Yimani Mi Nga Tsekatseki Mi Vona Loko Yehovha A Mi Ponisa!
Yimani Mi Nga Tsekatseki Mi Vona Loko Yehovha A Mi Ponisa!
“Yimani, mi nga tsekatseki, mi vona loko Yehovha a mi ponisa.”—2 TIKRONIKA 20:17.
1, 2. Ha yini nhlaselo lowu taka wa “Gogo wa tiko ra Magogo” wu ta va lowukulu swinene ku tlula nxungeto lowu vutherorisi byi nga na wona emisaveni hinkwayo?
VAN’WANA va vula leswaku vutherorisi i ku hlasela vanhu kumbe ku onha nhluvuko hi woxe. Entiyisweni, nxungeto wo tano wu fanele wu tekeriwa enhlokweni. Hi hala tlhelo, nhlaselo lowu faneleke wu tekeriwa enhlokweni swinene hi lowu vanhu va nga riki na mhaka na wona. Hi wihi?
2 I nhlaselo wa “Gogo wa tiko ra Magogo,” lowu Bibele yi vulavulaka ha wona eka Ezekiyele ndzima 38. Xana swo nyanyisiwa loko ku vuriwa leswaku nhlaselo lowu wu fanele wu tekeriwa enhlokweni swinene ku tlula nxungeto wa vutherorisi bya matiko hinkwawo? Nikatsongo, hikuva Gogo a nga hlaseli tihulumendhe ta vanhu ntsena. U hlasela ni hulumendhe ya le tilweni ya Xikwembu! Hambiswiritano, Muvumbi u swi kota kahle ku timela nhlaselo wa vukarhi wa Gogo, kasi vuswikoti bya vanhu byo langutana ni swiphiqo swa mafambiselo ya vona byi hikiwile.
Ku Hlaseriwa Ka Mfumo Wa Xikwembu
3. Vafumi va misava va khutaziwe leswaku va endla yini ku sukela hi 1914, naswona va angurise ku yini?
3 Ku sukela loko Mfumo wa Xikwembu wu simekiwile etilweni hi 1914, Hosi leyi fumaka sweswi, leyi vekiweke hi Xikwembu a yi ri karhi yi lwa ni mafambiselo lawa yo biha ya Sathana. Hi nkarhi wolowo, vafumi va misava a va ri karhi va tivisiwa leswaku va tiveka ehansi ka Hosi leyi vekiweke hi Xikwembu. Kambe va arile, hilaha ku profetiweke hakona: “Tihosi ta misava ta tserhama ni tindhuna leti tlakukeke ti vungane swin’we tanihi munhu un’we ku lwa na Yehovha ni mutotiwa wakwe, ti ku: ‘A hi tsemeni switsimbo swa vona hi ti cukumeta le kule na hina tintambhu ta vona!’” (Pisalema 2:1-3) Ku kanetiwa ka Mfumo ku ta chaputa loko Gogo wa Magogo a sungula nhlaselo wa yena.
4, 5. Xana vanhu va nga lwisana njhani ni mfumo lowu nga vonakiki wa Xikwembu wa le tilweni?
4 Hi nga tivutisa leswaku vanhu va ta swi kotisa ku yini ku lwa ni mfumo wa le tilweni lowu nga vonakiki. Bibele yi vula leswaku mfumo lowu wu vumbiwe hi “lava 144 000, lava xaviweke emisaveni,” kun’we na “Xinyimpfana,” ku nga Kreste Yesu. (Nhlavutelo 14:1, 3; Yohane 1:29) Tanihi leswi wu nga etilweni, mfumo lowu lowuntshwa wu vuriwa “matilo lamantshwa,” kasi lava va nga ta va ehansi ka wona laha misaveni va vuriwa “misava leyintshwa.” (Esaya 65:17; 2 Petro 3:13) Vunyingi bya lava va 144 000 lava nga ta fuma na Kreste ana se byi hete pfhumba ra byona ra laha misaveni hi ku tshembeka. Xisweswo byi tikombe byi ri lebyi fanekelaka ntirho wa byona lowuntshwa wa le tilweni.
