Swivutiso Swa Vahlayi

Xana Matsalwa ma swi pfumela leswaku Mukreste a tlhandleka voko ra yena ehenhla ka Bibele kutani a hlambanya leswaku u ta vulavula ntiyiso ntsena ehubyeni?

Munhu un’wana ni un’wana u fanele a tiendlela xiboho emhakeni leyi. (Vagalatiya 6:5) Hambiswiritano, Bibele a yi ali leswaku u hlambanya leswaku u ta vulavula ntiyiso ehubyeni.

Vanhu se va ni nkarhi wo leha va ri karhi va hlambanya. Hi xikombiso, eminkarhini ya khale Magriki loko ma hlambanya a ma yimisela voko ehenhla kumbe ma khumba alitari. Loko Murhoma a hlambanya, a a khoma ribye kutani a hlambanya a ku: “Loko ndzo vulavula mavunwa, kasi [Jupiter] u ponisa muti ni khokholo, onge [xikwembu] Jupiter xi nga ndzi tekela swilo hinkwaswo leswinene evuton’wini bya mina, tanihi loko ndzi lahla ribye leri.”—Cyclopedia of Biblical, Theological, and Ecclesiastical Literature, hi John McClintock na James Strong, Vholumo ya Vunkombo, tluka 260.

Swiendlo swo tano a a swi kombisa mboyamelo wa vanhu wo xiya vukona bya matimba ya Xikwembu lexi kotaka ku languta vanhu lava nga ni vutihlamuleri eka xona. Ku sukela enkarhini wa khale, vagandzeri va Yehovha va ntiyiso va xiye leswaku wa swi tiva leswi va swi vuleke ni leswi va swi endleke. (Swivuriso 5:21; 15:3) A va hlambanya emahlweni ka Xikwembu, hi ndlela yo fanekisela, kumbe xona xi va mbhoni. Hi xikombiso, Bowasi, Davhida, Solomoni na Sedekiyasi va hlambanyile. (Rhuti 3:13; 2 Samuwele 3:35; 1 Tihosi 2:23, 24; Yeremiya 38:16) Vagandzeri va Xikwembu xa ntiyiso na vona va pfumerile ku hlambanyisiwa hi van’wana. Abrahama na Yesu Kreste na vona va pfumerile ku hlambanyisiwa.—Genesa 21:22-24; Matewu 26:63, 64.

Munhu loyi a hlambanyaka emahlweni ka Yehovha minkarhi yin’wana a a endla mfungho wo karhi. Abrama (Abrahama) u byele hosi ya Sodoma a ku: “Ndzi tlakusa voko ra mina ndzi hlambanya eka Yehovha Xikwembu Lexi nge Henhla-henhla, Muendli wa tilo ni misava.” (Genesa 14:22) Ntsumi leyi vulavuleke na muprofeta Daniyele yi ‘tlakusele voko ra yona ra xinene ni ra ximatsi ematilweni, yi hlambanya hi Loyi a hanyaka hilaha ku nga riki na makumu.’ (Daniyele 12:7) Ku vuriwa leswaku hambi ku ri Xikwembu xi hlambanye hi ku yimisa voko ra xona, hi ndlela yo fanekisela.—Deteronoma 32:40; Esaya 62:8.

Matsalwa a ma lwisani na kona ku hlambanya. Hambiswiritano, Mukreste a nga fanelanga a tshama a ri karhi a hlambanya eka mhaka yin’wana ni yin’wana leyi a yi vulaka. Yesu u te: “Kambe ntsena Ina wa n’wina a a ve Ina, E-e wa n’wina a va E-e.” (Matewu 5:33-37) Mudyondzisiwa Yakobo u vulavule hi mhaka leyi fanaka. Loko a ku “tshikani ku hlambanya,” a a vula leswaku hi nga teki mhaka ya ku hlambanya ku ri nchumu wo tlanga hi wona. (Yakobo 5:12) Yesu na Yakobo a va vulanga leswaku swi hoxile ku hlambanya leswaku u ta vulavula ntiyiso ehubyeni.

Kutani, ku vuriwa yini loko Mukreste loyi a nga ehubyeni a komberiwa ku hlambanya leswaku vumbhoni bya yena i ntiyiso? A nga hlambanya loko a swi tsakela. Handle ka swona, a nga ha pfumeleriwa ku tiyisekisa leswaku a nga hembi.—Vagalatiya 1:20.

Loko ehubyeni ku laveka leswaku u yimisa voko kumbe u veka voko ehenhla ka Bibele leswaku u hlambanya, Mukreste a nga ha hlawula ku endla xin’wana xa swona. A nga ha anakanya hi swikombiso swa le Matsalweni swo endla xihlambanyo hi mfungho wo karhi. Xa nkoka swinene ku tlula ku endla mfungho wo karhi loko Mukreste a hlambanya i ku tsundzuka leswaku u hlambanya emahlweni ka Xikwembu leswaku u ta vulavula ntiyiso. Xihlambanyo xo tano a hi mhaka yo tlanga hi yona. Loko Mukreste a vona onge a nga xi endla ni leswaku u fanele a hlamula xivutiso lexi a nga ta vutisiwa xona eka swiyimo swo tano, kutani u fanele a swi tsundzuka leswaku u le hansi ka xihlambanyo xo vulavula ntiyiso, hakunene lowu i nchumu lowu Mukreste a lavaka ku wu vula minkarhi hinkwayo.