Xana U Ni Ripfumelo Hakunene Eka Mahungu Lamanene?
Xana U Ni Ripfumelo Hakunene Eka Mahungu Lamanene?
“Mfumo wa Xikwembu wu tshinele. Hundzukani, mi va ni ripfumelo eka mahungu lamanene.”—MARKA 1:15.
1, 2. U nga yi hlamusela njhani Marka 1:14, 15?
A KU ri hi lembe ra 30 C.E. Yesu Kreste a a sungule ntirho lowukulu le Galeliya. A a chumayela “mahungu lamanene ya Xikwembu,” naswona vanhu vo tala va le Galeliya va khumbiwe hi marito ya yena lama nge: “Nkarhi lowu vekiweke wu hetisekile, naswona mfumo wa Xikwembu wu tshinele. Hundzukani, mi va ni ripfumelo eka mahungu lamanene.”—Marka 1:14, 15.
2 “Nkarhi lowu vekiweke” a wu fikile leswaku Yesu a sungula ntirho wakwe ni leswaku vanhu va endla xiboho lexi a xi ta endla leswaku va tsakeriwa hi Xikwembu. (Luka 12:54-56) ‘Mfumo wa Xikwembu a wu tshinele’ hikuva Yesu a a ri kwalaho tanihi Hosi leyi Vekiweke. Ntirho wa yena wo chumayela wu susumetele vanhu va timbilu letinene leswaku va hundzuka. Kambe xana va swi kombise njhani leswaku va ni “ripfumelo eka mahungu lamanene,” naswona hina hi nga ri kombisa njhani?
3. Xana vanhu va endle yini ku kombisa leswaku va ni ripfumelo eka mahungu lamanene?
3 Ku fana na Yesu, muapostola Petro u khutaze vanhu leswaku va hundzuka. Loko a vulavula ni Vayuda eYerusalema hi Pentekosta ya 33 C.E., Petro u te: “Hundzukani, un’wana ni un’wana wa n’wina a khuvuriwa hi vito ra Yesu Kreste leswaku mi rivaleriwa swidyoho swa n’wina, kutani mi ta kuma nyiko ya mahala ya moya lowo kwetsima.” Vanhu va magidi va hundzukile, va khuvuriwa kutani va va valandzeri va Yesu. (Mintirho 2:38, 41; 4:4) Hi 36 C.E., vanhu Vamatiko lava hundzukeke va teke magoza lama fanaka. (Mintirho 10:1-48) Ninamuntlha, ku pfumela eka mahungu lamanene ku susumetela vanhu va magidi leswaku va hundzuka eswidyohweni swa vona, va tinyiketela eka Xikwembu kutani va khuvuriwa. Va amukela mahungu lamanene ya ku ponisiwa naswona va pfumela egandzelweni ra nkutsulo ra Yesu. Ku tlula kwalaho, va endla swilo leswi lulameke naswona va seketela Mfumo wa Xikwembu.
4. Ripfumelo i yini?
4 Kambe ripfumelo i yini? Muapostola Pawulo u tsarile: “Ripfumelo i ku langutela loku tiyisekisiweke ka swilo leswi tshembiwaka, vumbhoni lebyi tiyeke bya leswi nga swa xiviri hambiloko swi nga voniwi.” (Vaheveru 11:1) Ripfumelo ra hina ri hi endla hi tiyiseka leswaku xin’wana ni xin’wana lexi Xikwembu xi xi tshembiseke eRitweni ra xona xi tiyile onge hiloko se xi humelerile. Swi fana niloko hi ri ni phepha ro kombisa leswaku hi vini va ndhawu yo karhi. Nakambe ripfumelo i “vumbhoni lebyi tiyeke,” kumbe vumbhoni lebyi khorwisaka malunghana ni swilo leswi nga voniwiki. Mianakanyo ya hina swin’we ni mbilu leyi taleke ku tlangela swa hi khorwisa leswaku swilo swo tano i swa xiviri, hambiloko hi nga si swi vona.—2 Vakorinto 5:7; Vaefesa 1:18.
