Xana Musa Wa Rirhandzu I Wa Nkoka Hi Ndlela Yihi?

BIBELE yi ri: “Xilo lexi navelekaka eka munhu wa la misaveni i musa wakwe wa rirhandzu.” (Swivuriso 19:22) Entiyisweni, swiendlo swa musa leswi susumetiwaka hi rirhandzu swa naveleka hakunene. Hambiswiritano, xiga lexi nge “musa wa rirhandzu” eBibeleni xi kombetela eka musa lowu sekeriweke eka vuxaka lebyi ana se byi nga kona, byo fana ni lebyi sekeriweke eka xiendlo xa musa lexi munhu a nga tshama a endleriwa xona hi un’wana. Xisweswo, wu katsa ku tshembeka.

Hosi Yehowaxi wa le Yuda u tsandzekile ku hlakulela mfanelo leyi leyi navelekaka. A a fanele a kombise ku nkhensa lokukulu eka hahani wakwe ni malume wakwe Yoyada. Loko Yehowaxi a nga si va ni lembe rin’we hi vukhale, kokwa wakwe wa xisati la hombolokeke u tiendle hosi kutani a dlaya vamakwavo va Yehowaxi hinkwavo lava a va ri vadyandzhaka. Kambe u tsandzekile ku dlaya Yehowaxi lontsongo hikuva hahani wakwe na malume wakwe a va n’wi fihle hi vukheta. Va tlhele va n’wi dyondzisa Nawu wa Xikwembu. Loko Yehowaxi a ri ni malembe ya nkombo hi vukhale, malume wakwe u tirhise xikhundlha xakwe xa ku va muprista lonkulu leswaku a ta dlaya hosi ya xisati yo homboloka kutani a veka Yehowaxi exiluvelweni xa vuhosi.—2 Tikronika 22:10–23:15.

Yehowaxi lontsongo u fume hi ndlela leyinene kukondza malume wakwe a fa, kutani a sungula ku gandzela swifaniso. Xikwembu xi rhumele Zakariya, loyi a a ri n’wana Yoyada leswaku a ya tshinya Yehowaxi hikwalaho ka vugwinehi bya yena. Yehowaxi u lerise leswaku Zakariya a khandliwa hi maribye. Wa nga vona xiendlo lexi tsemaka nhlana xa ku nga tshembeki eka ndyangu lowu a a fanele a wu nkhensa ku tlula mpimo!—2 Tikronika 24:17-21.

Bibele yi ri: ‘Yehowaxi lowa hosi a nga wu tsundzukanga musa wa rirhandzu lowu tata wa Zakariya a n’wi kombeke wona, lerova a dlaya n’wana wakwe.’ Loko a ri kusuhi ni ku fa, Zakariya u te: “Yehovha a a teke goza, a rihisa.” Hi ku pfumelelana ni marito ya Zakariya, Yehowaxi u vabye swinene naswona u dlayiwe hi malandza yakwe.—2 Tikronika 24:17-25.

Ematshan’weni ya leswaku va hetelela va fane na Hosi Yehowaxi, hinkwavo lava yingisaka ndzayo ya tsalwa leri landzelaka va ta va ni vumundzuku lebyi tsakisaka: “Musa wa rirhandzu ni ntiyiso swi nga ku sukeli. . . . Kutani u kuma tintswalo . . . ematihlweni ya Xikwembu ni le ka munhu wa la misaveni.”—Swivuriso 3:3, 4.