Swivutiso Swa Vahlayi

Xana swi hoxile ku dlaya xifuwo lexi vabyelaka ku fa kumbe lexi dyuhaleke?

Vanhu vo tala va tsakisiwa hi swiharhi swo hambana-hambana naswona va tiphina hi ku va na swona. Swifuwo swin’wana swi hundzuka vanghana lavakulu va vini va swona. Hi xikombiso, timbyana ti tiveka hi ku endla xin’wana ni xin’wana lexi vini va tona va ti byelaka xona naswona ta va rhandza. Kutani swa twisiseka loko vanhu va rhandza xifuwo xa le ndlwini, ngopfu-ngopfu loko se ku hundze malembe yo tala va xi fuwile.

Hambiswiritano, swifuwo swo tala a swi hanyi nkarhi wo leha. Timbyana ti nga ha hanya malembe ya khume ku ya eka 15 kumbe ku tlulanyana naswona swi tano ni hi swimanga, swi ya hi leswaku i muxaka wihi. Loko swifuwo se swi dyuharile, swi nga ha vabya naswona swi lamala lerova vini va swona va titwa va ri ni gome loko va tsundzuka loko swa ha ri switsongo ni ndlela leyi a swi gingiriteka ha yona. Xana swi ta va swi hoxile ku swi dlaya leswaku swi nga ha xaniseki?

Mukreste u fanele a khoma swiharhi hi ndlela leyi Xikwembu xi lavaka ha yona. Swi le rivaleni leswaku ku swi khoma hi ndlela yo biha swi lwisana ni ku rhandza ka Xikwembu hikuva Rito ra xona ri ri: “Lowo lulama u khathalela moya-xiviri wa xifuwo xakwe.” (Swivuriso 12:10) Hambiswiritano, leswi a swi vuli swona leswaku Xikwembu xi languta swiharhi ni vanhu hi ndlela leyi fanaka. Loko Xikwembu xi vumba vanhu, xi swi veke erivaleni leswaku a va fani ni swiharhi. Hi xikombiso, xi tshembise vanhu vutomi lebyi nga heriki kambe a xi swi tshembisanga nchumu swiharhi. (Varhoma 6:23; 2 Petro 2:12) Leswi xi nga Muvumbi, xi ni mfanelo yo vula leswaku hi yihi ndlela leyi vanhu ni swiharhi va faneleke va khomana ha yona.

Genesa 1:28 yi hi byela leswaku hi yihi ndlela ya kona. Xikwembu xi byele vanhu vo sungula xi ku: “Mi fuma tinhlampfi ta lwandle ni swivumbiwa leswi hahaka swa matilo ni swivumbiwa hinkwaswo leswi famba-fambaka ehenhla ka misava.” Hilaha ku fanaka Pisalema 8:6-8 yi ri: “Hinkwaswo [Xikwembu xi] swi veke ehansi ka milenge [ya munhu]: tinyimpfu ni timbuti ni tinkunzi, hinkwaswo ka swona, ni swiharhi swa nhova, tinyenyana ta tilo ni tinhlampfi ta lwandle, xin’wana ni xin’wana lexi hundzaka emintileni ya malwandle.”

Xikwembu xi swi veke erivaleni leswaku swiharhi swi nga tirhisiwa hi ndlela leyinene naswona munhu a nga swi dlaya. Hi xikombiso, madzovo ya swona a ku endliwa tinguvu ha wona. Nakambe Xikwembu xi pfumelele vanhu leswaku va dya nyama ya swiharhi endzhaku ka Ndhambi ya Nowa, xi engetela eka swimila leswi a va nyikiwe swona leswaku va swi dya eku sunguleni.—Genesa 3:21; 4:4; 9:3.

Leswi a swi vuli swona leswaku mintlangu leyi ku yayarheriwaka swiharhi eka yona i yinene. Eka Genesa 10:9, Bibele yi hlamusela Nimrodo tanihi “muhloti wa matimba.” Kambe ndzimana leyi fanaka yi vula leswaku sweswo swi n’wi endle a va la “lwaka na Yehovha.”

Hikwalaho, hambileswi swiharhi swi nga ehansi ka munhu, a nga fanelanga a swi khoma hi ndlela yo biha kambe u fanele a swi khoma hi ku pfumelelana ni misinya ya milawu ya Rito ra Xikwembu. Sweswo swi nga ha katsa ku nga tshiki xifuwo xi xaniseka swi nga fanelanga hikwalaho ka leswi xi dyuhaleke, xi vavisekeke ngopfu kumbe xi khomiweke hi vuvabyi lebyi nga tshungulekiki. Loko swi ri tano, Mukreste u ni vutihlamuleri byo vona leswaku u teka goza rihi. Loko a vona swi nga ri swinene ku tshika xifuwo xexo xi ya emahlweni xi xaniseka hileswi swi nga tshembisiki leswaku xi ta hanya, a nga xi dlaya.