“Mi Tshama Eritweni Ra Mina”

“Loko mi tshama eritweni ra mina, hakunene mi vadyondzisiwa va mina.”—YOHANE 8:31.

1. (a) Loko Yesu a tlhelela etilweni, xana u siye yini emisaveni? (b) Hi swihi swivutiso leswi hi nga ta swi kambisisa?

LOKO Yesu Kreste, Musunguri wa Vukreste a tlhelela etilweni, a nga siyanga tibuku leti tsariweke hi yena emisaveni, a nga siyanga maribye ya switsundzuxo kumbe rifuwo leri a ri hlengeleteke. U siye vadyondzisiwa kun’we ni swilaveko swa ku va mudyondzisiwa. Entiyisweni, eka Evhangeli ya Yohane, Yesu u boxe swilaveko swinharhu swa nkoka leswi munhu wihi ni wihi loyi a lavaka ku va mulandzeri wakwe a faneleke a swi fikelela. Hi swihi swilaveko swa kona? Xana hi nga endla yini leswaku hi swi fikelela? Naswona hi nga tiyiseka njhani namuntlha leswaku ha faneleka ku va vadyondzisiwa va Kreste? *

2. Hi wihi nchumu wa nkoka lowu lavekaka leswaku u fanelekela ku va mudyondzisiwa, hilaha swi tsariweke hakona eka Evhangeli ya Yohane?

² Loko ka ha sele kwalomu ka tin’hweti ta tsevu leswaku a fa, Yesu u ye eYerusalema a ya chumayela ntshungu lowu a wu hlengeletanele ku ta tlangela Nkhuvo wa Mitsonga lowu a wu heta vhiki hinkwaro. Hikwalaho, loko nkhuvo wu ri exikarhi “vo tala va ntshungu va [pfumele] eka yena.” Yesu u hambete a chumayela, kutani hi siku ro hetelela ra nkhuvo, “vo tala [va tlhele] va pfumela eka yena.” (Yohane 7:10, 14, 31, 37; 8:30) Hi nkarhi wolowo, Yesu u yise nyingiso eka vapfumeri lavantshwa kutani a va byela nchumu wo hlawuleka lowu lavekaka leswaku va fanelekela ku va vadyondzisiwa, hilaha muapostola Yohane a tsaleke hakona: “Loko mi tshama eritweni ra mina, hakunene mi vadyondzisiwa va mina.”—Yohane 8:31.

3. I yini lexi lavekaka leswaku munhu a ‘tshama eritweni ra Yesu’?

³ Hi marito lawa, Yesu a a nga vuli swona leswaku vapfumeri lavantshwa a va nga ri na ripfumelo. Kambe a a vula leswaku a va pfulekeriwe hi lunghelo ra ku va vadyondzisiwa va yena—ntsena loko va tshama eritweni ra yena naswona va tiyisela. A va amukele rito ra yena, kambe sweswi a va fanele va ri namarhela. (Yohane 4:34; Vaheveru 3:14) Entiyisweni, Yesu a a teka ku tiyisela ku ri mfanelo ya nkoka eka valandzeri va yena lerova loko a bula ni vaapostola va yena ro hetelela, hilaha swi tsariweke hakona eka Evhangeli ya Yohane, Yesu u va khutaze kambirhi a ku: ‘Hambetani mi ndzi landzela.’ (Yohane 21:19, 22) Vakreste vo tala va le nkarhini wa khale va endle tano. (2 Yohane 4) I yini lexi va pfuneke ku tiyisela?

4. I yini leswi pfuneke Vakreste va le minkarhini ya khale leswaku va kota ku tiyisela?

⁴ Muapostola Yohane loyi a veke mudyondzisiwa wo tshembeka wa Kreste ku ringana kwalomu ka 70 wa malembe, u boxe yinhla ya nkoka. U bumabumele Vakreste vo tshembeka a ku: “Mi ni matimba, rito ra Xikwembu ri tshamile eka n’wina naswona mi hlule lowo homboloka.” Vadyondzisiwa lava va Kreste va tiyiserile kumbe va tshame eritweni ra Xikwembu hikuva rito ra Xikwembu a ri tshame eka vona. A va ri tlangela swinene. (1 Yohane 2:14, 24) Hilaha ku fanaka ninamuntlha, leswaku hi ‘tiyisela ku fika emakumu,’ hi fanele hi tiyiseka leswaku rito ra Xikwembu ri tshama eka hina. (Matewu 24:13) Xana hi nga swi endla njhani sweswo? Xifaniso lexi vuriweke hi Yesu xi nyikela nhlamulo.

