Ku Nyikela U Sala U Nga Ha Ri Na Nchumu

“HAMBI wo ndzi vitana mukomberi; a ndzi na mhaka na swona. Ndzi kombelela Yesu.” Marito wolawo lama paluxaka timhaka lama vuriweke hi mufundhisi wa Protestente, ma kandziyisa njhekanjhekisano lowu nga kona emhakeni ya ku hakelela swilo swa vukhongeri. Vukhongeri lebyikulu byi tikomba byi kota ku ya emahlweni loko ntsena byi kuma mali yo tala. Ku fanele ku hakeriwa miholo, ku fanele ku akiwa titempele ti tlhela ti khathaleriwa, ku fanele ku hakeleriwa matsima yo chumayela. Xana mali leyi yi ta kumeka kwihi?

Etikerekeni to tala yi kumeka loko ku humesiwa vukhume. * Norman Robertson muvuri wa evhangheli u ri: “Ku humesa vukhume i ndlela ya Xikwembu yo hakelela mfumo wa Xona emisaveni. I fambiselo ra Xona ra timali leri endlaka leswaku Evhangheli yi chumayeriwa.” Loko a tsundzuxa valandzeri va yena hi xivindzi, malunghana ni vutihlamuleri bya vona byo nyika, u ri: ‘Ku humesa vukhume a hi nchumu lowu u wu endlaka hikwalaho ka leswi u swi kotaka. Swi kombisa ku yingisa. Loko u nga humesi vukhume swi le rivaleni leswaku u tlula swileriso swa Xikwembu. I ku yiva.’—Tithing—God’s Financial Plan.

Kumbexana wa pfumela leswaku ku nyika ku fanele ku va xiphemu xa vugandzeri bya Vukreste. Hambiswiritano, xana loko ku tshama ku ri karhi ku komberiwa mali swa ku karhata kumbexana swa ku nyenyetsa? Inácio Strieder mufundhisi wa le Brazil u sola tikereke hileswi ti tirhisaka vukhume leswaku ti “tlhantlha swiphiqo swa tona” naswona u vula leswaku mikhuva yoleyo “a yi le nawini, i ya tihanyi naswona i ku hambuka ka vafundhisi.” U vula leswaku vuyelo bya kona hileswaku “vanhu lava nga tirhiki, tinoni, lava tshamaka eswidakanini ni lava va nga ehleketiki kahle va gimeta hileswaku Xikwembu xi va fularherile nileswaku va boheka ku nyika ‘muchumayeri’ mali yo karhi lerova mindyangu ya vona yi sala yi pfumala ni swakudya.”

U nga ha tivutisa: ‘Xana tikereke leti sindzisaka leswaku ku humesiwa vukhume ti ma tirhisa kahle Matsalwa? Kumbe xana vukhongeri byin’wana byi dyelela ntlhambi byi wu byela leswaku wu ta xupuriwa hi Xikwembu? Entiyisweni, xana Xikwembu xi lava leswaku hi nyikela ku tlula leswi hi nga na swona, hilaha van’wana va vulaka hakona?’

[Nhlamuselo ya le hansi]