Hi Fanele Hi Va Ni Ripfumelo!
5. Ha yini ripfumelo ri ri ra nkoka swinene?
5 Hi tswariwe hi ri ni xilaveko xa swilo swa moya kambe a hi tswariwanga hi ri ni ripfumelo. Kahle-kahle, “ripfumelo a hi ra vanhu hinkwavo.” (2 Vatesalonika 3:2) Kambe, Vakreste va fanele va va ni ripfumelo leswaku va ta kuma switshembiso swa Xikwembu. (Vaheveru 6:12) Endzhaku ko vulavula hi vanhu vo tala lava kombiseke ripfumelo, Pawulo u tsarile: “Hikwalaho, leswi hi nga ni papa lerikulu swinene ra timbhoni leri hi rhendzeleke, na hina a hi hluvuleni ntiko wun’wana ni wun’wana ni xidyoho lexi hi phasaka hi ku olova, a hi tsutsumeni hi ku tiyisela eka mphikizano lowu vekiweke emahlweni ka hina, loko hi ri karhi hi languta swinene-nene eka Murhangeri Lonkulu ni Muhetisekisi wa ripfumelo ra hina, Yesu.” (Vaheveru 12:1, 2) Xana “xidyoho lexi hi phasaka hi ku olova” i yini? I ku pfumala ripfumelo, hambi ku ri ku heleriwa hi ripfumelo leri munhu a nga tshama a va na rona. Leswaku hi tshama hi ri ni ripfumelo leri tiyeke, hi fanele hi ‘languta swinene-nene eka Yesu’ kutani hi landzela xikombiso xa yena. Hi fanele hi tlhela hi fularhela mahanyelo yo biha, hi lwisana ni mintirho ya nyama, hi papalata ku hlongorisa swilo leswi vonakaka, tifilosofi ta misava ni mikhuva leyi nga riki ya matsalwa. (Vagalatiya 5:19-21; Vakolosa 2:8; 1 Timotiya 6:9, 10; Yudha 3, 4) Ku tlula kwalaho, hi fanele hi tshemba leswaku Xikwembu xi na hina ni leswaku ndzayo leyi kumekaka eRitweni ra xona ya tirha hakunene.
6, 7. Ha yini swi fanerile ku khongelela ripfumelo?
6 A hi nge swi koti ku ti endla hi va ni ripfumelo hi matimba ya hina vini. Ripfumelo i yin’wana ya mihandzu ya moya lowo kwetsima wa Xikwembu, kumbe matimba lama tirhaka. (Vagalatiya 5:22, 23) Kutani, ku vuriwa yini loko ripfumelo ra hina ri lava ku tiyisiwa? Yesu u te: “Loko n’wina . . . mi tiva ndlela ya ku nyika vana va n’wina tinyiko letinene, Tatana la nge tilweni u ta nyika moya lowo kwetsima hilaha ku tlurisaka swinene eka lava n’wi kombelaka!” (Luka 11:13) Ina, a hi khongeleleni moya lowo kwetsima, hikuva wu nga endla leswaku hi va ni ripfumelo leri lavekaka leswaku hi endla ku rhandza ka Xikwembu hambi ku ri ehansi ka swiyimo leswi nonon’hwaka swinene.—Vaefesa 3:20.
7 Swi fanerile ku khongelela ripfumelo leri engetelekeke. Loko Yesu a ri kusuhi ni ku humesa dimona eka jaha rin’wana, tata wa jaha leri u komberile a ku: “Ndzi ni ripfumelo! Ndzi pfune laha ndzi lavaka ripfumelo kona!” (Marka 9:24) Vadyondzisiwa va Yesu va te: “Hi nyike ripfumelo leri engetelekeke.” (Luka 17:5) Hikwalaho, a hi khongeleleni ripfumelo, hi tiyiseka leswaku Xikwembu xa swi hlamula swikhongelo sweswo.—1 Yohane 5:14.
