Yingisa Leswi Moya Wu Swi Vulaka!
Yingisa Leswi Moya Wu Swi Vulaka!
“Loyi a nga ni ndleve a a yingise leswi moya wu swi byelaka mavandlha.”—NHLAVUTELO 3:22.
1, 2. Hi yihi ndzayo leyi phindha-phindhiweke eka marungula ya Yesu lama yaka eka mavandlha ya nkombo lama boxiweke eka Nhlavutelo?
MALANDZA ya Yehovha ma fanele ma yingisa marito ya Yesu Kreste lama yaka eka mavandlha ya nkombo lama boxiweke ebukwini ya Bibele ya Nhlavutelo. Ina, rungula rin’wana ni rin’wana ri ni ndzayo leyi nge: “Loyi a nga ni ndleve a a yingise leswi moya wu swi byelaka mavandlha.”—Nhlavutelo 2:7, 11, 17, 29; 3:6, 13, 22.
2 Se hi ma kambisisile marungula ya Yesu lama yaka eka tintsumi kumbe valanguteri va le Efesa, Smirna ni va le Pergamo. Xana hi nga vuyeriwa njhani eka leswi a swi byeleke mavandlha laman’wana ya mune, hi ku kongomisiwa hi moya lowo kwetsima?
Eka Ntsumi Ya Le Tiyatira
3. Muti wa Tiyatira a wu kumeka kwihi, naswona a wu dume hi yini?
3 “N’wana wa Xikwembu” u bumabumela vandlha ra le Tiyatira a tlhela a ri sola. (Hlaya Nhlavutelo 2:18-29.) Muti wa Tiyatira (lowu sweswi wu nga Akhisar) a wu akiwe etlhelweni ka xinambyana lexi cheletaka Nambu wa Gediz (ku nga Hermus wa khale) evupela-dyambu bya Asia Minor. Muti lowu a wu dume hi swilo swa wona leswi endliweke hi mavoko. Vanhu va muti lowu, a va endla tinguvu leti dumeke ta ribungu kumbe ta xivunguvungu va ti daya hi rimitsu ra murhi wa madder. Lidiya, loyi a veke Mukreste hi nkarhi lowu Pawulo a nga endzela muti wa Filipiya, le Grikiya, a a ri “muxavisi wa swilo swa xivunguvungu, wa muti wa Tiyatira.”—Mintirho 16:12-15.
4. Hi yihi mintirho leyi vandlha ra le Tiyatira ri bumabumeriweke ha yona?
4 Yesu u bumabumele vandlha ra le Tiyatira hikwalaho ka mintirho ya rona leyinene, ku nga rirhandzu, ripfumelo, ku tiyisela ni ku chumayela. Kahle-kahle, ‘mintirho ya rona yo hetelela a yi antswa ku tlula ya khale.’ Kambe, hambiloko hi tiveka hi leswinene, a hi fanelanga hi honisa ndlela leyi hi tikhomaka ha yona.
5-7. (a) Xana ‘wansati la vuriwaka Yezabele’ a a ri mani, naswona a ku fanele ku endliwa yini hi nkucetelo wa yena? (b) Xana rungula leri Kreste a ri kongomiseke evandlheni ra le Tiyatira ri pfuna vavasati lava chavaka Xikwembu leswaku va endla yini?
5 Vandlha ra le Tiyatira a ri pfumelela ku gandzela swifaniso, tidyondzo ta mavunwa ni ku tikhoma ko biha hi tlhelo ra rimbewu. Eka rona a ku ri ni ‘wansati la vuriwaka Yezabele’—laha kumbexana a ku ri ntlawa wa vavasati lava nga ni mikhuva yo fana ni ya Hosi ya xisati Yezabele wa le Mfun’weni wa tinyimba ta khume ta Israyele. Swidyondzi swin’wana swi ringanyeta leswaku ‘vaprofeta va xisati’ va le Tiyatira, a va ringeta ku yenga Vakreste leswaku va gandzela swikwembu swa mabindzu ni leswaku va ya eminkhubyeni leyi nga ni swakudya leswi tlhaveriweke swifaniso swa hava. Hi nga tshuki hi pfumelela wansati la tiendlaka muprofeta leswaku a kucetela van’wana evandlheni ra Vukreste namuntlha!
