‘Vanani Ni Xivindzi, Mi Va Ni Matimba!’
‘Vanani Ni Xivindzi, Mi Va Ni Matimba!’
“Tiyani timbilu! Misava ndzi yi hlurile.”—YOHANE 16:33.
1. Hi xihi xikhutazo lexi Vaisrayele va nyikiweke xona malunghana ni leswi a va ta langutana na swona eKanana?
LOKO Vaisrayele va ri kusuhi ni ku tsemakanya Nambu wa Yordani va ya eTikweni leri Tshembisiweke, Muxe u va byele leswi: “Vanani ni xivindzi, mi va ni matimba. Mi nga chavi kumbe mi tshuka emahlweni ka wona, hikuva Yehovha Xikwembu xa n’wina hi yena la fambaka na n’wina.” Kutani Muxe u vitane Yoxuwa, loyi a a ta rhangela Vaisrayele loko va nghena eKanana, a tlhela a n’wi phindhela ndzayo leyi ya leswaku a va ni xivindzi. (Deteronoma 31:6, 7) Endzhakunyana, Yehovha u khutaze Yoxuwa a ku: “Vana ni xivindzi, u tiya . . . Ntsena vana ni xivindzi, u tiya ngopfu.” (Yoxuwa 1:6, 7, 9) Marito wolawo a ma fike hi nkarhi. Vaisrayele a va fanele va va ni xivindzi xo jamelana ni valala lava nga ni matimba, lava a va tshama eka tlhelo lerin’wana ra Yordani.
2. Hi xihi xiyimo lexi hi tikumaka hi ri eka xona namuntlha, naswona i yini lexi hi faneleke hi va na xona?
2 Ni namuntlha, Vakreste va ntiyiso va le kusuhi ni ku nghena emisaveni leyintshwa leyi tshembisiweke naswona ku fana na Yoxuwa, va fanele va va ni xivindzi. (2 Petro 3:13; Nhlavutelo 7:14) Kambe, xiyimo xa hina xi hambanile ni lexiya xa Yoxuwa. Yoxuwa u lwe hi matlhari ni mafumu. Kasi hina hi lwa nyimpi ya moya naswona a hi ma tirhisi matlhari ya xiviri. (Esaya 2:2-4; Vaefesa 6:11-17) Ku tlula kwalaho, Yoxuwa a a fanele a lwa tinyimpi to tala letikulu hambiloko se a nghene eTikweni leri Tshembisiweke. Kambe nyimpi leyi hi yi lwaka sweswi loko hi nga si nghena emisaveni leyintshwa yi hisa ngopfu. A hi kambisiseni swiyimo swin’wana leswi lavaka hi va ni xivindzi.
Ha Yini Hi Fanele Hi Tikarhata?
3. Bibele yi paluxa yini malunghana ni mukaneti wa hina lonkulu?
3 Muapostola Yohane u tsarile: “Ha swi tiva leswaku hi huma eka Xikwembu, kambe misava hinkwayo yi le hansi ka matimba ya lowo homboloka.” (1 Yohane 5:19) Marito wolawo ma kombisa xivangelo-nkulu xa ku va Vakreste va fanele va tikarhata leswaku va ta hlayisa ripfumelo ra vona. Loko Mukreste a hlayisa vutshembeki bya yena, u va a hlule Sathana Diyavulosi hi ndlela yo karhi. Hikwalaho, Sathana u famba-famba ku fana ni “nghala leyi vombaka” leyi ringetaka ku chavisa ni ku dya Vakreste vo tshembeka. (1 Petro 5:8) Hakunene, u lwa ni Vakreste lava totiweke ni vanghana va vona. (Nhlavutelo 12:17) Enyimpini leyi u tirhisa vanhu leswaku va hetisisa swikongomelo swa yena ku nga khathariseki leswaku va swi tiva kumbe a va swi tivi. Swi lava xivindzi ku yima hi tiyile hi lwa na Sathana ni malandza ya yena hinkwawo.