I Swa Nkoka Ku Va Ni Ripfumelo eRitweni Ra Xikwembu
8. Ku va ni ripfumelo eRitweni ra Xikwembu swi nga hi pfuna njhani?
8 Emahlweninyana ka rifu ra yena ra gandzelo, Yesu u byele valandzeri va yena a ku: “Mi nga pfumeleli timbilu ta n’wina ti karhateka. Kombisani ripfumelo eka Xikwembu, mi kombisa ripfumelo ni le ka mina.” (Yohane 14:1) Leswi hi nga Vakreste, hi ni ripfumelo eka Xikwembu ni le ka N’wana wa xona. Kambe ku vuriwa yini hi Rito ra Xikwembu? Ri nga va ni nkucetelo lowunene evuton’wini bya hina loko hi ri dyondza hi tlhela hi tirhisa leswi hi swi dyondzaka hi tlhela hi tshemba leswaku ri nyikela ndzayo ni nkongomiso lowunene ngopfu.—Vaheveru 4:12.
9, 10. Xana u nga swi hlamusela njhani leswi vuriwaka malunghana ni ripfumelo eka Yakobo 1:5-8?
9 Leswi hi nga vanhu lava nga hetisekangiki, vutomi bya hina byi taleriwe hi swiphiqo. Hambiswiritano, loko hi va ni ripfumelo eRitweni ra Xikwembu hi nga pfuneka swinene. (Yobo 14:1) Hi xikombiso, a hi nge, a hi swi tivi leswaku hi nga langutana njhani ni ndzingo wo karhi. Rito ra Xikwembu ri hi nyika xitsundzuxo lexi: “Loko mani na mani eka n’wina a kayivela vutlhari, a a hambete a kombela eka Xikwembu, hikuva xi nyika hinkwavo hi mbilu yo basa, handle ka ku sandza; kutani u ta nyikiwa byona. Kambe a a hambete a kombela hi ripfumelo, a nga kanakani nikatsongo, hikuva loyi a kanakanaka u fana ni gandlati ra lwandle leri fambisiwaka hi mheho ri hungeriwa hala ni hala. Entiyisweni, munhu yoloye a nga tshuki a ehleketa leswaku u ta amukela nchumu hambi wu ri wihi eka Yehovha; i munhu la nga tiyisekiki, loyi a nga yimangiki a tiya etindleleni ta yena hinkwato.”—Yakobo 1:5-8.
10 Yehovha Xikwembu a nge hi sandzi loko hi pfumala vutlhari kutani hi byi khongelela. Ku ri na sweswo, u ta hi pfuna leswaku hi languta ndzingo hi ndlela leyi faneleke. Vakreste-kulorhi va nga ha hi tsundzuxa Matsalwa lama pfunaka kumbe hi nga ma kuma loko hi ri karhi hi dyondza Bibele. Kumbe hi nga ha kongomisiwa hi moya lowo kwetsima wa Yehovha hi ndlela yo karhi. Tata wa hina wa le tilweni u ta hi nyika vutlhari byo langutana ni miringo loko hi ‘hambeta hi kombela hi ripfumelo, hi nga kanakani nikatsongo.’ Loko a hi fana ni gandlati leri fambisiwaka hi mheho elwandle, a hi nga ta langutela ku kuma nchumu eka Xikwembu. Ha yini? Hikuva leswi swi nga ha vula leswaku a hi nga tiyiseki naswona a hi nga tiyanga exikhongelweni kumbe hi tindlela tin’wana—ina, ni le ku kombiseni ka ripfumelo. Hikwalaho hi fanele hi va ni ripfumelo leri tiyeke eRitweni ra Xikwembu ni le nkongomisweni lowu ri wu nyikelaka. A hi kambisiseni swikombiso swin’wana swa ndlela leyi ri pfunaka ha yona ni ndlela leyi ri nyikelaka nkongomiso ha yona.
Ripfumelo Ni Swakudya
11. Ku va ni ripfumelo eRitweni ra Xikwembu ku hi nyika xitiyisekiso xihi malunghana ni swilaveko swa hina swa siku ni siku?
