Ku Pfuna Ntlawa Wa Ririmi Ro Hlawuleka eKorea

NTLAWA lowu xalamukeke swinene lowu nga riki na huwa a wu hlangane entsombanweni wa muganga wa Timbhoni ta Yehovha hi ximumu xa 1997. Lowu a wu ri ntsombano wo sungula wa vanhu lava feke tindleve eKorea. Lava veke kona va fikelele nhlohlorhi ya 1 174. Nongonoko hinkwawo—lowu katsaka tinkulumo, mimbulavurisano ni drama—wu kombisiwe hi Ririmi ra Mavoko ra le Korea eka xikirini lexikulu, lexi hinkwavo lava nga eHolweni ya Tinhlengeletano a va kota ku xi vona kahle. Vamakwerhu vo tala va hete malembe va tirha swi vava eku hleleni ka nongonoko lowu.

Eparadeyisini ya laha misaveni, ku ta fika nkarhi lowu “tindleve ta lava nga twiki ti [nga] ta pfuriwa.” (Esaya 35:5) Leswaku va kuma vutomi eParadeyisini yoleyo, vanhu hinkwavo, ku katsa ni lava feke tindleve, va fanele va sungula va nghena eparadeyisini ya moya, ku nga xiyimo lexinene xa moya xa vanhu va Xikwembu lava tsakeke. Va fanele va va Timbhoni ta Yehovha leti tinyiketeleke ni ku khuvuriwa, leti dyondzisiwaka hi yena.—Mikiya 4:1-4.

Loko Swilo Swa Ha Sungula

Hambileswi vanhu lava feke tindleve va chumayeriweke hi ndlela yo karhi emalembeni ya va-1960, va nga ri vangani exikarhi ka vona va sungule hi va-1970 ku ya eminhlanganweni ya Timbhoni ta Yehovha le Seoul, ku nga ntsindza wa Korea. Makwerhu la nga Mukreste loyi a a tsala hi ku hatlisa a a tirhisa xitsalelo, a tsala tinhla-nkulu ta tinkulumo, ku katsa ni tindzimana ta Bibele leti hlayiwaka.

Hi 1971 le dorobeni ra Taejon, Mbhoni yin’wana leyi nga ni n’wana la feke tindleve yi n’wi hlanganise ni vanghana va yena lava feke tindleve, yi va dyondzisa rungula ra Mfumo. Exikarhi ka ntlawa lowu ku ve ni vahuweleri vo hlayanyana lava hisekaka lava sweswi va pfunaka swinene ensin’wini ya vanhu lava tirhisaka ririmi ra mavoko.—Zakariya 4:10.

Vantshwa Va Tinyiketela Hi Ku Tirhandzela

Leswaku lava feke tindleve va tiva Yehovha na Yesu kutani va nghena egondzweni leri yisaka evuton’wini, vatirhi va ku tirhandzela a va fanele va  kulula va n’watseka. (Yohane 17:3) Hikwalaho, Timbhoni ta Yehovha to hlayanyana ti dyondze ririmi ra mavoko naswona ku ve ni vuyelo byo tsakisa swinene.

Muntshwa un’wana wa malembe ya 15 la vuriwaka Park In-sun, u tivekele pakani ya ku dyondza ririmi ra mavoko. Kutani u ye a ya dyondzela ntirho efemeni yin’wana, laha a ku tirha ntlawa wa vanhu va 20 lava feke tindleve. U tirhe na vona tin’hweti ta nhungu leswaku a dyondza ririmi ra vona ni ndlela leyi va anakanyaka ha yona. Elembeni leri landzeleke u ve phayona ra nkarhi hinkwawo, kumbe muchumayeri wa Mfumo wa nkarhi hinkwawo, a pfuna ntlawa wa vanhu lava feke tindleve lava a va tsakela ntiyiso wa Bibele. Ntlawa lowu wu kule hi ku hatlisa, naswona a swi tekanga nkarhi leswaku ku va ni vanhu vo tlula 35 eminhlanganweni ya Sonto.—Pisalema 110:3.

