Xana Ripfumelo Ra Wena Ri Tiye Ku Fikela Kwihi?
Xana Ripfumelo Ra Wena Ri Tiye Ku Fikela Kwihi?
“Mi yimile hikwalaho ka ripfumelo ra n’wina.”—2 VAKORINTO 1:24.
1, 2. Ha yini hi fanele hi va ni ripfumelo naswona ri nga tiyisiwa njhani?
MALANDZA ya Yehovha ma swi tiva leswaku ma fanele ma va ni ripfumelo. Entiyisweni, ‘handle ka ripfumelo a swi koteki ku xi tsakisa kahle Xikwembu.’ (Vaheveru 11:6) Hikokwalaho, i vutlhari ku khongelela moya lowo kwetsima ni ripfumelo, ku nga wun’wana wa mihandzu leyinene. (Luka 11:13; Vagalatiya 5:22, 23) Ku tekelela ripfumelo ra vapfumeri-kulorhi swi ta tlhela swi hi endla hi tshama hi ri ni mfanelo leyi.—2 Timotiya 1:5; Vaheveru 13:7.
2 Ripfumelo ra hina ri ta tiya loko hi phikelela hi hanya hi ndlela leyi Rito ra Xikwembu ri khutazaka Vakreste hinkwavo ku hanya ha yona. Hi nga ha va ni ripfumelo leri engetelekeke loko hi hlaya Bibele siku ni siku ni ku gingiritekela ku hlaya Matsalwa hi ku pfuniwa hi tibuku leti hi nyikiweke tona hi “mulanguteri wo tshembeka.” (Luka 12:42-44; Yoxuwa 1:7, 8) Loko nkarhi na nkarhi hi ya eminhlanganweni ya Vukreste, etinhlengeletanweni ni le mintsombanweni ha khutazeka hi ripfumelo ra van’wana. (Varhoma 1:11, 12; Vaheveru 10:24, 25) Naswona ripfumelo ra hina ra tiya loko hi vulavula ni van’wana ensin’wini.—Pisalema 145:10-13; Varhoma 10:11-15.
3. Malunghana ni ripfumelo, hi wihi mpfuno lowu hi wu kumaka eka vakulu lava nga Vakreste lava nga ni rirhandzu?
3 Loko vakulu va Vakreste lava nga ni rirhandzu va hi laya ni ku hi khutaza hi ku tirhisa Matsalwa, va hi pfuna leswaku hi aka ripfumelo ra hina. Va ni moya wo fana ni wa muapostola Pawulo loyi a byeleke Vakorinto a ku: “Hi vatirhi-kuloni entsakweni wa n’wina, hikuva mi yimile hikwalaho ka ripfumelo ra n’wina.” (2 Vakorinto 1:23, 24) Vuhundzuluxeri byin’wana byi hlayekisa xileswi: “Hi tirha na wena leswaku hi ku tsakisa, hikuva ripfumelo ra wena ri tiyile.” (Contemporary English Version) Lavo lulama va hanya hi ripfumelo. Ina, ku hava munhu ni un’we loyi a nga kombisaka ripfumelo handle ka hina kumbe loyi a nga hi sindzisaka leswaku hi tshama hi tshembekile. Emhakeni leyi, ‘hi fanele hi rhwala ndzhwalo wa hina.’—Vagalatiya 3:11; 6:5.
4. Xana timhaka ta malandza ya Xikwembu yo tshembeka leti ku vulavuriwaka ha tona eMatsalweni ti nga ri tiyisa njhani ripfumelo ra hina?
4 EMatsalweni ku vulavuriwa hi vanhu lava a va ri ni ripfumelo. Hi nga ha va hi swi twile swiendlo swa vona swo tala leswi hlamarisaka, kambe ku vuriwa yini hi ripfumelo leri va ri kombiseke siku ni siku, kumbexana evuton’wini bya vona hinkwabyo? Loko sweswi ho kambisisa ndlela leyi va yi kombiseke ha yona mfanelo leyi eka swiyimo swo fana ni swa hina, ripfumelo ra hina ri ta tiya.
