Leswi Dyondziwaka Eka Matimu Ya Ku Tswariwa Ka Yesu

VANHU va timiliyoni va tsakisiwa swinene hi leswi endlekeke loko Yesu a tswariwa. Leswi swi kombisiwa hi swifaniso swo tala leswi kombisaka ku Tswariwa ka Yesu ni mintlangu leyi kombisaka ta ku Tswariwa ka yena emisaveni hinkwayo, hi nkarhi wa Khisimusi. Hambileswi swi tsakisaka, swiendlakalo leswi tsariweke eBibeleni, malunghana ni ku tswariwa ka Yesu, a swi nga tsaleriwanga ku hungasa vanhu. Ematshan’weni ya sweswo, i xin’wana xa swiyenge swa Matsalwa hinkwawo lawa Xikwembu xi ma huhuteleke, leswaku ma dyondzisa ni ku lulamisa swilo.—2 Timotiya 3:16.

Loko Xikwembu a xi swi lava leswaku Vakreste va tlangela ku velekiwa ka Yesu, Bibele a yi ta va yi ri boxile hi ku kongoma siku leri a tswariweke ha rona. Xana ya ri boxa? Endzhaku ko hlamusela leswaku Yesu u velekiwe hi nkarhi lowu ha wona varisi a va ri enhoveni ni vusiku, va risa mintlhambi ya vona, Albert Barnes, xidyondzi xa Bibele xa lembe-xidzana ra vu-19, u te: “Swi le rivaleni leswaku Muponisi wa hina u velekiwe ku nga si fika ti-25 ta December . . . Hi nkarhi wolowo ku va ku titimela, ngopfu-ngopfu etindhawini leti tlakukeke ni leti nga ni tintshava ekusuhi ni le Betlehema. Xikwembu a xi ri boxanga siku ra ku velekiwa ka [Yesu]. . . . Naswona a swi nga ri swa nkoka ku tiva siku ra kona; loko a swi ri swa nkoka, Xikwembu a xi ta va xi hlayise rungula ra kona.”

Ku hambana na sweswo, vatsari va mune va Tievhangeli va hi byela siku leri Yesu a feke ha rona. U fe hi siku ra Paseka, leyi a yi tlangeriwa hi siku ra vu-14 ra n’hweti ya Xiyuda ya Nisan, hi ximun’wana. Ku tlula kwalaho, Yesu u lerise valandzeri vakwe ku tlangela siku rero leswaku va n’wi tsundzuka. (Luka 22:19) Ku hava laha Bibele yi lerisaka kona leswaku ku tlangeriwa siku ra ku velekiwa ka Yesu kumbe ku  tlangeriwa siku ra ku velekiwa ka munhu wihi na wihi. Lexi vavisaka, minjhekanjhekisano ya malunghana ni siku leri Yesu a velekiweke ha rona yi nga ha endla leswaku swiendlakalo swa nkoka ngopfu leswi humeleleke hi nkarhi wolowo, swi nga vonaki swi ri swa nkoka.

Vatswari Lava Hlawuriweke Hi Xikwembu

Exikarhi ka mindyangu ya magidi-gidi eIsrayele, xana Xikwembu xi hlawule vatswari va muxaka muni leswaku va kurisa N’wana wa xona? Xana a xi languta swilo swo fana ni ndhuma ni rifuwo? Doo. Ematshan’weni ya sweswo, Yehovha u langute timfanelo ta moya ta vatswari volavo. Anakanya hi risimu ra Mariya ro dzunisa leri tsariweke eka Luka 1:46-55, leri a ri yimbeleleke endzhaku ka loko a byeriwe hi lunghelo ra yena ro hlawuleka ro va mana wa Mesiya. Swin’wana swa leswi a swi vuleke hi leswi: “Moya-xiviri wa mina wu twarisa Yehovha, . . . hikuva [u] langute xiyimo xa le hansi xa hlonga ra [yena] ra xisati.” Hi ku titsongahata u tivone a ri munhu wa “xiyimo xa le hansi,” a ri hlonga ra Yehovha ra xisati. Xa nkoka ngopfu, hileswaku marito yo saseka ya ku dzunisa ya risimu ra Mariya ma kombisa leswaku a a ri munhu la rhandzaka swilo swa moya loyi a a ma tiva kahle Matsalwa. Hambileswi a ri ntukulu wa Adamu, la nga ni xidyoho, a a faneleka ku hlawuriwa ku va mana wa N’wana wa Xikwembu wa laha misaveni.

Ku vuriwa yini hi nuna wa Mariya loyi a veke tata wa Yesu, wa muwundli? Yosefa a a ri wanuna loyi a ri ni vuswikoti lebyikulu byo vatla. Hikwalaho ka ku tiyimisela ka yena ku tirha hi matimba, u swi kotile ku wundla ndyangu wa yena lowu a wu ri ni vana va ntlhanu va majaha ni vanhwanyana vambirhi. (Matewu 13:55, 56) Yosefa a a nga ri xifumi. Loko ku fike nkarhi wa leswaku Mariya a yisa n’wana wa yena wa mativula etempeleni ya Xikwembu, swi fanele swi nga n’wi khomanga kahle Yosefa loko a xiya leswaku a nge swi koti ku endla gandzelo hi nyimpfu. Ematshan’weni ya sweswo, va boheke ku endla gandzelo leri a ri endliwa hi swisiwana. Mayelana ni ntswedyana, nawu wa Xikwembu a wu vula leswi: “Loko a nga swi koti ku humesa nyimpfu, u fanele a teka magugurhwana mambirhi kumbe swituvana swimbirhi, xin’we xi va xa gandzelo ro hisiwa lexin’wana xi va xa gandzelo ra xidyoho, muprista u fanele a n’wi kombelela ku rivaleriwa kutani u ta va a tengile.”—Levhitika 12:8; Luka 2:22-24.

