U Nga Byi Kuma Kwihi Vukongomisi Bya Ntiyiso Bya Moya?

RODOLPHE u vutise hi ku vungunya a ku: “Loko ku ri leswaku swa boha ku landzela vukhongeri bya vatswari, ha yini u nga ngheni kereke ya Macelt leyi vakokwa wa hina a va nghena yona eka malembe ya 2 000 lama hundzeke?” Sweswo swi tsakise muntshwa la n’wi yingiseleke.

Rodolphe u ri: “Vuxaka bya mina ni Xikwembu ndzi byi teka byi ri bya nkoka swinene. A ndzi pfumelelani na swona leswaku ndzi boheka ku pfumela tidyondzo to karhi hileswi vandyangu wa ka hina lava hanyeke eka makume kumbe madzana ya malembe lama hundzeke a va pfumela eka tona.” Rodolphe u yi kambisise hi vukheta mhaka leyi ya nkoka; eka yena a yi nga ri nchumu wo fana ni ndzhaka.

Hambileswi vanhu va nga ha byi landzeriki vukhongeri bya vatswari va vona, vo tala va ha byi landzela. Kambe, xana swa boha minkarhi hinkwayo leswaku munhu a namarhela vukhongeri bya vatswari va yena? Xana Bibele yi ri yini?

Endzhaku ko heta malembe ya 40 emananga, Yoxuwa mutlhandlami wa Muxe u nyike Vaisrayele nkarhi wo tihlawulela, a ku: “Loko swi bihile ematihlweni ya n’wina ku tirhela Yehovha, hlawulani namuntlha loyi mi nga ta n’wi tirhela, kumbe swikwembu leswi vatata wa n’wina va swi tirheleke ehase ka Nambu kumbe swikwembu swa Vaamori etikweni ra vona leri mi tshamaka eka rona. Kambe loko ku ri mina ni vandyangu wa mina, hi ta tirhela Yehovha.”—Yoxuwa 24:15.

Un’wana wa vatatana lava Yoxuwa a a vulavula ha vona a ku ri Tera, tata wa Abrahama, loyi a a tshama emutini wa Ura, lowu hi nkarhi wolowo a wu ri evuxeni bya Nambu wa Yufrata. Bibele a yi vuli swo tala hi Tera, kambe yi boxa leswaku a a gandzela swikwembu swin’wana. (Yoxuwa 24:2) Hambileswi n’wana wa yena Abrahama a a nga xi tivi hi ku hetiseka xikongomelo xa Xikwembu, a a tiyimiserile ku suka etikweni ra rikwavo loko Yehovha a n’wi lerisa ku endla tano. Ina, Abrahama u hlawule vukhongeri lebyi nga faniki ni bya tata wa yena. Leswi Abrahama a endleke tano, u kume mikateko leyi Xikwembu xi n’wi tshembiseke yona, naswona vukhongeri byo tala byi n’wi teka tanihi “tata wa hinkwavo lava pfumelaka eka Xikwembu.”—Varhoma 4:11, Today’s English Version.

Bibele yi tlhela yi vulavula kahle hi mhaka ya Rhuti kokwa wa Yesu Kreste. Rhuti loyi a a ri Mumowabu la tekiweke hi Muisrayele, u ve noni naswona a a fanele a hlawula exikarhi ka ku tshama etikweni ra rikwavo kumbe a famba ni n’wingi wa yena va tlhelela eIsrayele. Hi ku xiya leswaku ku gandzela Yehovha i swa nkoka swinene ematshan’weni ya ku gandzela swifaniso ku fana ni vatswari va yena, Rhuti u byele n’wingi wa yena  a ku: “Vanhu va wena va ta va vanhu va mina, Xikwembu xa wena xi ta va Xikwembu xa mina.”—Rhuti 1:16, 17.

