“Tanani Eka Mina, . . . Ndzi Ta Mi Phyuphyisa”

“Risani Ntlhambi Wa Xikwembu”

“Minkarhi hinkwayo mi tshama mi lunghekele ku yingisa ni ku hi khutaza hi marito lama humaka eBibeleni.”—Pamela.

“Hi nkhensa hinkwaswo leswi mi hi endlelaka swona. Swi hi pfuna swinene.”—Robert.

PAMELA na Robert va susumeteleke ku tsala marito lawa ya ku tlangela va ma tsalela vakulu lava nga Vakreste emavandlheni ya ka vona. Van’wana exikarhi ka malandza ya Xikwembu emisaveni hinkwayo na vona va wu tlangela nseketelo lowu tshamaka wu ri kona swin’we ni nseketelo lowu va wu kumaka eka lava va ‘risaka ntlhambi wa Xikwembu.’ (1 Petro 5:2) Kunene, vanhu va Yehovha va swi tlangela swilo swo tala leswi vakulu va va endlelaka swona ni ndlela leyi va swi endlaka ha yona.

“Mi Va Ni Swo Tala Swo Swi Endla”

Vakulu lava nga Vakreste va nyikiwe vutihlamuleri byo tala. (Luka 12:48) Va lunghiselela tinkulumo leti va nga ta ti nyikela eminhlanganweni ya vandlha va tlhela va hlanganyela eku chumayeleni ka mahungu lamanene ya Mfumo wa Xikwembu. Vutihlamuleri bya vona byi katsa ku endla maendzo ya vurisi eka vapfumeri-kulobye. Vakulu va tirhisa nkarhi wa vona eka lava va lavaka nyingiso wo hlawuleka—lava dyuhaleke ni van’wana—kambe a va byi honisi vuhlayiseki bya moya ni bya nyama bya mindyangu ya vona. (Yobo 29:12-15; 1 Timotiya 3:4, 5; 5:8) Vakulu van’wana va pfuneta eku akiweni ka Tiholo ta Mfumo. Van’wana va tirha eka Tikomiti to Vulavurisana ni Swibedlhele kumbe i swirho swa Mintlawa leyi Endzelaka Vavabyi. Naswona vo tala va vona va endla ntirho wo tirhandzela etinhlengeletanweni ni le mintsombanweni. Ina, vakulu va ni “swo tala swo swi endla entirhweni wa Hosi.” (1 Vakorinto 15:58) A swi hlamarisi leswi vakulu vo tano lava tirhaka hi matimba va tlangeriwaka swinene hi lava va va khathalelaka!—1 Vatesalonika 5:12, 13.

Vakulu lava nkarhi na nkarhi va endzelaka Vakreste-kulobye ekaya kumbe kun’wana leswaku va va tiyisa hi tlhelo ra moya i xihlovo xa xikhutazo. Thomas, loyi a kuleke a nga ri na tatana ekaya u te: “Loko a ndzi nga kumanga nseketelo wa rirhandzu ni xikhutazo xa vakulu, a ndzi tshembi leswaku a ndzi ta va ndzi tirhela Yehovha ndzi ri mutirheli wa nkarhi hinkwawo namuntlha.” Vantshwa vo tala lava kuriseriweke emindyangwini ya mutswari un’we va pfumela leswaku nyingiso lowu va wu kumeke eka vakulu wu va pfunile leswaku va va ni vuxaka ni Xikwembu.

Ni vanhu lavakulu va ma tlangela swinene maendzo ya vurisi lama endliwaka evandlheni. Endzhaku ka loko mpatswa lowu nga varhumiwa lowu nga ni malembe ya va-80 wu endzeriwe hi vakulu vambirhi, wu tsarile: “Ha ri tlangela swinene riendzo ra  n’wina leri chavelelaka. Loko mi ta va mi fambile, hi tlhele hi hlaya matsalwa lawa mi hi hlayeleke wona. A hi nge ma rivali marito ya n’wina lama khutazaka.” Noni leyi nga ni malembe ya 70 yi tsalele vakulu yi ku: “A ndzi ri karhi ndzi khongela eka Yehovha ndzi kombela mpfuno, kutani u rhumele n’wina vamakwerhu vambirhi laha kaya. Riendzo ra n’wina a ri ri nkateko lowu humaka eka Yehovha!” Xana u vuyeriwile sweswinyana loko u endzeriwe hi vakulu va le vandlheni ra ka n’wina? Entiyisweni, hinkwerhu ha ma tlangela matshalatshala yo risa ntlhambi lowu khathaleriwaka hi vona!

