Ku Pfumela Eka Xikwembu Lexi Hi Nga Xi Tiviki

VANHU vambirhi eka vanharhu eJarimani va pfumela eka Xikwembu. Kambe, loko vanhu vo tlula gidi va komberiwe ku hlamusela Xikwembu lexi va pfumelaka eka xona, un’wana ni un’wana u hlamusele hi ndlela ya yena. Magazini wa mahungu lowu vuriwaka FOCUS wa vika: “Vanhu va le Jarimani va anakanya leswi hambaneke mayelana ni Xikwembu, ku fana ni leswi vanhu va hambaniseke xiswona.” Hambileswi ku pfumela eka Xikwembu ku nga mhaka leyi bumabumeriwaka, xana a swi terisi vusiwana ku pfumela eka xona kambe u nga swi tivi leswaku xi njhani?

A hi vanhu va le Jarimani ntsena lava nga tiyisekiki leswaku Xikwembu xi njhani; ni vanhu van’wana va le Yuropa va tano. Nkambisiso lowu endliweke eAustria, eBritain ni le Netherlands wu paluxa mhaka leyi tiviwaka ngopfu ya leswaku Xikwembu “i matimba lama tlakukeke kumbe i xihundla lexi nga hlamuselekiki.” Vantshwa ngopfu-ngopfu, hambi ku ri van’wana lava pfumelaka eka xona va xi teka xi ri xihundla.

Xana U Xi Tiva Kahle Xikwembu?

Ku ni ku hambana lokukulu exikarhi ka ku tiva leswaku munhu wo karhi wa hanya ni ku n’wi tiva kahle. Ku tiva leswaku munhu wo karhi wa hanya—mufumi la nga ekule, xitsutsumi lexikulu, mutlangi wa tifilimi loyi a dumeke—swo vula ntsena ku pfumela leswaku u kona. Hambiswiritano, ku tiva munhu kahle swi vula ku tiva swo tala hi yena. Swi vula ku tiva leswi a nga xiswona, mahanyelo ya yena, ndlela leyi a titwaka ha yona, leswi a swi rhandzaka nileswi a nga swi rhandziki nileswi a kunguhataka ku swi endla enkarhini lowu taka. Ku tiva munhu kahle swi pfula ndlela yo aka vuxaka lebyikulu na yena.

Vanhu vo tala swinene va gimete hileswaku a swi enelanga ku tiva tidyondzo leti nga twisisekiki malunghana ni Xikwembu—kumbe ku tiva ntsena leswaku xi kona. Hikwalaho, va endle matshalatshala lamakulu leswaku va xi tiva kahle Xikwembu. Xana leswi swi va pfunile? Wanuna loyi a vuriwaka Paul, loyi a tshamaka en’walungwini wa Jarimani naswona a nga tshama a pfumela leswaku Xikwembu xi kona, u endle xiboho xa leswaku a xi tiva kahle. Paul wa hlamusela: “Leswaku u xi tiva kahle Xikwembu swi lava nkarhi ni matshalatshala naswona swa vuyerisa swinene. Ku va ni vuxaka lebyikulu ni Muvumbi swi endla vutomi byi tsakisa.”

Xana swi fanerile leswaku hi tirhisa nkarhi hi tlhela hi endla matshalatshala leswaku hi xi tiva kahle Xikwembu? Hi kombela u hlaya xihloko lexi landzelaka.

[Marito lama tshahiweke exihlokweni lama nga eka tluka 3]

Ku ni ku hambana lokukulu exikarhi ka ku tiva leswaku munhu wo karhi wa hanya ni ku n’wi tiva kahle