6 Kreste ‘a a ri kusuhi ni ku tlatlalata Yezabele esangwini ra vavabyi, ni lava endlaka vuoswi na yena a va tlatlalata enhlomulweni lowukulu, handle ka loko vo hundzuka eswiendlweni swa yena.’ Valanguteri a va fanelanga va pfumelela dyondzo ni nkucetelo wo tano wo biha, naswona ku nga vi ni Mukreste la endlaka vuoswi bya moya ni bya nyama kumbe ku gandzela swifaniso hi ku lava ku vona leswaku “swilo leswi enteke swa Sathana” swi bihe ku fikela kwihi. Loko hi yingisa xitsundzuxo xa Yesu, ‘hi ta swi khoma swi tiya leswi hi nga na swona,’ naswona xidyoho a xi nge fumi exikarhi ka hina. Hikwalaho ka leswi va aleke mikhuva, ku navela ni makungu yo biha, vatotiwa lava pfuxiweke eku feni va nyikiwa “vulawuri ehenhla ka matiko” naswona va ta hlanganyela na Kreste loko a ma lovisa. Mavandlha ya namuntlha ma ni tinyeleti to fanekisela, naswona vatotiwa va ta nyikiwa “nyeleti ya mixo leyi vangamaka,” ku nga Muteki, Yesu Kreste, loko va pfuxeriwa etilweni.—Nhlavutelo 22:16.
7 Vandlha ra le Tiyatira a ri tsundzuxiwile leswaku ri nga wu pfumeleli nkucetelo wo biha wa vavasati va vugwinehi. Rungula ra Kreste leri huhuteriweke hi moya, leri yaka evandlheni leri, ri pfuna vavasati lava chavaka Xikwembu namuntlha leswaku va tshama endhawini leyi Xikwembu xi va aveleke yona. A va ringeti ku lawula vavanuna naswona a va kuceteli vamakwerhu va xinuna leswaku va oswa hi tlhelo ra moya kumbe ra nyama. (1 Timotiya 2:12) Ematshan’weni ya sweswo, vavasati vo tano va veka xikombiso lexinene emintirhweni leyinene leyi dzunisaka Xikwembu. (Pisalema 68:11; 1 Petro 3:1-6) Loko vandlha ri langutela leswi ri nga na swona—ku nga tidyondzo ni ku tikhoma loku tengeke swin’we ni ku rhandza ntirho wa Mfumo—loko Kreste a ta, ri ta kuma mikateko ku nga ri ndzoviso.
Eka Ntsumi Ya Le Sarda
8. (a) Xana muti wa Sarda a wu kumeka kwihi, naswona hi byihi vuxokoxoko byin’wana malunghana na wona? (b) Ha yini vandlha ra le Sarda a ri lava mpfuno?
8 Vandlha ra le Sarda a ri lava mpfuno wa xihatla hikuva a ri file emoyeni. (Hlaya Nhlavutelo 3:1-6.) Muti wa Sarda a swi wu fambela kahle swinene naswona a wu ri kwalomu ka tikhilomitara ta 50 edzongeni wa Tiyatira. Mabindzu, misava yo nona, swiambalo ni timete ta wulu swi wu endle wu va muti lowu fuweke lowu tshameke wu va ni vaaki va kwalomu ka 50 000. Hi ku ya hi n’wamatimu Josephus, muti wa Sarda a wu ri ni Vayuda vo tala hi lembe-xidzana ro sungula B.C.E. Eka marhumbi ya muti lowu ku ni sinagoga ni tempele ya xikwembu xa le Efesa lexi vitaniwaka Artemi.