Loko yi vulavula hi nkoka wa mhaka leyi yi nga eBibeleni, Dictionnaire de la Bible yi hlamusela leswaku rungula leri ri kombisa “ndlela leyi wansati la tswariweke etikweni rimbe, exikarhi ka vahedeni lava a va ri ni tihanyi va tlhela va vengiwa hi Vaisrayele, . . . hi nkateko a veke kokwa wa Hosi Davhida wo kwetsima hikwalaho ka leswi a rhandzeke tiko ra Yehovha swin’we ni vugandzeri bya yena.” Rhuti a nga kanakananga ku hlawula vukhongeri lebyi nga faniki ni bya vatswari va yena, naswona hikwalaho ka sweswo u katekisiwe hi Xikwembu.

Mhaka leyi vulavulaka hi ku sungula ka Vukreste yi swi hlamusela kahle swivangelo swa ku va vadyondzisiwa va Yesu va fularhele vukhongeri bya vakokwa wa vona. Eka nkulumo yakwe ya matimba swinene, muapostola Petro u khutaze vayingiseri va yena leswaku va “[ponisiwa] eka xitukulwana lexi xo homboloka” hi ku hundzuka eswidyohweni swa vona kutani va khuvuriwa hi vito ra Yesu Kreste. (Mintirho 2:37-41) Xikombiso xin’wana xo hlawuleka a ku ri lexiya xa Sawulo, Muyuda loyi a a xanisa Vakreste. Loko Sawulo a ri endleleni yo ya eDamaska u vone xivono xa Kreste, laha endzhaku ka xona a hundzukeke Mukreste kutani a tiviwa tanihi muapostola Pawulo.—Mintirho 9:1-9.

Vakreste vo tala vo sungula a swi va humelelanga sweswo. Kambe hinkwavo va boheke ku tshika Vuyuda kumbe ku gandzela swikwembu swa vuhedeni swo hambana-hambana. Lava va veke Vakreste va rhange hi ku tiva ntiyiso kahle, hakanyingi endzhaku ka loko va burisane nkarhi wo leha malunghana ni leswi Yesu a nga ta swi endla tanihi Mesiya. (Mintirho 8:26-40; 13:16-43; 17:22-34) Vakreste volavo vo sungula a va swi tiva kahle leswaku va fanele va hundzuka. Ku khutaziwe vanhu hinkwavo, lava nga Vayuda ni lava nga riki Vayuda, kambe rungula ra kona a ri hundzukanga. Leswaku va tsakisa Xikwembu a va fanele va landzela vugandzeri lebyintshwa, ku nga Vukreste.

Nhlawulo Lowu Nga Wa Nkoka Eka Hina

Entiyisweni a swi lava xivindzi ku fularhela vukhongeri bya vatswari eka lembe-xidzana ro sungula—Vuyuda, ku gandzela mufumi, ku gandzela swikwembu swa vuhedeni—kutani u joyina vukhongeri lebyi nyenyiwaka hi Vayuda ni Varhoma. Ku nga ri kungani nhlawulo lowu wu vange nxaniso wa tihanyi. Ninamuntlha swi lava xivindzi ku fularhela “moya lowu andzeke wa ku longoloka ni vunyingi,” hilaha Hippolyte Simon, bixopo wa Mukhatoliki wa le Clermont-Ferrand a swi vekaka hakona ebukwini yakwe leyi nge Vers une France païenne? (Xana Tiko Ra Furwa Ri Amukela Vuhedeni?) Swi lava xivindzi ku va xirho xa nhlangano wa vukhongeri lowu nga nyawuriki lowu minkarhi yin’wana wu hlekuriwaka, ku nga wa Timbhoni ta Yehovha.

Paul, muntshwa wa le Bastia, eCorsica, la kuriseriweke evukhongerini bya Khatoliki, minkarhi yin’wana a a endla mintirho yin’wana ya le kerekeni yo tanihi ku xavisa makhekhe leswaku ku kumeka mali ya vandla ra Khatoliki ro phalala lava pfumalaka. Leswi a a lava ku yi twisisa kahle Bibele, u pfumele leswaku Timbhoni ta Yehovha ti hamba ti dyondza na yena. Hi ku famba ka nkarhi, u xiye leswaku leswi a a swi dyondza swi ta n’wi vuyerisa hilaha ku nga heriki. Hikwalaho, Paul u byi amukele hi ku helela vukongomisi bya Bibele kutani a va Mbhoni ya Yehovha. Vatswari va yena va xixime xiboho xa yena naswona sweswo a swi byi khumbanga vuxaka bya vona.