11 Ku vuriwa yini loko sweswi hi pfumala swakudya leswi eneleke ni vutshamo kumbe hi ri evuswetini? Ku va ni ripfumelo eRitweni ra Xikwembu swi hi nyika ku langutela loku tiyisekisiweke ka leswaku Yehovha u ta khathalela swilaveko swa hina swa siku ni siku ni leswaku eku heteleleni u ta endla leswaku hinkwavo lava va n’wi rhandzaka va nga pfumali nchumu. (Pisalema 72:16; Luka 11:2, 3) Hi nga ha swi kuma swi khutaza ku anakanyisisa hi ndlela leyi Yehovha a lunghiseleleke Eliya swakudya ha yona hi nkarhi wa ndlala. Endzhakunyana, Xikwembu hi singita xi endle leswaku mapa ni mafurha leswi a swi wundla wansati, n’wana wa wansati loyi na Eliya, swi nga heli. (1 Tihosi 17:2-16) Hilaha ku fanaka Yehovha u lunghiselele muprofeta Yeremiya swakudya hi nkarhi lowu Vababilona a va rhendzele Yerusalema. (Yeremiya 37:21) Hambileswi Yeremiya na Eliya a va ri ni swiphiqo swo kuma swakudya, Yehovha u va khathalerile. Ninamuntlha wa ha va endlela leswi fanaka vanhu lava kombisaka ripfumelo eka yena.—Matewu 6:11, 25-34.
12. Xana ripfumelo ri nga va pfuna njhani vanhu leswaku va kuma swilaveko swa xisekelo?
12 Ripfumelo swin’we ni ku tirhisa misinya ya milawu ya Bibele a swi nge hi endli hi va swigwili kambe swi ta hi pfuna leswaku hi kuma swilaveko swa xisekelo. Hi xikombiso: Bibele yi hi tsundzuxa leswaku hi tshembeka, hi va ni vutshila hi tlhela hi tirha hi matimba. (Swivuriso 22:29; Eklesiasta 5:18, 19; 2 Vakorinto 8:21) A hi fanelanga hi wu tekela ehansi nkoka wa ku va mutirhi la nga ni ndhuma leyinene. Hambi ku ri etindhawini leti mintirho leyi hakelaka kahle yi kalaka, vatirhi lava tshembekaka, lava nga ni vutshila ni lava hisekaka va yi kuma. Hambileswi vatirhi vo tano va nga ni swilo leswitsongo leswi vonakaka, hakanyingi va na swona swilaveko swa xisekelo naswona va eneriseka hi ku tiva leswaku va dya swakudya leswi va swi tirheleke.—2 Vatesalonika 3:11, 12.
Ripfumelo Ri Hi Pfuna Ku Tiyisela Gome
13, 14. Ripfumelo ri hi pfuna njhani leswaku hi tiyisela gome?
13 Rito ra Xikwembu ri swi kombisa kahle leswaku i swa ntumbuluko ku va ni gome loko hi feriwa hi munhu loyi hi n’wi rhandzaka. Abrahama, mupatriyarka wo tshembeka u ririle loko nsati wa yena Sara la rhandzekaka a fa. (Genesa 23:2) Davhida u ve ni gome lerikulu endzhaku ka loko a twe leswaku n’wana wa yena Absalomu u file. (2 Samuwele 18:33) Hambi ku ri Yesu wanuna wo tshembeka u ririle loko munghana wa yena Lazaro a fa. (Yohane 11:35, 36) Loko hi feriwa hi loyi hi n’wi rhandzaka, hi nga ha va ni gome lerikulu kambe ripfumelo leri hi nga na rona eswitshembisweni swa Rito ra Xikwembu, ri nga hi pfuna leswaku hi tiyisela gome ro tano.
