“Vachumayeri Va Mfumo Lava Hisekaka” Va Hlengeletane Hi Ntsako

KU HOHLOKA ka mahanyelo, ikhonomi ni mpfilumpfilu wa tipolitiki swi chavisa misava. Hambiswiritano, Timbhoni ta Yehovha ti hlengeletanile hi ku rhula eka Mintsombano ya Muganga ya masiku manharhu leyi nhloko-mhaka ya kona a yi ku, “Vachumayeri Va Mfumo Lava Hisekaka,” ku nga khathariseki mpfilumpfilu lowu. Tinhlengeletano leti ti khomiwile emisaveni hinkwayo ku sukela hi May 2002.

Hakunene mintsombano leyi yi ve swiendlakalo leswi tsakisaka. A hi pfuxeteni nongonoko lowu sekeriweke eBibeleni lowu akaka.

Siku Ro Sungula Ri Kandziyise Ku Hiseka Ka Yesu

Nhloko-mhaka ya siku ro sungula ra ntsombano a yi ku, “Tekelela Ku Hiseka Ka Hosi Ya Hina, Yesu.” (Yohane 2:17) Nkulumo leyi nge, “Ha Tsaka Ku Hlangana Swin’we Tanihi Vachumayeri Va Mfumo” yi rhambe lava a va ri kona leswaku va hlanganyela entsakweni lowu tshamaka wu ri kona emintsombanweni ya vanhu va Xikwembu. (Deteronoma 16:15) Nkulumo leyi yi landzeriwe hi mimbulavusano ni vachumayeri lava hisekaka va mahungu lamanene.

Nkulumo leyi nge, “Kuma Ntsako Lowu Heleleke Eka Yehovha” yi hlamusele ndzimana hi ndzimana ya Pisalema 37:1-11. Hi khutaziwe ku ka hi nga “karihi” hikwalaho ka leswi lavo homboloka va nga ha tikombaka va humelela. Hambileswi vanhu vo biha va nga ha hi hehlaka, hi ku famba ka nkarhi Yehovha u ta swi paluxa leswaku kahle-kahle i vamani vanhu va yena vo tshembeka. Nkulumo leyi nge, “Kombisani Moya Wa Ku Nkhensa” yi vulavule hi ndlela leyi hi nga nkhensaka Xikwembu ha yona. Vakreste hinkwavo va fanele va nyika Yehovha “xitlhavelo xa ku dzunisa.” (Vaheveru 13:15) Ina, nkarhi lowu hi wu hetaka entirhweni wa Yehovha wu titshege hi ku tlangela ka hina ni swiyimo swa hina.

Nkulumo-nkulu a yi ri ni xihloko lexi nge, “Vachumayeri Va Mfumo Va Tirha Hi Ku Hiseka.” Yi kombise leswaku Yesu Kreste i xikombiso lexinene ngopfu xa ku hiseka. Endzhaku ka loko Mfumo wa le tilweni wu simekiwile hi 1914, Vakreste va ntiyiso a va fanele va hisekela ku chumayela mahungu wolawo lamanene. Xivulavuri xi vulavule hi ntsombano wa le Cedar Point, Ohio, U.S.A., hi 1922 kutani xi hi tsundzuxa hi xirhambo xa nkoka lexi nge: “Twarisani Hosi ni Mfumo wa yona”! Eku heteleleni, ku hiseka ka malandza ya Xikwembu ku ma susumetele ku twarisa mintiyiso ya Mfumo leyi hlamarisaka eka matiko hinkwawo.

Nkulumo leyi nge, “Hi Nga Chaveni Tanihi Leswi Hi Tivaka Leswaku Yehovha U Na Hina,” leyi nyikeriweke hi ndzhenga wa siku ro sungula, yi kombise leswaku vanhu va Xikwembu va hlaseriwa swinene hi Sathana. Hambiswiritano, ku nga khathariseki nkaneto lowu hi hlangavetanaka na wona, loko hi kambisisa swikombiso swo tala swa le Bibeleni ni swa manguva lawa swa vanhu lava kombiseke ripfumelo swi hi nyika xivindzi xo langutana ni miringo handle ko chava.—Esaya 41:10.