Ripfumelo Ri Hi Nyika Xivindzi
5. Hi byihi vumbhoni bya Matsalwa lebyi kombisaka leswaku ripfumelo ra hi tiyisa leswaku hi twarisa rito ra Xikwembu hi xivindzi?
5 Ripfumelo ri hi nyika matimba yo chumayela rito ra Xikwembu hi xivindzi. Enoko u kanye mbilu a profeta hi ta ku avanyisa ka Xikwembu. U te: “Maswivo! Yehovha u fikile ni timiriyadi takwe to kwetsima, a ta avanyisa hinkwavo, ni ku va vona nandzu hinkwavo lava nga xiximiki Xikwembu malunghana ni swiendlo swa vona hinkwaswo swa ku ka va nga xiximi Xikwembu leswi va swi endleke hi ndlela ya ku ka va nga xiximi Xikwembu, ni malunghana ni swilo hinkwaswo leswi tsemaka nhlana leswi vadyohi lava nga xiximiki Xikwembu va xi lumbeteke swona.” (Yudha 14, 15) Loko va twa marito wolawo, valala va Enoko lava nga xi chaviki Xikwembu a va lava ku n’wi dlaya hakunene. Kambe, u vulavule hi xivindzi a ri ni ripfumelo kutani Xikwembu xi “n’wi tekile” hi ku n’wi etlerisa vurhongo bya rifu, kahle-kahle a nga twanga xitlhavi loko a fa. (Genesa 5:24; Vaheveru 11:5) A hi ma voni masingita yo tano, kambe Yehovha u hlamula swikhongelo swa hina leswaku hi ta twarisa rito ra yena hi ripfumelo ni hi xivindzi.—Mintirho 4:24-31.
6. Xana Nowa u pfuniwe njhani hi ripfumelo ni xivindzi leswi Xikwembu xi n’wi nyikeke swona?
6 Hi ripfumelo, Nowa u “[ake] ngalava leswaku ku ponisiwa ndyangu wakwe.” (Vaheveru 11:7; Genesa 6:13-22) Nakambe Nowa a a ri “muchumayeri wa leswo lulama” loyi hi xivindzi a twariseke xitsundzuxo xa Xikwembu eka vanhu va le nkarhini wa yena. (2 Petro 2:5) Va fanele va monye rungula ra yena ra ku ta ka Ndhambi, hilaha van’wana va monyaka ha kona loko hi va nyika xitiyisekiso xa Matsalwa xa leswaku mafambiselo ya swilo ya sweswi ma ta herisiwa ku nga ri khale. (2 Petro 3:3-12) Hambiswiritano, ku fana na Enoko na Nowa, hi nga ri twarisa rungula ro tano hikuva Xikwembu xi hi nyike ripfumelo ni xivindzi.
Ripfumelo Ri Hi Endla Hi Lehisa Mbilu
7. Xana Abrahama ni van’wana va ri kombise njhani ripfumelo ni ku lehisa mbilu?
7 Hi fanele hi va ni ripfumelo hi tlhela hi lehisa mbilu, ngopfu-ngopfu leswi hi rindzeleke makumu ya mafambiselo lawa yo biha. Exikarhi ka lava ‘va nga ta dya ndzhaka ya switshembiso hikwalaho ka ripfumelo ni ku lehisa mbilu’ ku ni mupatriyaka Abrahama loyi a chavaka Xikwembu. (Vaheveru 6:11, 12) Hikwalaho ka ripfumelo u siye tiko ra Ura, ni swilo swa rona swo tala, a ya va muluveri etikweni leri Xikwembu xi n’wi tshembiseke rona. Isaka na Yakobe na vona a va ri vadyandzhaka va xitshembiso lexi. Hambiswiritano, “hinkwavo lava va fele eripfumelweni, hambileswi va nga ku kumangiki ku hetiseka ka switshembiso.” Hi ripfumelo va ‘lwele ku fikelela ndhawu yo antswa, hileswaku, leyi nga ya le tilweni.’ Hikwalaho, Xikwembu “xi va lunghiselele muti.” (Vaheveru 11:8-16) Ina, Abrahama, Isaka na Yakobe—ni vasati va vona lava chavaka Xikwembu—va rindzele Mfumo wa Xikwembu wa le tilweni va nga heli mbilu, laha va nga pfuxeriwa evuton’wini bya laha misaveni.