4. I xitsundzuxo xihi lexi Yesu a xi nyikeleke, kambe i mfanelo yihi leyi Vakreste va ntiyiso va yi kombiseke?
4 Leswi Yesu a a swi tiva leswaku Sathana ni malandza ya yena va ta hambeta va ala mahungu lamanene, U tsundzuxe valandzeri va yena a ku: “Vanhu va ta mi nghenisa enhlomulweni, va mi dlaya, naswona mi ta vengiwa hi matiko hinkwawo hikwalaho ka vito ra mina.” (Matewu 24:9) Marito wolawo ma hetiseke eka lembe-xidzana ro sungula, naswona ma ha hetiseka ni namuntlha. Kunene, nxaniso lowu Timbhoni tin’wana ta Yehovha ta manguva lawa ti wu tiyiseleke i wa tihanyi letikulu ematin’wini. Hambiswiritano, Vakreste va ntiyiso va yima va tiyile loko va langutane ni ntshikilelo wo tano. Va swi tiva leswaku “ku chava vanhu swi veka ntlhamu,” naswona a va swi lavi ku phasiwa hi ntlhamu.—Swivuriso 29:25.
5, 6. (a) Hi le ka swiyimo swihi laha hi faneleke hi va ni xivindzi? (b) Xana Vakreste lava tshembekaka va endla njhani loko ripfumelo ra vona ri ringiwa?
5 Handle ka nxaniso ku ni mintlhontlho yin’wana leyi lavaka leswaku hi va ni xivindzi. Vahuweleri van’wana va khoma xo tika loko va fanele va vulavula hi mahungu lamanene ni vanhu lava nga va tiviki. Vana van’wana lava nghenaka xikolo va va endzingweni loko va byeriwa leswaku va yimbelela risimu ra rixaka kumbe va losa mujeko. Leswi sweswo ku nga xiendlo xa vukhongeri, vana va Vakreste va yima va tiyile leswaku va endla leswi tsakisaka Xikwembu, naswona ndhuma ya vona leyinene ya tsakisa hakunene.
6 Nakambe hi fanele hi va ni xivindzi loko vakaneti va kucetela vahaxi va mahungu leswaku va hangalasa swiviko swo biha hi malandza ya Xikwembu, kumbe loko va ringeta ku sivela vugandzeri bya ntiyiso hi ku kunguhata “khombo hi xileriso xa nawu.” (Pisalema 94:20) Hi xikombiso, xana hi fanele hi titwisa ku yini loko hi twa swiviko swo biha kumbe swa mavunwa ya rihlaza swa maphepha-hungu, swa xiya-ni-moya kumbe swa thelevhixini leswi vulavulaka hi Timbhoni ta Yehovha? Xana swi fanele swi hi hlamarisa? Doo! Ha swi tiva leswaku swilo swo tano swi ta endleka. (Pisalema 109:2) Kutani a swi hi hlamarisi loko van’wana va tshemba mavunwa ni swiviko leswi soholotiweke leswi hangalasiwaka, hikuva “un’wana ni un’wana la nga riki na ntokoto u pfumela rito rin’wana ni rin’wana.” (Swivuriso 14:15) Hambiswiritano, Vakreste vo tshembeka a va ri tshembi rungula rihi na rihi ra mavunwa leri vuriwaka malunghana ni vamakwavo va vona, naswona a va pfumeli ni kan’we leswaku swiviko swa mavunwa swi va endla va xwa eminhlanganweni ya Vukreste, va nga ha yi nkarhi hinkwawo ensin’wini, kumbe va tsana eripfumelweni. Ku ri na sweswo, va “tibumabumela tanihi vatirheli va Xikwembu . . . hi ku vangama ni ku khomisiwa tingana, hi xiviko xo biha ni xiviko lexinene; [hi ku ya hi leswi vuriwaka hi vakaneti, i] vaxisi kambe [entiyisweni va] ni ntiyiso.”—2 Vakorinto 6:4, 8.
7. Xana hi nga tikambisisa hi ku tivutisa swivutiso swihi?
7 Pawulo u tsalele Timotiya, a ku: “Xikwembu a xi hi nyikanga moya wa vutoya, kambe xi hi nyike moya wa matimba . . . Hikokwalaho u nga khomiwi hi tingana hi vumbhoni lebyi khumbaka Hosi ya hina.” (2 Timotiya 1:7, 8; Marka 8:38) Loko hi hlaye marito wolawo hi nga tivutisa leswi: ‘Xana tidyondzo ta vukhongeri bya mina ti ndzi khomisa tingana, kumbe, xana ndzi ni xivindzi? Xana lava ndzi tirhaka na vona (kumbe ndzi nghenaka na vona xikolo), va swi tiva leswaku ndzi Mbhoni ya Yehovha, kumbexana ndzi ringeta ku titumbeta leswaku ndzi Mbhoni? Xana swi ndzi khomisa tingana loko ndzi hambanile ni van’wana, kumbe, xana ndza tsaka loko ndzi hambanile ni van’wana hikwalaho ka vuxaka bya mina na Yehovha?’ Loko un’wana a titwa a kanakana ku chumayela mahungu lamanene kumbe ku hambana ni van’wana, a a tsundzuke ndzayo leyi Yehovha a yi nyikeke Yoxuwa: “Vana ni xivindzi, u tiya.” A hi fanelanga hi rivala leswaku mavonelo ya vatirhi-kulorhi kumbe ya vadyondzi-kulorhi a hi ya nkoka, kambe i mavonelo ya Yehovha na Yesu Kreste lama nga ya nkoka.—Vagalatiya 1:10.
