‘Mi Hambeta Mi Tswala Mihandzu Yo Tala’

“Mi [hambeta] mi tswala mihandzu yo tala ni ku tikombisa mi ri vadyondzisiwa va mina.”—YOHANE 15:8.

1. (a) I yini leswi languteriweke eka mudyondzisiwa leswi Yesu a swi byeleke vaapostola va yena? (b) Hi xihi xivutiso lexi hi faneleke hi tivutisa xona?

AKU ri nimadyambu emahlweni ka ku dlayiwa ka yena. Yesu a a hete nkarhi wo tala a ri karhi a khutaza vaapostola va yena hi mbilu hinkwayo. Swi nga ha endleka leswaku a ku ri exikarhi ka vusiku, kambe hikwalaho ka leswi Yesu a a rhandza vanghana vakwe lavakulu, u ye emahlweni a ri karhi a bula na vona. Kutani, loko a ri karhi a bula na vona, u va tsundzuxe hi xilaveko xin’wana lexi a va fanele va xi fikelela leswaku va tshama va ri vadyondzisiwa va yena. U te: “Tatana u vangamisiwa hi sweswo, leswi mi hambetaka mi tswala mihandzu yo tala ni ku tikombisa mi ri vadyondzisiwa va mina.” (Yohane 15:8) Xana hina namuntlha ha xi fikelela xilaveko lexi xa ku va mudyondzisiwa? Xana swi vula yini ku “tswala mihandzu yo tala”? Leswaku hi kuma nhlamulo ya kona, a hi kambisiseni bulo leri veke kona madyambu wolawo.

2. Hi xihi xifaniso lexi vulavulaka hi mihandzu lexi Yesu a vulavuleke ha xona nimadyambu emahlweni ka rifu rakwe?

² Xitsundzuxo xa ku tswala mihandzu xi huma exifanisweni lexi Yesu a xi hlamuseleke vaapostola va yena. U te: “Mina ndzi murhi wa vhinya wa ntiyiso, naswona Tatana i murimi. Rhavi rin’wana ni rin’wana leri nga eka mina leri nga tswaliki mihandzu wa ri susa, naswona rin’wana ni rin’wana leri tswalaka mihandzu wa ri basisa, leswaku ri tswala mihandzu leyi engetelekeke. Se mi basile hikwalaho ka rito leri ndzi mi byeleke rona. Tshamani mi ri ni vun’we na mina, na mina ndzi ri ni vun’we na n’wina. Tanihi leswi rhavi ri nga ta ka ri nga swi koti  ku tswala mihandzu hi roxe handle ka loko ri tshama emurhini wa vhinya, na n’wina hi ndlela leyi fanaka a mi nge yi tswali, handle ka loko mi tshama mi ri ni vun’we na mina. Hi mina murhi wa vhinya, n’wina mi marhavi. . . . Tatana u vangamisiwa hi sweswo, leswi mi hambetaka mi tswala mihandzu yo tala ni ku tikombisa mi ri vadyondzisiwa va mina. Tanihi leswi Tatana a ndzi rhandzeke nileswi ndzi mi rhandzeke, tshamani erirhandzwini ra mina. Loko mi hlayisa swileriso swa mina, mi ta tshama erirhandzwini ra mina.”—Yohane 15:1-10.

3. Valandzeri va Yesu va fanele va endla yini leswaku va tswala mihandzu?

³ Exifanisweni lexi, Yehovha i Murimi, Yesu i murhi wa vhinya kasi vaapostola lava Yesu a a vulavula na vona i marhavi. Vaapostola a va ta veka mihandzu loko ntsena va tikarhatela ku ‘tshama va ri ni vun’we’ na Yesu. Endzhaku ka sweswo Yesu u hlamusele ndlela leyi vaapostola a va ta swi kota ha yona ku hlayisa vun’we lebyi bya nkoka a ku: “Loko mi hlayisa swileriso swa mina, mi ta tshama erirhandzwini ra mina.” Endzhakunyana muapostola Yohane u tsalele Vakreste-kulobye marito lama fanaka a ku: “Loyi a hlayisaka swileriso swa [Kreste] u tshama a ri ni vun’we na [ye]na.” * (1 Yohane 2:24; 3:24) Hikwalaho, loko valandzeri va Kreste va hlayisa swileriso swa yena, va tshama va ri ni vun’we na yena, naswona vun’we byebyo byi endla leswaku va tswala mihandzu. Xana hi fanele hi tswala mihandzu ya njhani?