Ku landzele tinkulumo tinharhu to siyerisana leti a ti ri ni nhloko-mhaka leyi nge, “Vuprofeta Bya Mikiya Bya Hi Tiyisa Leswaku Hi Famba Hi Vito Ra Yehovha.”  Xivulavuri xo sungula xi fanise ku hohloka ka mahanyelo, vugwinehi bya vukhongeri ni ku rhandza swilo leswi vonakaka ka le nkarhini wa Mikiya ni ka le minkarhini ya hina. Xi te: “Ntshembo wa hina wa vumundzuku wu ta tiya loko hi hlakulela ku va ni mbilu leyi yingisaka naswona hi tiyiseka leswaku hi tikhoma hi ndlela yo kwetsima naswona vutomi bya hina byi tele hi swiendlo swo tinyiketela loku nga ni vukwembu—niloko hi nga rivali leswaku siku ra Yehovha ri ta fika.”—2 Petro 3:11, 12.

Xivulavuri xa vumbirhi eka tinkulumo to siyerisana xi vulavule hi ku sola ka Mikiya varhangeri va Yuda. A va khoma swisiwana hi ndlela yo biha, ku nga vanhu lava nga kotiki ku tilwela. Kambe Mikiya u tlhele a vula ka ha ri emahlweni ku hlula ka vugandzeri bya ntiyiso. (Mikiya 4:1-5) Leswi hi tiyisiwaka hi moya lowo kwetsima wa Yehovha, hi tiyimiserile ku twarisa rungula leri ri phyuphyisaka ra ntshembo. Kambe hi fanele hi endla yini loko hi titwa hi siveriwa hi vuvabyi kumbe hi titwa hi tindlela tin’wana? Xivulavuri xa vunharhu xi te: “Leswi Yehovha a swi languteleke swa twala naswona swa fikeleleka.” Xi ye emahlweni xi bula hi swivumbeko swo hambana-hambana swa Mikiya 6:8, laha hi hlayaka leswi: “Xana Yehovha u kombela leswaku u n’wi tlherisela yini, loko ku nga ri ku kombisa vululami ni ku rhandza musa ni ku titsongahata loko u famba ni Xikwembu xa wena?”

Leswi ku hohloka ka mahanyelo emisaveni ku nga va khumbaka Vakreste, hinkwerhu hi vuyeriwile eka nkulumo leyi nge, “Tshama U Tengile eMahanyelweni Hi Ku Hlayisa Mbilu Ya Wena.” Hi xikombiso, loko hi tshama hi tengile swi ta endla leswaku hi va ni vukati lebyi tsakisaka. Tanihi Vakreste, a hi fanelanga hi anakanya hi ku tikhoma hi ndlela yo biha hi tlhelo ra rimbewu.—1 Vakorinto 6:18.

Nkulumo leyi nge “Papalata Vuxisi” yi kombise leswaku hi ta va hi tlharihile loko hi ti teka tanihi chefu timhaka leti soholotiweke, leti nga riki ntiyiso lowu heleleke ni mavunwa ya rihlaza lama hangalasiwaka hi vagwinehi. (Vakolosa 2:8) Hilaha ku fanaka, a hi fanelanga hi tixisa hi ku anakanya leswaku hi nga enerisa ku navela ka hina ka vudyoho kambe hi nga kumi vuyelo lebyi vavisaka.

Nkulumo yo gimeta ya siku ro sungula a yi ku, “Gandzela Xikwembu Xi Ri Xin’we  Xa Ntiyiso.” Leswi swiyimo emisaveni swi yaka swi nonon’hwa swinene, swa khutaza ku tiva leswaku ku nga ri khale Yehovha u ta tisa misava ya yena yo lulama! I vamani lava nga ta hanya eka yona? Hi lava va gandzelaka Yehovha ntsena. Leswaku hina, vana va hina ni swichudeni swa hina swa Bibele hi ta kota ku fikelela pakani leyi, xivulavuri xi humese buku leyintshwa leyi nge Gandzela Xikwembu Xi Ri Xin’we Xa Ntiyiso. A hi tsake swinene loko hi yi kuma!