Ndlela Yo Hlakulela Ku Va Ni Xivindzi
8, 9. (a) Eka xiendlakalo xin’wana, xana Vakreste vo sungula va ve ni xivindzi hi ndlela yihi loko va ringiwa? (b) Xana Petro na Yohane va endle njhani loko va langutane ni minxungeto, naswona vona ni vamakwavo va langutane na yini?
8 Xana hi nga swi hlakulela njhani ku va ni xivindzi lexi nga ta hi endla hi hlayisa vutshembeki eminkarhini leyi yo nonon’hwa? Xana Vakreste vo sungula va swi hlakulele njhani ku va ni xivindzi? Xiya leswi humeleleke loko vaprista lavakulu ni vakulukumba va le Yerusalema va byele Petro na Yohane leswaku va tshika ku chumayela hi vito ra Yesu. Vadyondzisiwa va arile ku tshika, kutani va va chavisa ivi endzhaku ka swona va va tshika. Xikan’we-kan’we, va tlhelele eka vamakwavo, kutani va khongela swin’we, va ku: “Yehovha, xiyisisa minxungeto ya vona, u pfumelela mahlonga ya wena leswaku ma hambeta ma vula rito ra wena hi vurhena lebyi heleleke.” (Mintirho 4:13-29) Yehovha u va hlamule hi ku va tiyisa hi moya lowo kwetsima, kutani endzhakunyana, varhangeri va Vayuda va vule leswaku va “tate Yerusalema” hi dyondzo ya vona.—Mintirho 5:28.
9 A hi kambisiseni leswi humeleleke eka xiendlakalo xexo. Loko vadyondzisiwa va xungetiwile hi varhangeri va Vayuda, a va tshikanga ku chumayela hikwalaho ka ntshikilelo wolowo. Ku ri na sweswo, vadyondzisiwa va khongelele leswaku va va ni xivindzi xo hambeta va chumayela. Hikwalaho, va endle hi ku pfumelelana ni xikhongelo xa vona, kutani Yehovha a va tiyisa hi moya wa yena. Leswi va humeleleke swi kombisa leswaku leswi Pawulo a swi tsaleke eka malembe lama landzeleke emhakeni yin’wana leyi hambaneke swi tirha eka Vakreste loko va xanisiwa. Pawulo u te: “Eka swilo hinkwaswo ndzi ni ntamu hikwalaho ka loyi a ndzi nyikaka matimba.”—Vafilipiya 4:13.
10. Xana ntokoto wa Yeremiya wu va pfuna njhani lava nga ni tingana hi ntumbuluko?
10 Kambe ku vuriwa yini hiloko muhuweleri a ri ni tingana hi ntumbuluko? Xana a nga swi kota ku tirhela Yehovha hi xivindzi loko a langutane ni nkaneto? Ina! Tsundzuka leswi Yeremiya a swi vuleke loko Yehovha a n’wi hlawula ku va muprofeta. Jaha leri ri te: “Ndza ha ri mufana.” Hakunene, a a titwa a nga faneleki. Hambiswiritano, Yehovha u n’wi khutaze hi marito lawa: “U nga vuli u ku, ‘Ndza ha ri mufana.’ Kambe u fanele u ya eka hinkwavo lava ndzi nga ta ku rhuma eka vona; u fanele u vulavula xin’wana ni xin’wana lexi ndzi nga ta ku lerisa xona. U nga chavisiwi hi swikandza swa vona, hikuva ‘ndzi na wena leswaku ndzi ku kutsula.’” (Yeremiya 1:6-10) Yeremiya a a tshemba Yehovha, hikwalaho, hi matimba ya Yehovha u swi kotile ku hlula ku kanakana ka yena kutani a va mbhoni leyi nga ni xivindzi hi ndlela leyi hlamarisaka eIsrayele.