Xilaveko Xo Kula

4. Hi nga dyondza yini emhakeni ya leswaku Yehovha u “susa” rhavi rin’wana ni rin’wana leri nga tswaliki mihandzu?

⁴ Exifanisweni xa vhinya, Yehovha u “susa” rhavi kumbe ku ri tsema loko ri nga veki mihandzu. Xana leswi swi hi byela yini? Swi hi byela leswaku vadyondzisiwa hinkwavo va fanele va va ni mihandzu, nileswaku hinkwavo va nga swi kota ku va ni mihandzu ku nga khathariseki swiyimo swa vona kumbe ku tsana ka vona. Hikwalaho a swi fambisani ni tindlela ta Yehovha ta rirhandzu ku “susa” munhu kumbe ku n’wi tekela lunghelo ro va mudyondzisiwa wa Kreste loko a tsandzeka ku fikelela swin’wana leswi nga ehenhla ka matimba ya yena.—Pisalema 103:14; Vakolosa 3:23; 1 Yohane 5:3.

5. (a) Xifaniso xa Yesu xi swi kombisa njhani leswaku hi nga endla nhluvuko eku tswaleni ka mihandzu? (b) Hi yihi mixaka mimbirhi ya mihandzu leyi hi nga ta yi kambisisa?

⁵ Xifaniso xa Yesu xa nsinya wa vhinya xi tlhela xi kombisa leswaku hambiloko hi nga koti ku endla swilo hinkwaswo, hi fanele hi ndlandlamuxa leswi hi swi endlaka tanihi vadyondzisiwa. Xiya ndlela leyi Yesu a swi vekeke ha yona: “Rhavi rin’wana ni rin’wana leri nga eka mina leri nga tswaliki mihandzu wa ri susa, naswona rin’wana ni rin’wana leri tswalaka mihandzu wa ri basisa, leswaku ri tswala mihandzu leyi engetelekeke.” (Yohane 15:2) Loko a gimeta xifaniso xa yena, Yesu u khutaze valandzeri vakwe ku tswala “mihandzu leyi engetelekeke.” (Ndzimana 8) Xana leswi swi vula yini? Tanihi vadyondzisiwa, a hi fanelanga hi eneriseka hi leswi se hi swi endleke. (Nhlavutelo 3:14, 15, 19) Ematshan’weni ya sweswo, hi fanele hi lava tindlela to endla nhluvuko eku tswaleni ka mihandzu. I mihandzu ya muxaka muni leyi hi faneleke hi tikarhatela ku yi tswala hi xitalo? I (1) “mihandzu ya moya” ni (2) mihandzu ya Mfumo.—Vagalatiya 5:22, 23; Matewu 24:14.

Mihandzu Ya Timfanelo Ta Vukreste

6. Xana Yesu Kreste u wu kandziyisa njhani nkoka wa mbhandzu wa moya lowu boxiweke ku sungula?

⁶ Wo sungula eka “mihandzu ya moya” i rirhandzu. Moya lowo kwetsima wa Xikwembu wu endla leswaku Vakreste va va na rirhandzu, hikuva va yingisa xileriso lexi Yesu a xi nyikeleke emahlweninyana ko vulavula hi xifaniso xa vhinya leyi tswalaka mihandzu. U byele vaapostola vakwe a ku: “Ndzi mi nyika xileriso lexintshwa, leswaku mi rhandzana.” (Yohane 13:34) Entiyisweni, eka bulo ra yena hinkwaro eka vusiku byebyo byo hetelela bya vutomi bya yena bya laha misaveni, Yesu u tsundzuxe vaapostola vakwe hi ku phindha-phindha hi xilaveko xo kombisa mfanelo ya rirhandzu.—Yohane 14:15, 21, 23, 24; 15:12, 13, 17.

7. Muapostola Petro u swi kombise njhani leswaku ku tswala mihandzu swi fambisana ni ku kombisa timfanelo leti fanaka ni ta Kreste?

