Xana Vusweti Byi Ta Kala Byi Hela?

SOLOMONI Hosi yo tlhariha ya le Israyele wa khale u te: “Waswivo, mihloti ya lava va tshikileriwaka, kambe a va nga ri na muchaveleri; naswona lava va va tshikilelaka a va ri ni matimba, lerova a va nga ri na muchaveleri.” (Eklesiasta 4:1) Swi le rivaleni leswaku vanhu vo tala lava tshikileriweke lava a a anakanya hi vona a va ri swisiwana.

Ku pfumaleka ka mali a hi kona ku kombisaka leswaku vanhu va le vuswetini. Hi ku ya hi xiviko lexi humesiweke hi Banki ya Misava hi June 2002, “ku ringanyetiwe leswaku hi 1998, vanhu va 1,2 wa magidi ya timiliyoni emisaveni hinkwayo va hanya hi mali leyi nga ehansi ka $1 hi siku . . . naswona vanhu va 2,8 wa magidi ya timiliyoni va hanya hi mali leyi nga ehansi ka $2 hi siku.” Ku xiyiwe leswaku hambileswi tinhlayo leti ti nga le hansi ka leti nga tshama ti vikiwa, “ta ha ri ehenhla swinene hikwalaho ka leswi vanhu va nga le vuswetini.”

Xana vusweti byi ta kala byi hela? Yesu Kreste u byele vadyondzisiwa va yena a ku: “Swisiwana mi na swona nkarhi hinkwawo.” (Yohane 12:8) Kambe, xana sweswo swi vula leswaku vusweti ni vuyelo byo biha lebyi tisiwaka hi byona swi ta tshama swi ri kona hilaha ku nga heriki? Doo, hikuva hambileswi Yesu a nga tshembisangi valandzeri va yena leswaku va ta va swigwili, a hi fanelanga hi teka marito ya yena ma ri lama vulaka leswaku swisiwana swi ta tshama swi ri evuswetini.

Hambileswi matshalatshala ya vanhu ni switshembiso swa vona swa ku herisa vusweti swi hundzukeke nyuku wa mbyana, Rito ra Xikwembu, ku nga Bibele ra hi tiyisekisa leswaku ku nga ri khale a va nga he vi kona vanhu lava nga evuswetini. Entiyisweni, Yesu u vule “mahungu lamanene eka swisiwana.” (Luka 4:18) Mahungu wolawo lamanene ma katsa ni xitshembiso xa leswaku vusweti byi ta herisiwa. Sweswo swi ta endleka loko Mfumo wa Xikwembu wu tisa swiyimo swo lulama emisaveni.

Yoleyo yi ta va yi ri misava leyi hambaneke ni leyi! Yesu Kreste, Hosi ya le tilweni ‘u ta va ni nsovo eka loyi a pfumalaka ni loyi a nga xisiwana, u ta ponisa moya-xiviri wa swisiwana.’ Hakunene ‘u ta kutsula moya-xiviri wa vona eku tshikileriweni ni le madzolongeni.’—Pisalema 72:13, 14.

Malunghana ni nkarhi wolowo, Mikiya 4:4 yi ri: “Entiyisweni va ta tshama, un’wana ni un’wana ehansi ka murhi wakwe wa vhinya ni le hansi ka nkuwa wakwe, a ku nge vi na munhu loyi a va chavisaka; hikuva nomu wa Yehovha wa mavuthu wu swi vurile.” Mfumo wa Xikwembu wu ta tlhantlha swiphiqo hinkwaswo leswi xanisaka vanhu wu tlhela wu herisa vuvabyi ni rifu. Xikwembu ‘xi ta mita rifu hi masiku, kunene Yehovha, Hosi leyi Lawulaka u ta sula mihloti eswikandzeni hinkwaswo.’—Esaya 25:8.

U nga swi tshemba switshembiso leswi hikuva swi huhuteriwe hi Xikwembu hi ku kongoma. Ha yini u nga kambisisi vumbhoni lebyi kombisaka leswaku vuprofeta bya Bibele bya tshembeka?

[Laha Xifaniso Xi Humaka Kona eka tluka 32]

FAO photo/M. Marzot