Endzhaku ka sweswo, eSeoul ku sunguriwe minhlangano ya Vukreste leyi a yi khomiwa hi ririmi ra mavoko ntsena. Makwerhu Park In-sun u ve phayona ro hlawuleka eka ntlawa wolowo lowu kulaka. Se a a ri ni vutshila lebyikulu eka ririmi ra mavoko. Etin’hwetini tin’wana a a dyondza Bibele ni vanhu va 28 lava feke tindleve. Vo tala va vona va endle nhluvuko kutani va va Timbhoni ta Yehovha.

Hikwalaho ko tinyiketela swinene entirhweni lowu, hi October 1976, ku simekiwe vandlha ro sungula ra ririmi ra mavoko eSeoul, ri ri ni vahuweleri va 40 ni maphayona mambirhi ya nkarhi hinkwawo. Leswi swi hundzisele moya wa ku hiseka ni le madorobeni man’wana ya le Korea. Vanhu vo tala lava feke tindleve a va ri ni torha ra mahungu lamanene naswona a va swi langutele hi mahlo-ngati ku endzeriwa.

Ku Pfuna Vanhu Lava Feke Tindleve

U nga va u tivutisa leswaku lava va feke tindleve va kumiwe njhani. Vo tala va kumiwe hi ku tivisana. Nakambe ku komberiwe mpfuno wa vini va switolo swa le kusuhi swa rhayisi, kutani va xaxameta mavito ni tiadirese ta vanhu lava feke tindleve. Tihofisi tin’wana ta hulumendhe na tona ti pfunetile hi rungula ro tano. Nsimu leyi nga ni vanhu lava feke tindleve yi hlanganisiwe kahle lerova hi ku famba ka nkarhi ku simekiwe mavandlha ya mune lama tirhisaka ririmi ra mavoko. Vantshwa vo tala lava nga Vakreste va khutaziwe ku dyondza ririmi ra mavoko.

Hofisi ya rhavi ya Timbhoni ta Yehovha yi avele maphayona yo hlawuleka lama dyondzeke ririmi ra mavoko leswaku ma ya tirha ni mavandlha wolawo. Ku nga ri khale, vamakwerhu lava yeke eXikolweni xa Ndzetelo wa Vutirheli va averiwe emavandlheni wolawo naswona va fike va ma tiyisa swinene hi tlhelo ra moya.

Ku ni swiphiqo leswi ku hlangavetaniwaka na swona. Ku tirha ensin’wini ya vanhu lava feke tindleve swi lava ku tiyimisela ku twisisa ndhavuko wa vona. A va swi koti ku ceceleta mhaka. Minkarhi yin’wana vanhu swa va hlamarisa sweswo kutani va va ni mianakanyo leyi hoxeke hi vanhu lava feke tindleve. Ku tlula kwalaho, loko Timbhoni ti fambisa dyondzo ya le kaya ya Bibele ni vanhu lava feke tindleve, ti fanele ti va pfuna leswaku va tinyiketela swinene eku antswiseni ka ririmi ra vona ni ndlela leyi va hlayaka ni ku dyondza ha yona.

Siku ni siku, lava feke tindleve va langutana ni swiphiqo leswi vo tala va nga swi xiyiki. Hakanyingi a swi olovi ku twanana na vona loko va ye etihofisini ta hulumendhe, eswibedlhele ni le tindhawini ta mabindzu. Kambe Timbhoni ta mavandlha ya le kusuhi ti va pfunile swinene, lerova loko va ta eminhlanganweni ya Vukreste, va fike va swi vona leswaku va rhandziwa hakunene.—Yohane 13:34, 35.