‘Ku Twa Rito’

5. (a) I mixaka yingani ya misava leyi Yesu a vulavuleke ha yona eka xin’wana xa swifaniso swakwe? (b) Xana mbewu ni misava ya xifaniso xa Yesu swi fanekisela yini?

⁵ Yesu u vulavule hi xifaniso xa muhaxi loyi a haxaka mbewu, lexi tsariweke eka Tievhangeli ta Matewu, Marka na Luka. (Matewu 13:1-9, 18-23; Marka 4:1-9, 14-20; Luka 8:4-8, 11-15) Loko u ri  karhi u hlaya tievhangeli leti, u ta xiya leswaku mhaka-nkulu exifanisweni lexi hileswaku mbewu leyi fanaka yi wela emisaveni yo hambana-hambana, kutani ku va ni vuyelo byo hambana. Misava yo sungula i rikhwarha, ya vumbirhi yi ni maribye le hansi, kasi ya vunharhu yi tele mitwa. Ya vumune yi hambanile ni leyin’wana, hikuva i ‘misava leyinene.’ Hi ku ya hi nhlamuselo ya Yesu, mbewu i rungula ra Mfumo leri kumekaka eRitweni ra Xikwembu, naswona misava yi fanekisela vanhu lava swiyimo swa timbilu ta vona swi nga faniki. Hambileswi vanhu lava fanekiseriwaka hi misava yo hambana va nga ni swilo swo karhi leswi fanaka, lava va fanekiseriwaka hi misava leyinene va ni swilo swo karhi leswi va endlaka va nga fani ni lavan’wana.

6. (a) Muxaka wa vumune wa misava leyi nga exifanisweni xa Yesu wu hambana njhani ni leyin’wana yinharhu, naswona sweswo swi vula yini? (b) I yini leswi lavekaka leswaku hi tiyisela tanihi vadyondzisiwa va Kreste?

⁶ Rungula leri nga eka Luka 8:12-15 ri kombisa leswaku vanhu hinkwavo lava nga eka mixaka leyi ya mune ya misava ‘va twe rito.’ Kambe lava nga ni “mbilu yo xonga, leyinene” a va ‘twanga rito’ ntsena. Va ri ‘hlayisile ivi va veka mihandzu hi ku tiyisela.’ Misava leyinene leyi olovaka ku ya fika le hansi, yi pfumelela timitsu ta ximilana leswaku ti nghena ti twelela, kutani timbewu ti mila ti tlhela ti tswala mihandzu. (Luka 8:8) Hilaha ku fanaka, lava va nga ni mbilu leyinene va twisisa rito ra Xikwembu, va ri tsakela naswona va dzika va twelela eka rona. (Varhoma 10:10; 2 Timotiya 2:7) Rito ra Xikwembu ri tshama eka vona. Hikwalaho, va tswala mihandzu hi ku tiyisela. Xisweswo, ku laveka leswaku munhu a tlangela Rito ra Xikwembu hi mbilu hinkwayo leswaku a ta tiyisela tanihi mudyondzisiwa wa Kreste. (1 Timotiya 4:15) Kambe, xana hi nga swi hlakulela njhani ku tlangela Rito ra Xikwembu hi ndlela yoleyo?

Xiyimo Xa Mbilu Ni Ku Anakanyisisa

7. I xiendlo xihi lexi fambisanaka swinene ni mbilu leyinene?

⁷ Xiya xiendlo lexi Bibele yi vulaka leswaku xi fambisana swinene ni mbilu leyinene. “Mbilu ya lowo lulama ya anakanyisisa leswaku a ta hlamula.” (Swivuriso 15:28) “Marito ya nomu wa mina ni ku anakanyisisa ka mbilu ya mina a ku tsakise emahlweni ka wena, Wena Yehovha.” (Pisalema 19:14) “Mbilu ya mina yi ta anakanyisisa hi swilo swa ku twisisa.”—Pisalema 49:3.

8. (a) Loko hi hlaya Bibele, i yini leswi hi faneleke hi swi papalata, naswona i yini leswi hi faneleke hi swi endla? (b) Xana hi vuyeriwa hi yini loko hi anakanyisisa hi Rito ra Xikwembu? (Katsa ni bokisi leri nge “Ku Dzima Timitsu Swinene eNtiyisweni.”)