Siku Ra Vumbirhi Ri Kandziyise Ku Hisekela Ku Endla Leswinene

Siku ra vumbirhi ra ntsombano a ri ri ni nhloko-mhaka leyi nge, “Hisekela Ku Endla Leswinene.” (1 Petro 3:13) Xivulavuri xo sungula xi bule hi ndzimana ya siku ya Bibele. Xi kandziyise leswaku ku kambisisa ndzimana ya siku nkarhi na nkarhi, hi ndlela leyi nga ni xikongomelo swi engetela ku hiseka ka hina.

Kutani ku landzele tinkulumo to siyerisana leti nge, “Vachumayeri Va Mfumo Lava Vangamisaka Vutirheli Bya Vona.” Nkulumo yo sungula yi kandziyise xilaveko xo tamela Rito ra Xikwembu khwatsi. (2 Timotiya 2:15) Loko hi yi tirhisa kahle Bibele swi ta pfula ndlela ya leswaku yi ‘va ni matimba’ evuton’wini bya vanhu. (Vaheveru 4:12) Hi fanele hi yisa nyingiso wa hina eBibeleni hi tlhela hi yi hlamusela hi ndlela leyi khorwisaka. Nkulumo ya vumbirhi yi hi khutaze ku vuyela hi ku phindha-phindha eka vanhu lava tsakelaka. (1 Vakorinto 3:6) Leswaku hi ta tlhelela eka vanhu hinkwavo lava tsakelaka hi ku hatlisa hi fanele hi lunghiselela hi tlhela hi va ni xivindzi. Nkulumo ya vunharhu yi ringanyete leswaku hi languta munhu un’wana ni un’wana loyi hi hlanganaka na yena tanihi loyi a nga ha vaka mudyondzisiwa, yi tlhela yi kombisa leswaku loko ho sungula dyondzo ya Bibele eka riendzo ro sungula swi nga ha  endla leswaku hi tsakela ku pfuna vanhu leswaku va va vadyondzisiwa.

Nkulumo leyi landzeleke a yi ri ni nhloko-mhaka leyi nge, “Xivangelo Xa Ku ‘Khongela Minkarhi Hinkwayo.’” Bibele yi khutaza Vakreste leswaku va lava nkongomiso eka Xikwembu eka swilo hinkwaswo leswi va swi endlaka evuton’wini. Hi fanele hi tinyika nkarhi wa ku khongela hi ri hexe. Ku tlula kwalaho, hi fanele hi phikelela eku khongeleni, hikuva Yehovha a nga ha hi tshika hi khongela nkarhi wo karhi a nga si hi hlamula.—Yakobo 4:8.

Nkulumo leyi nge “Ku Vulavula Hi Timhaka Ta Moya Swa Aka” yi hi khutaze ku tirhisa vuswikoti bya hina byo vulavula leswaku hi vuyerisa hina vini ni van’wana. (Vafilipiya 4:8) Vanhu lava tekaneke ni vana va vona va fanele va vulavula hi swilo swa moya siku ni siku. Leswaku va kota ku endla sweswo, mindyangu yi fanele yi ringeta ku dya swin’we kan’we hi siku, leswaku va ta kota ku va ni mbulavurisano lowu akaka.

Nongonoko wa nimixo wu gimete hi nkulumo leyi khutazaka leyi nge, “Ndlela Leyi Ku Tinyiketela Ni Nkhuvulo Swi Yisaka Eku Ponisiweni Ha Yona.” Vanhu lava yaka eku khuvuriweni va kume vutivi, va kombisa ripfumelo, va hundzuka, va tshika ku endla leswo biha kutani va tinyiketela eka Xikwembu. Xivulavuri xi vule leswaku, endzhaku ka loko va khuvuriwile va fanele va hambeta va kula hi tlhelo ra moya naswona va tshama va ri karhi va hiseka va tlhela va tikhoma hi ndlela leyinene.—Vafilipiya 2:15, 16.

