“Tshinelani Eka Xikwembu, Kutani Xi Ta Tshinela Eka N’wina”

Emahlweni Ni Le Ndzhaku Vutomi Bya Khale Lebyi Nga Tsakisiki Ni Vumundzuku Lebyinene

“RITO ra Xikwembu ra hanya naswona ri ni matimba, ri kariha ku tlula banga rihi ni rihi leri tsemaka hi matlhelo mambirhi . . . naswona ra swi kota ku twisisa miehleketo ni makungu ya mbilu.” (Vaheveru 4:12) Muapostola Pawulo u vule marito wolawo malunghana ni ndlela leyi rungula ra Xikwembu ri nga ni matimba lamakulu ha yona. Vuswikoti bya rona byo fikelela mbilu byi vonake kahle hi lembe-xidzana ro sungula C.E. Lava va veke Vakreste va ambale munhu lontshwa ku nga khathariseki minkucetelo yo biha leyi a yi ri kona hi nkarhi wolowo.—Varhoma 1:28, 29; Vakolosa 3:8-10.

Matimba yo hundzula lawa rito ra Xikwembu ri nga na wona, hilaha swi tsariweke hakona eBibeleni ma vonaka ni namuntlha. Hi xikombiso, anakanya hi mhaka ya xihontlovila lexi vuriwaka Richard. Leswi a a ri ni xifafa, Richard a a lwa hambiloko mhaka ya kona yi nga nyawuli. Vutomi bya yena a byi onhiwe hi madzolonga. Richard u joyine ntlangu wa xibakela. U tiletele swinene kutani a va ngwenya ya xibakela ya le Westphalia, le Jarimani. Richard u tlhele a va xindzendzele naswona hakanyingi a a rhandza nyimpi. Siku rin’wana loko ku ri ni nyimpi ya muxaka wolowo ku dlayiwe munhu, naswona a ku sele katsongo Richard a khotsiwile.

Ku vuriwa yini hi vukati bya Richard? Richard u ri: “Loko mina na Heike hi nga si dyondza Bibele, un’wana ni un’wana a a tihanyela vutomi bya yena. Heike a a heta nkarhi wo tala a ri ni vanghana va yena kasi mina a ndzi titsakisa hi vuhungasi bya mina—ngopfu-ngopfu ku ba xibakela, ku tshwiririka emagandlatini ya lwandle ni ku swatama.”

Loko Richard na Heike va sungule ku dyondza Bibele ni Timbhoni ta Yehovha, Richard u pfilunganyekile loko a kuma leswaku u fanele a endla mindzulamiso leyi a yi tikomba yi nga ta koteka, ya ku hanya hi ku pfumelelana ni mimpimanyeto leyi tlakukeke leyi nga eRitweni ra Xikwembu. Kambe, loko a ya a tiva Yehovha Xikwembu ku antswa, Richard u ve ni ku navela lokukulu ko n’wi tsakisa. Richard u swi vonile leswaku Xikwembu a xi va tsakeli lava rhandzaka madzolonga kumbe lava ma endlelaka ku titsakisa. Richard u dyondze leswaku “moya-xiviri [wa Yehovha] wa n’wi venga un’wana ni un’wana la rhandzaka madzolonga.”—Pisalema 11:5.

Ku tlula kwalaho, ntshembo wa ku hanya hi masiku emisaveni leyi nga paradeyisi wu tsakise Richard na Heike. A va lava ku nghena swin’we eparadeyisini! (Esaya 65:21-23) Xirhambo lexi nge “tshinelani eka Xikwembu, kutani xi ta tshinela eka n’wina,” xi n’wi khumbe swinene Richard. (Yakobo 4:8) U vone swi ri swa nkoka ku yingisa ndzayo leyi huhuteriweke leyi nge: “U nga n’wi naveli munhu wa madzolonga, hambi ku ri ku hlawula yin’wana ya tindlela takwe. Hikuva munhu la kanganyisaka i nchumu lowu nyenyetsaka eka Yehovha, kambe Yena u rhandza lavo lulama.”—Swivuriso 3:31, 32.