⁸ Ku fana ni vatsari lava va Bibele, na hina hi fanele hi anakanyisisa swinene hi Rito ra Xikwembu ni mintirho ya xona. Loko hi hlaya Bibele kumbe minkandziyiso leyi sekeriweke eBibeleni, a hi fanelanga hi fana ni vavalangi lava valangaka endhawini leyi ivi va hatlisa va tlulela eka liya, xa vona ku ri ku teka swifaniso kambe va nga tinyiki nkarhi wa ku xiyisisa leswi va swi vonaka. Ematshan’weni ya sweswo, loko hi dyondza Bibele, hi fanele hi tinyika nkarhi wo yima hi anakanyisisa hi leswi yi swi vulaka. * Loko hi ri karhi hi anakanyisisa hi leswi hi swi hlayeke, rito ra Xikwembu ri khumba timbilu ta hina. Ri khumba mintlhaveko ni mianakanyo ya hina. Nakambe ri hi susumetela ku byela Xikwembu leswi hi swi anakanyaka. Hikwalaho, vuxaka bya hina na Yehovha bya  kula, naswona ndlela leyi hi xi rhandzaka ha yona Xikwembu yi hi susumetela ku hambeta hi landzela Yesu hambiloko hi langutane ni swiyimo swo tika. (Matewu 10:22) Entiyisweni, ku anakanyisisa hileswi Xikwembu xi hi byelaka swona i swa nkoka loko hi lava ku tshama hi tshembekile ku fikela emakumu.—Luka 21:19.

9. Xana hi nga tiyiseka njhani leswaku timbilu ta hina ti tshama ti ri karhi ti amukela rito ra Xikwembu?

⁹ Xifaniso xa Yesu xi tlhela xi kombisa leswaku ku ni swilo leswi kavanyetaka ku kula ka mbewu, leyi nga rito ra Xikwembu. Hikwalaho, leswaku hi va vadyondzisiwa lava tshembekaka, hi fanele (1) hi tiva swihinga leswi fanekiseriwaka hi misava leyi nga riki yinene ya le xifanisweni, naswona hi fanele (2) hi teka magoza yo karhi leswaku hi swi lulamisa kumbe hi swi papalata. Loko hi endla tano, hi ta tiyiseka leswaku timbilu ta hina ti tshama ti ri karhi ti amukela mbewu ya Mfumo kutani ti hambeta ti tswala mihandzu.

Leyi Nga “Etlhelo Ka Gondzo” Hi Lava Rivatiwaka Hi Swin’wana

10. Hlamusela muxaka wo sungula wa misava ya xifaniso xa Yesu, u tlhela u hlamusela leswaku yi vula yini.

¹⁰ Muxaka wo sungula wa misava leyi mbewu yi weleke eka yona hi leya le ‘tlhelo ka gondzo,’ laha mbewu yi ‘kandziyeriwaka.’ (Luka 8:5) Misava leyi nga etlhelo ka gondzo leri yaka ensin’wini ya swimilana a yi tshama yi gandlanile hikuva vanhu a va famba-famba eka yona. (Marka 2:23) Hilaha ku fanaka, lava hetaka nkarhi ni matimba ya vona eka swilo swa misava va nga ha tikuma va khomeke ngopfu lerova va tsandzeka ku tlangela rito ra Xikwembu hi mbilu hinkwayo. Va ri twa, kambe va tsandzeka ku anakanyisisa ha rona. Kutani sweswo swi tlanyata timbilu ta vona. Loko va nga si sungula ku ri rhandza, “Diyavulosi a ta a susa rito etimbilwini ta vona leswaku va nga pfumeli, va ta ponisiwa.” (Luka 8:12) Xana leswi hi nga swi kota ku swi sivela?

11. Xana hi nga endla njhani leswaku xiyimo xa timbilu ta hina xi nga tiyi ku fana ni misava leyi gandlaneke?

 ¹¹ Swi tele leswi nga endliwaka ku sivela mbilu leswaku yi nga fani ni misava leyi nga riki yinene leyi nga etlhelo ka gondzo. Misava leyi gandlaneke hikwalaho ko kandziyeriwa yi nga va leyinene ni ku humesa mihandzu loko yi rimiwa, naswona vanhu va nga ha hundzi hi kona. Hilaha ku fanaka, ku tinyika nkarhi wo dyondza ni ku anakanyisisa hi Rito ra Xikwembu swi nga endla leswaku mbilu yi va leyinene, yi tswala mihandzu. Mhaka-nkulu a hi ku khomeka ngopfu hi swilo swa vutomi bya siku ni siku. (Luka 12:13-15) Ematshan’weni ya sweswo, tiyiseka leswaku u hlela nkarhi wa ku anakanyisisa “hi swilo swa nkoka swinene” evuton’wini.—Vafilipiya 1:9-11.