Hi ndzhenga wolowo, ku kandziyisiwe tinhla timbirhi enkulumeni leyi nge, “Titsongahate, U Hlayisa Tihlo Ra Wena Ri Olovile.” Ku titsongahata swi vula ku va ni langutelo lerinene hi ku tsana ka hina na hi xiyimo xa hina emahlweni ka Xikwembu. Ku titsongahata swi hi pfuna leswaku hi hlayisa tihlo ra hina ri “olova”—ri languta Mfumo wa Xikwembu ku nga ri swilo leswi vonakaka. Loko hi endla leswi, a hi fanelanga hi vilela, hikuva Yehovha u ta hi nyika leswi hi swi pfumalaka.—Matewu 6:22-24, 33, 34.

Xivulavuri lexi landzelaka xi kombise xivangelo xa ku va hi fanele hi “Tshemba Yehovha Hi Ku Helela eMinkarhini Ya Maxangu.” Xana hi nga swi lawula njhani swilo swo tanihi ku tsana ka hina ni swiphiqo swa timali kumbe swa rihanyo? A hi kombeleni vutlhari eka Yehovha hi tlhela hi kombela mpfuno eka van’wana. Ematshan’weni yo pfumelela ku chava kumbe gome, hi fanele hi tiyisa ku tshemba ka hina Xikwembu hi ku hlaya Rito ra xona.—Varhoma 8:35-39.

Tinkulumo to siyerisana to hetelela ta ntsombano a ti ri ni nhloko-mhaka leyi nge, “Ku Tiya Ka Ripfumelo Ra Hina Ku Ringiwa Hi Tindlela To Hambana-hambana.” Nkulumo yo sungula yi hi tsundzuxe leswaku Vakreste hinkwavo va ntiyiso va langutana ni nxaniso. Wu nyikela vumbhoni eka van’wana, wu tiyisa ripfumelo ra hina naswona wu hi nyika nkarhi wo kombisa ku tshembeka ka hina eka Xikwembu. Hambileswi hi nga taka hi nga hoxi vutomi bya hina ekhombyeni swi nga fanelanga,  a hi nge pfuki hi tirhise tindlela leti nga riki ta Matsalwa leswaku hi papalata ku xanisiwa.—1 Petro 3:16.

Xivulavuri xa vumbirhi eka tinkulumo leti to siyerisana xi vulavule hi swivutiso leswi fambisanaka ni vukala-tlhelo. Vakreste vo sungula a va nga ngheneleli eka mavandla ya tinyimpi kambe a va tshembela eka Xikwembu hi ku helela. Hilaha ku fanaka namuntlha, Timbhoni ta Yehovha ti wu namarhela swinene nsinya wa nawu lowu nge: ‘A mi xiphemu xa misava.’ (Yohane 15:19) Leswi miringo ya vukala-tlhelo bya hina yi nga hi hlaselaka hi ku hatlisa, mindyangu yi fanele yi tinyika nkarhi wa ku pfuxeta minkongomiso ya Bibele emhakeni leyi. Hilaha nkulumo ya vunharhu eka tinkulumo to siyerisana yi kombiseke hakona, xikongomelo xa Sathana a hi ku hi dlaya, kambe i ku hi tshikilela leswaku hi nga tshembeki. Loko hi ku tshembeka hi tiyisela ku hlekuriwa, mintshikilelo ya leswaku hi tikhoma hi ndlela yo biha, ku vava ka mintlhaveko ni mavabyi, hi tisa ku dzuneka eka Yehovha.

Xirhambo xa rirhandzu lexi nge “Tshinelani Eka Yehovha” a xi ri nhloko-mhaka ya nkulumo yo hetelela ya siku rero. Ku twisisa timfanelo letikulu ta Yehovha swi hi kokela eka yena. U tirhisa matimba ya yena lamakulu leswaku a sirhelela vanhu va yena, ngopfu-ngopfu hi tlhelo ra moya. Vululami bya yena a hi bya tihanyi kambe byi n’wi susumetela leswaku a nyika un’wana ni un’wana la endlaka swo lulama vutomi lebyi nga heriki. Vutlhari bya Xikwembu byi tikomba eka ndlela leyi a tirhiseke vanhu lava nga hetisekangiki ha yona leswaku va tsala Bibele. Leyi rhandzekaka swinene i rirhandzu ra xona, leri xi susumeteleke leswaku xi endla malunghiselelo ya ku ponisiwa ka vanhu ha Yesu Kreste. (Yohane 3:16) Xivulavuri xi gimete hi ku humesa buku leyintshwa leyi khutazaka leyi nge Tshinela Eka Yehovha.