8. Xana Abrahama, Isaka na Yakobe va kombise ku lehisa mbilu ni ripfumelo ku nga khathariseki yini?
8 Ripfumelo ra Abrahama, Isaka na Yakobe a ri helanga. A va ri vonanga Tiko leri Tshembisiweke, naswona a va ma vonanga matiko hinkwawo loko ma tikatekisa hikwalaho ka mbewu ya Abrahama. (Genesa 15:5-7; 22:15-18) Hambileswi ‘muti lowu akiweke hi Xikwembu’ a a wu nga ta va wa xiviri kukondza ku hundza madzana ya malembe, vavanuna lava va hambete va kombisa ripfumelo va tlhela va lehisa mbilu evuton’wini bya vona hinkwabyo. Hakunene hi fanele hi endla leswi fanaka sweswi tanihi leswi Mfumo wa Mesiya wu fumaka etilweni.—Pisalema 42:5, 11; 43:5.
Ripfumelo Ri Hi Endla Hi Va Ni Tipakani Letikulu
9. Xana ripfumelo ri ti khumba njhani tipakani ta hina?
9 Vapatriyaka vo tshembeka a va ma tekelelanga mahanyelo lama thyakeke ya Vakanana, hikuva a a va ri ni tipakani letikulu. Hilaha ku fanaka, ripfumelo ri hi nyika tipakani ta moya leti hi endlaka hi lwisana ni ku tekelela misava leyi yi nga le matimbeni ya lowo homboloka, ku nga Sathana Diyavulosi.—1 Yohane 2:15-17; 5:19.
10. Hi swi tivisa ku yini leswaku Yosefa u fikelele pakani leyikulu ku tlula ndhuma ya misava leyi?
10 Hikwalaho ka nkongomiso wa Xikwembu, Yosefa n’wana wa Yakobe a a tirha tanihi mulanguteri wa swakudya aEgipta, kambe a ku nga ri pakani ya yena leswaku a va munhu la tlakukeke etikweni leri. Leswi Yosefa a a ri ni ripfumelo eku hetisekeni ka switshembiso swa Yehovha, loko a ri ni malembe ya 110 hi vukhale u byele vamakwavo va yena a ku: “Ndza fa; kambe hakunene Xikwembu xi ta tisa nyingiso wa xona eka n’wina, hakunene xi ta mi humesa etikweni leri, xi mi yisa etikweni leri xi ri fungheleke Abrahama na Isaka na Yakobe.” Yosefa u kombele leswaku va n’wi lahla etikweni ra xitshembiso. Loko a fa, u totiwe mafurha yo sivela ku onhaka kutani a latiwa ebokisini ra vafi aEgipta. Kambe loko Vaisrayele va kutsuriwe evuhlongeni bya le Egipta, muprofeta Muxe u rhwale marhambu ya Yosefa a ya ma lahla eTikweni leri Tshembisiweke. (Genesa 50:22-26; Eksoda 13:19) Ripfumelo ro fana ni ra Yosefa ri fanele ri hi susumetela ku lava ku fikelela tipakani letikulu ku tlula ndhuma ya misava leyi.—1 Vakorinto 7:29-31.