Leyi Nga “Ehenhla Ka Ribye Lerikulu” Hi Lava Nga Ni Ku Chava

12. I yini lexi vangaka leswaku ximilana xi vuna eka muxaka wa vumbirhi wa misava leyi boxiweke exifanisweni xa Yesu?

¹² Loko mbewu yi wela eka muxaka wa vumbirhi wa misava a yi tshami ehenhla ku fana ni le ka leyo sungula. Yi huma timitsu kutani yi hluka. Kambe loko dyambu ri tlhava, ximilana xi vavula hi ku hisa ka dyambu kutani xi vuna. Hambiswiritano, xiya mhaka leyi ya nkoka. Lexi endlaka leswaku ximilana xi vuna a hi ku hisa. Phela, ni ximilana lexi humaka emisaveni leyinene na xona xi hisiwa hi dyambu kambe a xi vuni—entiyisweni, xi kula kahle. I yini lexi endlaka swi hambana? Yesu u vule leswaku ximilana lexi xa vuna “hikwalaho ka leswi misava a yi nga entanga” ni “hikwalaho ka ku pfumala ndzhongo.” (Matewu 13:5, 6; Luka 8:6) “Ribye lerikulu” leri nga ehansi ka misava ri endla leswaku mbewu yi nga swi koti ku dzikisa timitsu ta yona leswaku ti kuma ndzhongo lowu eneleke leswaku ti tiya. Kutani ximilana xa vuna hikuva misava a yi entanga.

13. Xana i vanhu va njhani lava fanaka ni misava leyi nga entangiki, naswona hi xihi xivangelo-nkulu lexi va endlaka va chava?

¹³ Laha xifaniso lexi xi kombetela eka vanhu lava “amukelaka rito hi ntsako” kutani va landzela Yesu hi ku hiseka ku ringana “nkarhi wo karhi.” (Luka 8:13) Loko va langutana ni dyambu leri vavulaka ra “nhlomulo kumbe nxaniso” va khomiwa hi ku chava lokukulu lerova va lahlekeriwa hi ntsako va tlhela va hela matimba ivi va tshika ku landzela Kreste. (Matewu 13:21) Hambiswiritano, lexi endlaka leswaku va va ni ku chava a hi nkaneto. Phela, vadyondzisiwa vo tala swinene va Kreste va tiyisela miringo yo hambana-hambana kambe va tshama va tshembekile. (2 Vakorinto 2:4; 7:5) Lexi endlaka van’wana va va ni ku chava, va sukela ntiyiso hileswi xiyimo xa timbilu ta vona xi va sivelaka ku anakanyisisa hi vuenti hi swilo swa moya leswi akaka. Xisweswo, ndlela leyi va n’wi tlangelaka ha yona Yehovha swin’we ni rito rakwe yi va yi nga nyawuli lerova va nga kota ku langutana ni nkaneto. Xana munhu a nga swi sivela njhani leswi?

14. I magoza wahi lama munhu a faneleke a ma teka leswaku a sirhelela mbilu ya yena eka xiyimo lexi fanaka ni misava leyi nga entangiki?

¹⁴ Munhu u fanele a tiyiseka leswaku a nga vi ni swihinga leswi fanaka ni ribye, swo fana ni maxangu lamakulu ni vutianakanyi embilwini ya yena. Loko a ri ni swilo swo tano embilwini ya yena, matimba lama tirhaka ya rito ra Xikwembu ma nga swi susa. (Yeremiya 23:29; Vaefesa 4:22; Vaheveru 4:12) Endzhaku ka sweswo, ku anakanyisisa swi ta kondletela ku “nghenisiwa ka rito” embilwini ya munhu wo tano. (Yakobo 1:21) Leswi swi ta endla leswaku a kota ku hlula swiyimo leswi hetaka matimba ni ku n’wi khutaza leswaku a tshama a tshembekile ku nga khathariseki miringo.