5 Hambiswiritano, ka ha ri ni masalela matsongo ya lava 144 000 emisaveni. Eka vanhu vo tlula 15 000 000 lava veke kona eXilalelweni xa Hosi hi 2002, i 8 760 ntsena lava kombiseke ku tiyiseka ka vona leswaku va hlawuleriwe ntirho lowu wa le tilweni. Mani na mani la xinyataka a hlasela swirho leswi nga ni ntshembo wa ku hlanganyela eMfun’weni kahle-kahle u hlasela Mfumo wa Xikwembu.—Nhlavutelo 12:17.
Hosi Yi Hetisa Ku Hlula Ka Yona
6. Yehovha na Kreste va ku languta njhani ku kanetiwa ka vanhu va Xikwembu?
6 Goza leri Yehovha a ta ri teka malunghana ni ku kanetiwa ka Mfumo wa yena lowu simekiweke ku vulavuriwe hi rona ka ha ri emahlweni: “Yena la tshameke ematilweni u ta hleka; Yehovha hi byakwe u ta va hlekula. Hi nkarhi wolowo u ta vulavula na vona hi ku hlundzuka kakwe u ta va karhata hi vukarhi byakwe lebyikulu, a ku: ‘Mina ndzi veke hosi yanga ehenhla ka Siyoni, ku nga ntshava ya mina yo kwetsima.’” (Pisalema 2:4-6) Se wu fikile nkarhi wa leswaku Kreste a “hetisa ku hlula ka yena,” a ri karhi a kongomisiwa hi Yehovha. (Nhlavutelo 6:2) Xana Yehovha u titwa njhani loko vanhu va yena va kanetiwa hi nkarhi wa ku hlula ko hetelela? Sweswo u swi teka swi kongomisiwa eka yena ni le ka Hosi ya yena leyi fumaka. Yehovha u ri: “Loyi a mi khumbaka u khumba ndzololo ya tihlo ranga.” (Zakariya 2:8) Naswona Yesu u swi veke erivaleni leswaku leswi vanhu va swi endlaka eka vamakwavo vakwe lava totiweke swi fana ni loko va swi endla eka yena, kasi leswi va nga swi endliki eka vona swi fana ni loko va nga swi endli ni le ka yena.—Matewu 25:40, 45.
7. I yini lexi nga ta endla leswaku vukarhi bya Gogo byi pfurhela “ntshungu lowukulu,” lowu hlamuseriweke eka Nhlavutelo 7:9?
7 Ina, vukarhi bya Gogo byi ta pfurhela ni lava va seketelaka masalela lama totiweke hi ku hiseka. Vanhu volavo, lava nga ni ntshembo wa ku hanya ‘emisaveni leyintshwa’ ya Xikwembu i “ntshungu lowukulu” lowu hlengeletiweke “wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato.” (Nhlavutelo 7:9) Wu vuriwa lowu “[yimeke] emahlweni ka xiluvelo ni le mahlweni ka Xinyimpfana, wu ambale tinguvu to leha to basa.” Xisweswo wa amukeleka emahlweni ka Xikwembu ni le ka Kreste Yesu. Wu khome “marhavi ya micindzu emavokweni ya wona,” wu dzunisa Yehovha tanihi Mulawuri la lulameke wa vuako hinkwabyo, loyi a yimeriwaka hi Hosi leyi a yi vekeke exiluvelweni, ku nga Yesu Kreste, “Xinyimpfana xa Xikwembu.”—Yohane 1:29, 36.
8. Nhlaselo wa Gogo wu ta tlhontlha Kreste leswaku a endla yini, naswona vuyelo bya kona byi ta va byihi?
8 Nhlaselo wa Gogo wu ta endla leswaku Hosi leyi Xikwembu xi yi vekeke exiluvelweni yi teka goza kutani yi lwa nyimpi ya Armagedoni. (Nhlavutelo 16:14, 16) Lava va aleke ku tiveka ehansi ka vuhosi bya Yehovha va ta lovisiwa. Hi hala tlhelo, lava va tiyiseleke maxangu lawa ma va weleke hileswi va tshameke va tshembekile eMfun’weni wa Xikwembu va ta kutsuleriwa makumu. Muapostola Pawulo u tsarile malunghana ni mhaka leyi: “Lexi i xitiyisekiso xa vuavanyisi byo lulama bya Xikwembu, lexi endlaka leswaku mi hlayiwa mi ri lava faneriwaka hi mfumo wa Xikwembu, lowu hakunene mi xanisekaka ha wona. Leswi swi kombisa leswaku swi lulamile eka Xikwembu leswaku xi tlherisela nhlomulo eka lava mi tiselaka nhlomulo, kambe, n’wina lava weriwaka hi nhlomulo, xi ta mi hakela hi ku wisa swin’we na hina eku hlavuteriweni ka Hosi Yesu a huma etilweni swin’we ni tintsumi takwe ta matimba a ri endzilweni lowu pfurhaka malangavi, a tisa ndzihiselo eka lava va nga xi tiviki Xikwembu ni lava va nga ma yingisiki mahungu lamanene malunghana ni Hosi ya hina Yesu.”—2 Vatesalonika 1:5-8.
