Tiyisani Mavoko Ya N’wina

EBIBELENI voko ri boxiwa minkarhi yo tlula 1 800. Eka ririmi ra Xiheveru swivulavulelo leswi katsaka voko swi tirhisiwa hi tindlela to hambana-hambana. Hi xikombiso, ku va ni voko leri baseke swi vula ku pfumala nandzu. (2 Samuwele 22:21; Pisalema 24:3, 4) Ku pfula voko swi vula ku hanana. (Deteronoma 15:11; Pisalema 145:16) Loyi a vekaka vutomi bya yena ekhombyeni ku vuriwa leswaku u veka moya-xiviri wa yena evokweni rakwe. (1 Samuwele 19:5) Ku tshika mavoko ma lenga swi vula ku hela matimba. (2 Tikronika 15:7) Kutani ku tiyisa mavoko swi vula ku tiyimisela ni ku lunghekela ku endla xo karhi.—1 Samuwele 23:16.

Namuntlha ku ni xilaveko xa xihatla xo tiyisa mavoko ya hina kumbe xa ku tshama hi lunghekile. Hi hanya “[eminkarhini] ya mangava leyi swi nonon’hwaka ku langutana na yona.” (2 Timotiya 3:1) Loko munhu a karhatekile, hakanyingi u hela matimba, a nga tiyimiseli ku endla nchumu. Swi tolovelekile ku vona vantshwa va tshika xikolo, vavanuna va siya mindyangu ya vona ni vamanana va cukumeta vana va vona. Tanihi Vakreste, hi fanele hi tiyisa mavoko ya hina leswaku hi kota ku tiyisela miringo leyi hi langutanaka na yona entirhweni wa Xikwembu. (Matewu 24:13) Loko hi endla tano, hi tsakisa mbilu ya Yehovha.—Swivuriso 27:11.

Ndlela Leyi Mavoko Ma Tiyisiwaka Ha Yona

Vayuda va le sikwini ra Ezra a va fanele va tiyisa mavoko ya vona leswaku va kota ku heta ku aka tempele ya Yehovha eYerusalema. Xana mavoko ya vona ma tiyisiwe njhani? Rungula ra kona ri ri: “Va famba va ya endla nkhuvo wa swinkwa leswo-ke-comela masiku ya nkombo hi ku tsaka; hikuva Yehovha u va vangele ku tsaka, naswona u hundzuluxele mbilu ya hosi ya Asiriya eka vona leswaku yi tiyisa mavoko ya vona entirhweni wa yindlu ya Xikwembu xa ntiyiso, Xikwembu xa Israyele.” (Ezra 6:22) Swi le rivaleni leswaku Yehovha u tirhise matimba ya yena lama tirhaka leswaku a endla “hosi ya Asiriya” yi pfumelela vanhu va Xikwembu leswaku va tlhelela etikweni ra rikwavo, naswona U tlhele a endla vanhu leswaku va hisekela ku hetisa ntirho lowu va wu sunguleke.

Endzhakunyana, loko marhangu ya Yerusalema ma lava ku lunghisiwa, Nehemiya u tiyise mavoko ya vamakwavo leswaku va kota ku endla ntirho lowu. Ha hlaya: “Ndzi [hambete] ndzi va byela hi voko ra Xikwembu xanga, ndlela leyi a swi ri swinene ha yona ni marito lawa hosi yi ndzi byeleke wona. Hiloko va ku: ‘A hi sukeni hi yima, hi fanele hi aka.’ Kutani va tiyisa mavoko ya vona leswaku va endla ntirho lowunene.” Leswi a va tiyisiwe mavoko, Nehemiya ni Vayuda-kulobye va swi kotile ku pfuxeta marhangu ya Yerusalema hi masiku ya 52 ntsena!—Nehemiya 2:18; 6:9, 15.

Hilaha ku fanaka, Yehovha u hi nyika matimba leswaku hi chumayela mahungu lamanene ya Mfumo. (Matewu 24:14) U hi nyika matimba hi ku hi ‘hlomisa hi xilo xin’wana ni xin’wana lexinene leswaku hi endla ku rhandza ka yena.’ (Vaheveru 13:21) U hi nyike switirho swa xiyimo xa le henhla. Hi na Bibele ni tibuku leti sekeriweke eBibeleni, timagazini, tibroxara, swiphephana, ni tikhasete ta  thepi ni ta vhidiyo, leswi hi swi tirhisaka ku fikelela vanhu emisaveni hinkwayo. Kahle-kahle, tibuku ta hina ti kumeka hi tindzimi to tlula 380. Ku engetela kwalaho, Yehovha wa hi dyondzisa hi ku tirhisa minhlangano ya vandlha, tinhlengeletano ni mintsombano, a tlhela a hi dyondzisa ndlela yo tirhisa switirho leswi leswinene, leswaku hi hetisisa vutirheli bya hina.