14 Pawulo u te: “Ndzi ni ntshembo eka Xikwembu . . . leswaku ku ta va ni ku pfuxiwa ka lava lulameke ni ka lava nga lulamangiki.” (Mintirho 24:15) Hi fanele hi va ni ripfumelo elunghiselelweni ra Xikwembu ra ku pfuxa vanhu vo tala eku feni. (Yohane 5:28, 29) Van’wana va lava va nga ta pfuxiwa i Abrahama na Sara, Isaka na Raveka, Yakobo na Leya—lava sweswi va feke naswona va rindzeleke ku pfuxeriwa emisaveni leyintshwa ya Xikwembu. (Genesa 49:29-32) Kunene ku ta va ni ntsako lowukulu loko vanhu lava rhandzekaka va pfuxiwa eku feni leswaku va ta hanya laha misaveni! (Nhlavutelo 20:11-15) Enkarhini wa sweswi, ripfumelo a ri nge ma susi hinkwawo maxangu, kambe ri ta hi endla leswaku hi tshama hi ri ekusuhi ni Xikwembu, lexi hi pfunaka leswaku hi tiyisela ku feriwa hi varhandziwa va hina.—Pisalema 121:1-3; 2 Vakorinto 1:3.
Ripfumelo Ri Tiyisa Lava Karhatekeke
15, 16. (a) Ha yini hi nga vulaka leswaku a hi nchumu lowu hlamarisaka loko lava va kombisaka ripfumelo va karhateka? (b) Xana hi nga endla yini leswaku hi langutana ni ku karhateka?
15 Rito ra Xikwembu ri tlhela ri kombisa leswaku hambi ku ri lava nga ni ripfumelo va nga hlaseriwa hi ku karhateka. Loko Yobo a hlaseriwe hi ndzingo lowukulu, u twe onge Xikwembu xi n’wi fularherile. (Yobo 29:2-5) Muti wa Yerusalema lowu onhakeke swin’we ni makhumbi ya wona swi endle leswaku Nehemiya a karhateka. (Nehemiya 2:1-3) Loko Petro a ta va a landzule Yesu u karhateke swinene lerova a “rila hi xiviti.” (Luka 22:62) Naswona Pawulo u khutaze vapfumeri-kulobye va le vandlheni ra le Tesalonika leswaku va “[vulavula] hi ku chavelela eka mimoya-xiviri leyi karhatekeke.” (1 Vatesalonika 5:14) Hikwalaho, a swi hlamarisi leswi namuntlha lava nga ni ripfumelo va karhatekaka. Kutani, hi nga endla yini leswaku hi langutana ni ku karhateka koloko?
16 Hi nga ha karhateka loko hi langutana ni swiphiqo swo hlayanyana leswikulu. Ematshan’weni yo swi teka swi ri xiphiqo xin’we lexikulu, swi nga va swinene loko ho swi tlhantlha ha xin’we-xin’we hi ku tirhisa misinya ya milawu ya Bibele. Leswi swi nga ha hunguta ku karhateka ka hina. Ku tirha hi ndlela leyi ringaniseriweke ni ku wisa kahle na swona swi nga ha pfuna. Kambe ntiyiso i wun’we: Ku pfumela eka Xikwembu ni le Ritweni ra xona ku endla leswaku hi hlayiseka hi tlhelo ra moya hikuva ku hi endla hi tiyiseka leswaku xa khathala swinene hi hina.
17. Hi swi tivisa ku yini leswaku Yehovha wa khathala hi hina?
17 Petro u hi nyika xitiyisekiso lexi xi chavelelaka: “Titsongahateni ehansi ka voko ra matimba ra Xikwembu, leswaku xi ta mi tlakusa hi nkarhi lowu faneleke; mi ri karhi mi lahlela ku vilela hinkwako ka n’wina eka xona, hikuva xa mi khathalela.” (1 Petro 5:6, 7) Mupisalema u yimbelerile: “Yehovha u seketela hinkwavo lava waka, naswona u yimisa hinkwavo lava nkhinsamaka.” (Pisalema 145:14) Hi fanele hi tshemba switiyisekiso leswi hikuva swi kumeka eRitweni ra Xikwembu. Hambiloko hi hambeta hi karhateka, swi tiyisa ripfumelo swonghasi ku tiva leswaku hi nga lahlela ku vilela ka hina hinkwako eka Tata wa hina wa le tilweni la nga ni rirhandzu!