9, 10. (a) Yehovha u endle leswaku Vayuda va hlula nala la chavisaka hi ndlela yihi? (b) Vakreste va fanele va hambeta va endla yini namuntlha?
9 Eka nhlomulo lowukulu lowu taka, lowu nga ta chaputa hi nyimpi ya Armagedoni, Kreste u ta lwisana ni vuhomboloki hinkwabyo. Kambe a ku nge vi ni xilaveko xa leswaku valandzeri va yena va hlanganyela enyimpini leyi, tanihi leswi a ku nga ri na xilaveko xa leswaku vaaki va mfumo wa tinyimba timbirhi wa Yuda va hlanganyela enyimpini leyi veke kona eka magidi ya malembe lama hundzeke. Nyimpi yoleyo a yi ri ya Yehovha, naswona hi yena a endleke leswaku va hlula. Rungula ra kona ri ri: “Yehovha a veka vavanuna va tumbelela vana va Amone, eMowabu ni le ndhawini ya tintshava ya Seyiri, lava a va huma eYuda, hiloko va tlhavana. Kutani vana va Amone na Mowabu va yima ku lwa ni vaaki va le ndhawini ya tintshava ya Seyiri leswaku va va nyikela endzovisweni ni ku va herisa; hi ku hatlisa loko va hetile hi vaaki va Seyiri, va pfuna un’wana ni un’wana ku lovisa warikwavo. Kambe loko ku ri Yuda, ri fika eka xihondzo xo rindza xa le mananga. Loko va hundzuluxela swikandza swa vona entshungwini, waswivo, mintsumbu ya vona a yi wele emisaveni ku nga ri na loyi a balekaka.”—2 Tikronika 20:22-24.
10 Swi endleke hilaha Yehovha a profeteke hakona: “A mi nge lwi.” (2 Tikronika 20:17) Sweswo hi leswi Vakreste va faneleke va swi endla loko Yesu Kreste a “hetisa ku hlula ka yena.” Sweswi va hambeta va lwisana ni vuhomboloki hi matlhari ya moya, ku nga ri ya xiviri. Xisweswo va “hambeta [va] hlula swo biha hi leswinene.”—Varhoma 6:13; 12:17-21; 13:12; 2 Vakorinto 10:3-5.
I Mani La Nga Ta Kongomisa Nhlaselo Wa Gogo?
11. (a) I vamani lava Gogo a nga ta va tirhisa enhlaselweni wakwe? (b) Ku xalamuka emoyeni swi katsa yini?
11 Gogo wa Magogo i Sathana Diyavulosi loyi a veke exiyin’weni xa le hansi ku sukela hi 1914. Leswi a nga xivumbiwa xa moya, a nge swi koti ku hlasela hi ku kongoma, kambe u ta tirhisa vanhu leswaku va endla mintirho ya yena. I vamani vanhu va kona? Bibele a yi hi nyiki vuxokoxoko, kambe yi hi nyika swikombiso swin’wana leswi nga hi pfunaka ku tiva vanhu va kona. Loko swiendlakalo swa misava swi ri karhi swi hetisisa vuprofeta bya Bibele, hi ta ya hi swi vona kahle leswaku hi vahi vanhu va kona. Vanhu va Yehovha a va lavi ku mbambela-mbambela kambe va tshama va xalamukile emoyeni, va xiyisisa swiendlakalo swa tipolitiki ni swa vukhongeri leswi hetisisaka vuprofeta bya Bibele.
12, 13. Muprofeta Daniyele u wu profete njhani nhlaselo wo hetelela lowu nga ta wela vanhu va Xikwembu?