Hambileswi Yehovha a hi tiyisaka hi tindlela leti to tala, u langutele leswaku na hina hi tikarhata. Tsundzuka leswi muprofeta Elixa a swi byeleke Hosi Yehowaxi, loyi a nga ta eka Elixa a ta lava mpfuno leswaku a lwa ni Vasiriya lava n’wi hlaselaka. Elixa u byele hosi leswaku yi teka miseve yi copa ehansi emisaveni. Rungula ra Bibele ri ri: “A tlhava kanharhu a tshika. Munhu wa Xikwembu xa ntiyiso a n’wi hlundzukela; hikwalaho a ku: ‘A wu fanele u tlhave kantlhanu kumbe katsevu! Emhakeni yoleyo a wu ta hlasela Siriya ku ya emakumu, kambe sweswi u ta hlasela Siriya kanharhu.’” (2 Tihosi 13:18, 19) Leswi a tsandzekeke ku chivirika, Yehowaxi a a nga ta va hlula hi ku helela Vasiriya.

Nsinya wa nawu lowu fanaka wa tirha ni le ka hina loko hi lava ku hetisisa leswi Yehovha a hi leriseke leswaku hi swi endla. Ematshan’weni yo karhateka hi swihinga leswi nga endleleni ya hina kumbe hi ndlela leyi xiavelo xa hina xi tikaka ha yona, hi fanele hi xi endla hi ku hiseka ni hi mbilu hinkwayo. Hi fanele hi tiya hi titshega hi mpfuno wa Yehovha.—Esaya 35:3, 4.

Yehovha U Ta Hi Tiyisa

Yehovha a nga ka a nga tsandzeki ku hi pfuna ni ku hi tiyisa leswaku hi endla ku rhandza ka yena. Kambe, Xikwembu a xi nge endli singita, xi hi endlela swilo hinkwaswo. Xi langutele leswaku na hina hi endla xiphemu xa hina—hi hlaya Bibele siku ni siku, hi lunghiselela minhlangano nkarhi na nkarhi, hi tlhela hi va kona eminhlanganweni, hi hlanganyela entirhweni wa nsimu hilaha hi nga kotaka hakona ni ku khongela nkarhi hinkwawo. Loko hi endla xiphemu xa hina hi ku tshembeka hi ri karhi hi gingiriteka loko ha ha ri ni nkarhi, Yehovha u ta hi nyika matimba yo endla leswi a swi languteleke eka hina.—Vafilipiya 4:13.

Xiya mhaka ya Mukreste un’wana loyi nsati wakwe swin’we ni mana wakwe, va feke hi lembe rin’we. Loko a ha ku i switsongo, hiloko jaha rakwe ri thariwa hi nsati wa rona, nsati loyi a tlhela a tshika ndlela ya Vukreste. Makwerhu loyi u te: “Ndzi swi vonile leswaku a hi swi koti ku tihlawulela miringo, ni nkarhi lowu hi lavaka yi humelela ha wona.” Xana u ma kuma kwihi matimba yo langutana na yona? “Xikhongelo ni dyondzo ya munhu hi xiyexe, swi fane ni mati hi nkarhi wa dyandza eka mina. Ni nseketelo wa vamakwerhu va moya wu ndzi chavelerile swinene. Ku tlula kwalaho, ndzi xiye leswaku i swa nkoka ku hlakulela vuxaka lebyinene na Yehovha ku nga si fika swiyimo swo tika.”

Hambi u humeleriwa hi yini evuton’wini, tiyimisele ku tshemba Yehovha hi ku helela ni ku tirhisa malunghiselelo hinkwawo lama endleriweke ku ku tiyisa. Kutani u ta swi kota ku tirhela Yehovha hi ndlela leyi faneleke, naswona hi ku endla sweswo u ta tisa ku dzuneka ni xichavo evitweni ra yena ra risima.—Vaheveru 13:15.

[Xifaniso lexi nga eka tluka 31]

Leswi a tsandzekeke ku chivirika, Yehowaxi a a nga ta va hlula hi ku helela Vasiriya