Ripfumelo Ni Miringo Yin’wana
18, 19. Ripfumelo ri hi pfuna njhani leswaku hi langutana ni vuvabyi ni ku chavelela vapfumeri-kulorhi lava vabyaka?
18 Ripfumelo ra hina ri nga ha ringiwa swinene loko hina kumbe van’wana lava hi va rhandzaka va vabya swinene. Hambileswi Bibele yi nga vuliki leswaku Vakreste vo tanihi Epafrodito, Timotiya na Trofimo va hanyisiwile hi singita kumbe a va hanyisiwanga, handle ko kanakana Yehovha u va pfunile leswaku va tiyisela. (Vafilipiya 2:25-30; 1 Timotiya 5:23; 2 Timotiya 4:20) Ku tlula kwalaho, malunghana ni “un’wana ni un’wana la ehleketelaka xisiwana,” mupisalema u yimbelerile a ku: “Yehovha u ta n’wi seketela ehenhla ka mubedo wa vuvabyi; kunene sangu ra yena u ta ri cinca hi nkarhi wa ku vabya.” (Pisalema 41:1-3) Xana marito ya mupisalema ma nga hi pfuna njhani leswaku hi chavelela vapfumeri-kulorhi lava vabyaka?
19 Ndlela yin’wana yo pfuna van’wana hi tlhelo ra moya i ku khongela ni lava vabyaka swin’we ni ku tlhela hi va khongelela. Hambiloko hi nga kombeli leswaku va hanyisiwa hi singita namuntlha, hi nga kombela leswaku Xikwembu xi va nyika matimba yo tiyisela mavabyi ya vona ni leswaku xi va nyika matimba ya moya lawa va ma lavaka leswaku va tiyisela minkarhi yoleyo ya ku tsana. Yehovha u ta va tiyisa naswona ripfumelo ra vona ri ta tiyisiwa hi ku langutela nkarhi lowu ha wona ku nga ta va ku ri “hava munhu la tshamaka kona la nga ta ku: ‘Ndza vabya.’” (Esaya 33:24) Kunene swa chavelela ku tiva leswaku ha Yesu Kreste la pfuxiweke na hi Mfumo wa Xikwembu, vanhu lava yingisaka va ta ntshunxiwa hilaha ku heleleke exidyohweni, evuvabyini ni le ku feni! Hi nkhensa Yehovha hikwalaho ka ntshembo lowu lowukulu, hikuva hi yena ‘la nga ta horisa mavabyi ya hina hinkwawo.’—Pisalema 103:1-3; Nhlavutelo 21:1-5.
20. Ha yini ku nga vuriwaka leswaku ripfumelo ri nga hi pfuna leswaku hi tiyisela “masiku ya khombo” ya vudyuhari?
20 Ripfumelo ri nga tlhela ri hi pfuna ku tiyisela “masiku ya khombo” ya vudyuhari, loko rihanyo ni matimba swi tsana. (Eklesiasta 12:1-7) Kutani vadyuhari lava nga exikarhi ka hina va nga khongela ku fana na mupisalema la dyuhaleke la yimbeleleke a ku: “U ntshembo wa mina, Wena Yehovha, Hosi leyi Lawulaka . . . U nga ndzi cukumeti emalembeni ya vudyuhari; loko matimba ya mina ma hela, u nga ndzi siyi.” (Pisalema 71:5, 9) Mupisalema u swi vonile leswaku u lava nseketelo wa Yehovha, hilaha Vakreste-kulorhi vo tala lava dyuhaleleke entirhweni wa Xikwembu va wu lavaka hakona. Hikwalaho ka leswi va nga ni ripfumelo, va nga tiyiseka leswaku mavoko ya Yehovha lama nga karhaliki, ma va seketela.—Deteronoma 33:27.
Tshama U Ri Ni Ripfumelo eRitweni Ra Xikwembu
21, 22. Ku va ni ripfumelo swi byi khumba njhani vuxaka bya hina ni Xikwembu?