11. Xana Muxe u byi kombise njhani vumbhoni bya leswaku u ni tipakani ta moya?
11 Muxe ‘u hlawule ku xaniseka swin’we ni vanhu va Xikwembu ku ri ni ku tiphina hi xidyoho swa nkarhinyana’ hambileswi a a ri xirho lexi dyondzekeke swinene xa ndyangu wa le vuhosini aEgipta. (Vaheveru 11:23-26; Mintirho 7:20-22) A nga lavanga ndhuma ya misava kumbexana hambi ku ri ku lahliwa onge i hosi, a ri endzeni ka bokisi ra vafi leri sasekisiweke swinene, eka man’wana ya masirha ya vanhu lava xiximekaka va le Egipta. Kambe xana sweswo a swi ta va ni nkoka wo fikela kwihi loko swi ringanisiwa ni lunghelo ro va “munhu wa Xikwembu xa ntiyiso,” muhlanganisi wa ntwanano wa Nawu, muprofeta wa Yehovha ni mutsari wa Bibele? (Ezra 3:2) Xana u navela xikhundlha lexi tlakukeke emisaveni kumbe ripfumelo ri ku endle leswaku u hisekela tipakani letikulu ta moya?
Ripfumelo Ri Endla Leswaku Munhu A Hanya Vutomi Lebyi Nga Ni Xikongomelo
12. Ripfumelo ri ve ni vuyelo byihi evuton’wini bya Rahava?
12 Ripfumelo a ri endli leswaku vanhu va va ni tipakani letikulu ntsena kambe ri tlhela ri va endla va hanya vutomi lebyi nga ni xikongomelo. Rahava wa le Yeriko u fanele a vone vutomi byi nga ri na xikongomelo loko a ha ri nghwavava. Kambe, wa nga vona ndlela leyi sweswo swi hundzukeke ha yona loko a kombisa ripfumelo! U “[vuriwe] la lulameke hikwalaho ka mintirho [ya ripfumelo], endzhaku ka ku amukela varhumiwa [va Vaisrayele] hi malwandla kutani a va humesa hi ndlela yin’wana,” leswaku va balekela valala va vona va Vakanana. (Yakobo 2:24-26) Hikwalaho ko xiya Yehovha tanihi Xikwembu xa ntiyiso, Rahava u tlhele a kombisa ripfumelo hi ku tshika vunghwavava. (Yoxuwa 2:9-11; Vaheveru 11:30, 31) U tekiwe hi nandza wa Yehovha ku nga ri hi Mukanana la nga riki mupfumeri. (Deteronoma 7:3, 4; 1 Vakorinto 7:39) Rahava u ve ni lunghelo lerikulu ra ku va kokwa wa xisati wa Mesiya. (1 Tikronika 2:3-15; Rhuti 4:20-22; Matewu 1:5, 6) Ku fana ni van’wana lava tshikeke mahanyelo yo biha, u ta tlhela a kuma vuyelo byin’wana—ku nga ku pfuxiwa leswaku a hanya emisaveni leyi nga paradeyisi.
13. Xana Davhida u dyohe hi ndlela yihi na Bati-xeba, kambe u ve ni langutelo rihi?
13 Handle ko kanakana, Rahava u hanye hi ku tshembeka endzhaku ka loko a tshike vunghwavava. Hambiswiritano, van’wana lava nga ni nkarhi wo leha va tinyiketele eka Xikwembu, va tshame va endla swidyoho leswikulu. Hosi Davhida u endle vuoswi na Bati-xeba, a lerisa leswaku nuna wa yena a dlayiwa enyimpini kutani a n’wi teka a va nsati wa yena. (2 Samuwele 11:1-27) Loko a hundzuka enhlomulweni wa yena lowukulu, Davhida u kombele Yehovha a ku: “U nga wu susi moya wa wena wo kwetsima eka mina.” Davhida a nga tekeriwanga moya wa Xikwembu. A a ri ni ripfumelo ra leswaku Yehovha, hi tintswalo ta yena a nge yi languteli hansi “mbilu leyi tshovekeke yi tlhela yi pfotloseka” hikwalaho ka xidyoho. (Pisalema 51:11, 17; 103:10-14) Hikwalaho ka ripfumelo ra vona Davhida na Bati-xeba va hakeriwe hi lunghelo ro va vakokwa wa Mesiya.—1 Tikronika 3:5; Matewu 1:6, 16; Luka 3:23, 31.