9. Hi fanele hi endla yini loko hi huma nsimu ku hetisa nawu ntsena?
9 Kreste u byele ntsumi ya vandlha ra le Sarda a ku: “Ndzi tiva swiendlo swa wena, leswaku u ni vito ra leswaku wa hanya, kasi u file.” Ku vuriwa yini loko hi ri ni ndhuma ya leswaku hi xalamukile hi tlhelo ra moya kambe kahle-kahle hi nga ri na mhaka na wona malunghelo ya Vukreste, hi huma nsimu ku hetisa nawu ntsena naswona hi ri ‘kusuhi ni ku fa’ hi tlhelo ra moya? Kutani hi fanele hi ‘hambeta hi anakanya hi ndlela leyi hi ri amukeleke ni ku ri twa’ ha yona rungula ra Mfumo, naswona hi fanele hi tlhela hi hiteka entirhweni wo kwetsima. Entiyisweni, hi fanele hi sungula ku hlamula swi huma embilwini loko hi ri eminhlanganweni ya Vukreste. (Vaheveru 10:24, 25) Kreste u tsundzuxe vandlha ra le Sarda a ku: “Loko u nga pfuki, ndzi ta ta ku fana ni khamba, u nge wu tivi nikatsongo nkarhi lowu ndzi taka ha wona.” Ku vuriwa yini hi siku ra hina? Ku nga ri khale hi ta boheka ku tihlamulela.
10. Hambi ku ri eka xiyimo xo fana ni lexiya xa le Sarda, i yini lexi nga ha humelelaka eka Vakreste va nga ri vangani?
10 Hambi ku ri ehansi ka xiyimo xo fana ni xa le Sarda, ku nga ha va ni vanhu va nga ri vangani lava ‘nga nyamisiki tinguvu ta vona ta le handle, lava swi va fanelaka ku famba na Kreste va ambale tinguvu to basa.’ Minkarhi hinkwayo va tikombisa va ri Vakreste hi ku tshama va tengile, va nga pfumeleli misava leyi leswaku yi thyakisa mahanyelo ni vukhongeri bya vona. (Yakobo 1:27) Hikwalaho, Yesu ‘a nge ma susi nikatsongo mavito ya vona ebukwini ya vutomi, kambe u ta va bumabumela emahlweni ka Tata wakwe ni le mahlweni ka tintsumi.’ Loko wu kumiwe wu faneleka ku famba na Kreste, ntlawa wa mutekiwa, wa lava totiweke hi moya, wu ta ambexiwa nguvu leyinene, leyi vangamaka yi tlhela yi basa, leyi fanekiselaka mintirho yo lulama ya vakwetsimi va Xikwembu. (Nhlavutelo 19:8) Malunghelo lawa va nga ta ma kuma etilweni ma va nyika matimba yo ya emahlweni va lwela ku hlula misava leyi. Nakambe, ku ni mikateko leyi nga ta kumiwa hi lava nga ta hanya hilaha ku nga heriki laha misaveni. Mavito ya vona na wona ma tsariwile ebukwini ya vutomi.
11. Xana hi fanele hi endla yini loko hi khomiwa hi vurhongo bya moya?
11 A nga kona eka hina la lavaka ku tikuma a ri eka xiyimo xo biha hi tlhelo ra moya xo fana ni xa vandlha ra le Sarda. Kambe hi fanele hi endla yini loko hi vona leswaku hi sungule ku khomiwa hi vurhongo bya moya? Hi fanele hi teka goza ra xihatla. A hi nge hi sungula ku kokiwa hi tindlela to biha kumbe a ha ha yi kahle eminhlanganweni kumbe ensin’wini. A hi kombeleni Yehovha hi mbilu hinkwayo leswaku a hi pfuna. (Vafilipiya 4:6, 7, 13) Ku hlaya Bibele siku ni siku swin’we ni ku dyondza Matsalwa ni tibuku ta “mulanguteri wo tshembeka” swi ta hi pfuna leswaku hi tshama hi xalamukile hi tlhelo ra moya. (Luka 12:42-44) Kutani hi ta fana ni lavaya va le Sarda, lava va amukeriweke hi Kreste naswona hi ta va nkateko eka vapfumerikulorhi.
