Mhaka Ya Vutomi

Ngula Leri Hundzuleke Vutomi Bya Mina

HI KU VULA KA IRENE HOCHSTENBACH

A ku ri hi Ravumbirhi nimadyambu hi 1972. A ndzi ri ni malembe ya 16 hi vukhale naswona a ndzi fambe ni vatswari va mina enhlanganweni wa vukhongeri le Eindhoven, ku nga doroba leri nga exifundzheni xa Brabant, le Netherlands. A ndzi titwa ndzi nga sirhelelekanga naswona a ndzi navela onge ndzi nga ya endhawini yin’wana. Hiloko vanhwanyana van’wana vambirhi va ndzi nyika xiphephana lexi tsariweke leswi: “Eka Irene, hi lava ku ku pfuna.” A ndzi nga swi xiyi leswaku xiphephana xolexo xi ta cinca vutomi bya mina. Kambe loko ndzi nga si mi hlamusela leswi nga humelela endzhaku ka sweswo, mi nge ndzi mi chumbutela matimu ya mina.

NDZI velekiwe exihlaleni xa Belitung, le Indonesia. Ndzi tsundzuka mimpfumawulo yin’wana ya le xihlaleni xexo lexi hisaka—ku hunga ka misinya ya micindzu, mpfumawulo wa nambu wa le kusuhi, ku hleka ka vana lava a va tlanga ekusuhi ni yindlu ya ka hina, swin’we ni mpfumawulo wa vuyimbeleri lowu a wu ri kona ekaya ka hina. Hi 1960 loko ndzi ri na malembe ya mune hi vukhale, ndyangu wa ka hina wu rhurhe eIndonesia wu ya eNetherlands. Hi teke riendzo rero ro leha hi xikepe naswona mpfumawulo lowu ndzi wu tsundzukaka kahle i wa thoyi leyi a ndzi yi rhandza swinene leyi a ndzi ri na yona—ku nga mutlangi loyi a khome xigubu. Loko ndzi ri ni malembe ya nkombo, ndzi khomiwe hi vuvabyi lebyi nga endla leswaku ndzi nga ha twi etindleveni naswona ku sukela kwalaho a ndza ha kotanga ku twa nchumu. Hi swona swilo leswi ndza ha swi tsundzukaka.

Ku Kula Ndzi Ri Karhi Ndzi Nga Twi Etindleveni

Leswi vatswari va mina a va ndzi khathalela hi rirhandzu, eku sunguleni a ndzi nga swi twisisi hi ku hetiseka leswaku swi vava njhani ku ka ndzi nga twi etindleveni. Loko ndza ha ri n’wana, a ndzi ehleketa  leswaku nchumu wo pfuneta ku twa lowu a ndzi ri na wona a wu ri wo tlanga hambi leswi a wu nga ndzi pfuni ngopfu. Loko vana va le mugangeni wa ka hina va lava ku vulavula na mina a vo ndzi tsalela kunene ehansi kutani ndzi va hlamula hi nomu hambileswi a ndzi nga ri twi rito ra mina.

Loko ndzi ri karhi ndzi kula ndzi sungule ku swi xiya leswaku a ndzi nga fani na vanhu van’wana. Ndzi tlhele ndzi swi xiya leswaku vanhu van’wana a va endla xihlekiso hi mina hi leswi a ndzi nga twi, kasi van’wana a va nga ndzi lavi ekusuhi na vona. Ndzi sungule ku titwa ndzi nga pfuni nchumu naswona ndzi ri na xivundza. Ndzi sungule ku swi twisisa leswaku swi vava njhani ku ka u nga twi etindleveni, naswona loko ndzi ri karhi ndzi kula, a ndzi ya ndzi va chava vanhu lava twaka etindleveni.

Leswaku ndzi ta kota ku ya exikolweni xo hlawuleka xa vanhu lava nga twiki etindleveni, vatswari va mina va rhurhise ndyangu hinkwawo exifundzheni xa Limburg wu ya edorobeni ra Eindhoven. Loko hi ri kwalaho, tatana u lave ntirho naswona makwerhu wa mina wa xinuna ni vamakwerhu va mina vambirhi va xisati va ye exikolweni lexintshwa. Ndzi tlangela swilo hinkwaswo leswi va swi endleke hikwalaho ka mina. Loko ndzi ri exikolweni ndzi dyondze ndlela leyi ndzi nga wu tirhisaka ha yona mpfumawulo wa rito ra mina ni ndlela leyi ndzi nga vulavulaka kahle ha yona. Kutani hambileswi vadyondzisi a va nga ri tirhisi ririmi ra mavoko, lava a ndzi nghena na vona etlilasini va ndzi dyondzise ku vulavula hi mavoko.

