Mintirho Leyi Khutazaka Mahanyelo Lamanene

Eku heleni ka 2001, lava pfuleleke xitichi xa xiya-ni-moya xa tiko lexi vuriwaka Radio Mozambique va twe xitiviso lexi:

“Muungameri wa Riphabliki leri u endzele rhavi ra Timbhoni ta Yehovha eMaputo. U khutaze vanhu va vukhongeri lebyi leswaku va ya emahlweni ni mintirho ya vona leyi khutazaka mahanyelo lamanene emindyangwini swin’we ni minongonoko ya vona yo dyondzisa lavakulu ku hlaya ni ku tsala. Minongonoko leyi yo dyondzisa se yi pfune vanhu va kwalomu ka 10 000. Hi ku ya hi Muungameri Chissano, minongonoko yo fana ni leyi yi fanele yi ndhundhuzeriwa, hikuva yi hoxa xandla eku lulamiseni ka swiphiqo swa dyondzo leswi vanhu va tiko leri va langutaneke na swona.”

Eka xitiviso lexi ku nghenisiwe marito lama rhekhodiweke ya muungameri loko a ri karhi a vulavula a ku: “Swa hi khutaza swinene ku vona leswaku vanhu vo tala va swi tsakela ku dyondza ku hlaya ni ku tsala. Leswi swi hi endla hi vona leswaku vaaka-tiko va ta hi pfuna ku engetela nhlayo ya vanhu lava kotaka ku hlaya ni ku tsala. Hikwalaho, ndzi khutaza Timbhoni ta Yehovha leswaku ti ya emahlweni ni minongonoko ya tona yo dyondzisa vanhu ku hlaya ni ku tsala hi tindzimi hinkwato. Lexi nga xa nkoka swinene hileswaku vanhu va kota ku hlaya ni ku tsala ni leswaku va swi kota ku tsalelana ni vanhu van’wana, naswona enkarhini lowu taka va ta hoxa xandla etimhakeni ta dyondzo.”

Timbhoni ta Yehovha eMozambhiki ti dyondzisa vanhu ku hlaya ni ku tsala etindhawini ta 850 etikweni hinkwaro leswaku va ta kota ku tihlayela Rito ra Xikwembu hi voxe. Ku engetela kwalaho, va fambisa tidyondzo ta Bibele ta le kaya, ta mahala ta kwalomu ka 50 000 vhiki rin’wana ni rin’wana. Lexi i xiphemu xa nongonoko wa misava hinkwayo wo dyondzisa Bibele, lowu sweswi wu endliwaka ematikweni ya 235. (Matewu 24:14) Na wena u nga vuyeriwa eka nongonoko lowu. Hi kombela u titwa u ntshunxekile ku vulavurisana ni Timbhoni ta Yehovha endhawini ya ka n’wina.