Hambileswi a a swi navela hi mbilu hinkwayo ku hundzula tindlela ta yena, Richard u swi xiyile leswaku sweswo a nge swi endli hi matimba ya yena. U swi xiyile leswaku u fanele a lava mpfuno wa Xikwembu hi xikhongelo. Xisweswo u endle hi ku pfumelelana ni marito ya Yesu lawa a ma byeleke vaapostola va Yena: “Mi hambeta mi khongela, leswaku mi nga ngheni endzingweni. Ina, moya wu ni mapfundza, kambe nyama yi tsanile.”—Matewu 26:41.

Endzhaku ka loko a dyondze ndlela leyi Xikwembu xi langutaka madzolonga ni xifafa ha yona, Richard  a a tiyiseka leswaku ntlangu wa xibakela a wu xi tsakisi. Hi ku pfuniwa hi Yehovha ni hi ku khutaziwa hi lava a va dyondza na yena Bibele, Richard u tshike madzolonga. U tshike ku ba xibakela ni ku rhandza nyimpi hiloko a tiyimisela ku antswisa vutomi bya ndyangu wa yena. Richard loyi sweswi a nga mulanguteri la nga ni moya wo rhula eka rin’wana ra mavandlha ya Timbhoni ta Yehovha u ri: “Ku dyondza ntiyiso wa le Bibeleni swi ndzi pfunile leswaku ndzi rhanga ndzi anakanya loko ndzi nga si teka goza.” Wa engetela: “Sweswi vuxaka bya mina ni nsati ni vana va hina byi kongomisiwa hi nsinya wa nawu wa rirhandzu ni xichavo. Hikwalaho ka sweswo, ndyangu wa hina wu ni vun’we.”

Minkarhi yin’wana vanhu lava nga riki na vutivi va hehla Timbhoni ta Yehovha va vula leswaku ti hahlula mindyangu. Hambiswiritano, swikombiso swa vanhu vo tanihi Richard swi va paluxa va ri vahembi. Entiyisweni, ntiyiso wa Bibele wu nga endla leswaku ndyangu wu tiya naswona lava tshameke va hanya vutomi lebyi nga tsakisiki va va ni vumundzuku lebyinene.—Yeremiya 29:11.

[Marito lama tshahiweke exihlokweni lama nga eka tluka 9]

“Ntshembo wa misava ya paradeyisi wu ndzi susumetele ku hundzuka”

[Bokisi leri nga eka tluka 9]

Misinya Ya Milawu Ya Bibele Ya Tirha

Bibele yi nga byi khumba swinene vutomi bya vanhu. Hi leyi misinya yin’wana ya milawu ya le Matsalweni leyi pfuneke vanhu lava nga ni madzolonga leswaku va hundzuka:

“Loyi a hlwelaka ku hlundzuka wa antswa ku ri ni wanuna wa matimba, ni loyi a lawulaka moya wakwe ku ri ni loyi a tekaka muti.” (Swivuriso 16:32) Ku hlundzuka loku nga lawulekiki i xikombiso xa ku tsana, ku nga ri xa vurhena.

“Kunene ku twisisa ka munhu ku vohlisa ku hlundzuka kakwe.” (Swivuriso 19:11) Loko munhu a xi twisisa kahle xiyimo, swa n’wi pfuna leswaku a vona leswi ku nga ha vaka ku ri swona swi vangaka ku va ni ku tlulana milenge, naswona leswi swi nga n’wi endla a tikhoma, a nga hlundzuki ku tlula mpimo.

‘U nga vi nakulobye wa loyi a voyameleke eku kariheni leswaku u nga toloveli tindlela ta yena.’ (Swivuriso 22:24, 25) Vakreste va endla kahle loko va nga tolovelani ni lava hatlaka va kariha.