Ripfumelo Leri Tiyisiweke Hi Xitiyisekiso Xa Mpfuno Wa Xikwembu
14. Xana Gidiyoni u kume switiyisekiso swihi naswona mhaka leyi yi nga ri khumba njhani ripfumelo ra hina?
14 Hambileswi hi fambaka hi ripfumelo, minkarhi yin’wana hi nga ha lava mpfuno wa Xikwembu. Sweswo swi ve tano hi Muavanyisi Gidiyoni, un’wana wa “lava hi ripfumelo va hluleke mimfumo enkwetlembetanweni.” (Vaheveru 11:32, 33) Loko Vamidiyani ni matiko lama khomisaneke na vona va hlasela Israyele, moya wa Xikwembu wu sirhelele Gidiyoni. Hikwalaho ko navela xitiyisekiso xa leswaku Yehovha a a ri na yena, u ringanyete miringo mimbirhi leyi a yi katsa ku humesela dzovo ra voya erivaleni, exivuyeni ni vusiku. Eka ndzingo wo sungula, mberha wu ve edzobyeni ntsena kutani misava yi sala yi omile. Eka ndzingo wa vumbirhi, mberha wu ve emisaveni kutani dzovo ri sala ri omile. Hikwalaho ko tiyisiwa hi switiyisekiso leswi, Gidiyoni la nga ni vuxiyaxiya u teke goza hi ripfumelo kutani a hlula valala va Israyele. (Vaavanyisi 6:33-40; 7:19-25) Loko hi fanele hi endla xiboho kambe hi lava xitiyisekiso, a swi vuli swona leswaku hi pfumala ripfumelo. Entiyisweni hi kombisa ripfumelo hi ku hlaya Bibele ni tibuku ta Vukreste ni ku khongelela nkongomiso wa moya lowo kwetsima loko hi endla swiboho.—Varhoma 8:26, 27.
15. Xana hi nga pfuneka njhani loko hi anakanyisisa hi ripfumelo ra Baraka?
15 Ripfumelo ra Muavanyisi Baraka ri tiyisiwe hi xitiyisekiso lexi a xi ri xikhutazo. Debora muprofeta wa xisati u n’wi khutaze ku rhanga a ntshunxa Vaisrayele eku tshikileriweni hi Hosi Yabini wa le Kanana. Hi ripfumelo ni hi xitiyisekiso xo seketeriwa hi Xikwembu, Baraka u rhangele vavanuna lava a va nga hlomanga ngopfu vo ringana 10 000 enyimpini kutani a hlula mavuthu ya Yabini lamakulu lawa a ma rhangeriwe hi Sisera. Ku hlula koloko ku tlangeriwe hi risimu leri nyanyulaka ra Debora na Baraka. (Vaavanyisi 4:1–5:31) Debora u khutaze Baraka ku endla ku fana ni murhangeri la vekiweke hi Xikwembu wa Israyele, naswona a a ri un’wana wa malandza ya Yehovha loyi hi ripfumelo a ‘hangalaseke mavuthu ya vanhu vambe.’ (Vaheveru 11:34) Loko hi anakanyisisa hi ndlela leyi Xikwembu xi katekiseke Baraka ha yona hikuva a kombisa ripfumelo swi nga hi susumetela ku teka goza loko hi kanakana malunghana ni ku hetisisa xiavelo xo nonon’hwa entirhweni wa Yehovha.
Ripfumelo Ri Kondletela Ku Rhula
16. Hi xihi xikombiso lexinene lexi Abrahama a xi vekeke xa ku endla ku rhula na Lota?
16 Tanihi leswi ripfumelo ri hi pfunaka ku hetisisa swiavelo swo tika entirhweni wa Xikwembu, ri nga ha kondletela ku rhula. Abrahama la dyuhaleke u pfumelele ntukulu wa yena Lota ku hlawula ndhawu leyi nga ni madyelo lamanene loko varisi va swifuwo swa vona va holovile kutani va boheka ku hambana. (Genesa 13:7-12) Swi nga ha endleka leswaku Abrahama u khongele a ri ni ripfumelo ra leswaku Xikwembu xi ta n’wi pfuna ku tlhantlha xiphiqo lexi. Ematshan’weni yo rhangisa ku rhandza ka yena, u endle swilo hi ku rhula. Loko hi tikuma hi holove ni makwerhu wa hina wa Mukreste, a hi khongeleni hi ri ni ripfumelo kutani hi ‘lava ku rhula,’ hi tsundzuka xikombiso xa Abrahama xo anakanyela hi ndlela ya rirhandzu.—1 Petro 3:10-12.
