Swivutiso Swa Vahlayi

Xana hi fanele hi gimeta hi leswaku ku ta va ni nhlayo leyikulu ya vanhu lava nga ta hambukisiwa hi Sathana eka ndzingo wo hetelela hilaha Nhlavutelo 20:8 yi vulaka hakona?

Nhlavutelo 20:8 yi hlamusela nhlaselo wo hetelela wa Sathana eka vanhu lava hanyaka emisaveni emakumu ka gidi ra malembe ra Mfumo wa Mesiya. Loko yi vulavula hi Sathana, ndzimana leyi yi ri: “U ta huma a ya hambukisa matiko lama nga etinhleni ta mune ta misava, yena Gogo na Magogo, leswaku a ma hlengeletela nyimpi. Nhlayo ya vona a yi kotisa sava ra lwandle.”

Hambileswi sayense yi endlaka switirhisiwa leswi rharhanganeke swinene, kambe nhlayo ya “sava ra lwandle” a yi si tiviwa ni sweswi. Xisweswo ku nga ha vuriwa leswaku xiga lexi xi yimela nhlayo leyi nga tivekiki, leyi nga pimiwangiki. Kambe xana xiga lexi xi vula nhlayo leyikulu ku tlurisa, leyi nga hlayekiki kumbe xi vula nhlayo leyi nga tiviwiki kambe leyi nga yikulu hi ndlela leyi nga hlayekaka?

EBibeleni, xiga lexi nge “yi kotisa sava ra lwandle” xi tirhisiwa hi tindlela to tala. Hi xikombiso, eka Genesa 41:49 ha hlaya: “Yosefa a hambeta a hlengeleta mavele yo tala ngopfu, a ma tele kukota sava ra lwandle ku fikela loko eku heteleleni va tshika ku ma hlaya, hikuva a ma nga ha hlayeki.” Laha ku kandziyisiwa leswaku a ma nga hlayeki. Hilaha ku fanaka Yehovha u te: “Tanihi leswi vuthu ra le matilweni ri nga hlayekiki, nileswi sava ra lwandle ri nga pimekiki, hikwalaho ndzi ta andzisa mbewu ya Davhida nandza wa mina.” Tanihi leswi hakunene tinyeleti ta le tilweni ni sava ra lwandle swi nga hlayekiki, kunene Yehovha u hetisise xitshembiso xa yena eka Davhida.—Yeremiya 33:22.

Hakanyingi xiga lexi nge “sava ra lwandle” xi kombetela eka swilo leswi teleke swinene. Vaisrayele eGiligala a va chuhile swinene loko va vona vuthu ra Vafilista leri a ri hlengeletane eMikimaxi, leri “[a ri tele] kukota swiribyana swa sava leswi nga eribuweni ra lwandle.” (1 Samuwele 13:5, 6; Vaavanyisi 7:12) Kutani “Xikwembu xi ya emahlweni xi nyika Solomoni vutlhari ni ku twisisa hi mpimo lowukulu ni mbilu leyi pfulekeke, ku fana ni sava leri nga eribuweni ra lwandle.” (1 Tihosi 4:29) Hambileswi swilo leswi ku vulavuriweke ha swona laha a swi tele, a swi hlayeka naswona a swi pimeka.

“Sava ra lwandle” ri nga ha yimela nhlayo leyi nga tiviwiki, ku nga ri vukulu bya yona. Yehovha u byele Abrahama a ku: “Ndzi [ta] andzisa mbewu ya wena ku fana ni tinyeleti ta matilo ni ku fana ni swiribyana swa sava leri nga eribuweni ra lwandle.” (Genesa 22:17) Loko a phindha xitshembiso lexi eka Yakobe ntukulu wa Abrahama, Yehovha u tirhise xiga lexi nge “ntshuri wa misava” lexi Yakobe a xi vuleke “swiribyana swa sava ra lwandle.” (Genesa 28:14; 32:12) Loko nkarhi wu ya wu ri karhi wu famba, “mbewu” ya Abrahama yi ve nhlayo ya 144 000, loko ku nga katsiwi na Yesu Kreste, leyi Yesu a yi vitaneke “ntlhambinyana.”—Luka 12:32; Vagalatiya 3:16, 29; Nhlavutelo 7:4; 14:1, 3.

Hi dyondza yini eka swikombiso leswi? Hi dyondza leswaku xiga lexi nge ku “kotisa sava ra lwandle” a hi minkarhi hinkwayo xi vulaka nchumu lowu nga pimekiki, nhlayo leyi nga hlayekiki; naswona a hi minkarhi hinkwayo xi tirhiseriwaka ku hlamusela nchumu lowukulu kumbe mpimo lowu hlamarisaka. Hakanyingi xi vula nhlayo leyi nga tivekiki kambe leyi swi kotekaka ku yi hlaya. Xisweswo, swa twisiseka ku pfumela leswaku ntshungu lowu nga ta xandzuka wu seketela Sathana loko a hlasela vanhu va Xikwembu ro hetelela, a wu nge vi lowu nga hlayekiki, kambe wu ta va wukulu lerova wu nga va nxungeto. Hambiswiritano, nhlayo ya kona a yi tiveki ni sweswi.