Ku Dyela eTafuleni Ra Mufambisi Wa Xikepe

VANHU lava tsakisaka, swakudya swo nandziha ni mabulo lamanene swi endla leswaku ku dyela etafuleni ra mufambisi wa xikepe swi tsakisa. Kambe leswi ku buriweke ha swona etafuleni ra Robert G. Smith Mufambisi wa xikepe xa White Star Line, swi tise ku vonakala ka swakudya swa moya.—Esaya 25:6.

Hi 1894, loko Robert a ri ni malembe ya 24, u fambise xikepe xa Kinclune of Dundee a teka riendzo ra yena ro sungula ro rhendzeleka ni misava hinkwayo. Endzhakunyana u ve mufambisi wa swikepe swa ka White Star, swo tanihi Cedric, Cevic na Runic. * Loko a ri karhi a tsemakanya lwandle ra Atlantic a suka eNew York a ya eLiverpool, le Nghilandhi, eka xin’wana xa swikepe leswi, Robert a a tshame na Charles Taze Russell. Bulo ra Russell ri endle leswaku Robert a tsakela rungula ra Bibele, naswona u teke tikopi ta Studies in the Scriptures eka Russell leswaku a ta dyondza leswi engetelekeke.

Russell u tsalelane na yena, xisweswo Robert u ye a ri tsakela swinene rungula ra Bibele. Robert u byele nsati wakwe hi swilo leswintshwa leswi a swi dyondzeke. A swi tekanga nkarhi leswaku va va Swichudeni swa Bibele leswi hisekaka, hilaha Timbhoni ta Yehovha a ti vitaniwa hakona. Endzhakunyana Robert u ve ni lunghelo ro nyikela tinkulumo ta Bibele. Hi xikombiso, le Brisbane eAustralia, u vulavule hi “Balsama ya le Gilead” a kombisa ndlela leyi Rito ra Xikwembu ri tameleke rungula leri nga “ntlhantlho wa swiphiqo hinkwaswo swa misava.” Le Nghilandhi, nsati wakwe ni vana va vona lavatsongo va pfunetile eku kombiseni ka “Photo-Drama of Creation,” va tlanga tirhekhodo leti Russell a a hlamusela loko ku ri karhi ku kombisiwa tislaydi.

Robert u yi hundzisele eka vana va yena ndzhaka ya ntiyiso wa Mfumo leyi a yi kumeke. Namuntlha, switukulwana swa vuntlhanu, ku nga swirho swa 18 swa ndyangu wakwe swi karhi swi avelana mahungu lamanene ni van’wana, hinkwaswo swi tlangela leswi ku buriweke ha swona etafuleni ra mufambisi wa xikepe.

Hi ku tirhisa tibuku ta tona ni ntirho wa tona wo dyondzisa Bibele, Timbhoni ta Yehovha ti pfuna vanhu emisaveni hinkwayo ku dyondza rungula ra Bibele leri pfuxeke ku tsakela ka Smith Mufambisi wa xikepe. Na wena u ta twa leswaku i yini leswi a swi tsakisa loko ku ri karhi ku dyiwa etafuleni ra mufambisi wa xikepe.

[Nhlamuselo ya le hansi]

[Xifaniso lexi nga eka tluka 8]

Robert G. Smith

[Xifaniso lexi nga eka tluka 8]

Charles T. Russell