Yehovha, ku va ni moya wa rirhandzu, wo pfunana ni lowu tsakisaka. Endyangwini ku nga ha va ku ri ni vanhu vo hlayanyana lava nga ni vumunhu byo hambana-hambana, kambe un’wana ni un’wana u ni xiyimo xa yena lexi xiximekaka. Xiyimo lexi xa yelana ni xa le vandlheni. Hambileswi hinkwerhu ka hina hi hambaneke—naswona hi nga hetisekangiki—Xikwembu xi hi kokele eka xona ha Kreste. (Yohane 6:44; 14:6) Yehovha na Yesu va hi rhandza, naswona tanihi ndyangu lowu nga ni vun’we, hi fanele hi rhandzana.—1 Yohane 4:7-11.
23. I yini lexi hi faneleke hi xi tsundzuka naswona hi fanele hi tiyimisela ku endla yini?
23 Nakambe vandlha ra Vukreste leri fanaka ni ndyangu i ndhawu leyi hi nga langutelaka leswaku ku va ni vanhu lava tshembekaka. Muapostola Pawulo u tsarile: “Ndzi navela leswaku endhawini yin’wana ni yin’wana vavanuna va hambeta va khongela, va tlakusa mavoko lama tshembekeke, ku nga ri hi vukarhi ni minjhekanjhekisano.” (1 Timotiya 2:8) Xisweswo Pawulo u hlanganise ku tshembeka ni xikhongelo xa le rivaleni “endhawini yin’wana ni yin’wana” laha Vakreste va hlengeletanaka kona. I vavanuna lava tshembekaka ntsena lava faneleke va yimela vandlha hi xikhongelo. Ina, Xikwembu xi langutele leswaku hi tshembeka eka xona ni le ka vapfumeri-kulorhi. (Eklesiasta 12:13, 14) Hikwalaho, a hi tiyimiseleni ku tirha hi vun’we, ku fana ni swirho swa miri wa munhu. Onge hi nga tlhela hi tirha hi vun’we tanihi xiphemu xa ndyangu wa vagandzeri va Yehovha. Ku tlula kwalaho, a hi tsundzukeni leswaku ha wu lava mpfuno wa vamakwerhu naswona Yehovha u ta hi tsakela a tlhela a hi katekisa loko hi hambeta hi n’wi tirhela hi mbilu yin’we.
A Wu Ta Hlamurisa Ku Yini?
• I yini lexi endlaka leswaku vanhu va Yehovha va n’wi tirhela hi mbilu yin’we?
• Ha yini Vakreste va papalata xihlawuhlawu?
• Xana u nga ku swi hoxe kwihi ku gungula?
• Ha yini hi fanele hi fundzha vapfumeri-kulorhi?
[Swivutiso Swa Dyondzo]
[Xifaniso lexi nga eka tluka 15]
Petro u swi xiyile leswaku “Xikwembu a xi yi hi nghohe”
[Xifaniso lexi nga eka tluka 16]
Xana wa swi tiva leswaku ha yini Xikwembu xi khomise Meriyamu tingana?
[Xifaniso lexi nga eka tluka 18]
Vakreste lava tshembekaka va tirhela Yehovha hi mbilu yin’we va tsakile