Eka Ntsumi Ya Le Filadelfiya
12. U nga xi hlamusela njhani xiyimo xa vukhongeri xa le Filadelfiya wa khale?
12 Yesu u ri bumabumerile vandlha ra le Filadelfiya. (Hlaya Nhlavutelo 3:7-13.) Muti wa Filadelfiya (lowu sweswi wu vuriwaka Alasehir) a wu ri ndhawu leyi nyukaka evupela-dyambu bya Asia Minor laha vhinyo a yi endliwa kona. Phela, xikwembu xa kona lexikulu a ku ri Dionysus, ku nga xikwembu xa vhinyo. Swi vonaka onge Vayuda va le Filadelfiya va be hansi loko va ringeta ku kucetela Vakreste lava nga Vayuda leswaku va tlhelela eka mikhuva yo karhi ya Nawu wa Muxe.
13. Xana Kreste u xi tirhise njhani “xilotlelo xa Davhida”?
13 Kreste u “ni xilotlelo xa Davhida,” naswona u nyikiwe timhaka ta Mfumo leswaku a ti langutela swin’we ni ku langutela ndyangu hinkwawo wa ripfumelo. (Esaya 22:22; Luka 1:32) Yesu u tirhise xilotlelo xexo leswaku a pfulela Vakreste va le Filadelfiya wa khale ni le tindhawini tin’wana leswaku va kuma malunghelo yo karhi ya Mfumo. Ku sukela hi 1919, u pfulele “mulanguteri wo tshembeka” “nyangwa leyikulu” leyi yisaka entirhweni wo chumayela hi Mfumo, leyi nga ta ka yi nga pfariwi hi munhu. (1 Vakorinto 16:9; Vakolosa 4:2-4) Kambe, nyangwa ya malunghelo ya Mfumo yi pfariwile eka “lava va sinagoga ya Sathana,” hikuva a hi Vaisrayele va moya.
14. (a) Xana Yesu u ri tshembise yini vandlha ra le Filadelfiya? (b) Xana hi nga swi papalata njhani ku wa “enkarhini wa ndzingo”?
14 Yesu u tshembise Vakreste va le Filadelfiya wa khale a ku: “Leswi u hlayiseke rito leri yelanaka ni ku tiyisela ka mina, na mina ndzi ta ku hlayisa enkarhini wa ndzingo, lowu nga ta wela misava hinkwayo leyi akiweke.” Ntirho wo chumayela wu lava munhu a tiyisela hilaha Yesu a endleke hakona. A nga pfumelanga ku hluriwa hi nala, kambe u ye emahlweni a endla ku rhandza ka Tata wakwe. Hikwalaho, Kreste u pfuxiwile a ya kuma vutomi lebyi nga heriki etilweni. Loko hi namarhela xiboho xa hina xo gandzela Yehovha naswona hi seketela Mfumo hi ku chumayela mahungu lamanene, hi ta swi kota ku yima hi nga wi ‘enkarhini lowu wa ku ringiwa.’ Hi ta ‘hambeta hi fumbarhela leswi hi swi kumeke’ eka Kreste hi ku tikarhatela ku ndlandlamuxa timhaka ta Mfumo. Loko va endla leswi, vatotiwa va ta kuma harhi ya le tilweni ya risima naswona vanghana va vona vo tshembeka va ta kuma vutomi lebyi nga heriki emisaveni.
