Matimu Lama Kokaka Rinoko

MUVALANGI Richard E. Byrd u teke maendzo ya ntlhanu a ya valanga ndhawu ya Antarctic ku sukela hi 1928 ku fikela hi 1956. Tanihi leswi yena ni vavalangi-kulobye a va swi tsala ehansi swiendlakalo swa siku na siku, va kote ku twisisa mahungelo ya timheho, va mpfampfarhuta mimepe ya tiko-nkulu ra Antarctica va tlhela va kuma rungula ro tala hi ndhawu leyi.

Vuvalangi bya Byrd byi kombisa nkoka wa ku tsala swiendlakalo swa siku na siku ebukwini. Buku yo tano yi nga pfuna ku hlayisa vuxokoxoko bya maendzo ya xikepe kumbe xihaha-mpfhuka. Yi nga tirhisiwa endzhaku, loko ku kambisisiwa swiendlakalo swa nkarhi lowu hundzeke kumbe rungula leri nga pfunaka loko ku tekiwa maendzo enkarhini lowu taka.

Matsalwa ma hi hlamusela rungula leri kokaka rinoko ra Ndhambi ya le nkarhini wa Nowa. Ndhambi yoleyo ya misava hinkwayo yi hete nkarhi lowu tlulaka lembe. Loko Ndhambi yi nga si fika, Nowa, nsati wakwe, vana va vona vanharhu kun’we ni vasati va vona va hete malembe ya 50 kumbe 60 va aka ngalava—xikepe lexikulu lexi vundzeni bya xona a byi endla mpimo wa kwalomu ka 40 000 wa tikhubiki-mitara. Xana a yi akeriwa yini ngalava leyi? A yi akeriwa ku ponisa vanhu vo karhi ni swiharhi hi nkarhi wa Ndhambi.—Genesa 7:1-3.

Kahle-kahle, buku ya Bibele ya Genesa yi ni leswi hi nga swi vulaka matimu ya Nowa ya swiendlakalo swo sukela eku sunguleni ka Ndhambi ku fikela loko yena ni ndyangu wakwe va huma engalaveni. Xana matimu lawa ma vula swo karhi eka hina namuntlha?