Leyi Nga “eMitweni” Hi Lava Kanakanaka

15. (a) Ha yini hi fanele hi nyikela nyingiso swinene eka muxaka wa vunharhu wa misava lowu boxiweke hi Yesu? (b) Xana ku humelela yini eku heteleleni eka muxaka wa vunharhu wa misava, naswona ha yini?

¹⁵ Muxaka wa vunharhu wa misava, leyi nga ni mitwa, yi fanele yi  koka nyingiso wa hina hikuva a yi hambananga ngopfu ni leyinene. Ku fana ni misava leyinene, mbewu ya swi kota ku humesa timitsu yi tlhela yi hluka emisaveni leyi nga ni mitwa. Loko swa ha mila, a ku na ku hambana eka ndlela leyi ximilana lexitsongo xi kulaka ha yona eka mixaka leyimbirhi ya misava. Hambiswiritano, hi ku famba ka nkarhi ximilana xa kavanyeteka. Ku hambana ni misava leyinene, misava leyi yi mphimpheriwa hi mitwa. Loko ximilana lexitsongo xi sungula ku hluka eka misava leyi, xi phikizana ni ‘mitwa leyi kuleke swin’we na xona.’ Hikwalaho swimilana leswi haswimbirhi swi lwela swakudya, dyambu ni ndhawu, kambe eku heteleleni mitwa yi funengeta ximilana kutani yi xi “kamanyeta.”—Luka 8:7.

16. (a) I vamani vanhu lava fanekiseriwaka hi mitwa ya misava? (b) Hi ku ya hi timhaka tinharhu ta Evhangeli, mitwa yi fanekisela yini?—Vona nhlamuselo ya le hansi.

¹⁶ I vanhu va njhani lava fanekiseriwaka hi misava ya mitwa? Yesu wa hlamusela: “Vona hi lava va tweke, kambe, hi ku hluriwa hi ku karhateka, rifuwo ni ntsako wa vutomi lebyi, va kamanyetiwa hi ku helela naswona a ku na lexi va xi hetisisaka.” (Luka 8:14) Ku fana ni muhaxi wa mbewu ni mitwa leyi kulaka emisaveni hi nkarhi wun’we, xisweswo vanhu van’wana va lava rito ra Xikwembu ni “ntsako wa vutomi lebyi” hi nkarhi wun’we. Ntiyiso wa rito ra Xikwembu wu byariwe etimbilwini ta vona kambe va rhandza swilo leswi lwisanaka ni mianakanyo ya vona. Timbilu ta vona to fanekisela ti avanile. (Luka 9:57-62) Leswi swi va sivela ku va ni nkarhi lowu ringaneleke wo khongela ni ku anakanyisisa hi rito ra Xikwembu. Va tsandzeka ku amukela rito ra Xikwembu hi ku helela xisweswo va pfumala ku tlangela ka mbilu hinkwayo leyi lavekaka leswaku va tiyisela. Hakatsongo-tsongo, ku tsakela ka vona swilo swa moya ku funengetiwa hi ku hlongorisa swilo leswi nga riki swa moya lerova va “kamanyetiwa hi ku helela.” * Hakunene vanhu lava nga n’wi rhandziki Yehovha hi mbilu hinkwayo va va ni makumu lama nga tsakisiki!—Matewu 6:24; 22:37.

17. Xana hi fanele hi hlawula yini evuton’wini leswaku hi nga kamanyetiwi hi mitwa yo fanekisela leyi boxiweke eka xifaniso xa Yesu?

¹⁷ Loko hi rhangisa timhaka ta moya hi papalata ku kamanyetiwa hi switlhavi ni ntsako wa misava leyi. (Matewu 6:31-33; Luka 21:34-36) A hi fanelanga hi honisa ku hlaya Bibele ni ku anakanyisisa hileswi hi swi hlayaka. Hi ta kuma nkarhi wo tala wo nyikela nyingiso ni ku anakanyisisa hi xikhongelo loko hi olovisa vutomi bya hina hilaha hi nga kotaka hakona. (1 Timotiya 6:6-8) Malandza ya Xikwembu lama endleke tano—lama hi ndlela yo fanekisela ma tsuvuleke mitwa emisaveni, leswaku yi ta kuma swakudya leswi engetelekeke, dyambu ni ndhawu leyi eneleke eka ximilana lexi tswalaka mihandzu—ma katekisiwa hi Yehovha. Sandra wa malembe ya 26 u ri: “Loko ndzi anakanyisisa hi mikateko ya ntiyiso, ndza swi xiya leswaku misava a yi nge ndzi nyiki nchumu lowu fanaka na wona!”—Pisalema 84:11.

