Xiviko Xa Vahuweleri Va Mfumo

Va “Twa” Rungula Ra Mfumo eBrazil

LESWAKU ti kota ku twarisa mahungu lamanene ya Mfumo eka vanhu lava Feke Tindleve, Timbhoni ta Yehovha to tala le Brazil ti tinyiketele ku dyondza Ririmi ra Mavoko ra le Brazil. Matshalatshala ya tona ma tswala mihandzu leyinene, hilaha mintokoto leyi landzelaka yi kombisaka hakona.

Eva, * wansati la feke tindleve wa le São Paulo, u sungule ku dyondza ririmi ra mavoko endzhaku ka loko yena ni vana va yena vanharhu va sungule ku tshama ni wanuna la feke tindleve. Loko va ri endhawini ya mabindzu, Eva ni xigangu xa yena va hlangane ni ntlawa wa Timbhoni leti feke tindleve kutani va rhamberiwa ku ya enhlanganweni eHolweni ya Mfumo. Va xi amukerile xirhambo, va anakanya leswaku ku ta va ku hlengeletana ka xinghana.

Leswi a a nga ri tivi kahle ririmi ra mavoko, Eva u lo twisisa switsongo swa leswi nga vuriwa enhlanganweni. Endzhaku ka sweswo, Timbhoni to hlayanyana ti n’wi rhambile leswaku a ya khomisa nyoka ekaya ra tona. Ti tirhise swifaniso swa broxara leyi nge Tsakela Vutomi eMisaveni Hi Masiku!, ti n’wi hlamusela xitshembiso xa Xikwembu xa misava ya paradeyisi ya le nkarhini lowu taka. Eva u swi tsakerile leswi a swi dyondzeke kutani a sungula ku va kona eminhlanganweni nkarhi na nkarhi.

Endzhakunyana ka kwalaho, Eva u xi tshikile xigangu xa yena leswaku a ta hanya hi misinya ya milawu ya Bibele. Hambileswi ndyangu wa ka vona wu n’wi kaneteke swinene, u hambete a endla nhluvuko wa moya naswona u khuvuriwe hi 1995. Endzhaku ka tin’hweti ta tsevu, Eva u tsarise ku va phayona, kumbe muchumayeri wa Mfumo wa nkarhi hinkwawo. Se u pfune vanhu va mune lava feke tindleve leswaku va tinyiketela va tlhela va khuvuriwa.

Carlos u velekiwe a fe tindleve. Loko a ha ri ntsongo u sungule ku godzomberiwa hi swidzidzirisi, a tikhoma hi ndlela yo biha a tlhela a yiva. Loko a ta va a xungetiwe hi swirho swa ntlawa wa swigevenga leswi nga valala, u balekele le São Paulo a fika a tshama na João ku ringana nkarhi wo karhi. João na yena a a fe tindleve ku fana na Carlos naswona a a hanya vutomi lebyi thyakeke.

Endzhaku ka malembe ma nga ri mangani, Carlos u dyondze rungula ra Mfumo, leri n’wi susumeteleke ku hanya hi ndlela leyinene kutani a tsarisa vukati bya yena hi nawu. Loko a ta va a fikelele swilaveko swa Matsalwa, Carlos u khuvuriwile a kombisa ku tinyiketela ka yena eka Yehovha. Hi nkarhi lowu fanaka, João na yena se a a ma twile mahungu lamanene, naswona a a hundzuke swinene evuton’wini bya yena, hambileswi Carlos a a nga swi tivi. Loko a twa leswaku Yehovha a nga swi lavi leswaku ku tirhisiwa swifaniso, João u lahle swifaniso swakwe hinkwaswo swa “vakwetsimi.” Endzhaku ko tshika ndlela leyi a a hanya ha yona, João na yena u khuvuriwile.

Carlos na João a va tsake swinene loko va hlangana eHolweni ya Mfumo kutani va vona ku cinca loku va ku endleke. Sweswi havambirhi ka vona i tinhloko ta mindyangu leti wupfeke naswona i vachumayeri va Mfumo lava hisekaka.

Le Brazil, sweswi ku ni mavandlha ya 30 laha ku tirhisiwaka ririmi ra mavoko naswona ku ni mintlawa ya 154, leyi nga ni vahuweleri vo tlula 2 500, laha ku nga ni vanhu va kwalomu ka 1 500 lava feke tindleve. EMintsombanweni ya Muganga ya “Vadyondzisi Va Rito Ra Xikwembu” ya 2001 ya vanhu lava feke tindleve le Brazil, a ku ri ni vanhu vo tlula 3 000 kutani ku khuvuriwa vanhu va 36. Hi nkateko wa Yehovha, hi tshemba leswaku vanhu vo tala lava feke tindleve va ta amukela rungula ra Mfumo.

[Nhlamuselo ya le hansi]