17. Ha yini hi nga vulaka leswaku mholovo leyi a yi ri kona exikarhi ka Pawulo, Barnaba na Marka yi herisiwe hi ndlela yo rhula?
17 Xiya ndlela leyi ku tirhisa misinya ya milawu ya Vukreste hi ripfumelo swi nga hi pfunaka ha yona ku kondletela ku rhula. Loko Pawulo a lava ku sungula riendzo ra yena ra vumbirhi ra vurhumiwa, Barnaba u pfumele kungu ra leswaku va tlhela va endzela mavandlha ya le Kipra na le Asia Minor. Hambiswiritano, Barnaba a a lava ku famba na muzala wa yena Marka. Pawulo u arile hikuva Marka a va siyile ePamfiliya. Ku pfuke “mholovo yo chavisa” naswona leswi swi endle leswaku va hambana. Barnaba u fambe na Marka eKipra, kasi Pawulo u hlawule ku famba na Silasi kutani va “hundze hi le Siriya ni le Kilikiya, [va] tiyisa mavandlha.” (Mintirho 15:36-41) Hi ku famba ka nkarhi, xiphiqo lexi xi tlhantlhiwile, hikuva Marka na Pawulo a va ri swin’we eRhoma naswona muapostola loyi u vulavule kahle hi yena. (Vakolosa 4:10; Filemoni 23, 24) Loko Pawulo a ri ekhotsweni eRhoma kwalomu ka 65 C.E., u byele Timotiya a ku: “Teka Marka u ta na yena, hikuva wa ndzi pfuna eku tirheleni.” (2 Timotiya 4:11) Handle ko kanakana, Pawulo u khongele hi ripfumelo hi vuxaka bya yena na Barnaba na Marka, naswona leswi swi endle leswaku va va ni ku rhula loku fambisanaka ni “ku rhula ka Xikwembu.”—Vafilipiya 4:6, 7.
18. Ku nga ha va ku humelele yini emhakeni ya Efodiya na Sintika?
18 Ina, leswi hi nga hetisekangiki, “hinkwerhu ha khunguvanyeka minkarhi yo tala.” (Yakobo 3:2) Ku ni vavasati vambirhi va Vakreste lava holoveke, lava Pawulo a tsaleke ha vona a ku: “Efodiya ndza n’wi khongotela na Sintika ndza n’wi khongotela leswaku va va ni mianakanyo yin’we eHosini. . . . Hambeta u pfuna vavasati lava va lweke swin’we na mina eka mahungu lamanene.” (Vafilipiya 4:1-3) Swi nga ha endleka leswaku vavasati lava, lava chavaka Xikwembu va tlhantlhe xiphiqo xa vona hi ndlela yo rhula hi ku tirhisa ndzayo yo tanihi leyi nga eka Matewu 5:23, 24. Ku tirhisa misinya ya milawu ya Matsalwa hi ripfumelo swa pfuna swinene eku kondleteleni ka ku rhula namuntlha.