21 Ku va ni ripfumelo eka mahungu lamanene ni le Ritweni ra Xikwembu hinkwaro swi hi pfuna leswaku hi tshinela swinene eka Yehovha. (Yakobo 4:8) I ntiyiso, i Hosi ya hina leyi Lawulaka, naswona i Muvumbi wa hina ni Tata wa hina. (Esaya 64:8; Matewu 6:9; Mintirho 4:24) Mupisalema u yimbelerile: “U Tata wa mina, Xikwembu xa mina ni Ribye ra mina ra ku ponisiwa.” (Pisalema 89:26) Loko hi kombisa ripfumelo eka Yehovha ni le Ritweni ra yena leri huhuteriweke, na hina hi nga n’wi teka a ri ‘Ribye ra hina ra ku ponisiwa.’ Rero i lunghelo leri tsakisaka hakunene!
22 Yehovha i Tata wa Vakreste lava totiweke hi moya swin’we ni vanakulobye va vona lava nga ni ntshembo wa laha misaveni. (Varhoma 8:15) Naswona ku va ni ripfumelo eka Tata wa hina wa le tilweni a swi nge pfuki swi hi khomise tingana. Davhida u te: “Loko tatana na manana vo ndzi tshika, Yehovha u ta ndzi teka.” (Pisalema 27:10) Ku tlula kwalaho, hi ni xitiyisekiso lexi: “Yehovha a nge va tshiki vanhu vakwe hikwalaho ka vito rakwe lerikulu.”—1 Samuwele 12:22.
23. I yini lexi lavekaka eka hina leswaku hi va ni vuxaka lebyi nga heriki na Yehovha?
23 Ina, leswaku hi va ni vuxaka lebyi nga heriki na Yehovha, hi fanele hi va ni ripfumelo eka mahungu lamanene hi tlhela hi amukela Matsalwa leswi ma nga xiswona—Rito ra Xikwembu. (1 Vatesalonika 2:13) Hi fanele hi va ni ripfumelo leri heleleke eka Yehovha kutani hi pfumelela Rito ra yena ri hi voningela ndlela ya hina. (Pisalema 119:105; Swivuriso 3:5, 6) Ripfumelo ra hina ri ta kula loko hi ri karhi hi khongela eka yena, naswona hi wu tshemba swinene ntwela-vusiwana wa yena, ni tintswalo ta yena ni mpfuno wa yena.
24. I marito wahi lama chavelelaka lama kumekaka eka Varhoma 14:8?
24 Ripfumelo ri hi susumetele ku tinyiketela eka Xikwembu hilaha ku nga heriki. Loko hi ri ni ripfumelo leri tiyeke, hambiloko ho fa, ha ha ri malandza ya xona lama tinyiketeleke lama nga ni ntshembo wa ku pfuxiwa eku feni. Ina, “loko hi hanya ni loko hi fa, hi va Yehovha.” (Varhoma 14:8) A hi tshameni hi ri karhi hi anakanya hi mhaka yoleyo leyi khutazaka loko hi ri karhi hi hlayisa ntshembo wa hina eRitweni ra Xikwembu ni ku hambeta hi ri ni ripfumelo eka mahungu lamanene.
A Wu Ta Hlamurisa Ku Yini?
• Ripfumelo i yini, naswona ha yini hi fanele hi va ni mfanelo leyi?
• Ha yini swi ri swa nkoka leswaku hi va ni ripfumelo eka mahungu lamanene ni le Ritweni ra Xikwembu hinkwaro?
• Ripfumelo ri hi pfunisa ku yini leswaku hi langutana ni miringo yo hambana-hambana?
• I yini lexi nga ta hi pfuna leswaku hi tshama hi ri ni ripfumelo?
[Swivutiso Swa Dyondzo]
[Swifaniso leswi nga eka tluka 12]
Yehovha u phamele Yeremiya na Eliya swakudya hikuva a va ri ni ripfumelo
[Swifaniso leswi nga eka tluka 13]
Yobo, Petro na Nehemiya a va ri ni ripfumelo leri tiyeke
[Swifaniso leswi nga eka tluka 15]
Leswaku hi va ni vuxaka lebyi nga heriki na Yehovha, hi fanele hi va ni ripfumelo eka mahungu lamanene