11. I yini lexi pfunaka Vakreste namuntlha leswaku va fana na Yeremiya?
11 Namuntlha Vakreste lava totiweke va nyikiwe ntirho wo fana ni wa Yeremiya, naswona leswi va seketeriwaka hi “ntshungu lowukulu” wa “tinyimpfu tin’wana,” va hambeta va huwelela swikongomelo swa Yehovha, hambiloko vanhu va nga tsakeli, niloko va monyiwa ni ku xanisiwa. (Nhlavutelo 7:9; Yohane 10:16) Va khutaziwa hi marito ya Yehovha lawa a ma byeleke Yeremiya, a ku: ‘U nga chavi.’ A va rivali leswaku va rhumiwe hi Xikwembu ni leswaku i rungula ra xona leri va ri chumayelaka.—2 Vakorinto 2:17.
Swikombiso Swa Vurhena Leswi Faneleke Swi Tekeleriwa
12. Hi xihi xikombiso lexinene ngopfu xa ku va ni xivindzi lexi Yesu a xi vekeke, naswona u va khutaze njhani valandzeri va yena?
12 Loko hi anakanyisisa hi swikombiso swa van’wana vo fana na Yeremiya, lava kombiseke xivindzi, swi nga hi pfuna loko hi ri karhi hi hlakulela ku va ni xivindzi. (Pisalema 77:12) Hi xikombiso, loko hi ri karhi hi kambisisa vutirheli bya Yesu, hi tsakisiwa hi xivindzi lexi a a ri na xona loko a ringiwa hi Sathana ni loko a langutane ni varhangeri va Vayuda lava a va tiyimisele ku kanetana na yena. (Luka 4:1-13; 20:19-47) Hi ku pfuniwa hi Yehovha, Yesu u yime a tiyile, naswona loko a nga si fa, u byele vadyondzisiwa va yena a ku: “Emisaveni mi ni nhlomulo, kambe tiyani timbilu! Misava ndzi yi hlurile.” (Yohane 16:33; 17:16) Loko vadyondzisiwa va Yesu va landzela xikombiso xa yena, na vona a va ta hlula. (1 Yohane 2:6; Nhlavutelo 2:7, 11, 17, 26) Kambe a va fanele va ‘tiya timbilu.’
13. Hi xihi xikhutazo lexi Pawulo a xi nyikeke Vafilipiya?
13 Endzhakunyana ka malembe Yesu a file, Pawulo na Silasi va hoxiwe ekhotsweni eFilipiya. Endzhaku ka sweswo, Pawulo u khutaze vandlha ra le Filipiya leswaku ri “yima [ri] tiyile hi moya wun’we, [ri] pfunana hi moya-xiviri wun’we ku lwela ripfumelo eka mahungu lamanene, naswona hambi hi ndlela yihi [ri] nga tshukisiwi hi vakaneti va [rona].” Leswaku a va tiyisa emhakeni leyi Pawulo u te: “Nchumu lowu [ku nga ku xanisiwa ka Vakreste] i xitiyisekiso xa ndzoviso eka [vaxanisi va] vona, kambe eka n’wina i xa ku ponisiwa; naswona xikombiso lexi xi huma eka Xikwembu, hikuva n’wina mi nyikiwe lunghelo hikwalaho ka Kreste, ku nga ri ro veka ripfumelo ra n’wina eka yena ntsena, kambe ni ku xaniseka hikwalaho ka yena.”—Vafilipiya 1:27-29.
14. Xana byi ve byihi vuyelo bya ku va Pawulo a kombise xivindzi eRhoma?
14 Loko Pawulo a tsalela vandlha ra le Filipiya, a a tlhele a hoxiwa ekhotsweni, kambe sweswi a a ri eRhoma. Hambiswiritano, u hambete a chumayela eka van’wana hi xivindzi. Vuyelo bya kona byi ve byihi? U tsarile: “Timpecana ta mina ti tiviwa erivaleni hi ku fambisana na Kreste exikarhi ka Varindzi hinkwavo va Mufumi-nkulu ni lavan’wana hinkwavo; naswona vo tala va vamakwerhu eHosini, lava titwaka va tiyiseka hikwalaho ka timpecana ta mina ta khotso, va kombisa xivindzi lexikulu xo vulavula rito ra Xikwembu handle ka ku chava.”—Vafilipiya 1:13, 14.