Siku Ra Vunharhu Ri Kandziyise Ku Hisekela Ku Endla Mintirho Leyinene

Nhloko-mhaka ya siku ra vunharhu ra ntsombano a yi ku, “Vanhu Lava Hisekelaka Ku Endla Mintirho Leyinene.” (Tito 2:14) Nimixo nongonoko  wu sungule hi bulo ra ndyangu ra ndzimana ya siku. Ku landzele nkulumo leyi nge, “Xana Ntshembo Wa Wena Wu Le Ka Yehovha?” Matiko ma veke ntshembo wa wona eka swilo leswi hoxeke hi ku tshembela eka vutlhari bya wona ni matimba ya wona. Hambiswiritano, malandza ya Yehovha ma tshembele eka yena hi xivindzi ni hi ntsako, ku nga khathariseki makhombo lawa ma langutaneke na wona.—Pisalema 46:1-3, 7-11.

Xihloko xa nkulumo leyi nge “Vantshwa—Kunguhatani Vumundzuku Bya N’wina Hi Ku Fambisana Ni Nhlengeletano Ya Yehovha” xi vulavule hi xivutiso lexi nge: Xana muntshwa a nga vuyeriwa njhani evuton’wini? Loko a hlongorisa mali, rifuwo ni ndhuma a nge vuyeriwi. Muvumbi wa hina u khutaza vantshwa hi rirhandzu leswaku va n’wi tsundzuka loko va ha ri vantshwa. Xivulavuri xi vulavurisane ni van’wana lava tirheke hi matimba entirhweni wa Vukreste loko va ha ri vantshwa, naswona hi nga vona ntsako lowu va veke na wona. Hakunene a swi tsakisa ku amukela xiphephana lexintshwa lexi nge, Vantshwa—Xana Mi Ta Endla Yini Hi Vutomi Bya N’wina?, lexi endleriweke ku pfuna vantshwa lava nga Timbhoni leswaku va tivekela xisekelo xa vumundzuku lebyi nga heriki ni nhlengeletano ya Yehovha!

Endzhaku ku landzele drama ya le Bibeleni leyi kokaka nyingiso leyi nge “Yima U Tiya eMinkarhini Ya Maxangu.” Yi hlamusele katsongo hi ntirho-vutomi wa Yeremiya lowu a wu endleke ku sukela loko a ha ri muntshwa ku fikela loko Yerusalema wu lovisiwa, ku nga mhaka leyi a yi profeteke hi ku hiseka. Yeremiya a a titwa a nga xi fanelekeli xiavelo xa yena, kambe u xi hetisisile hambileswi a a kanetiwa, naswona Yehovha u n’wi kutsurile.—Yeremiya 1:8, 18, 19.

Drama yi landzeriwe hi nkulumo leyi nge “Ku Fana Na Yeremiya—Chumayela Rito Ra Xikwembu Hi Xivindzi.” Vachumayeri va Mfumo va manguva lawa hakanyingi va hemberiwa swinene. (Pisalema 109:1-3) Kambe, ku fana na Yeremiya hi nga langutana ni ku hela matimba hi ku tsakela Rito ra Yehovha. Naswona ha tiyiseka leswaku lava va lwaka na hina a va nge hluli.

Hakunene, nkulumo ya le rivaleni leyi a yi ri ni nhloko-mhaka leyi nge “Xiyimo Xa Misava Leyi Xa Hundzuka” a yi ri enkarhini. Nguva ya hina yi ve ni ku hundzuka lokukulu. Bibele yi vule ka ha ri emahlweni leswaku swiyimo swo tano, ku katsa ni ku huwelela “ku rhula ni nsirhelelo,” swi ta yisa eka siku leri chavisaka ra Xikwembu ra ku avanyisa. (1 Vatesalonika 5:3) Ri ta tisa ku hundzuka lokukulu—ku ta hela tinyimpi, vugevenga, madzolonga ni mavabyi hinkwawo. Kutani, ematshan’weni yo tshemba mafambiselo lawa ya swilo, lowu i nkarhi wa ku tinyiketela swinene eka Xikwembu ni wa ku tshama hi tikhome hi ndlela leyi tengeke.