Ripfumelo Ri Hi Endla Hi Tiyisela
19. Hi xihi xiyimo xo nonon’hwa lexi nga ri herisangiki ripfumelo ra Isaka na Raveka?
19 Hikwalaho ka ripfumelo hi nga ha tlhela hi tiyisela maxangu. Kumbexana hi ni gome hikwalaho ka leswi xirho lexi khuvuriweke xa ndyangu wa ka hina xi nga yingisangiki Xikwembu hi ku tekana ni munhu la nga riki mupfumeri. (1 Vakorinto 7:39) Isaka na Raveka va xanisekile hikwalaho ka leswi n’wana wa vona Esawu a tekeke vavasati lava nga xi chaviki Xikwembu. Vasati vakwe va Vaheti “a va dyisa mbitsi emoyeni” wa vona—ku fikela laha Raveka a nga te: “Ndzi fike laha ndzi nyenyaka vutomi lebyi bya mina hikwalaho ka vana lava va Heti va vanhwanyana. Loko Yakobe o tshuka a teke nsati eka vana lava va Heti lava fanaka ni vana va vanhwanyana va tiko leri, xana vutomi byi ni mpfuno wihi eka mina?” (Genesa 26:34, 35; 27:46) Kambe xiyimo lexi xo nonon’hwa a xi ri herisanga ripfumelo ra Isaka na Raveka. Onge hi nga tshama hi ri ni ripfumelo leri tiyeke loko swi hi tikela ku langutana na swiyimo swo nonon’hwa.
20. Xana Nawomi na Rhuti va kombise ripfumelo hi ndlela yihi?
20 Nawomi, noni leyi dyuhaleke a a ri Muyuda naswona a a swi tiva leswaku vavasati van’wana va le Yuda va nga ha veleka vana lava a va ta va vatata wa Mesiya. Hambiswiritano, hikwalaho ka leswi vana va yena a va fe va nga ri na vana naswona yena a hundzile emalembeni ya yena yo veleka vana, a swi nga tshembisi leswaku Mesiya a nga huma endyangwini wa yena. Nilokoswiritano, n’wingi wa yena Rhuti loyi a a ri noni u ve nsati wa Bowasi la dyuhaleke, a n’wi velekela n’wana, kutani a va kokwa wa xisati wa Yesu, ku nga Mesiya! (Genesa 49:10, 33; Rhuti 1:3-5; 4:13-22; Matewu 1:1, 5) Ripfumelo ra Nawomi na Rhuti ri tiyisele maxangu kutani ri va tisela ntsako. Na hina hi nga kuma ntsako lowukulu loko hi tshama hi ri ni ripfumelo loko hi langutane ni maxangu.
21. Xana ripfumelo ri hi pfuna yini, naswona hi fanele hi tiyimisela yini?
21 Hambileswi hi nga swi tiviki leswaku hi ta humeleriwa hi yini mundzuku, ripfumelo ri nga hi pfuna leswaku hi langutana ni xiyimo xin’wana ni xin’wana xo tika. Ripfumelo ri hi endla hi va ni xivindzi hi tlhela hi lehisa mbilu. Ri hi endla hi va ni tipakani letikulu hi tlhela hi hanya vutomi lebyi vuyerisaka. Ripfumelo ri ni vuyelo lebyinene eka vuxaka bya hina ni van’wana naswona ri tiyisela maxangu. Hikwalaho onge hi nga va “muxaka lowu nga ni ripfumelo eku londzovotiweni ka moya-xiviri wu hanya.” (Vaheveru 10:39) A hi hambeteni hi kombisa ripfumelo leri tiyeke hi matimba ya Yehovha Xikwembu xa hina xa rirhandzu, leswaku a vangamisiwa.
A Wu Ta Hlamurisa Ku Yini?
• Hi byihi vumbhoni bya le Matsalweni bya leswaku ripfumelo ri nga hi endla hi va ni xivindzi?
• Ha yini hi nga vulaka leswaku ripfumelo ri hi endla hi hanya vutomi lebyi vuyerisaka?
• Ripfumelo ri kondletela ku rhula hi ndlela yihi?
• Hi byihi vumbhoni lebyi nga kona bya leswaku ripfumelo ri hi endla hi tiyisela maxangu?
[Swivutiso Swa Dyondzo]
[Swifaniso leswi nga eka tluka 16]
Ripfumelo ri nyike Nowa na Enoko xivindzi xo twarisa rungula ra Yehovha
[Swifaniso leswi nga eka tluka 17]
Ripfumelo ro fana ni ra Muxe ri hi susumetela ku fikelela tipakani ta moya
[Swifaniso leswi nga eka tluka 18]
Ripfumelo ra Baraka, Debora na Gidiyoni ri tiyisiwe hi xitiyisekiso xa leswaku Xikwembu xi ta va pfuna