12 Muprofeta Daniyele u hi nyika vuthala bya nhlaselo wo hetelela lowu nga ta wela vanhu va Xikwembu, loko a tsala a ku: “Kunene [hosi ya le n’walungwini] yi ta huma hi vukarhi lebyikulu leswaku yi lovisa ni ku nyiketa vo tala endzovisweni. Yi ta dzima mintsonga ya yona leyi fanaka ni xigodlo exikarhi ka lwandle lerikulu ni ntshava yo kwetsima yo Khavisiwa.”—Daniyele 11:44, 45.
13 Eminkarhini ya ku tsariwa ka Bibele, “lwandle lerikulu” a ku ri Lwandle ra Mediteraniya, kasi “ntshava yo kwetsima” a ku ri Siyoni, leyi Yehovha a vulavuleke ha yona a ku: “Mina ndzi veke hosi yanga ehenhla ka Siyoni, ku nga ntshava ya mina yo kwetsima.” (Pisalema 2:6; Yoxuwa 1:4) Xisweswo, hi mianakanyo ya moya, tiko leri nga “exikarhi ka lwandle lerikulu ni ntshava yo kwetsima” ri yimela tiko ra moya leri fuweke ra Vakreste lava totiweke. A va ha hlangani helo ni lwandle ra vanhu lava xandzukeleke Xikwembu, naswona va langutele ku ya fuma na Kreste Yesu eMfun’weni wa le tilweni. Swi le rivaleni leswaku malandza ya Xikwembu lama totiweke swin’we ni vanakulobye va wona lava tshembekaka va ntshungu lowukulu, va ta hlaseriwa hi hosi ya le n’walungwini loko yi hlasela hi tihanyi yi hetisisa vuprofeta bya Daniyele.—Esaya 57:20; Vaheveru 12:22; Nhlavutelo 14:1.
Xana Malandza Ya Xikwembu Ma Ta Endla Yini?
14. Hi swihi swilo swinharhu leswi vanhu va Xikwembu va nga ta swi endla loko va hlaseriwa?
14 Xana malandza ya Xikwembu ma fanele ma endla yini loko ma hlaseriwa? Ma fanele ma endla hilaha vanhu va Xikwembu va le nkarhini wa Yehoxafati va endleke hakona. Xiya leswaku vanhu volavo a va lerisiwe ku endla swilo swinharhu: (1) va yima, (2) va nga tsekatseki, naswona (3) va vona loko Yehovha a va ponisa. Xana vanhu va Xikwembu namuntlha va ta swi endlisa ku yini sweswo?—2 Tikronika 20:17.
15. Ku yima ka vanhu va Yehovha swi vula yini?
15 Ku yima ka vona: Vanhu va Xikwembu va ta hambeta va seketela Mfumo wa Xikwembu hi ku hiseka va nga tsekatseki. Va ta hambeta va hlayisa vukala-tlhelo bya vona bya Vukreste. Va ta tirhela Yehovha hi ku tshembeka va “nga tsekatsekisiwi” naswona va ta hambeta va n’wi dzunisa erivaleni hikwalaho ka tintswalo ta yena ta rirhandzu. (1 Vakorinto 15:58; Pisalema 118:28, 29) A ku na ntshikilelo lowu nga endlaka leswaku va nga amukeleki eka Xikwembu.
16. Malandza ya Yehovha a ma nge tsekatseki hi ndlela yihi?
16 Ku nga tsekatseki ka vona: Malandza ya Yehovha a ma nge ringeti ku tiponisa kambe ma ta tshemba Yehovha hi ku helela. Hi yena ntsena la kotaka ku ponisa malandza ya yena emisaveni leyi nga ni mpfilumpfilu, naswona u tshembise leswaku u ta ma ponisa. (Esaya 43:10, 11; 54:15; Swirilo 3:26) Ku tshemba Yehovha swi ta katsa ku tshemba nhlengeletano ya manguva lawa leyi vonakaka leyi se a nga ni makume ya malembe a yi tirhisa leswaku a hetisisa swikongomelo swa yena. Ku tlula rini na rini, Vakreste va ntiyiso va ta fanela ku va tshemba swinene vagandzeri-kulobye lava hlawuriweke hi Yehovha na hi Hosi leyi a yi vekeke, leswaku va rhangela evandlheni. Vavanuna lava vo tshembeka va ta kongomisa vanhu va Xikwembu. Ku honisa nkongomiso wa vona swi nga vanga khombo.—Matewu 24:45-47; Vaheveru 13:7, 17.
