Wa Tsundzuka Xana?

Xana u swi tsakerile ku hlaya minkandziyiso leya ha ku humaka ya Xihondzo xo Rindza? Loko swi ri tano, ringeta ku hlamula swivutiso leswi landzelaka:

• Ku dyondza hi ndyangu wa Xafani swi nga hi pfuna njhani?

Xafani a a ri mukopi tlhelo matsalana wa Hosi Yosiya wa le Yuda. Xafani, loyi a a yingisiwa etikweni, u seketele tsima ra hosi ro vuyetela vugandzeri bya ntiyiso. Vana vambirhi va Xafani va tshame va tshembekile eka muprofeta Yeremiya. Naswona n’wana un’wana wakwe ni vatukulu va yena vambirhi na vona va tirhise nhlohlotelo wa vona etimhakeni ta vugandzeri bya ntiyiso. Kutani na hina hi fanele hi tirhisa swilo swa hina ni nhlohlotelo wa hina leswaku hi seketela vugandzeri bya ntiyiso.—12/15, matluka 19-22.

• Irene Hochstenbach u hlangavetane njhani ni vulema lebyikulu leswaku a kota ku tirhela Yehovha?

Loko a ri ni malembe ya nkombo, u fe tindleve. Hambi leswi a nga twiki u dyondze ku vulavurisana ni van’wana naswona sweswi u famba-famba ni nuna wakwe (loyi a nga mulanguteri la famba-fambaka) loko a endzela mavandlha eNetherlands.—1/1, matluka 23-6.

• Hi tihi tibuku timbirhi leti humesiweke eMintsombanweni ya Muganga ya “Vachumayeri Va Mfumo Lava Hisekaka”?

Vakreste emisaveni hinkwayo va tsakele ku kuma buku leyi nge Gandzela Xikwembu Xi Ri Xin’we Xa Ntiyiso, leyi hleleriweke ku dyondza ni vanhu lavantshwa endzhaku ka loko va hete ku dyondza buku leyi nge Vutivi Lebyi Yisaka eVuton’wini Lebyi Nga Heriki; buku yin’wana leyintshwa hi leyi nge Tshinela Eka Yehovha, naswona yi vulavula ngopfu hi timfanelo ni swiendlo swa Yehovha. Yi tlhela yi kombisa ndlela leyi hi nga n’wi tekelelaka ha yona hi ku kombisa timfanelo takwe.—1/15, matluka 23-4.

• Ma vula yini marito ya Swivuriso 12:5 lama nge: “Miehleketo ya lavo lulama i vuavanyisi”?

Mianakanyo ya vanhu lavanene ya twala naswona yi lulamile. Tanihi leswi vanhu lavo lulama va susumetiwaka hi rirhandzu ra vona eka Xikwembu ni le ka vanhu-kulobye, makungu ya vona i manene.—1/15, tluka 30.

• I yini lexi nga pfunaka munhu leswaku a va ni langutelo lerinene hi ntirho?

I swinene ku dyondzisiwa ku rhandza ntirho wa ha ri ntsongo. Bibele yi hi khutaza ku rhandza ku tirha hi tshika vulolo. (Swivuriso 20:4) Yi tlhela yi khutaza Vakreste leswaku va nga tshami va khomeke ku tlula mpimo hi ntirho. Hi fanele hi tsundzuka leswaku ku tirhela Xikwembu ku fanele ku va yona mhaka-nkulu evuton’wini bya hina. (1 Vakorinto 7:29-31) Ku tlula kwalaho, Vakreste va ntiyiso va tiyiseka leswaku Xikwembu a xi nge va tshiki.—2/1, matluka 4-6.

• Hi kwihi laha alitari yi boxiwaka kona ro sungula eBibeleni?

Hi le ka Genesa 8:20, leyi vulavulaka hi alitari leyi akiweke hi Nowa loko a huma engalaveni endzhaku ka Ndhambi. Kambe swi nga endleka Kayini na Avele va tirhise tialitari loko va endla magandzelo ya vona. (Genesa 4:3, 4)—2/15, tluka 28.

• Vakreste van’wana va swi tirhisa njhani swiyimo leswi cinceke?

Van’wana va pfumelelane ni ku cinca ka swiyimo swa vona entirhweni naswona sweswo swi endle leswaku va va ni nkarhi lowu engetelekeke ensin’wini. Van’wana va engetele nkarhi wa vona ni ku kuma malunghelo lama engetelekeke entirhweni wa Xikwembu loko vutihlamuleri byi hunguteka, ku fana ni loko vana va vona va kurile kumbe loko va nghenele vukati.—3/1, matluka 19-22.

• Xana xikombiso xa Yonasi ni xa muapostola Petro swi hi pfuna njhani leswaku hi languta van’wana hi ndlela leyi Yehovha a va langutaka ha yona?

Yonasi na Petro a a va ri ni swihoxo leswi tivekaka eka ndlela leyi va anakanyaka ha yona ni le ka ndlela leyi va anguleke ha yona eka miringo ya ripfumelo ni ku titsongahata ka vona. Hambiswiritano, Yehovha u vone timfanelo letinene eka vona kutani a hambeta a va tirhisa entirhweni wakwe. Loko van’wana va hi hlundzukisa kumbe ku hi heta matimba, hi nga anakanya hi timfanelo ta vona letinene leti hi ti tsakeleke enkarhini lowu hundzeke ni hi swilo leswinene leswi Xikwembu xi swi vonaka eka vona.—3/15, matluka 16-19.

• Ha yini mahlelelo ya tindzima ni tindzimana ta buku ya Tipisalema ma nga fani eka vuhundzuluxeri byo hambana-hambana bya Bibele?

Mahlelelo ya tindzima ni tindzimana ta buku leyi ma hambana eka Xiheveru xo sungula ni le ka vuhundzuluxeri bya kona lebyi nga eka Septuagint ya Xigriki. Vuhundzuluxeri bya sweswinyana byi nga hambana, swi titshege hi loko byi suka ematsalweni ya Xiheveru kumbe eka Septuagint.—4/1, tluka 31.