Xiviko Xa Vahuweleri Va Mfumo

Mpfuno Wo Namarhela Nawu Wa Ku Kwetsima Ka Ngati

EMISAVENI hinkwayo malandza ya Yehovha ma kombise leswaku ma yingisa Xikwembu loko swi ta emhakeni ya ku kwetsima ka ngati. (Mintirho 15:28, 29) Vamakwerhu lava va Vakreste va pfuniwe hi ntlawa wa hlonga ro tshembeka ni ro tlhariha. (Matewu 24:45-47) A hi voneni leswaku vuyelo byi ve byihi le swihlaleni swa Philippine.

Rhavi ra le Philippine ri vika mhaka leyi landzelaka: “Hi 1990 hi byeriwe leswaku vayimeri lava humaka eBethele ya le Brooklyn va ta va na seminara laha Philippine. Ku rhambiwe vamakwerhu lava humaka emarhavini yo hlayanyana ya le Asia, ku katsa ni rhavi ra le Korea, Taiwan na Hong Kong. Xikongomelo xa seminara leyi a ku ri ku va pfuna leswaku va simeka Ndzawulo ya Rungula ra Swibedlhele emarhavini ya ka vona ni ku va ni Tikomiti to Vulavurisana ni Swibedlhele. Le Philippine tikomiti leti ti rhange ti simekiwa emadorobeni lamakulu ya mune.” Tikomiti leti a ti ta ringeta ku kuma madokodela lama tiyimiseleke ku tirhisana na hina malunghana ni xiboho lexi hina Vakreste hi xi endleke emhakeni ya ngati. A ma ta tlhela ma pfuna vamakwerhu loko ku tshuka ku va ni swiphiqo swa ngati.

Remegio u hlawuriwe ku tirha eka Komiti yo Vulavurisana ni Swibedlhele ya le Baguio. Hi ku famba ka nkarhi, madokodela ma sungule ku xiya ndlela leyi komiti leyi yi pfunaka ha yona. Remegio u tsundzuka siku rin’wana loko madokodela yo hlayanyana lawa a ma hlangane ni Komiti yo Vulavurisana ni Swibedlhele ma lave ku tiva leswaku ma fanele ma va tshungurisa ku yini vavabyi lava nga Timbhoni lava nga pfumeriki ku pomperiwa ngati. Remegio u te: “Madokodela ma sungule ku vutisa swivutiso, kambe ndzi tikume ndzi phasekile hikuva swivutiso swa kona a swi tika.” U khongele eka Yehovha leswaku a n’wi pfuna ku langutana ni mhaka leyi. Remegio u ya emahlweni: “Endzhaku ka xivutiso xin’wana ni xin’wana, madokodela man’wana a ma tlakusa mavoko ma hlamusela ndlela leyi ma langutaneke ha yona ni xiyimo lexi fanaka.” Remegio u wu tsakerile mpfuno lowu, tanihi leswi xiyenge lexi xa swivutiso ni tinhlamulo xi tekeke tiawara timbirhi.

Sweswi ku ni tikomiti ta 21 etikweni hinkwaro, naswona ku ni vamakwerhu va 77 lava tirhaka eka tona. Danilo, Mbhoni leyi nga dokodela, u ri: “Madokodela ma swi xiya leswaku vavabyi lava nga Timbhoni va seketeriwa swinene hi nhlengeletano ya vona.” Dokodela un’wana eku sunguleni u ale ku endla vuhandzuri eka makwerhu un’wana tanihi leswi a a nga lavi ku pomperiwa ngati. Makwerhu loyi u phikelerile eka xiboho xa yena. U endliwe vuhandzuri naswona a ku vanga na xiphiqo. Ndzawulo ya Rungula ra Swibedlhele ya vika: “Dokodela loyi u hlamarisiwe hi ndlela leyi makwerhu a a hlakarhela ha yona. U te: ‘Hikwalaho ka leswi swi endlekeke eka muvabyi loyi, loko ku ta xirho xa n’wina lexi lavaka ku endliwa vuhandzuri bya muxaka lowu handle ko pomperiwa ngati, ndzi ta byi endla hi mbilu yo basa.’”