Ku Hanya Etikweni Ra Mina

Loko ndzi ri karhi ndzi kula, vatswari va mina va ringete hi matimba leswaku va vulavula na mina, kambe a ku ri ni swilo swo tala leswi a ndzi nga swi twisisi. Hi xikombiso, a ndzi nga swi twisisi leswaku vatswari va mina a va dyondza Bibele ni Timbhoni ta Yehovha. Kambe ndza tsundzuka leswaku siku rin’wana ndyangu wa ka hina wu endzele endhawini leyi a ku ri ni vanhu vo tala lava a va tshame eswitulwini. Hinkwavo a va tshame va languta emahlweni, minkarhi yin’wana va ba mavoko va tlhela va yima nkarhi na nkarhi—kambe a ndzi nga swi tivi leswaku ha yini vanhu lava a va endla swilo leswi. Endzhaku ka nkarhi, ndzi swi xiyile leswaku a ndzi ri entsombanweni wa Timbhoni ta Yehovha. Vatswari va mina a va tala ku famba na mina eholweni leyitsongo le dorobeni ra Eindhoven. Loko ndzi ri kwalaho a ndzi titwa ndzi ntshunxekile hikuva un’wana ni un’wana a a ri ni musa naswona ndyangu wa ka hina a wu tikomba wu tsakile, kambe a ndzi nga swi tivi leswaku ha yini a hi tshamela ku ya kwalaho. Sweswi se ndza swi tiva leswaku holo liya leyitsongo a ku ri Holo ya Mfumo ya Timbhoni ta Yehovha.

Khombo ra kona, eminhlanganweni yoleyo a ku ri hava loyi a ta ndzi tolokela nongonoko. Se ndza swi xiya leswaku lava a va ri kona kwalaho a va swi lava ku ndzi pfuna kambe a va nga swi tivi leswaku va ta ndzi pfuna njhani leswi a ndzi nga twi. Loko ndzi ri eminhlanganweni leyi a ndzi titwa ndzi lahlekile kutani ndzi ku, ‘Loko a ndzo va exikolweni a swi ta antswa.’ Kambe loko ndza ha anakanya hi mhaka yoleyo, vanhwanyana vambirhi va tsale xiphephana va ndzi nyika xona. Xiphephana xa kona hi lexi ndzi vulavuleke ha xona eku sunguleni. A ndzi nga swi tivi leswaku xiphephana lexi xi ta endla leswaku ndzi va ni vunghana bya risima lebyi nga ta endla leswaku ndzi nga ha titwi ndzi lahlekile.

Ku Hlakulela Vunghana Bya Risima

Colette na Hermine, lava ndzi tsaleleke xiphephana lexi a va ri ni malembe ya va-20. Endzhakunyana, ndzi kume leswaku a va te evandlheni ra Timbhoni ta Yehovha leri a ndzi ri endzerile leswaku va ta va maphayona ya nkarhi hinkwawo, kumbe vatirheli va nkarhi hinkwawo. Hambileswi Colette na Hermine a va nga ri tivi kahle ririmi ra mavoko, a ndzi swi kota ku twisisa leswi va swi vulaka hi ku languta milomu ya vona loko va ri karhi va vulavula, naswona hi kote ku vulavurisana kahle hi ndlela yoleyo.

Vatswari va mina a va tsakile loko Colette na Hermine va kombela ku dyondza Bibele na mina, kambe vanhwanyana lava a va endlanga sweswo ntsena. Va ringete hi matimba ku ndzi tolokela leswi a swi dyondziwa eminhlanganweni eHolweni ya Mfumo swin’we ni ku endla leswaku ndzi va ni  xinakulobye ni van’wana evandlheni. Va ndzi tolovete timhaka ta le Bibeleni leswaku ndzi ta ya ti tirhisa entirhweni wo chumayela naswona va tlhele va ndzi pfuna ku lunghiselela tinkulumo ta Xikolo Xa Vutirheli Bya Le Tilweni. Phela, sweswi ndzi ni xivindzi xo nyikela nkulumo emahlweni ka ntlawa wa vanhu lava va twaka kahle etindleveni!

Ku tlula kwalaho, Colette na Hermine va ndzi endle ndzi titwa ndzi va tshemba. A va ndzi lehisela mbilu naswona a va ndzi yingisela. Hambileswi hakanyingi a hi hleka loko ndzi endle xihoxo, a va nga ndzi endli xihlekiso; hambi ku ri ku ndzi khomisa tingana loko ndzi ri na vona. A va ringeta ku twisisa mintlhaveko ya mina naswona a va ndzi khoma kahle. Vanhwanyana lava va musa va ndzi nyike nyiko yo saseka—ku nga rirhandzu ra vona ni xinakulobye xa vona.