15. I yini lexi languteriweke eka lava va nga ta va ‘tiphuphu etempeleni ya Xikwembu’?
15 Kreste u ya emahlweni a ku: “Loyi a hlulaka—ndzi ta n’wi endla phuphu etempeleni ya Xikwembu xa mina, . . . naswona eka yena ndzi ta tsala vito ra Xikwembu xa mina ni vito ra muti wa Xikwembu xa mina, Yerusalema lontshwa la xikaka hi le tilweni eka Xikwembu xa mina, ni vito ra mina lerintshwa.” Valanguteri lava totiweke va fanele va seketela vugandzeri bya ntiyiso. Va fanele va tshama va ri karhi va fanelekela ku va swirho swa “Yerusalema lontshwa” hi ku chumayela hi Mfumo wa Xikwembu ni ku tshama va basile hi tlhelo ra moya. Leswi swa laveka loko va lava ku va tiphuphu etempeleni ya le tilweni leyi kwetsimisiweke, ni loko va lava ku byarha vito ra muti wa Xikwembu tanihi vaaki va le tilweni, ni ku hlanganyela eka vito ra Kreste tanihi mutekiwa wakwe. Nakambe, va fanele va “yingis[a] leswi moya wu swi byelaka mavandlha.”
Eka Ntsumi Ya Le Lawodikiya
16. Hi swihi swin’wana leswi tiviwaka hi muti wa Lawodikiya?
16 Kreste u sole vandlha ra le Lawodikiya leri a ri loloha. (Hlaya Nhlavutelo 3:14-22.) Muti wa Lawodikiya a wu kumeka kwalomu ka tikhilomitara ta 150 evuxeni bya muti wa Efesa, enkoveni lowu noneke wa Nambu wa Lycus, exikarhi ka magondzo ya van’wamabindzu, naswona eka wona a ku endliwa swilo swo tala ku tlhela ku vekisiwa timali. Swiambalo leswi a swi endliwa hi wulu ya ntima ya ndhawu leyi, a swi dumile. Tanihi leswi muti wa Lawodikiya a wu ri ni xikolo lexi tivekaka swinene xa swa vutshunguri, swi nga ha endleka leswaku a wu endla murhi wa mahlo lowu vitaniwaka Phrygian powder. Asclepius, xikwembu xa vutshunguri, a ku ri xin’wana xa swikwembu leswikulu emutini lowu. Swi tikomba onge muti wa Lawodikiya a wu ri ni Vayuda vo tala, naswona van’wana va vona swi nga ha endleka a va fuwile swinene.
17. Hikwalaho ka yini Valawodikiya va soriwile?
17 Loko Yesu a vulavula ni vandlha ra le Lawodikiya hi ku tirhisa “ntsumi” ya rona, u vulavule hi vurhena tanihi “mbhoni yo tshembeka ni ya ntiyiso, masungulo ya ntumbuluko wa Xikwembu.” (Vakolosa 1:13-16) Valawodikiya va soriwile hikwalaho ko ka va nga “titimeli naswona [va nga] hisi” hi tlhelo ra moya. Hikwalaho ka leswi a va kufumela, Kreste a a ta va hlanta. A swi nga ta va tikela ku twisisa xifaniso xexo. Muti wa Hiyerapoli lowu nga ekusuhi a wu ri ni swihlovo swa mati yo hisa kasi muti wa Kolosa a wu ri ni mati yo titimela. Kambe, tanihi leswi mati a ma fanele ma fambisiwa hi tiphayiphi ma yisiwa eLawodikiya leyi a yi ri ekule, kumbexana a ma fika se ma kufumela kunene emutini lowu. Kun’wana mati a ma pfa ma famba hi misele. Loko ma ri kusuhi ni ku fika emutini wa Lawodikiya, a ma famba ehansi ka buloho leri akiweke hi maribye.
18, 19. Xana Vakreste va namuntlha va nga pfuniwa njhani ku fana ni va le Lawodikiya?