15. Xana hi nga swi kuma kwihi swikombiso leswinene swa ripfumelo leswi nga ta hi tiyisa leswaku hi tiyimisela ku va ni xivindzi?
15 Xikombiso xa Pawulo xa hi khutaza. Ni swikombiso leswinene swa Vakreste va manguva lawa lava va tiyiseleke nxaniso ematikweni lama lawuriwaka hi voko ra nsimbi, kumbe lama lawuriwaka hi vafundhisi swa hi khutaza. Timhaka ta Vakreste lava vo tala ku vulavuriwe ha tona eka timagazini ta Xihondzo xo Rindza ni Xalamuka! ni le ka Buku Ya Lembe Ya Timbhoni Ta Yehovha. Loko u ri karhi u hlaya timhaka teto tsundzuka leswaku vanhu lava ku vulavuriweke ha vona etimhakeni leti i vanhu lava fanaka na hina; kambe loko va ri eswiyin’weni swo tika, Yehovha u va nyike matimba yo tlula lama tolovelekeke kutani va kota ku tiyisela. Hikwalaho, hi nga tiyiseka leswaku na hina u ta hi nyika matimba wolawo loko ma laveka.
Loko Hi Ri Ni Xivindzi Swi Tsakisa Yehovha Swi Tlhela Swi Yisa Ku Dzuneka Eka Yena
16, 17. Xana namuntlha hi nga ri hlakulela njhani langutelo ro va ni xivindzi?
16 Loko Mukreste a yima a tiyile hikwalaho ka ntiyiso ni vululami, sweswo swi kombisa xivindzi. Loko a tiyisa xisweswo hambiloko a titwa a chava, sweswo i ku kombisa xivindzi hakunene. Kunene, Mukreste wihi na wihi a nga va ni xivindzi loko hakunene a lava ku endla ku rhandza ka Yehovha, loko a tiyimisele ku tshama a tshembekile, loko nkarhi hinkwawo a titshege hi Xikwembu, ni loko a tshama a ri karhi a tsundzuka leswaku enkarhini lowu hundzeke Yehovha u tiyise vanhu vo tala vo fana na yena. Ku tlula kwalaho, loko hi xiya leswaku loko hi ri ni xivindzi swi tsakisa Yehovha swi tlhela swi yisa ku dzuneka eka yena, hi ya hi tiyimisela ku yima hi tiyile. Hi tiyimisele ku tiyisela ku monyiwa kumbe ku xanisiwa hikwalaho ka leswi hi n’wi rhandzaka swinene.—1 Yohane 2:5; 4:18.
17 Hi nga rivali leswaku loko hi xanisiwa hikwalaho ka ripfumelo ra hina, a swi vuli swona leswaku hi dyohile. (1 Petro 3:17) Hi xaniseka hikwalaho ko seketela vuhosi bya Yehovha, hikwalaho ko endla leswi lulameke ni hikwalaho ka leswi hi nga riki xiphemu xa misava. Emhakeni leyi, muapostola Petro u te: “Loko mi endla leswinene ivi mi xanisiwa, kutani mi tiyisela, sweswo hi leswi amukelekaka eka Xikwembu.” Petro u tlhele a ku: “Lava xanisekaka hi ku pfumelelana ni ku rhandza ka Xikwembu a va tame va nyikela mimoya-xiviri ya vona eka Mutumbuluxi wo tshembeka va ri karhi va endla leswinene.” (1 Petro 2:20; 4:19) Ina, ripfumelo ra hina ri tsakisa Yehovha Xikwembu xa hina xa rirhandzu naswona ri tisa ku dzuneka eka yena. Hakunene, lexi i xivangelo lexi twalaka xa ku va ni xivindzi!
Ku Vulavula Ni Valawuri
18, 19. Xana loko hi va ni xivindzi emahlweni ka muavanyisi, kahle-kahle hi hundzisa rungula ra mani?
