“Tshinelani Eka Xikwembu, Kutani Xi Ta Tshinela Eka N’wina”

Loko Ndzi Nga Si Dyondza Bibele Niloko Se Ndzi Yi Dyondzile Rito Ra Xikwembu Ra Tirha

LOKO a wu lo hlangana na Tony loko a ha ri emalembeni ya kondlo-a-ndzi-dyi, a wu ta va u vone jaha leri nga riki na xinghana ni leri rhandzaka madzolonga, leri a ri tala ku endzela tindhawu leti nga ni ndhuma yo biha le Sydney, eAustralia. Van’wana va vanghana va yena a va ri swirho swa mintlawa ya swigevenga. Hakanyingi a va tshova va yiva, mintlawa ya vona a yi lwa yi tlhela yi baleselana eswitarateni.

Tony u sungule ku dzaha loko a ri ni malembe ya kaye. Loko a ri ni malembe ya 14 a a tshamela ku dzaha mbangi naswona a a tikhoma hi ndlela yo biha. Loko se a ri ni malembe ya 16, a a godzomberiwe hi heroyini, naswona leswi swi endle leswaku a tirhisa khokheyini, LSD—Tony u ri, “entiyisweni, a ndzi tirhisa xin’wana ni xin’wana lexi a xi ta ndzi nyanyula.” Kutani u sungule ku tirhisana ni mintlawa mimbirhi ya swigevenga leyi xavisaka swidzidzirisi. Ku nga ri kungani Tony u sungule ku tiviwa tanihi un’wana wa vaxavisi va swidzidzirisi la tshembekaka swinene eribuweni ra le vuxeni bya Australia.

Tony a a tirhisa mali ya kwalomu ka $160 (U.S.) ku ya eka $320 (U.S.) hi siku, a xava heroyini ni mbangi. Kambe ndyangu wa yena a wu tlhela wu xaniseka na hi tindlela tin’wana. U ri: “Hakanyingi mina ni nsati wa mina a hi kombeteriwa hi swibalesa ni mikwana, hi makhamba lawa a ma lava swidzidzirisi ni mali leyi a hi ri na yona endlwini.” Endzhaku ko pfaleriwa kanharhu ekhotsweni, Tony u boheke ku tivutisa leswaku a a ta helela kwihi loko a hambeta a hanya hi ndlela leyi.

Hambileswi a ya ekerekeni, Tony a a titwa a nga swi koti ku tshinela eka Xikwembu lexi ku vuriwaka leswaku xi xupula vadyohi hi ku va hisa etiheleni hilaha ku nga heriki. Kambe loko a endzeriwe hi Timbhoni ta Yehovha timbirhi, Tony u hlamarisiwe hi ku twa leswaku Xikwembu a xi nga ri tano. Naswona Tony a a tsakile hikwalaho ka leswi a ta hanya vutomi lebyi nga ni xikongomelo naswona a kuma mikateko ya Xikwembu. Tony u khumbiwe hi marito ya Yesu Kreste lama nge: “Swilo hinkwaswo swa koteka eka Xikwembu.” (Marka 10:27) Tony u tlhele a khumbiwa swinene hi marito lama khutazaka lama nge: “Tshinelani eka Xikwembu, kutani xi ta tshinela eka n’wina.”—Yakobo 4:8.

Tony se a a langutane ni ntlhontlho wa ku hanya hi ku pfumelelana ni mimpimanyeto ya Bibele. U ri: “A ndzi fanele ndzi rhanga ndzi tshika ku dzaha, ku nga nchumu lowu ndzi ringeteke ku wu endla ko tala khale, kambe ndzi tsandzekeke. Kambe hikwalaho ka matimba ya Yehovha ndzi swi kotile ku tshika heroyini na mbangi, ku nga swidzidzirisi leswi se a ndzi ri ni malembe ya 15 swi ndzi godzomberile. A ndzi nga swi ehleketi leswaku ndzi nga swi kota ku tshika mikhuva leyi.”