Xa nkoka swinene, Colette na Hermine va ndzi dyondzise leswaku ndzi fanele ndzi tiva Xikwembu xa hina, Yehovha, tanihi munghana loyi a nga tshembiwaka. Va ndzi hlamusele leswaku Yehovha u ndzi vonile loko ndzi tshame eHolweni ya Mfumo nileswaku u twisise ku tikeriwa loku a ndzi langutana na kona tanihi leswi ndzi nga twiki etindleveni. Ndza tsaka swinene leswi rirhandzu ra hina eka Yehovha ri hi hlanganiseke hina vanharhu ri hi endla vanghana! Ndzi khumbiwe hi ndlela leyi Yehovha a ndzi khathalelaka ha yona, naswona hikwalaho ko n’wi rhandza, ndzi kombise ku tinyiketela ka mina eka yena hi ku khuvuriwa ematini hi July 1975.

Ku Tirha Ni Munghana Wo Hlawuleka

Emalembeni lama landzeleke, ndzi tolovelane ni vamakwerhu lava nga Vakreste vo tala swinene. Makwerhu un’wana wa xinuna u ve munghana wa mina wo hlawuleka swinene, kutani hi tekane hi 1980. Endzhakunyana ka kwalaho, ndzi ve phayona, naswona hi 1994 mina na nuna wa mina Harry hi averiwe ku ya va maphayona yo hlawuleka ensin’wini leyi a ku vulavuriwa Ririmi ra Mavoko ra Xidachi. Hi lembe leri landzelaka, ndzi kume xiavelo lexi a xi ri ntlhontlho. A ndzi fanele ndzi famba ni nuna wa mina loyi a twaka etindleveni, loko a ri karhi a endzela mavandlha yo hambana-hambana a ri mulanguteri wa xifundzha la khomelaka.

Leyi i ndlela leyi ndzi langutaneke na swona ha yona. Loko hi endzela vandlha ro sungula, a ndzi ya eka vamakwerhu vo tala va xinuna ni va xisati hilaha ndzi nga kotaka hakona kutani ndzi ti tivisa eka vona. Ndzi va byele leswaku a ndzi twi, kutani ndzi va kombela leswaku va ndzi languta loko va ri karhi va vulavula na mina hi ku nonoka. Ndzi tlhele ndzi ringeta ku nyikela tinhlamulo eminhlanganweni ya vandlha. Naswona ndzi tlhele ndzi kombela un’wana loyi a a swi rhandza ku ndzi tolokela eka vhiki rolero eminhlanganweni ni le ntirhweni wa nsimu.

Endlelo leri a ri famba kahle hi nkarhi wolowo lerova vamakwerhu va kala va rivala leswaku a ndzi twi, leswi nga endla leswaku hi hleka. Hi xikombiso, va ndzi byele leswaku loko va ndzi vona ndzi ri  karhi ndzi famba edorobeni, va ndzi bela bele ya movha va ndzi xeweta, kambe mina a ndzi nga va yimiseli voko. Na mina a ndzi pfa ndzi rivala leswaku a ndzi twi—ku fana ni loko ndzi ringeta ku hlevela nuna wa mina nchumu wun’wana wa xihundla. Loko ndzi vona a sungula ku khomiwa hi tingana, a ndzi swi tiva leswaku a ndzi “vulavulela” ehenhla.

Vana va ndzi pfune hi tindlela leti a ti nga languteriwanga. Eka vandlha rin’wana leri hi ri endzeleke ro sungula, xifanyetana xa kaye wa malembe hi vukhale xi xiye leswaku van’wana a va kanakananyana ku vulavula na mina eHolweni ya Mfumo, kutani xi tiboha ku endla swo karhi hi mhaka leyi. Xi te eka mina, xi ndzi khoma hi voko xi ndzi yisa exikarhi ka Holo ya Mfumo kutani xi huwelela xi ku: “Ndzi kombela ku mi tivisa Irene—a nga twi etindleveni!” Lava a va ri kona kwalaho va te eka mina kutani va ti tivisa.

Loko ndzi ri karhi ndzi famba na nuna wa mina eka ntirho wa xifundzha, ndzi hambeta ndzi kuma vanghana vo tala. Hakunene vutomi bya mina bya namuntlha byi hambanile ni bya malembe lawa a ndzi titwa ndzi nga laviwi naswona ndzi ri ni xivundza! Ku sukela hi madyambu lawa Colette na Hermine va ndzi nyikeke xiphephana xexo, ndzi swi vonile leswaku xinakulobye xi ni matimba naswona ndzi hlangane ni vanhu lava va veke va nkoka swinene eka mina. Xa nkoka swinene, se ndzi tiva Yehovha, Munghana wa risima swinene wa vanhu hinkwavo. (Varhoma 8:38, 39) Hakunene xiphephana lexiya xi hundzule vutomi bya mina!

[Xifaniso lexi nga eka tluka 24]

Ndzi tsundzuka mpfumawulo wa thoyi ya mina leyi a ndzi yi rhandza

[Swifaniso leswi nga eka tluka 25]

Ndzi ri ensin’wini na nuna wa mina, Harry