Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? Kutani vona loko u ta swi kota ku hlamula swivutiso leswi landzelaka:

• Xana “vuswikoti byo ehleketa” byi nga hi sirhelela njhani? (Swivuriso 1:4)

Byi ta hi endla leswaku hi vona makhombo hi tlhelo ra moya byi tlhela byi hi susumetela ku teka ndlela leyinene, yo tanihi ku papalata miringo ya ku tikhoma hi ndlela yo biha hi tlhelo ra rimbewu entirhweni. Byi hi pfuna ku vona leswaku Vakreste-kulorhi a va hetisekanga, naswona sweswo swi ta hi endla hi papalata ku endla swo karhi hi magugu loko hi khunguvanyisiwile. Byi ta tlhela byi hi endla hi papalata ntshikilelo wa ku rhandza swilo leswi vonakalaka lowu nga ha tsanisaka vumoya bya hina.—8/15, matluka 21-4.

• Xana vaakelani va nga va va risima hi ndlela yihi?

Tindlela timbirhi to va muakelani lonene i ku va munyiki lonene u tlhela u nkhensa. I swa nkoka ku va muakelani lonene loko ku tshika ku va ni khombo. Timbhoni ta Yehovha ti tikarhatela ku va vaakelani lavanene hi ku tsundzuxa van’wana hi xiendlakalo lexi nga ta humelela ku nga ri khale, loko Xikwembu xi herisa vuhomboloki.—9/1, matluka 4-7.

• Hi ku ya hi Bibele, xana i vamani vakwetsimi va xiviri, naswona va ta va pfuna njhani vanhu?

Vakreste hinkwavo vo sungula a va ri vakwetsimi va xiviri, naswona a va kwetsimisiwe hi Xikwembu ku nga ri hi vanhu kumbe hi minhlangano yo karhi. (Varhoma 1:7) Loko va kala va pfuxeriwa etilweni, vakwetsimi va ta tirha na Kreste ku katekisa vanhu vo tshembeka lava nga emisaveni. (Vaefesa 1:18-21)—9/15, matluka 5-7.

• Ku tiva swo karhi hi mimphikizano ya vatsutsumi ya le mutini wa Greece wa khale ku nga va pfuna yini Vakreste?

Matsalwa ya muapostola Petro na Pawulo ma ni swikombiso leswi sekeriweke eka mintlangu ya khale. (1 Vakorinto 9:26; 1 Timotiya 4:7; 2 Timotiya 2:5; 1 Petro 5:10) A swi ri swa nkoka eka mutsutsumi wa khale leswaku a va ni muleteri lonene, a tikhoma, a tlhela a endla matshalatshala. Ninamuntlha Vakreste va fanele va tikarhata hi tlhelo ra moya.—10/1, matluka 28-31.

• Hi yihi mintlhontlho ni vuyelo bya ku kurisela vana etikweni rimbe?

Vana vo tala va ri dyondza hi ku hatlisa ririmi lerintshwa ku tlula vatswari va vona, lava swi nga ha va tikelaka ku twisisa ndlela leyi vana va vona va anakanyaka ha yona ni leswi va swi endlaka. Kutani swi nga ha va tikela vana ku twisisa tidyondzo ta Bibele leti vatswari va vona va va dyondzisaka tona hi ririmi ra rikwavo. Kambe, vun’we bya ndyangu byi nga tiyisiwa loko vatswari va ri karhi va dyondzisa vana va vona ririmi ra rikwavo, kutani va ta tiva tindzimi timbirhi va tlhela va tolovela mindhavuko mimbirhi.—10/15, matluka 22-6.

• Ha yini swi ri swa nkoka ku dyondza ku kombela ku rivaleriwa?

Ku kombela ku rivaleriwa hi mbilu hinkwayo hakanyingi i ndlela yo pfuxa vuxaka lebyi onhiweke. Bibele yi nyika swikombiso swa leswi ku kombela ku rivaleriwa ku pfunaka swona. (1 Samuwele 25:2-35; Mintirho 23:1-5) Hakanyingi, loko vanhu vambirhi va holovile, havambirhi va vonana nandzu. Hikwalaho, ku laveka leswaku havambirhi va pfumela nandzu va tlhela va kombela ku rivaleriwa.—11/1, matluka 4-7.

• Ha yini ku gembula hambi ku ri hi swimalana swi bihile?

Ku gembula ku nga hlohlotela vutianakanyi, moya wo phikizana ni makwanga, ku nga swilo leswi Bibele yi swi solaka. (1 Vakorinto 6:9, 10) Vo tala lava godzomberiweke hi ku gembula va sungule ku beja hi swimalana va ha ri vatsongo.—11/1, tluka 31.

• Leswi tibuku to tala ta Bibele a ti tsariwe hi Xigriki, ha yini a ku laveka leswaku Bibele yi hundzuluxeriwa hi Xigriki naswona vuyelo bya kona byi ve byihi?

Xigriki xa manguva lawa xi hambane ngopfu ni Xigriki xa vuhundzuluxeri bya Septuagint ya Matsalwa ya Xiheveru ni bya Matsalwa ya Vukreste ya Xigriki. Eka malembe-xidzana ya sweswinyana ku ringetiwe ko tala ku hundzuluxela xiphemu xa Bibele kumbe hinkwayo ka yona hi Xigriki lexi vulavuriwaka. Namuntlha, ku ni vuhundzuluxeri bya Bibele bya kwalomu ka 30 yi helerile kumbe xiphemu xa yona, lebyi hlayekaka hi ku olova eka Magriki lama tolovelekeke, lebyi tivekaka ngopfu i Vuhundzuluxeri Bya Misava Leyintshwa Bya Matsalwa Yo Kwetsima, lebyi humesiweke hi 1997.—11/15, matluka 26-9.

• Ha yini Vakreste va nga boheki ku humesa vukhume?

Eka Nawu lowu nyikiweke Vaisrayele va khale, vukhume a byi hlayisa nyimba ya Levhi ni ku tlhela byi pfuna swisiwana. (Levhitika 27:30; Deteronoma 14:28, 29) Rifu ra Yesu ra gandzelo ri herise Nawu ni ku humesiwa ka vukhume. (Vaefesa 2:13-15) Eka vandlha ro sungula, Mukreste un’wana ni un’wana a a fanele a humesa hilaha a boheke hakona embilwini yakwe. (2 Vakorinto 9:5, 7)—12/1, matluka 4-6.

• Xana Nhlavutelo 20:8 yi vula leswaku eka ndzingo wo hetelela Sathana u ta hambukisa vo tala swinene?

Ndzimana leyi yi vula leswaku lava hambukisiweke va ta “kotisa sava ra lwandle.” EBibeleni xiga xexo hakanyingi xi vula nhlayo leyi nga tivekiki, a xi vuli swona leswaku i nhlayo yo tala. Mbewu ya Abrahama leyi a yi ta “fana ni swiribyana swa sava leri nga eribuweni ra lwandle,” yi ve vanhu vo ringana 144 000, loko ku nga katsiwi na Yesu Kreste. (Genesa 22:17; Nhlavutelo 14:1-4)—12/1, tluka 29.