18. Xana hi nga tshama njhani eritweni ra Xikwembu ni ku tiyisela tanihi Vakreste?

 ¹⁸ Kutani, swi le rivaleni leswaku hinkwerhu ka hina, lavantshwa ni lavakulu hi ta tshama hi ri eritweni ra Xikwembu ni ku tiyisela tanihi vadyondzisiwa va Kreste ntsena loko rito ra Xikwembu ri tshama eka hina. Hikokwalaho, a hi tiyisekeni leswaku misava ya timbilu ta hina to fanekisela yi va exiyin’weni lexinene, naswona yi nga tshuki yi tsindziyela, kumbe yi va exiyin’weni lexi swimilana swi nga ta ka swi nga swi koti ku kula eka xona. Hi ndlela yoleyo, hi ta swi kota ku tirhisa rito ra Xikwembu swinene ni ku “veka mihandzu hi ku tiyisela.”—Luka 8:15.

[Tinhlamuselo ta le hansi]

A Wu Ta Hlamula Njhani?

• Hikwalaho ka yini hi fanele ku ‘tshama eritweni ra Yesu’?

• Hi nga ri pfumelela njhani rito ra Xikwembu leswaku ri tshama etimbilwini ta hina?

• I vanhu va njhani lava fanekiseriwaka hi mixaka ya mune ya misava leyi boxiweke hi Yesu?

• U nga wu kuma njhani nkarhi wo anakanyisisa hi rito ra Xikwembu?

[Swivutiso Swa Dyondzo]

[Bokisi/Xifaniso lexi nga eka tluka 10]

‘MI YIMA MI TIYA ENTIYISWENI’

LEMBE NA LEMBE vadyondzisiwa va Kreste lava se va nga ni malembe, va swi kombisa leswaku va ‘yime va tiya entiyisweni.’ (2 Petro 1:12) I yini lexi va pfunaka leswaku va tiyisela? Xiya tin’wana ta tinhlamuselo ta vona.

“Loko ndzi nga si etlela ndzi hlaya xiyenge xo karhi xa Bibele kutani ndzi khongela. Endzhaku ka sweswo ndzi anakanyisisa hi leswi ndzi swi hlayeke.”—Jean, la khuvuriweke hi 1939.

“Ku anakanyisisa hi ndlela leyi Yehovha, munhu la tlakukeke swinene, a hi rhandzaka swinene ha yona swi ndzi endla ndzi titwa ndzi sirhelelekile, swi ndzi nyika ni matimba yo tshama ndzi tshembekile.”—Patricia, la khuvuriweke hi 1946.

“Ku namarhela mikhuva leyinene yo dyondza Bibele ni ku tshama hi khomekile hi ‘swilo leswi enteke swa Xikwembu,’ swi ndzi pfune leswaku ndzi hambeta ndzi xi tirhela.”—1 Vakorinto 2:10; Anna, la khuvuriweke hi 1939.

“Ndzi hlaya Bibele ni tibuku ta hina leti sekeriweke eBibeleni hi xikongomelo xo kambisisa mbilu ya mina ni mintlhaveko ya mina.”—Zelda, la khuvuriweke hi 1943.

“Loko ndzi tifamba-fambela ndzi va ni nkarhi lowunene wa ku vulavula na Yehovha hi xikhongelo ivi ndzi n’wi tivisa ndlela leyi ndzi titwaka ha yona hakunene.”—Ralph, la khuvuriweke hi 1947.

“Ndzi sungula siku ra mina hi ku kambisisa ndzimana ya siku na hi ku hlaya xiyenge xo karhi xa Bibele. Leswi swi endla leswaku ndzi va ni nchumu lowuntshwa wo anakanyisisa ha wona ninhlikanhi.”—Marie, la khuvuriweke hi 1935.

“Eka mina, nhlamuselo ya ndzimana hi ndzimana ya buku ya Bibele ya ndzi phyuphyisa swinene.”—Daniel, la khuvuriweke hi 1946.

Xana u tinyika rini nkarhi wa ku anakanyisisa swinene hi rito ra Xikwembu?—Daniyele 6:10b; Marka 1:35; Mintirho 10:9.

[Xifaniso lexi nga eka tluka 13]

Hi nga “veka mihandzu hi ku tiyisela” loko hi rhangisa swilo swa moya