Xana Ko Va Mukhuva Ntsena Kumbe I Ku Fumbarherisa?

ETIKHOLICHINI tin’wana ta le Poland, swichudeni swi ni mukhuva wo hlenga mali yo xavela vadyondzisi va swona tinyiko, swi tshemba leswaku swi ta pasela ehenhla. Kutani a swi hlamarisi leswi muntshwa la nga Mukreste la vuriwaka Katarzyna a langutaneke ni ntlhontlho. U tivutisile: “Xana ndzi fanele ndzi humesa mali leyi?” Vadyondzi-kulobye va te: “Sweswo swi tolovelekile. A wu lahlekeriwi hi nchumu, kambe u nga vuyeriwa swinene, kutani ha yini u kanakana?”

Katarzyna u ri: “Entiyisweni eka lembe ra mina ro sungula, ndzi yi humesile mali leyi. Ndzi swi xiye endzhakunyana leswaku ndzi seketele ku fumbarherisa loku Bibele yi ku solaka.” U tsundzuke matsalwa lama kombisaka leswaku Yehovha u ku sola hi ku helela ku fumbarherisa. (Deteronoma 10:17; 16:19; 2 Tikronika 19:7) Katarzyna u ri: “Ndzi yi xiyile ndlela leyi swi olovaka ha yona ku kokiwa hi ntshikilelo wa tintangha. Ndzi tlhele ndzi kambisisa mhaka leyi kutani ku sukela siku rero a ndza ha hlanganyelanga emukhuveni lowu.” Eka malembe manharhu lama hundzeke, u swi kotile ku hlamusela van’wana leswaku a nge yi humesi mali ya ku xava leswi vuriwaka “nyiko,” hikwalaho ka tidyondzo leti sekeriweke eBibeleni leti a pfumelaka eka tona, ku nga khathariseki ku hlekuriwa hi vadyondzi-kulobye.

Van’wana va vule leswaku Katarzyna u ni vutianakanyi ni mona. U ri: “Ni sweswi van’wana va vona va ha ndzi venga. Hi hala tlhelo, vo tala va ri xixima vonelo ra mina, naswona sweswo swa ndzi tsakisa.” Katarzyna u sungule ku tiveka tanihi un’wana wa Timbhoni ta Yehovha, leti hanyaka hi ku landza misinya ya milawu ya Bibele.