Amélie u tshama edzongeni wa Furwa. Ndyangu wa ka vona wu ve Timbhoni ta Yehovha ku sukela eka kokwana-xinguwe wa yena ku ya fika eka ntukulu-xinguwe. Ha yini a hlawule vukhongeri bya vatswari va yena? U ri: “Munhu a nga vi Mbhoni ya Yehovha hikwalaho ka leswi vatswari kumbe vakokwa wa yena va veke Timbhoni ta Yehovha. Kambe hi ku famba ka nkarhi, u fikelela xiboho lexi nge, ‘Lebyi i vukhongeri bya mina hikuva ndza pfumela eka tidyondzo  ta byona.’” Ku fana ni vantshwa van’wana vo tala lava nga Timbhoni ta Yehovha, Amélie wa swi tiva leswaku tidyondzo leti twalaka ta vukhongeri bya yena ti n’wi endla a va ni xikongomelo evuton’wini naswona ti n’wi endla a tshama a tsakile.

Lexi Endlaka Leswaku Hi Amukela Vukongomisi Bya Xikwembu

Buku ya Swivuriso ndzima 6, ndzimana 20, yi khutaza lava lavaka ku tsakisa Xikwembu, yi ku: “N’wananga, hlayisa xileriso xa tata wa wena, u nga wu fularheli nawu wa mana wa wena.” Marito lawa a hi ya ku sindzisa vantshwa leswaku va yingisa, kambe i xitsundzuxo lexi va khutazaka leswaku va amukela nkongomiso wa Xikwembu hi ku tiyisa ripfumelo ra vona ni hi ku tinyiketela ku endla ku rhandza ka Xikwembu. Muapostola Pawulo u khutaze vapfumeri-kulobye leswaku va ‘tiyiseka hi swilo hinkwaswo,’ va kumisisa loko leswi va dyondzisiweke swona swi fambisana ni Rito ra Xikwembu swin’we ni ku rhandza ka xona, naswona va hanya hi ku pfumelelana na swona.—1 Vatesalonika 5:21.

Timbhoni ta Yehovha to tlula tsevu wa timiliyoni, leti katsaka vantshwa ni vanhu lavakulu, ti endle xiboho xo tano, hambi ti kulele emindyangwini ya Vakreste kumbe kun’wana. Hi ku dyondza Bibele hi vukheta, ti kume tinhlamulo leti nga kanakanisiki ta swivutiso swa tona malunghana ni xikongomelo xa vutomi, naswona ti swi twisise kahle leswi Xikwembu xi swi languteleke eka vanhu. Loko ti kume vutivi byo tano, ti amukele vukongomisi bya Xikwembu, ti tikarhatela ku endla ku rhandza ka xona.

Hambiloko u wu hlaya minkarhi hinkwayo magazini lowu kumbe swi nga ri tano, swi nga va njhani leswaku u amukela xiringanyeto xa Timbhoni ta Yehovha xa ku ku pfuna ku dyondza Bibele leswaku u kambisisa vukongomisi bya yona bya timhaka ta moya. Loko u endla tano, u ta kota ku ‘tivonela hi wexe leswaku Yehovha hi lonene,’ naswona u ta kuma vutivi lebyi nga ta ku yisa evuton’wini lebyi nga heriki ntsendze loko u byi tirhisa.—Pisalema 34:8; Yohane 17:3.

[Xifaniso lexi nga eka tluka 5]

Ndyangu wa Timbhoni ta Yehovha le Furwa, wa swirho swo sukela eka kokwana-xinguwe ku fikela eka ntukulu-xinguwe

[Xifaniso lexi nga eka tluka 7]

Rhuti u hlawule ku gandzela Yehovha ematshan’weni ya swikwembu swa vakokwa wa yena