 Vuyelo Bya Ku Nyikela Vumbhoni Bya Xitshuketa

Le Pusan, ku nga doroba lerikulu eKorea ra hlaluko ra swikepe ra le dzongeni, Mbhoni yin’wana yi hlangane ni vanhu vambirhi lava feke tindleve, lava tsaleke marito lama landzelaka exiphephanini: “Ha swi rhandza ku hanya eParadeyisini. Hi lava ku tiva matsalwa lama vulavulaka hi vutomi lebyi nga heriki.” Makwerhu u tsale adirese ya vona ehansi kutani a endla malunghiselelo ya ku va endzela. Loko a fika u kume vanhu lava feke tindleve va tate kamara hinkwaro, va rindzele ku twa rungula ra Mfumo. Leswi swi n’wi susumetele ku sungula ku dyondza ririmi ra mavoko. Endzhakunyana ku simekiwe vandlha ra ririmi ra mavoko ePusan.

Makwerhu wa le vandlheni rero u vone vanhu vambirhi lava feke tindleve va ri karhi va vulavurisana hi ndlela ya vona, kutani a ya eka vona. U kume leswaku a va ha ku vuya hi le nhlanganweni wa vukhongeri byin’wana, ivi hi siku rero a va rhambela ku ya eHolweni ya Mfumo hi awara ya mbirhi nindzhenga. Kunene va yile, hiloko va sungula ku dyondzeriwa Bibele. Endzhakunyana, vanhu lava vambirhi va ye entsombanweni wa muganga va ri ni vanghana va vona va 20 lava na vona va feke tindleve. Vo talanyana eka ntlawa wolowo va nyiketele vutomi bya vona eka Yehovha. Vambirhi i vakulu emavandlheni ya ririmi ra mavoko kasi un’wana i nandza wa vutirheli.

Vuyelo Bya Ku Tiyimisela

Tanihi leswi van’wana lava feke tindleve va tshamaka ekule swinene  ni mavandlha lama tirhisaka ririmi ra mavoko, hakanyingi swi lava matshalatshala lamakulu ni ku tiyimisela leswaku va kuma swakudya swa moya nkarhi na nkarhi leswi humaka eBibeleni. Hi xikombiso, wanuna un’wana wa malembe ya 31 hi vukhale a a tihanyisa hi ku phasa tinhlampfi eribuweni ra xihlala. U byeriwe rungula ra Bibele hi ndzisana yakwe ya xinuna, leyi Timbhoni ta Yehovha ti vulavuleke na yona. Leswaku a tima torha rakwe ra swilo swa moya, muphasi loyi wa tinhlampfi la feke tindleve u fambe tikhilomitara ta 16 hi byatso a ya eDorobeni ra Tongyoung leri nga kusuhi ni lwandle edzongeni wa Korea. Kwalaho a a ya hlangana ni phayona ro hlawuleka ro huma evandlheni ro tirhisa ririmi ra mavoko leri nga eDorobeni ra Masan. Hi Musumbhunuku wun’wana ni wun’wana, phayona leri ro hlawuleka a ri teka riendzo ra tikhilomitara ta 65 ri ya va ni dyondzo ya Bibele ni muphasi wa tinhlampfi la feke tindleve.

Loko xichudeni lexi xa Bibele xi ya enhlanganweni wa Sonto le Dorobeni ra Masan, a xi boheka ku famba tikhilomitara ta 16 hi byatso, ivi xi khandziya bazi xi famba tikhilomitara tin’wana ta 65. Ku tiyimisela ka xona ku ve ni vuyelo lebyinene. Hi tin’hweti ti nga ri tingani, xi antswise ririmi ra xona ra mavoko, xi dyondza maletere man’wana ya Xikorea—naswona xa nkoka ngopfu—xi dyondze ndlela leyi nga yona ya ku va munghana wa Yehovha. Hi ku vona ntikelo wa ku va kona eminhlanganweni ni wa ku chumayela nkarhi na nkarhi, xichudeni lexi xi rhurhele endhawini leyi nga ni vandlha leri tirhisaka ririmi ra mavoko. Xana sweswo swi olovile? Doo! Xi boheke ku tshika ntirho wa xona wa ku phasa tinhlampfi lowu a wu xi nghenisela mali yo ringana R32 400 hi n’hweti, kambe xiboho xa xona xi ve ni vuyelo lebyinene. Loko xi endle nhluvuko entiyisweni, xi khuvuriwile naswona sweswi xi tirhela Yehovha hi ntsako kun’we ni ndyangu wa xona.