Nkatsakanyo wa dyondzo ya Xihondzo xo Rindza xa vhiki rero wu landzeriwe hi nkulumo yo hetelela ya ntsombano leyi a yi ri ni nhloko-mhaka leyi nge “Vanani Lava Fuweke eMintirhweni Leyinene Tanihi Vachumayeri Va Mfumo Lava Hisekaka.” Xivulavuri xi hlamusele ndlela leyi nongonoko wu hi phyuphyiseke ha yona hi tlhelo ra moya wu tlhela wu hi khutaza ku titshega hi Yehovha. Emakumu, hi khutaziwe ku va vachumayeri va Mfumo wa Xikwembu lava baseke, lava nga ni rirhandzu ni lava hisekaka.—1 Petro 2:12.

Ku fana ni malandza ya Yehovha ya le sikwini ra Nehemiya, handle ko kanakana hi tlhelele ekaya hi tsakele mikateko ya moya leyi hi yi kumeke eNtsombanweni wa Muganga wa “Vachumayeri Va Mfumo Lava Hisekaka.” (Nehemiya 8:12) Xana ntsombano lowu wu phyuphyisaka wu ku tsakisile wu tlhela wu ku endla u tiyimisela ku hambeta u ri muchumayeri wa Mfumo la hisekaka?

[Bokisi/Xifaniso lexi nga eka tluka 23]

Buku Leyintshwa!

Loko siku ro sungula ra ntsombano ri hela, lava a va ri kona va tsakisiwe hi ku humesiwa ka buku leyintshwa leyi nge Gandzela Xikwembu Xi Ri Xin’we Xa Ntiyiso. Yi fanele yi dyondziwa ni lava va heteke ku dyondza buku leyi nge Vutivi Lebyi Yisaka eVuton’wini Lebyi Nga Heriki naswona handle ko kanakana yi ta tiyisa ripfumelo ra lava va nga ni “mboyamelo lowunene eka vutomi lebyi nga heriki.”—Mintirho 13:48.

[Xihlovo Xa Kona]

Image on book cover: U.S. Navy photo

[Bokisi/Swifaniso leswi nga eka tluka 24]

Mpfuno Wo Tshinela Eka Xikwembu

Xivulavuri xo hetelela hi siku ra vumbirhi ra ntsombano xi tivise ku humesiwa ka buku leyintshwa leyi nge Tshinela Eka Yehovha. Yi ni swiyenge swa mune, xin’wana ni xin’wana xi vulavula hi timfanelo letikulu ta Yehovha—matimba, vululami, vutlhari ni rirhandzu. Xiyenge xin’wana ni xin’wana xa buku leyi xi ni ndzima leyi kombisaka ndlela leyi Yesu Kreste a ti kombiseke kahle ha yona timfanelo leti ta Xikwembu. Xikongomelo-nkulu xa buku leyi leyintshwa i ku pfuna hina ni swichudeni swa hina swa Bibele leswaku hi aka vuxaka lebyikulu ni lebyi tiyeke na Yehovha Xikwembu.

[Bokisi/Swifaniso leswi nga eka tluka 26]

Nkongomiso Wa Moya Wa Vantshwa

Hi siku ra vunharhu ra ntsombano ku humesiwe xiphephana xo hlawuleka lexi nge Vantshwa—Xana Mi Ta Endla Yini Hi Vutomi Bya N’wina? Xiphephana lexi lexintshwa lexi endleriweke ku pfuna vantshwa lava nga Timbhoni leswaku va endla swiboho leswinene malunghana ni vumundzuku bya vona, xi na xitsundzuxo xa le Matsalweni xa ku tiendlela ntirho-vutomi wa hilaha ku nga heriki entirhweni wa Yehovha.