Ematshan’weni yo chava Xikwembu lexi xanisaka vanhu hilaha ku nga heriki etiheleni—ku nga dyondzo leyi nga riki kona eBibeleni—Tony na nsati wa yena va ve ni ntshembo wo hanya hilaha ku nga heriki emisaveni leyi nga paradeyisi. (Pisalema 37:10, 11; Swivuriso 2:21) Tony wa pfumela: “Ndzi hete nkarhi wo tala naswona ndzi boheke ku endla matshalatshala lamakulu leswaku ndzi endla vutomi bya mina byi pfumelelana ni mimpimanyeto ya Xikwembu, kambe hi mpfuno wa Yehovha ndzi swi kotile.”

Ina, munhu loyi la tshameke a godzomberiwa hi  swidzidzirisi se i Mukreste. Yena ni nsati wakwe va heta magidi-gidi ya tiawara entirhweni wo dyondzisa hi Bibele, va tirhisa nkarhi wa vona ni swilo swa vona leswi vonakaka hi ku tirhandzela. Naswona va kurisa vana vambirhi lava chavaka Xikwembu. Ku cinca loku lokukulu ku ve kona hikwalaho ka matimba lamakulu ya Rito ra Xikwembu, ku nga Bibele. Hakunene, hilaha muapostola Pawulo a vulaka hakona, “rito ra Xikwembu ra hanya naswona ri ni matimba.”—Vaheveru 4:12.

Hambileswi ku nga ni swikombiso leswi khutazaka swo fana ni lexi, van’wana va hehla Timbhoni ta Yehovha va vula leswaku ntirho wa tona wo dyondzisa lowu sekeriweke eBibeleni wu hahlula mindyangu naswona wu onha vumunhu lebyinene bya vantshwa. Hakunene mhaka ya Tony yi kombisa leswaku sweswo a hi ntiyiso.

Ku fana na Tony, vo tala va swi xiyile leswaku mikhuva leyi dlayaka yi nga tshikiwa. Njhani? Hi ku va ni ripfumelo eka Xikwembu ni hi ku titshega hi xona ni hi Rito ra xona, swin’we ni hi nseketelo wa vanakulobye lava nga Vakreste lava khathalaka ni lava nga ni rirhandzu. Tony u gimeta a tsakile a ku: “Ndzi yi vonile ndlela leyi misinya ya milawu ya Bibele yi va sirheleleke ha yona vana va mina. Tidyondzo ta le Bibeleni ti ponise vukati bya mina. Naswona vaakelani va mina va etlela bya n’wantenyana hikuva a ndza ha va chavisi.”

[Marito lama tshahiweke exihlokweni lama nga eka tluka 9]

‘Hi matimba lama humaka eka Yehovha ndzi swi kotile ku tshika swidzidzirisi leswi a swi ndzi godzombele malembe ya 15’

[Bokisi leri nga eka tluka 9]

Misinya Ya Milawu Ya Bibele Ya Tirha

Misinya ya milawu ya Bibele yo hambana-hambana yi pfune vanhu vo tala lava a va godzomberiwile leswaku va tshika mukhuva lowu wu tsanisaka miri. Yin’wana ya misinya ya milawu leyi hi leyi landzelaka:

“A hi tibasiseni eka swilo hinkwaswo leswi nyamisaka nyama ni moya, hi hetisekisa vukwetsimi hi ku chava Xikwembu.” (2 Vakorinto 7:1) Ku tirhisa swidzidzirisi swi lwisana ni nawu wa Xikwembu.

“Ku chava Yehovha i masungulo ya vutlhari, naswona ku tiva Lowo Kwetsima Ngopfu hi leswi ku twisisa ku nga swona.” (Swivuriso 9:10) Ku chava Yehovha loku sekeriweke eka vutivi lebyi kongomeke bya yena swin’we ni tindlela ta yena swi pfune vo tala leswaku va tshika ku tirhisa swidzidzirisi.

“Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.” (Swivuriso 3:5, 6) Mikhuva leyi onhaka yi nga tshikiwa hi ku tshembela eka Xikwembu hi mbilu hinkwayo ni hi ku titshega hi xona hi ku hetiseka.