“Ndzi Kume Hinkwaswo Leswi A Ndzi Swi Lava”

HI KU ya hi xiviko xa Vandla ra Rihanyo ra Misava Hinkwayo vanhu vo tlula 120 wa timiliyoni emisaveni hinkwayo va ni ntshikilelo wa mianakanyo. Lembe rin’wana ni rin’wana vanhu vo ringana miliyoni va tidlaya naswona vanhu va le xikarhi ka timiliyoni ta khume na 20 va ringeta ku tidlaya. Xana va nga pfuniwa njhani vanhu lava xanisekaka hikwalaho ka ntshikilelo wa mianakanyo? Vutshunguri byi nga ha antswisa ku xaniseka ka vona naswona i swa nkoka leswaku va chaveleriwa. Ku tlula kwalaho, van’wana lava tshikilelekeke hi ndlela yoleyo va kume mpfuno wun’wana etibukwini ta Timbhoni ta Yehovha leti pfunaka leti sekeriweke eBibeleni, hilaha papila leri landzelaka leri humaka eFurwa ri kombisaka hakona.

“Eka masikunyana lama hundzeke a ndzi nga swi tivi leswaku ndzi hanyela yini. Ndzi khongele Xikwembu leswaku xi ndzi tshika ndzi tifela. A ndzi titwa ndzi ri sirha ra le handle. Ndzi khongele swinene eka Yehovha ndzi lava nkongomiso. Ndzi tlhele ndzi tiyimisela ku hlaya Buku Ya Lembe Ya Timbhoni Ta Yehovha Ya 2002 naswona ndzi yi hete hi masiku manharhu. Entiyisweni yi ndzi khutaze swinene yi tlhela yi tiyisa ripfumelo ra mina.

“Ndzi endle ndzavisiso eka timagazini ta Xihondzo xo Rindza na Xalamuka! naswona ndzi hlamarile swinene! Ndzi hlaye timagazini leti nkarhi na nkarhi malembe yo tlula 15, kambe a ndzi nga swi xiyi leswaku swihloko swa tona swa khutaza naswona swa tsakisa. Swi khutaza rirhandzu—ku nga mfanelo leyi kalaka masiku lawa. Ndzi kume hinkwaswo leswi a ndzi swi lava.”

Bibele yi ri: “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.” (Pisalema 34:18) Handle ko kanakana, hinkwavo lava “tshovekeke mbilu” kumbe “lava va pfotlokeke emoyeni” va nga kuma xikhutazo ni ntshembo wa vumundzuku eBibeleni. Timbhoni ta Yehovha ti fambisa tibuku leti sekeriweke eBibeleni leswaku ti pfuna lava lavaka ku vuyeriwa eka xihlovo xa nchavelelo lexi huhuteriweke hi Xikwembu.