⁷ Petro, loyi a a ri kona hi vusiku byebyo, u swi twisisile leswaku rirhandzu leri fanaka ni ra Kreste  ni timfanelo leti yelanaka na rona ti fanele ti kombisiwa exikarhi ka vadyondzisiwa va Kreste va xiviri. Endzhaku ka malembe yo hlayanyana, Petro u khutaze Vakreste ku hlakulela timfanelo to tanihi ku tikhoma, rirhandzu ra vumakwerhu ni rirhandzu. U engetele hileswaku loko hi endla tano swi ta hi sivela leswaku hi “nga vi lava tsaneke kumbe lava nga vekiki mihandzu.” (2 Petro 1:5-8) Ku nga khathariseki leswaku swiyimo swa hina hi swihi, hi nga swi kota ku kombisa mihandzu ya moya. Hikwalaho, onge hi nga tikarhatela ku kombisa swinene rirhandzu, musa, ku olova ni timfanelo tin’wana leti fanaka ni ta Kreste, hikuva “a wu kona nawu lowu solaka swilo sweswo.” (Vagalatiya 5:23) Hakunene, a hi tswaleni “mihandzu leyi engetelekeke.”

Ku Tswala Mihandzu Ya Mfumo

8. (a) Hi kwihi ku yelana loku nga kona exikarhi ka mihandzu ya moya ni mihandzu ya Mfumo? (b) Hi xihi xivutiso lexi hi faneleke hi anakanyisisa ha xona?

⁸ Mihandzu ya mivala-vala ni leyi phomisaka marha yi sasekisa murhi. Kambe, nkoka wa mihandzu yoleyo wu tlula ku saseka ka yona. Mihandzu yi tlhela yi pfuna eku andziseni ka mbewu ya murhi wa kona. Hilaha ku fanaka, mihandzu ya moya a yo sasekisa vumunhu bya hina bya Vukreste ntsena. Timfanelo to tanihi rirhandzu ni ripfumelo ti tlhela ti hi susumetela ku hangalasa rungula ra Mfumo leri fanaka ni mbewu leri kumekaka eRitweni ra Xikwembu. Xiya ndlela leyi muapostola Pawulo a ku kandziyisaka hakona ku yelana ka nkoka ka timfanelo leti. U ri: “Na hina hi kombisa ripfumelo [xiphemu xa mihandzu ya moya] hikokwalaho ha vulavula.” (2 Vakorinto 4:13) Hi ndlela leyi, Pawulo u ya emahlweni a hlamusela leswaku hi ‘nyikela eka Xikwembu xitlhavelo xa ku dzunisa, ku nga mbhandzu wa milomu’—i mbhandzu wa vumbirhi lowu hi faneleke hi wu kombisa. (Vaheveru 13:15) Xana ku ni laha hi faneleke hi antswisa kona evuton’wini bya hina leswaku hi tswala mihandzu leyi engetelekeke, kunene hi tswala “mihandzu yo tala,” tanihi vachumayeri va Mfumo wa Xikwembu?

9. Xana ku tswala mihandzu swa fana ni ku endla vadyondzisiwa? Hlamusela.

⁹ Leswaku hi xi hlamula kahle xivutiso lexi, hi fanele hi rhanga hi twisisa leswi tekiwaka swi ri mihandzu ya Mfumo. Xana hi ta va hi tiyisile loko hi gimeta hileswaku ku tswala mihandzu swi vula ku endla vadyondzisiwa? (Matewu 28:19) Xana mihandzu leyi hi nga ta yi tswala kahle-kahle yi vula vanhu lava hi va pfunaka leswaku va va vagandzeri va Yehovha lava khuvuriweke? E-e. Loko a swi ri tano, a swi ta ti heta matimba swinene Timbhoni leti rhandzekaka leti se ti nga ni malembe ti ri karhi ti twarisa rungula ra Mfumo hi ku tshembeka ensin’wini leyi vanhu va kona va nga ri amukeliki kahle rungula. Phela, loko mihandzu ya Mfumo leyi hi yi tswalaka a yi fanekiseriwa hi vadyondzisiwa lavantshwa ntsena, Timbhoni toleto leti hisekaka a ti ta fana ni marhavi lama nga tswaliki ya le xifanisweni xa Yesu! Entiyisweni a swi tano. Kutani, i yini mihandzu ya Mfumo leyikulu ya vutirheli bya hina?