Bibele yi vula leswaku Yosefa “a a lulamile.” (Matewu 1:19) Hi xikombiso, a nga vanga ni vuxaka bya rimbewu ni nsati wakwe loyi a ha ri nhwana ku kondza loko Yesu a tswariwile. Leswi swi endle leswaku swi nga kanakanisi leswaku Tata wa Yesu wa xiviri i mani. A swi nga ta olova leswaku mpatswa lowa ha ku tekanaka wu tshama wu nga vi na byona vuxaka bya rimbewu kambe wu ri karhi wu tshama swin’we, kambe leswi swi kombisa leswaku a va ri tlangela lunghelo ra ku va va hlawuriwe leswaku va kurisa N’wana wa Xikwembu.—Matewu 1:24, 25.

Ku fana na Mariya, Yosefa a a rhandza timhaka ta moya. Lembe na lembe a a teka riendzo ra masiku manharhu ni ndyangu wakwe va suka eNazareta va ya eYerusalema, enkhubyeni wa lembe na lembe wa Paseka. (Luka 2:41) Nakambe, Yosefa u fanele a tolovete Yesu loyi a ha ri ntsongo mukhuva wa ku ya gandzela esinagogeni vhiki na vhiki, laha a ku hlayiwa Rito ra Xikwembu ri tlhela ri hlamuseriwa. (Luka 2:51; 4:16) Xisweswo a swi kanakanisi leswaku Xikwembu xi hlawule manana ni tatana wa muwundli lonene va laha misaveni leswaku va kurisa N’wana wa xona.

Varisi Va Xiyimo Xa Le Hansi Va Katekisiwa Swinene

Hambileswi nsati wakwe, loyi se a a ri na tinh’weti ta kaye, a swi n’wi tikela ku famba, Yosefa u fambe na yena emutini wa rikwavo leswaku va ya tsarisiwa, hi ku pfumelelana ni nawu wa Khezari.  Loko mpatswa lowu wu fika eBetlehema a wu yi kumanga ndhawu yo etlela emutini lowu a wu lo mphaa, hi vanhu. Xisweswo wu boheke ku ya etlela exivaleni, laha Yesu a velekeriweke kona kutani a latiwa exidyelweni. Leswaku a tiyisa ripfumelo ra vona, Yehovha u nyike vatswari lava, lava nga fuwangiki, xitiyisekiso xa leswaku a ku ri ku rhandza ka Xikwembu leswaku n’wana loyi a velekiwa. Xana u rhume vakulukumba lava tlakukeke va le Betlehema leswaku va ya tiyisekisa mpatswa lowu? Doo! Ematshan’weni ya sweswo, Yehovha Xikwembu u paluxe mhaka leyi eka varisi lava a va tirha ku tika, lava a va heta vusiku hinkwabyo va ri enhoveni, va langutela mintlhambi ya vona.

Ntsumi ya Xikwembu yi humelele eka vona kutani yi va byela leswaku va ya eBetlehema, laha va nga ta kuma Mesiya loyi a ha ku velekiwaka a “etlele exidyelweni.” Xana vavanuna lava va xiyimo xa le hansi, va hlamarile kumbe va khomiwa hi tingana loko va twa leswaku Mesiya loyi a ha ku tswariwaka a ri exivaleni? Doo! Handle ko dya nkarhi, va siye mintlhambi ya vona va kongoma eBetlehema. Loko va kuma Yesu va rungulele Yosefa na Mariya leswi ntsumi ya Xikwembu yi va byeleke swona. Handle ko kanakana leswi swi tiyise ripfumelo ra mpatswa lowu, swi wu endla wu vona leswaku swilo hinkwaswo a swi famba hi ku ya hi xikongomelo xa Xikwembu. “Varisi va tlhela, va vangamisa ni ku vonga Xikwembu hikwalaho ka swilo hinkwaswo leswi va swi tweke ni leswi va swi voneke.” (Luka 2:8-20) Ina, loko Yehovha a paluxa timhaka eka varisi lava chavaka Xikwembu, a a hlawule vanhu lava faneleke.

Hi ku ya hileswi nga laha henhla, hi dyondza leswaku hi fanele hi va vanhu va njhani leswaku hi ta tsakeriwa hi Yehovha. A hi boheki ku lava ndhuma kumbe rifuwo. Ku ri na sweswo, ku fana na Yosefa, Mariya ni varisi, hi fanele hi yingisa Xikwembu hi tlhela hi kombisa leswaku ha xi rhandza hi ku rhangisa timhaka ta moya eka swilo swa hina swa nyama. Hakunene, ku ni swo tala leswi hi nga swi dyondzaka loko hi anakanyisisa hi swiendlakalo leswi humeleleke enkarhini wa ku velekiwa ka Yesu.

[Xifaniso lexi nga eka tluka 7]

Xana ku nyikela ka Mariya hi matuva mambirhi a swi kombisa yini?

[Xifaniso lexi nga eka tluka 7]

Xikwembu xi hlawule ku paluxa ta ku velekiwa ka Yesu eka varisi va nga ri vangani va xiyimo xa le hansi