Nkarhi Lowu Tsakisaka Swinene Wo Hanya Eka Wona

LOKO u koka exilogweni, xana u sungula ku navela masiku ya khale, swilo swa ha ku fambela khwatsi? Loko swi ri tano, xiya marito ya Hosi Solomoni wo tlhariha: “U nga vuli u ku: ‘Swi endlekisa ku yini leswaku masiku yo sungula ma antswa ku tlula lawa?’ hikuva leswi a wu swi vutisanga hi vutlhari.”—Eklesiasta 7:10.

Ha yini Solomoni a nyikela ndzayo leyi? Hikuva a a swi tiva leswaku ku va ni langutelo ra xiviri hi swilo swa nkarhi lowu hundzeke swi pfuna swinene leswaku munhu a kota ku langutana ni swiyimo leswi nga tsakisiki swa sweswi, hi ndlela leyi humelelaka. Lava va navelaka ta khale ka vona va nga ha rivala leswaku masiku wolawo na wona a ma tele hi swiphiqo ni maxangu naswona vutomi a byi nga tsakisi. Swi nga ha endleka leswaku swilo swin’wana swa nkarhi lowu nga hundza a swi antswa, kambe swo tala a swi nga ri swinene. Hilaha Solomoni a swi xiyeke hakona, a swi pfuni nchumu ku tshama u ri karhi u anakanya hi swilo swa nkarhi lowu hundzeke, hikuva tolo a nga ha vuyi.

Xana swi nga va ni khombo ku navela swilo wa nkarhi lowu hundzeke? Ina, swi nga va ni khombo loko swi hi endla hi nga lavi ku hanya hi ku pfumelelana ni swiyimo swa sweswi kumbe loko swi hi sivela ku tlangela minkarhi leyi hi hanyaka eka yona swin’we ni ntshembo lowu hi nga vaka na wona.

Entiyisweni, swi tsakisa swinene ku hanya enkarhini lowu, hambiloko ku ri ni swiphiqo swo tala emisaveni. Ha yini? Hikuva hi le kusuhi ni ku hetiseka ka xikongomelo xa Xikwembu hi misava ya hina ni ku kuma mikateko leyi nga ta ta ni Mfumo wa xona wa ku rhula. Bibele ya tshembisa: “Xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlavutelo 21:4) Kutani loko swiyimo swi ta va se swi ri swinene hi ndlela leyi, ku hava ni un’we loyi a nga ta va ni xivangelo xo navela ta khale ka yena.