Ku Hangalasa Mbewu Ya Mfumo Swi Tswala Mihandzu

10. Xana xifaniso xa Yesu xa muhaxi ni xa mixaka ya misava xi swi kombisa njhani leswi mihandzu ya Mfumo yi nga swona nileswi yi nga riki swona?

¹⁰ Xifaniso xa Yesu xa muhaxi ni misava yo hambana-hambana xi nyikela nhlamulo—ku nga  nhlamulo leyi khutazaka eka lava va chumayelaka ensin’wini leyi vanhu va kona va nga ri amukeliki kahle rungula. Yesu u vule leswaku mbewu i rungula ra Mfumo leri kumekaka eRitweni ra Xikwembu, kasi misava yi yimela mbilu ya munhu yo fanekisela. Mbewu yin’wana “yi [wele] emisaveni leyinene, kuteloko yi mirile, yi humesa mihandzu.” (Luka 8:8) I mihandzu ya muxaka muni? Phela loko rihlanga ra koroni ri kurile a ri tswali rihlanga rin’wana ra koroni kambe ri tswala mbewu yin’wana. Hilaha ku fanaka, Mukreste u tswala mbewu leyintshwa ya Mfumo ku nga ri vadyondzisiwa lavantshwa.

11. Xana yi nga hlamuseriwa njhani mihandzu ya Mfumo?

¹¹ Hikwalaho, emhakeni leyi mihandzu a hi vadyondzisiwa lavantshwa kumbe timfanelo letinene ta Vukreste. Tanihi leswi mbewu leyi rimiweke ku nga rito ra Mfumo, mihandzu yi fanele yi yimela ku andza lokukulu ka mbewu yoleyo. Ku tswala mihandzu emhakeni leyi ku kombetela eka ku vulavula hi Mfumo. (Matewu 24:14) Xana hi nga swi kota ku tswala mihandzu yoleyo ya Mfumo—ku nga ku chumayela mahungu lamanene ya Mfumo—ku nga khathariseki leswaku swiyimo swa hina swi njhani? Ina, hi nga swi kota! Yesu u hlamusela xivangelo xa kona exifanisweni xexo.

Ku Endla Leswi Hi Nga Swi Kotaka Leswaku Hi Dzunisa Xikwembu

12. Xana Vakreste hinkwavo va nga swi kota ku tswala mihandzu ya Mfumo? Hlamusela.

¹² Yesu u te: “Leyi haxiweke emisaveni leyinene . . . yin’wana yi veka hilaha ku phindhiweke ka 100, leyin’wana ka 60, leyin’wanyana ka 30.” (Matewu 13:23) Mavele lama byariweke ensin’wini ma nga ha hambana hi ku ya hi swiyimo. Hilaha ku fanaka, ndlela leyi hi chumayelaka ha yona mahungu  lamanene yi nga ha hambana ni ya van’wana hi ku ya hi swiyimo swa hina, naswona Yesu u kombise leswaku wa yi tiva mhaka leyi. Van’wana va nga ha va ni nkarhi wo tala; van’wana va nga ha va ni rihanyo lerinene naswona va chivirika swinene. Xisweswo, leswi hi kotaka ku swi endla swi nga ha va swi tele kumbe swi ri switsongo ku tlula leswi van’wana va swi endlaka, kambe loko hi endla leswi nga ematimbeni ya hina Yehovha wa tsaka. (Vagalatiya 6:4) Hambiloko ku dyuhala kumbe vuvabyi swi kavanyeta ntirho wa hina wo chumayela, a swi kanakanisi leswaku Yehovha Tata wa hina loyi a nga ni ntwela-vusiwana, u hi teka ku fana ni van’wana lava va “hambetaka [va] tswala mihandzu yo tala.” Ha yini? Hikuva hi n’wi nyika ‘hinkwaswo leswi hi nga na swona’—ku nga ntirho lowu hi wu endlaka hi moya-xiviri wa hina hinkwawo. *—Marka 12:43, 44; Luka 10:27.