17. Ha yini malandza lama tshembekaka ya Xikwembu ma langutele ku ponisiwa hi Yehovha?
17 Ku vona loko Yehovha a va ponisa: Vakreste hinkwavo lava nga ta tshama va tshembekile va tlhela va titshega hi Yehovha va ta ponisiwa. Va ta twarisa ku fika ka siku ra ku avanyisa ka Yehovha hilaha va nga kotaka hakona ku fikela enkarhini wo hetelela. Swivumbiwa hinkwaswo swi fanele swi tiva leswaku Yehovha i Xikwembu xa ntiyiso ni leswaku u ni malandza lama tshembekaka emisaveni. A ku nge he vi ni xilaveko xin’wana xa ku tshika vuhosi bya Yehovha byi kanetiwa nkarhi wo leha.—Ezekiyele 33:33; 36:23.
18, 19. (a) Xana risimu ra ku hlula leri nga eka Eksoda ndzima 15 ri yi kombisa njhani mintlhaveko ya lava nga ta pona nhlaselo wa Gogo? (b) I yini leswi vanhu va Xikwembu va faneleke va swi endla sweswi?
18 Leswi vanhu va Xikwembu va nga ta va va kume matimba nakambe, va ta nghena emisaveni leyintshwa, va tiyimisele ku yimbelela risimu ra ku hlula, hilaha Vaisrayele va khale va endleke hakona loko va kutsuriwa va hundza hi le xikarhi ka Lwandle ro Tshwuka. Vanhu va ta nkhensa Yehovha hikwalaho ka nsirhelelo wakwe, va yimbelela marito lama yimbeleriweke khale va ku: “Ndzi ta yimbelelela Yehovha, hikuva u tlakuseriwe ehenhla swinene. . . . Yehovha i nhenha ya nyimpi. Yehovha i vito rakwe. . . . Wena Yehovha, voko ra wena ra xinene ri nga faya nala. Hi vukulu bya ku tlakuka ka wena u nga wisa lava ku pfukelaka; u rhumela ku hlundzuka ka wena lokukulu, ku va dya kukota mahlanga. . . . Wena hi musa wa wena wa rirhandzu u rhangele vanhu lava u va kutsuleke; kunene wena hi ntamu wa wena u ta va kongomisa endhawini ya wena leyi kwetsimaka, yo tshama eka yona. . . . U ta va tisa u va simeka entshaveni ya ndzhaka ya wena, ndhawu leyi u yi lunghiseleleke leswaku u ta tshama eka yona, Wena Yehovha, Oho Yehovha, vukwetsimelo lebyi voko ra wena ri byi simekeke. Yehovha u ta va hosi hilaha ku nga riki na makumu, hi masiku.”—Eksoda 15:1-19.
19 Leswi se ntshembo wa vutomi lebyi nga heriki wu nga kusuhi swinene ni ku hetiseka, i nkarhi wa leswaku malandza ya Xikwembu ma kombisa ku tinyiketela ka wona eka Yehovha, ni ku n’wi tirhela tanihi leswi a nga Hosi ya wona ya hilaha ku nga riki na makumu!—1 Tikronika 29:11-13.
Xana U Nga Hlamusela?
• Ha yini Gogo a ta hlasela vatotiwa ni tinyimpfu tin’wana?
• Xana vanhu va Xikwembu va ta yima loko swi te yini?
• Swi vula yini ku yima u nga tsekatseki?
• Xana vanhu va Xikwembu va ta vona loko Yehovha a ponisa hi ndlela yihi?
[Swivutiso Swa Dyondzo]
[Xifaniso lexi nga eka tluka 18]
Yehovha u endle leswaku Yehoxafati ni vanhu vakwe va hlula va nga lwanga
[Xifaniso lexi nga eka tluka 20]
Vatotiwa ni tinyimpfu tin’wana va hlanganyela eku seketeleni ka vuhosi bya Yehovha
[Xifaniso lexi nga eka tluka 22]
Ku nga ri khale vanhu va Xikwembu va ta va va yimbelela risimu ra ku hlula ku fana ni Vaisrayele va khale