18 Loko Yesu a byela valandzeri va yena leswaku va ta xanisiwa, u te: “[Vanhu] va ta mi nyiketa etihubyeni ta rikwavo, naswona va ta mi ba emasinagogeni ya vona. Ina, mi ta huduleriwa emahlweni ka tindhuna-nkulu ni tihosi hikwalaho ka mina, leswaku byi va vumbhoni eka vona ni le ka matiko.” (Matewu 10:17, 18) Loko hi yisiwa eka muavanyisi kumbe eka mufumi wo karhi hikwalaho ka swihehlo swa mavunwa hi fanele hi va ni xivindzi. Hambiswiritano, loko hi tirhisa nkarhi wo tano leswaku hi chumayela vanhu vo tano hi xivindzi, hi endla nchumu wa nkoka eswiyin’weni swo tika. Entiyisweni, hi hundzisela marito ya Yehovha lama tsariweke eka Pisalema ya Vumbirhi eka lava hi avanyisaka: “Sweswi, N’wina tihosi, twisisani; pfumelani ku lulamisiwa, N’wina vaavanyisi va misava. Tirhelani Yehovha hi ku chava.” (Pisalema 2:10, 11) Hakanyingi, loko Timbhoni ta Yehovha ti hehliwe hi mavunwa ehubyeni, vaavanyisi va ti nyike ntshunxeko wa vukhongeri naswona ha swi tlangela sweswo. Hambiswiritano, vaavanyisi van’wana va pfumele ku kuceteriwa hi vakaneti. Matsalwa ma vula leswi hi vaavanyisi vo tano: “Pfumelani ku lulamisiwa.”
19 Vaavanyisi va fanele va swi xiya leswaku nawu lowu tlakukeke i wa Yehovha Xikwembu. Va fanele va tsundzuka leswaku vanhu hinkwavo, ku katsa ni vaavanyisi va ta tihlamulela eka Yehovha Xikwembu na Yesu Kreste. (Varhoma 14:10) Hambiloko hi kuma ku dzuneka eka muavanyisi kumbe hi nga ku kumi, hi ni xivangelo lexi twalaka xo va ni xivindzi hikwalaho ka leswi Yehovha a hi seketelaka. Bibele yi ri: “Va tsaka hinkwavo lava tumbelaka eka yena.”—Pisalema 2:12.
20. Ha yini hi fanele hi tsaka loko hi fanele hi tiyisela ku xanisiwa ni ku lumbetiwa?
20 EDyondzweni ya yena ya le Ntshaveni, Yesu u te: “Ma tsaka n’wina loko vanhu va mi rhukana ni ku mi xanisa ni ku mi hembela hi swilo hinkwaswo swo homboloka hikwalaho ka mina. Tsakani mi khana, hikuva hakelo ya n’wina i yikulu ematilweni; hikuva ni vaprofeta lava mi rhangeleke va xanisiwe tano.” (Matewu 5:11, 12) Ina, ku xanisiwa a swi tsakisi, kambe loko hi yima hi tiyile hambiloko hi xanisiwa, hi lumbetiwa eka swihaxa-mahungu, hi fanele hi tsaka. Swi vula leswaku hi tsakisa Yehovha naswona hi ta kuma hakelo. Loko hi ri ni xivindzi swi kombisa leswaku hi ni ripfumelo leri tiyeke naswona swa hi tiyisekisa leswaku ha amukeleka eka Xikwembu. Hakunene, swi kombisa leswaku hi tshemba Yehovha hi ku helela. Ntshembo wo tano i wa nkoka eka Mukreste, hilaha xihloko lexi landzelaka xi nga ta swi kombisa hakona.
Xana U Dyondze Yini?
• Hi swihi swiyimo leswi lavaka leswaku hi va ni xivindzi namuntlha?
• Hi nga yi hlakulela njhani mfanelo ya xivindzi?
• I vamani lava nga swikombiso leswinene swo kombisa xivindzi?
• Ha yini hi navela ku va ni xivindzi?
[Swivutiso Swa Dyondzo]
[Swifaniso leswi nga eka tluka 9]
Simone Arnold (loyi sweswi a nga wa ka Liebster) wa le Jarimani, Widdas Madona wa le Malawi na Lydia na Oleksi Kurdas va le Ukraine va kombise xivindzi va tlhela va kaneta lowo homboloka
[Swifaniso leswi nga eka tluka 10]
A hi khomiwi hi tingana hikwalaho ka mahungu lamanene
[Xifaniso lexi nga eka tluka 11]
Xivindzi xa Pawulo loko a ri ekhotsweni xi pfunile eku twariseni ka mahungu lamanene
[Xifaniso lexi nga eka tluka 12]
Loko hi xivindzi hi hlamusela xiyimo xa hina xa Matsalwa eka muavanyisi, hi va hi nyikela rungula ra nkoka