13. (a) Hi xihi xivangelo-nkulu xa hina xo “ya emahlweni” hi tswala mihandzu ya Mfumo? (b) I yini leswi nga ta hi pfuna ku hambeta hi tswala mihandzu ensin’wini leyi vanhu va kona va nga tsakeliki? (Vona bokisi eka tluka 21.)

¹³ Ku nga khathariseki mpimo lowu hi kotaka ku tswala mihandzu ya Mfumo ha wona, hi ta susumeteleka ku “ya emahlweni ni ku tswala mihandzu” loko hi xi twisisa xivangelo xa ku tswala mihandzu. (Yohane 15:16) Yesu u boxe xivangelo xa kona lexikulu: “Tatana u vangamisiwa hi sweswo, leswi mi hambetaka mi tswala mihandzu yo tala.” (Yohane 15:8) Ina, ntirho wa hina wo chumayela wu kwetsimisa vito ra Yehovha eka vanhu hinkwavo. (Pisalema 109:30) Honor, loyi a nga Mbhoni yo tshembeka ya malembe ya le xikarhi ka va-70, u ri: “Hambi ku ri ensin’wini leyi vanhu va kona va nga tsakeliki, i lunghelo lerikulu ku yimela La nge Henhla-henhla.” Loko Claudio, loyi a veke Mbhoni leyi hisekaka ku sukela hi 1974, a vutisiwe leswaku ha yini a hambeta a chumayela hambiloko ku ri vanhu vatsongo lava tsakelaka, u tshahe Yohane 4:34, laha hi hlayaka marito ya Yesu lama nge: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” Claudio u engeterile a ku: “Ku fana na Yesu, ndzi lava ku sungula ntirho wa mina wa ku va mutwarisi wa Mfumo ndzi tlhela ndzi wu heta.” (Yohane 17:4) Timbhoni ta Yehovha emisaveni hinkwayo ti pfumelelana na sweswo.—Vona bokisi leri nge “Ndlela Yo ‘Veka Mihandzu Hi Ku Tiyisela,’” eka tluka 21.

Ku Chumayela Ni Ku Dyondzisa

14. (a) Ntirho wa Yohane lowo Khuvula ni wa Yesu a wu ri ni swikongomelo swihi swimbirhi? (b) Xana u nga wu hlamusela njhani ntirho wa Vakreste namuntlha?

¹⁴ Muhuweleri wo sungula wa Mfumo loyi a boxiweke eka Tievhangeli, i Yohane lowo Khuvula. (Matewu 3:1, 2; Luka 3:18) Xikongomelo xa yena lexikulu a ku ri ku “nyikela vumbhoni” naswona u byi nyikele hi ripfumelo lerikulu na hi ntshembo wa “leswaku vanhu va mixaka hinkwayo va kholwa.” (Yohane 1:6, 7) Hakunene, van’wana lava Yohane a va chumayeleke va ve vadyondzisiwa va Kreste. (Yohane 1:35-37) Hikokwalaho, Yohane a a ri muchumayeri tlhelo muendli wa vadyondzisiwa. Yesu na yena a a ri muchumayeri tlhelo mudyondzisi. (Matewu 4:23; 11:1) Kutani a swi hlamarisi leswi Yesu a leriseke valandzeri vakwe ku chumayela rungula ra Mfumo ni ku tlhela va pfuna vanhu lava ri amukeleke leswaku va va vadyondzisiwa va yena. (Matewu 28:19, 20) Xisweswo ntirho wa hina namuntlha wu katsa ku chumayela ni ku dyondzisa.

15. Hi kwihi ku yelana loku nga kona eka ndlela leyi vanhu va lembe-xidzana ro sungula C.E. va ri amukeleke ha yona rungula ni leswi namuntlha va ri amukerisaka xiswona?

