Swivutiso Swa Vahlayi

Ha yini Esaya 30:21 yi vula leswaku rito ra Yehovha ri twiwa ri huma hala ‘ndzhaku,’ kasi ndzimana ya hala henhla yi vula leswaku Yehovha u le mahlweni, loko yi ku, “Mahlo ya n’wina ma ta va mahlo lama vonaka Muleteri Lonkulu wa n’wina”?

Esaya 30:20, 21 yi ri: “Muleteri wa n’wina Lonkulu a nge he tifihli naswona mahlo ya n’wina ma ta va mahlo lama vonaka Muleteri Lonkulu wa n’wina. Tindleve ta n’wina ti ta twa rito endzhaku ka n’wina ri ku: ‘Ndlela hi leyi. Fambani hi yona,’ loko mo tshuka mi ya exineneni kumbe mi tshuka mi ya eximatsini.”

Loko ndzimana leyi yi hlamuseriwa hi ku kongoma, muhlayi u vona Yehovha, Muleteri Lonkulu emahlweni ka yena kambe u twa rito ra Yena hala ndzhaku. Hambiswiritano, marito lawa i yo fanekisela naswona ma fanele ma twisisiwa hi ndlela yoleyo.

Xiga-ririmi xa ndzimana 20 xi hi endla hi kota ku vona hi mahlo ya mianakanyo nandza loyi a tirhelaka n’wini wakwe, loyi a tshamaka a tiyimisele ku yingisa swileriso swa n’wini wakwe. Ku fana ni nandza loyi a yingisaka swileriso swa n’wini wakwe leswaku a ta endla ku rhandza ka n’wini wakwe, namuntlha vanhu va Yehovha va yisa nyingiso wa vona eka swileriso leswi sekeriweke eBibeleni leswi Yehovha a va nyikaka swona nkarhi na nkarhi hi ku tirhisa nhlengeletano ya yena ya laha misaveni. (Pisalema 123:1, 2) Ina, va endla leswi a va lerisaka swona, va tshama va xalamukele xileriso xihi na xihi lexi Yehovha a va lerisaka xona hi ku tirhisa “hlonga ro tshembeka ni ro tlhariha.”—Matewu 24:45-47.

Kutani ke, xana ku vuriwa yini hi rito leri malandza ya yena ma ri twaka hala ndzhaku? Swa twala ku gimeta hileswaku rito leri twalaka hala ndzhaku i rito ra Xikwembu leri xi ri vuleke enkarhini lowu hundzeke, leri tsariweke eRitweni ra xona kutani ri hlamuseriwa kahle hi “mulanguteri wo tshembeka.” (Luka 12:42) Malandza ya Xikwembu ya manguva lawa ma yingisa rito ra xona hi ku dyondza Bibele hi ku hiseka na hi ku tirhisa misinya ya milawu ya yona evuton’wini bya vona va ri karhi va pfuniwa hi tibuku leti lunghiseleriweke hi “hlonga ro tshembeka ni ro tlhariha,” ku nga “mulanguteri wo tshembeka.” Malandza ya xona ma xi vona xi ri emahlweni ka wona hi ndlela yo fanekisela naswona ma tlhela ma twa rito ra xona endzhaku ka wona, loko ma kambisisa ma tlhela ma titshega hi nkongomiso wa xona lowu nga enkarhini lowu Muleteri Lonkulu a wu nyikelaka niloko ma dyondza Rito ra Xikwembu leri tsariweke eka madzana ya malembe lama hundzeke.—Varhoma 15:4.