18 Namuntlha vanhu vo fana ni va le Lawodikiya a va phyuphyisi loko u ri na vona. Va ta tshwuteriwa ku fana ni mati lama kufumelaka! Yesu a nga swi lavi leswaku va va vavulavuleri va yena, vatotiwa lava nga “vayimeri lava khomelaka Kreste.” (2 Vakorinto 5:20) Loko va nga hundzuki va ta lahlekeriwa hi lunghelo ra ku va vahuweleri va Mfumo. Valawodikiya a va rhandza rifuwo ra misava naswona ‘a va nga swi tivi leswaku va dyisa mbitsi ni ku hlomula mbilu ni leswaku i swisiwana, va fe mahlo naswona va swerile.’ Leswaku va susa vusiwana, vubofu ni vusweti bya vona bya moya, vanhu vahi ni vahi lava fanaka na vona namuntlha, va fanele va xava “nsuku lowu tengisiweke” wa ripfumelo leri ringiweke, “tinguvu to basa ta le handle” ta ku lulama ni “murhi wo tota mahlo” eka Kreste, leswaku va ta twisisa swilo swa moya. Valanguteri lava nga Vakreste va tiyimiserile ku va pfuna leswaku va tshama va xalamukele swilaveko swa vona swa moya leswaku va kota ku “fuwa eripfumelweni.” (Yakobo 2:5; Matewu 5:3) Ku tlula kwalaho, valanguteri va fanele va va pfuna ku tirhisa “murhi wo tota mahlo” hi tlhelo ra moya—leswaku va amukela ni ku fambisana ni dyondzo, ndzayo, xikombiso ni langutelo ra Yesu. Leswi hi swona swi pfunaka munhu ku lwisana ni “ku navela ka nyama ni ku navela ka mahlo ni ku bombisa rifuwo ra munhu ra vutomi.”—1 Yohane 2:15-17.
19 Yesu u sola ni ku tshinya hinkwavo lava a va rhandzaka. Valanguteri lava nga ehansi ka yena va fanele va endla leswi fanaka hi musa. (Mintirho 20:28, 29) Valawodikiya a va fanele va “hiseka [va tlhela va] hundzuka,” va cinca ndlela ya vona yo anakanya ni mahanyelo ya vona. Xana van’wana va hina hi hanya hi ndlela leyi endlaka leswaku ntirho wo kwetsima lowu hi wu endlelaka Xikwembu wu nga ha vi wa nkoka evuton’wini bya hina? Kutani a hi ‘xaveni murhi wo tota mahlo eka Yesu’ leswaku hi ta vona xilaveko xo hisekela ku lava Mfumo ku sungula.—Matewu 6:33.
20, 21. I vamani namuntlha lava pfulelaka Yesu loko a “gongondza,” naswona va langutele ku kuma yini?
20 Kreste u ri: “Waswivo, ndzi yime enyangweni naswona ndza gongondza. Loko mani na mani a twa rito ra mina kutani a pfula nyangwa, ndzi ta nghena endlwini ya yena ndzi dya na yena xilalelo, na yena a dya na mina.” Hakanyingi, Yesu a a dyondzisa hi timhaka ta moya loko ku dyiwa swakudya. (Luka 5:29-39; 7:36-50; 14:1-24) Kutani sweswi u gongondza enyangweni ya vandlha leri fanaka ni ra le Lawodikiya. Xana swirho swa rona swi ta n’wi pfulela loko a gongondza, swi kondletela ndlela leyi a swi n’wi rhandza ha yona, swi n’wi nghenisa evandlheni naswona swi n’wi pfumelela leswaku a swi dyondzisa? Loko swo endla tano, Kreste u ta dya na swona swakudya leswi nga ta swi phyuphyisa emoyeni.
21 “Tinyimpfu tin’wana” ta namuntlha ti pfulela Yesu hi ndlela yo fanekisela, naswona sweswo swi ta endla leswaku ti kuma vutomi lebyi nga heriki. (Yohane 10:16; Matewu 25:34-40, 46) Kreste u ta nyika mutotiwa un’wana ni un’wana, la nga ta hlula, lunghelo ro ‘tshama na yena exiluvelweni xa yena, tanihi leswi na yena a hluleke kutani a tshama ni Tata wa yena exiluvelweni xa Yena.’ Ina, Yesu u tshembisa leswaku vatotiwa lava nga ta hlula va ta kuma hakelo leyikulu yo tshama na yena exiluvelweni evokweni ra xinene ra Tata wakwe etilweni. Naswona tinyimpfu tin’wana leti nga ta hlula ti langutele misava leyinene leyi nga ta va ehansi ka Mfumo.