¹⁵ Van’wana va lava va tweke Pawulo loko a chumayela ni loko a dyondzisa hi lembe-xidzana ro sungula C.E., “va [sungule] ku kholwa swilo leswi vuriwaka; van’wanyana va nga kholwi.” (Mintirho 28:24) Ninamuntlha swi tano. Lexi vavisaka, mbewu yo tala ya Mfumo yi wela emisaveni leyi nga riki  yinene. Hambiswiritano, mbewu yin’wana ya ha wela emisaveni leyinene, yi mila yi tlhela yi kula hilaha Yesu a profeteke hakona. Hakunene, emisaveni hinkwayo vanhu vo tlula 5 000 hi xiringaniso va va vadyondzisiwa va ntiyiso va Kreste vhiki na vhiki hi lembe! Vadyondzisiwa lava lavantshwa va “kholwa swilo leswi vuriwaka,” hambiloko van’wana vo tala va nga kholwi. I yini lexi va pfuneke leswaku timbilu ta vona ti amukela rungula ra Mfumo? Hakanyingi ku khathala loku kombisiwaka hi Timbhoni—ku nga ku cheletiwa ka mbewu leya ha ku byariwaka, hi ndlela yo fanekisela—ku pfunile swinene. (1 Vakorinto 3:6) Xiya swikombiso swimbirhi ntsena.

Ku Khathala Swa Pfuna Swinene

16, 17. Ha yini swi ri swa nkoka ku khathala hi lava hi hlanganaka na vona ensin’wini?

¹⁶ Karolien, Mbhoni leya ha riki muntshwa ya le Belgium, yi endzele mukhegula loyi a a nga ri tsakeli rungula ra Mfumo. Leswi voko ra mukhegula loyi a a ri bandhichiwile, Karolien ni loyi a a famba na yena va lave ku n’wi pfuna kambe a ala. Endzhaku ka masiku mambirhi, Timbhoni leti ti tlhele ti endzela mukhegula loyi kutani ti n’wi vutisa leswaku u titwa njhani. Karolien u te: “Leswi swi pfune swinene. U hlamarisiwe hi ku vona leswaku a hi n’wi khathalela. U hi pfumelele leswaku hi nghena endlwini ya yena, naswona ku sunguriwe dyondzo ya Bibele.”

¹⁷ Sandi, loyi a nga Mbhoni ya le United States, na yena u khathalela lava a va chumayelaka. U kamba eka phepha-hungu ra kwalaho ehansi ka switiviso swa vana lava va ha ku tswariwaka kutani a endzela vatswari va kona a ri ni buku leyi nge Buku Yanga Ya Timhaka Ta Bibele. * Tanihi leswi manana a tshamaka a ri ekaya naswona a tsakelaka ku komba vaendzi n’wana wa yena, hakanyingi ku landzela bulo. Sandi wa hlamusela: “Ndzi vulavula ni vatswari va kona malunghana ni nkoka wa ku endla vuxaka ni n’wana laha ku tswariwaka hi ku n’wi hlayela swo karhi. Endzhaku ndzi vulavula hi mintlhontlho ya ku kurisa n’wana emisaveni ya namuntlha.” Manana un’wana ni vana va yena va tsevu va ha ku sungula ku tirhela Yehovha hikwalaho ka riendzo ro tano. Ku teka goza ku sungula ni ku khathala hi van’wana swi nga hi tisela vuyelo lebyi fanaka lebyi tsakisaka evutirhelini bya hina.

18. (a) Ha yini hinkwerhu hi nga swi kotaka ku “tswala mihandzu yo tala”? (b) Hi swihi swilaveko swinharhu swa ku va mudyondzisiwa leswi boxiweke eka Evhangeli ya Yohane leswi u tiyimiseleke ku swi fikelela?

¹⁸ Hakunene swa khutaza ku tiva leswaku hi nga swi kota ku “tswala mihandzu yo tala”! Hambiloko hi ri vantshwa kumbe hi dyuharile, hi ri ni rihanyo lerinene kumbe ro tsana, hi chumayela ensin’wini leyi vanhu va kona va tsakelaka kumbe va nga tsakeliki, hinkwerhu ka hina hi nga swi kota ku tswala mihandzu yo tala. Njhani? Hi ku kombisa mihandzu ya moya hi mpimo lowukulu ni hi ku twarisa rungula ra Mfumo wa Xikwembu hilaha hi nga swi kotaka hakona. Hilaha ku fanaka, hi lwela ku ‘tshama eritweni ra Yesu’ ni ku “rhandzana.” Ina, loko hi fikelela swilaveko leswi swinharhu swa nkoka swa ku va vadyondzisiwa leswi boxiweke eka Evhangeli ya Yohane, hi ta va hi kombisa leswaku ‘hakunene hi vadyondzisiwa va Kreste.’—Yohane 8:31; 13:35.

