“Tshinelani Eka Xikwembu, Kutani Xi Ta Tshinela Eka N’wina”

Emahlweni Ni Le Ndzhaku Ka Ku Hundzuka Ka Vutomi Bya Yena

WA NGA vona ndlela leyi vutomi bya Matsepang a byi pfumala xikongomelo ha yona! A a ri xinhwanyetana xa le Lesotho, ku nga tiko leri nga exikarhi ka tiko ra Afrika Dzonga. Matsepang u kurisiwe hi vatswari lava nga Makhatoliki. Hambiswiritano, ematshan’weni ya leswaku tinani ti n’wi pfuna leswaku a tshinela eka Xikwembu, ti n’wi khome hi ndlela yo biha ti n’wi nyika mali leswaku ti n’wi yengela eka swiendlo swa ku tikhoma loko biha hi tlhelo ra rimbewu, ku ringana malembe yo tala.

Hikwalaho, vukhongeri byi pfilunganye Matsepang byi n’wi endla a nga pfumeli eka Muvumbi la nga ni rirhandzu loyi a khathalaka hakunene hi swivumbiwa swa yena leswi nga vanhu. Hikwalaho ka ku honisiwa ni ku khomiwa hi ndlela leyo biha, Matsepang a a vavisekile emoyeni naswona a a titwa a nga pfuni nchumu. U kule a ri munhu wa madzolonga swinene. Leswi swi n’wi endle a va xigevenga.

Matsepang u hetelele a joyine ntlawa wa swigevenga leswi a swi tekela vanhu swilo eswitimeleni. U khomiwile kutani a pfaleriwa ekhotsweni ra le Afrika Dzonga. Endzhakunyana, u tlhelerisiwe eka rikwavo eLesotho, laha a nga ya emahlweni ni vugevenga, vudakwa, madzolonga ni ku tikhoma loko biha.

Loko a tshikilelekile swinene, Matsepang u khongele swinene eka Xikwembu leswaku xi n’wi pfuna. U xi tshembise a ku, “Xikwembu, loko ndzo pona, ndzi ta ku tirhela hilaha ndzi nga kotaka hakona.”

Ku nga ri kungani Matsepang u endzeriwe hi varhumiwa lava nga Timbhoni ta Yehovha. Va n’wi hlamusele leswaku va nga dyondza na yena Bibele. Loko a ri karhi a dyondza u sungule ku swi vona leswaku Xikwembu xa khathala hi vanhu. Entiyisweni, u dyondze leswaku Sathana, i “tata wa mavunwa,” u tirhisa marhengu ya vuxisi leswaku a endla van’wana va titwa va nga pfuni nchumu a tlhela a va endla va tshemba leswaku Yehovha a nge pfuki a va rhandzile.—Yohane 8:44; Vaefesa 6:11.

Ku hambana ni sweswo, vona ndlela leyi Matsepang a chavelelekeke ha yona loko a dyondze leswaku hi nga ha titwa hi ri vanhu loko hi hundzuka eswidyohweni swa hina swa khale, kutani hi lava ndzivalelo wa Xikwembu hi tlhela hi lwela ku xi tsakisa! U pfuniwe ku twisisa leswaku “Xikwembu i xikulu eka timbilu ta hina” naswona xi hi teka hi ndlela leyi hambaneke ni leswi hina hi titekisaka xiswona.—1 Yohane 3:19, 20.

Matsepang a a tsake ngopfu loko a hlaya marito ya mupisalema Davhida lama nge: “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.” (Pisalema 34:18) Tanihi un’wana wa lava “pfotlokeke emoyeni,” u sungule ku swi xiya leswaku Yehovha a nga ma fularheli malandza yakwe, hambi loko man’wana ya wona ma titwa ma ri ni nhlomulo kumbe ma titwa ma nga  pfuni nchumu. Swi n’wi chavelerile ku tiva leswaku Xikwembu xi khathalela tinyimpfu ta xona hinkwato naswona xa ti hlayisa loko ti ri emaxangwini. (Pisalema 55:22; 1 Petro 5:6, 7) Marito lama n’wi khumbeke ngopfu hi lama nge: “Tshinelani eka Xikwembu, kutani xi ta tshinela eka n’wina.”—Yakobo 4:8.

Leswaku matimba ya Rito ra Xikwembu, ku nga Bibele ma tirha, swi hatle swi tikomba evuton’wini bya Matsepang. U sungule ku ya eminhlanganweni ya Vukreste nkarhi na nkarhi a tlhela a tshika swiendlo leswi nga pfumelelaniki ni Matsalwa. Xana hi byihi vuyelo bya kona? A nga ha titwi a ri la nga faneriwiki hi ku rhandziwa hi Xikwembu. Ku sukela loko a khuvuriwile tanihi un’wana wa Timbhoni ta Yehovha, u tirhe tiawara ta magidi evutirhelini bya Vukreste tanihi muhuweleri wa mahungu lamanene ya Mfumo. Hambileswi a nga tshama a vaviseka emintlhavekweni, Matsepang sweswi u hanya vutomi lebyi tsakisaka lebyi nga ni xikongomelo. Wa nga vona ndlela leyi matimba ya Bibele ma antswisaka vutomi ha yona!—Vaheveru 4:12.

[Marito lama tshahiweke exihlokweni lama nga eka tluka 9]

“Xikwembu, loko ndzo pona, ndzi ta ku tirhela hilaha ndzi nga kotaka hakona”

[Bokisi leri nga eka tluka 9]

Misinya Ya Milawu Ya Bibele Ya Tirha

Yin’wana ya misinya ya milawu ya Bibele leyi chaveleleke lava khomiweke hi ndlela yo biha hi leyi landzelaka:

“Loko miehleketo ya mina leyi ndzi karhataka yi tele endzeni ka mina, nchavelelo wa wena [Xikwembu] wu sungule ku vukarha moya-xiviri wa mina.” (Pisalema 94:19) “Nchavelelo” wa Yehovha lowu kumekaka eRitweni rakwe i xihlovo xa nchavelelo lowukulu. Loko hi ehleketa ha wona loko hi ri karhi hi anakanyisisa ni loko hi khongela wu ta hi pfuna leswaku hi susa miehleketo leyi hi karhataka kutani wu hi endla hi tshemba Xikwembu leswaku i Munghana la twisisaka.

“[Yehovha] u horisa vanhu lava timbilu ta vona ti vavisekeke, naswona u boha timbanga ta vona leti vavaka.” (Pisalema 147:3) Loko hi tlangela tintswalo ta Yehovha ni lunghiselelo ra yena ro hi rivalela swidyoho swa hina hi ku tirhisa gandzelo ra Yesu ra nkutsulo, hi nga tshinela eka Xikwembu hi ntshunxekile, hi nga ha titwi hi ri lava nga amukelekiki. Leswi swi nga hi nyika nchavelelo ni ku rhula ka mianakanyo loku nga pimanisiwiki na nchumu.

“Ku hava munhu loyi a nga taka eka mina [Yesu Kreste] handle ka loko Tatana, loyi a ndzi rhumeke, a n’wi koka; naswona ndzi ta n’wi pfuxa hi siku ro hetelela.” (Yohane 6:44) Hi moya wakwe lowo kwetsima na hi ntirho wo chumayela Mfumo, Yehovha u hi kokela eka N’wana wakwe a tlhela a hi nyika ntshembo wa vutomi lebyi nga heriki.