Leswi Hinkwerhu Hi Swi Dyondzaka
22, 23. (a) Xana Vakreste hinkwavo va nga vuyeriwa njhani eka marito ya Yesu lama yaka emavandlheni ya nkombo? (b) Hi fanele hi tiyimisela yini?
22 A swi kanakanisi leswaku Vakreste hinkwavo va nga pfuneka swinene eka marito lawa Yesu a ma byeleke mavandlha ya nkombo ya le Asia Minor. Hi xikombiso, hi ku xiya leswaku Kreste u nyikele xibumabumelo loko swi fanerile, vakulu va Vakreste lava nga ni rirhandzu va susumeteleka ku bumabumela vanhu ni mavandlha lama hanyaka hi tlhelo ra moya. Loko ku ri ni laha vapfumeri-kulobye va siyekaka kona, vakulu va va pfuna leswaku va tirhisa Matsalwa. Hinkwerhu ka hina hi nga hambeta hi pfuneka eka tindzayo to hambana-hambana leti Kreste a ti nyikeke mavandlha ya nkombo, ntsena loko hi tirhisa tindzayo ta kona handle ko ba mariri hi tlhela hi nga rivali ku khongela. *
23 Emasikwini lawa ya makumu a hi fanelanga hi debyisa mavoko, hi hlongorisa swilo leswi vonakaka kumbe swilo swin’wana ni swin’wana leswi nga endlaka leswaku hi nga ha xi tirheli kahle Xikwembu. Hikokwalaho, onge mavandlha hinkwawo ma nga hambeta ma voninga swinene ku fana ni swo tlhoma timboni leswi Yesu a nga swi susiki endhawini ya swona. Tanihi Vakreste lava tshembekaka, onge minkarhi hinkwayo hi nga tiyimisela ku yingisa loko Kreste a vulavula ni ku yingisa leswi moya wu swi vulaka. Kutani hi ta va ni ntsako lowu nga heriki tanihi vabyarhi va ku vonakala lava vangamisaka Yehovha.
[Nhlamuselo ya le hansi]
^ par. 22 Nhlavutelo 2:1–3:22 ya hlamuseriwa nakambe eka ndzima 7 ku ya eka 13 ya buku leyi nge Nhlavutelo—Ku Chaputa Ka Yona Loku Hlamarisaka Ku Tshinele!, leyi kandziyisiweke hi Timbhoni ta Yehovha.
A Wu Ta Hlamurisa Ku Yini?
• ‘Wansati la vuriwaka Yezabele’ a a ri mani, naswona ha yini vavasati lava chavaka Xikwembu va nga n’wi tekeleli?
• Hi xihi xiyimo lexi a xi ri kona evandlheni ra le Sarda, naswona hi nga endla yini leswaku hi nga fani ni Vakreste vo tala lava a va tshama emutini lowu?
• Yesu u ri tshembise yini vandlha ra le Filadelfiya, naswona switshembiso leswi swi tirha njhani namuntlha?
• Ha yini Valawodikiya va soriwile, kambe i yini leswi Vakreste lava hisekaka va tshembisiwaka swona?
[Swivutiso Swa Dyondzo]
[Xifaniso lexi nga eka tluka 16]
Tindlela to biha ta ‘wansati la vuriwaka Yezabele’ ti fanele ti papalatiwa
[Swifaniso leswi nga eka tluka 18]
Yesu u pfulele valandzeri va yena “nyangwa leyikulu” ya malunghelo ya Mfumo
[Xifaniso lexi nga eka tluka 20]
Xana wa n’wi amukela Yesu u tlhela u n’wi yingisa?