[Tinhlamuselo ta le hansi]

Swivutiso Swa Mpfuxeto

• Hi yihi mihandzu leyi hi faneleke hi yi tswala swinene?

• Ha yini hi nga swi kotaka ku fikelela pakani yo “tswala mihandzu yo tala”?

• Hi swihi swilaveko swinharhu swa nkoka swa ku va mudyondzisiwa leswi boxiweke eka Evhangeli ya Yohane leswi hi swi kambisiseke?

[Swivutiso Swa Dyondzo]

[Bokisi/Xifaniso lexi nga eka tluka 21]

NDLELA YO “VEKA MIHANDZU HI KU TIYISELA”

I YINI leswi ku pfunaka leswaku u hambeta u chumayela rungula ra Mfumo hi ku tshembeka ensin’wini leyi vanhu va kona va nga tsakeriki swinene? Hi leti tinhlamulo tin’wana leti pfunaka ku hlamula xivutiso lexi.

“Ku tiva leswaku Yesu u hi seketela swinene swi hi susumetela leswaku hi va ni ntshembo hi tlhela hi phikelela, ku nga khathariseki leswaku vanhu va angurisa ku yini ensin’wini.”—Harry loyi a nga ni malembe ya 72; la khuvuriweke hi 1946.

“Tsalwa ra 2 Vakorinto 2:17 ra ndzi khutaza minkarhi hinkwayo. Ri vula leswaku hi hlanganyela entirhweni wa nsimu leswaku ‘hi voniwa hi Xikwembu, swin’we na Kreste.’ Loko ndzi ri ensin’wini, ndzi tsakela ku va swin’we ni vanghana va mina lavakulu.”—Claudio wa malembe ya 43; loyi a khuvuriweke hi 1974.

“Entiyisweni, ntirho wa ku chumayela i ntlhontlho eka mina. Kambe, ndzi tokote ntiyiso wa marito lama kumekaka eka Pisalema 18:29 lama nge: ‘Hi Xikwembu xanga ndzi nga khandziya rirhangu.’”—Gerard wa malembe ya 79; loyi a khuvuriweke hi 1955.

“Loko ndzo kota ku hlaya tsalwa rin’we ntsena ensin’wini, ndza eneriseka ku tiva leswaku munhu un’wana u pfumele leswaku mbilu ya yena yi kambisisiwa hi Bibele.”—Eleanor wa malembe ya 26; loyi a khuvuriweke hi 1989.

“Ndzi tirhisa swingheniso swo hambana-hambana. Swi tele swinene lerova a ndzi nge swi koti ku swi tirhisa hinkwaswo eka malembe lawa ma ndzi saleleke.”—Paul wa malembe ya 79; loyi a khuvuriweke hi 1940.

“Loko vanhu va nga ndzi yingiseli a ndzi khunguvanyeki. Ndzi ringeta ku va ni xinghana eka vanhu, ndzi burisana na vona ndzi tlhela ndzi yingisa vonelo ra vona.”—Daniel wa malembe ya 75; loyi a khuvuriweke hi 1946.

“Ndzi hlangane ni vanhu lava ha ku khuvuriwaka lava ndzi byeleke leswaku ntirho wa mina wo chumayela wu va pfune swinene leswaku va va Timbhoni. Munhu un’wana u dyondze na vona Bibele mina ndzi nga swi tivi kutani a va pfuna ku endla nhluvuko. Swa ndzi tsakisa ku tiva leswaku ha khomisana eka vutirheli bya hina.”—Joan wa malembe ya 66; loyi a khuvuriweke hi 1954.

I yini leswi ku pfunaka ku “veka mihandzu hi ku tiyisela”?—Luka 8:15.

[Swifaniso leswi nga eka tluka 20]

Hi tswala mihandzu yo tala loko hi kombisa mihandzu ya moya ni ku chumayela rungula ra Mfumo

[Xifaniso lexi nga eka tluka 23]

Xana Yesu a a vula yini loko a byela vaapostola va yena a ku: “Hambeta[ni] mi tswala mihandzu yo tala”?