Minkandziyiso Leyi Hundzuluxeleriweke Lava Feke Tindleve

Mahungu lamanene ya Mfumo hakanyingi ma twarisiwa hi nomu. Kambe loko rungula leri humaka eRitweni ra Xikwembu ri ta hundzisiwa hilaha ri nga hakona, i swa nkoka leswaku dyondzo ya Bibele yi kumeka eka nchumu lowu nga ta tshama wu ri kona. Hi xikombiso, eka lembe-xidzana ro sungula, vakulukumba lava nga ni ntokoto va tsale tibuku ni mapapila. (Mintirho 15:22-31; Vaefesa 3:4; Vakolosa 1:2; 4:16) Enkarhini wa hina, ku phameriwe swakudya swo tala swa moya hi ku tirhisa tibuku ni minkandziyiso yin’wana ya Vukreste. Minkandziyiso leyi yi hundzuluxeriwe hi tindzimi ta madzana, ku katsa ni tindzimi to hambana-hambana ta mavoko. Leswaku swi va tano ni hi Ririmi ra Mavoko ra le Korea, hofisi ya rhavi yi simeke ndzawulo ya vuhundzuluxeri bya ririmi ra mavoko. Ndzawulo ya tivhidiyo yi endla tivhidiyo ta ririmi ra mavoko. Sweswo swi endla leswaku vachumayeri va mahungu lamanene lava feke tindleve ni vanhu lava tsakelaka va kuma swakudya swa moya emavandlheni hinkwawo ya le Korea.

Hambileswi vahundzuluxeri vo tala va veke ni vutshila byo vulavula hi mavoko va tlhela va pfuneta eku endleni ka tivhidiyo, hakanyingi vahundzuluxeri lavakulu i vana lava nga ni vatswari lava feke tindleve. Va dyondze ririmi ra mavoko ku sukela evuhlangini. Va kota ku vulavula kahle hi mavoko va tlhela va hundzisela rungula hi ndlela yo twala, va ri kandziyisa hi mavoko ni nghohe ya vona, xisweswo va fikelela mianakanyo ni timbilu ta van’wana.

Hilaha ku vuriweke hakona, sweswi mintsombano ni tinhlengeletano swi khomiwa nkarhi na nkarhi hi ririmi ra mavoko eKorea. Sweswo a hi ntirho wutsongo naswona swi lava mali. Kambe lava vaka kona va ri tlangela lunghiselelo leri. Loko ku gimetiwa nongonoko wa minhlangano leyi, vo tala a va hatli va famba, kambe va tsakela ku ya emahlweni va va ni mabulo lamanene ni vanakulobye, va vulavula hi timhaka letinene ta moya leti va ti tweke. Kunene, ku pfuna ntlawa lowu wo hlawuleka a hi matlangwana, kambe mikateko leyi vaka kona hi tlhelo ra moya yi kombisa leswaku mpfuno wo tano wu fanerile.

[Xifaniso lexi nga eka tluka 10]

Tivhidiyo ta ririmi ra mavoko leti endliweke eKorea: “What Does God Require of Us?,” “Appreciating Our Spiritual Heritage,” “Warning Examples for Our Day” ni leyi nge “Respect Jehovah’s Authority”

[Swifaniso leswi nga eka tluka 10]

Ku sukela ehansi: Ku endliwa ka vhidiyo ya ririmi ra mavoko erhavini ra le Korea; ku lunghiselela ndlela yo vulavurisana hi marito ya swa le tilweni; ntlawa wa vahundzuluxeri va ririmi ra mavoko; ku koweta muhundzuluxeri loko ku ri karhi ku endliwa vhidiyo