Varisi Lava Tekelelaka Xikwembu Na Kreste

Yehovha i Murisi la nga ni rirhandzu. (Pisalema 23:1-4; Yeremiya 31:10; 1 Petro 2:25) Yesu Kreste na yena i Murisi la hlamarisaka la khathalelaka swilaveko swa hina swa moya. Entiyisweni, u vitaniwa “murisi lonene” ni “murisi lonkulu.” (Yohane 10:11; Vaheveru 13:20; 1 Petro 5:4) Xana Yesu u va khome njhani lava a va lava ku va vadyondzisiwa va yena? U va rhambe hi rirhandzu a ku: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa.”—Matewu 11:28.

Hilaha ku fanaka, namuntlha vakulu va lwela ku va xihlovo xa ku phyuphya ni nsirhelelo eka ntlhambi. Vavanuna volavo i “ndhawu ya ku tifihla emhehweni ni vutumbelo exidzedzeni, ku fana ni swinambyana swa mati etikweni leri nga riki na mati, ku fana ni ndzhuti wa ribye lerikulu etikweni leri omeke.” (Esaya 32:2) Vasirheleri vo tano va phyuphyisa, va xiximiwa hi ntlhambi naswona va tsakeriwa hi Xikwembu.—Vafilipiya 2:29; 1 Timotiya 5:17.

Nseketelo Wa Nkoka Wa Vavasati Va Vona

Vanhu va Xikwembu va va tlangela vakulu lava nga Vakreste swin’we ni nseketelo wa rirhandzu lowu vavanuna lava va wu kumaka eka vavasati va vona. Leswaku vavasati lava va va seketela hakanyingi swi lava leswaku va titsona swo karhi. Minkarhi yin’wana, va va va ri ekaya loko vavanuna va vona va khomekile hi timhaka tin’wana ta vandlha kumbe loko va ri karhi va endla maendzo ya vurisi. Minkarhi yin’wana ku laveka leswaku swilo leswi kunguhatiweke khale swi cinciwa hikwalaho ka leswi ku veke ni xiphiqo xa xihatla evandlheni. Michelle u ri: “Hambiswiritano, loko ndzi vona ndlela leyi nuna wa mina a khomekeke ha yona hi ku lunghiselela minhlangano kumbe hi ku endla maendzo ya vurisi, ndzi tibyela leswaku u endla ntirho wa Yehovha naswona ndzi ringeta ku n’wi seketela hilaha ndzi nga kotaka hakona.”

Cheryl, loyi na yena a tekiweke hi nkulu, u te: “Ndza swi tiva leswaku vamakwerhu evandlheni va swi lava ku va ni vakulu lava nga tiphofulaka eka vona, naswona ndzi lava leswaku va titwa va ntshunxekile ku ta eka nuna wa mina nkarhi wihi na wihi.” Vavasati lava khathalaka, vo tanihi Michelle na Cheryl, va titsona swilo swo karhi hi ku tirhandzela leswaku vanuna va vona va ta khathalela tinyimpfu ta Xikwembu. Vavasati va vakulu va tlangeriwa hikwalaho ka nseketelo wa vona.

Kambe nkulu la khomekeke a nga fanelanga a honisa swilaveko swa moya ni swin’wana swa nsati wa yena ni vana va yena. Nkulu la nga ni nsati u fanele a “[pfumala] xihehlo, nuna wa nsati un’we, a ri ni vana lava pfumelaka lava nga hehliwiki hi manyala ni ku nga lawuleki.” (Tito 1:6) U fanele a khathalela ndyangu wa yena hi ndlela leyi Matsalwa ma vulaka ha yona leswaku valanguteri lava nga Vakreste va fanele va khathalela mindyangu ya vona ha yona.—1 Timotiya 3:1-7.

Eka nkulu la khomekeke ngopfu, nsati la n’wi seketelaka i wa risima swinene! Yoleyo i ndlela leyi vakulu lava anakanyelaka naswona va nga ni vasati va titwaka ha yona. Swi hilaha Bibele yi vulaka hakona: “Xana u kona la kumeke nsati lonene? Munhu yoloye u kume nchumu lowunene.” (Swivuriso 18:22) Vakulu vo tano va tlangela vavasati va vona swi huma embilwini, va swi vula hi marito na hi swiendlo. Ku engetela eka ku khongela swin’we hi mbilu hinkwayo ni ku va ni dyondzo leyi tsakisaka, mimpatswa leyi ya Vakreste yi tivekela nkarhi wa ku tiphina hi swilo swo tanihi ku famba-famba eribuweni, ku tifamba-fambela enhoveni ni ku ya biwa hi moya ephakeni. Ina, vakulu va swi tsakela ku khathalela vavasati va vona hi rirhandzu.—1 Petro 3:7.

Vakulu lava risaka ntlhambi wa Xikwembu hi ku swi rhandza i xihlovo xa ku phyuphya ka moya eka vanhu va Yehovha. Hakunene i “tinyiko leti nga vanhu,” i nkateko evandlheni!—Vaefesa 4:8, 11-13.