Leswi Hi Nga Swi Dyondzaka Eka Tinyenyana

“XIYISISANI swinene tinyenyana ta tilo, hikuva a ti byali mbewu, a ti tshoveli, a ti hlengeleti eswitlatini; kambe, Tata wa n’wina wa le tilweni wa ti wundla. Xana a mi ti tluli hi risima?” (Matewu 6:26) Yesu Kreste u vule marito lawa edyondzweni yakwe leyi dumeke leyi a yi nyikeleke etlhelo ka ntshava ekusuhi ni Lwandle ra Galeliya. Vanhu lava a va n’wi yingiserile a ku nga ri valandzeri vakwe ntsena. A ku ri ni ntshungu lowukulu lowu nga vaka vadyondzisiwa lowu humaka etindhawini hinkwato ta tiko. Vo tala va vona a ku ri vanhu lava sweleke lava tiseke vavabyi eka Yesu leswaku a ta va hanyisa.—Matewu 4:23–5:2; Luka 6:17-20.

Endzhaku ko hanyisa hinkwavo lava vabyaka, Yesu u yise nyingiso eka swilaveko swa moya swa nkoka swinene. Yin’wana ya tidyondzo leti a ti dyondziseke a ku ri leyi boxiweke laha henhla.

Tinyenyana ta tilo i khale ti ri kona. Tin’wana ta tona ti dya switsotswana, tin’wana ti dya mihandzu ni timbewu. Loko Xikwembu xi swi kota kahle ku wundla tinyenyana hi ndlela yoleyo, swi le rivaleni leswaku xa swi kota ku pfuna malandza ya xona leswaku ma kuma swakudya swa siku ni siku. Xi nga ha ma pfuna leswaku ma kuma mintirho leyi eka yona ma nga ta hola mali yo xava swakudya. Kumbe xi nga ha endla leswaku ma tshovela swakudya swo tala loko ma rimile. Loko ku ri ni xilaveko xa xihatla Xikwembu xi nga susumeta timbilu ta vaakelani ni vanghana lava nga ni malwandla leswaku va nyika vanhu lava pfumalaka swakudya.

Ku ni swilo swin’wana swo tala leswi hi nga swi dyondzaka hi ku kambisisa vutomi bya tinyenyana. Xikwembu xi tumbuluxe tinyenyana ti ri ni vuswikoti byo hlamarisa bya ku aka swisaka leswi ti nga ta kurisela mavondlo eka swona. Xiya tinxaka letimbirhi ta swisaka. Xisaka lexi nga eximatsini i xa mbewulani ya laha Afrika. Xi akiwa emaribyeni kumbe emakhumbini ya tiyindlu. Lwangu ra xisaka lexi i ribye kumbe vhurandi ra muako hilaha swi kombisiweke hakona exifanisweni lexi. Xisaka xi akiwe hi swigavadana swo tsakama. Nyenyana ya xinuna ni ya xisati ti tirha hi matimba ti hlengeleta swigavadana leswi swo tsakama naswona ti nga ha heta masiku lama tlulaka n’hweti ta ha aka xisaka xa tona. Kutani endzeni ka xisaka ti andlala byanyi ni tinsiva. Hatimbirhi ta pfunana eku wundleni ka mavondlo. Xisaka lexi nga hala hansi i xa sohwa. Nyenyana leyi, leyi hisekaka ya laha Afrika yi aka xisaka xa yona hi byanyi kumbe hi matluka ya swimilana swin’wana. Yi nga heta ku aka xisaka hi siku rin’we naswona yi nga ha aka swisaka swo tlula 30 hi nguva yin’we!

Hi dyondza yini emhakeni leyi? Loko Xikwembu xi nyika tinyenyana vuswikoti byo tano ni swilo swo tala leswi ti akaka swisaka ha swona, swi le rivaleni leswaku xi nga pfuna malandza ya xona leswaku ma kuma vutshamo lebyi lavekaka. Hambiswiritano, Yesu u kombise leswaku hi fanele hi endla nchumu wo karhi loko hi lava leswaku Yehovha Xikwembu a hi pfuna hi kuma swilo leswi hi swi pfumalaka. Yesu u tshembisile a ku: “Kutani, hambetani mi lava mfumo ni ku lulama ka yena ku sungula, xisweswo swilo leswin’wana hinkwaswo mi ta engeteleriwa swona.” (Matewu 6:33) U nga ha tivutisa: ‘I yini lexi katsekaka eku laveni ka Mfumo wa Xikwembu ku sungula?’ Timbhoni ta Yehovha leti fambisaka magazini lowu, ti nga tsakela ku hlamula xivutiso xexo.