Xikolo Xa Gilead—Malembe Ya 60 Yo Letela Varhumiwa

“LESWI hi dyondzeke Bibele hi vuenti, hi ve ekusuhi na Yehovha naswona hi dyondze swo tala hi nhlengeletano ya yena. Leswi swi endle leswaku hi lunghekela ku ya tshama exiavelweni xa le tikweni rimbe.” Yoleyo i ndlela leyi makwerhu la thwaseke eka ntlawa wo sungula a ti hlamuseleke ha yona tidyondzo leti a ti kumeke eXikolweni xa Bibele xa Gilead xa Watchtower. Xikolo xa Gilead xi hambete xi rhumela varhumiwa ku sukela loko xi ve kona malembe ya 60 lama hundzeke. Hi March 8, 2003, ntlawa wa vu-114 wu thwasile le Ntsindza wa Dyondzo wa Watchtower ePatterson, le New York. Vanhu va 6 404 lava a va hlengeletanile eholweni ni le tindhawini tin’wana laha nongonoko a va wu vona eka thelevhixini va yingiserisise tinkulumo, mimbulavurisano ni ku burisana ka ntlawa.

Theodore Jaracz, loyi a nga xirho xa Huvo leyi Fumaka a a ri mutshama-xitulu. Exinghenisweni xakwe u vulavule hi vaendzi lava a va huma eAsia, Kharibiya, eAmerika Xikarhi ni le Amerika Dzonga ni le Yuropa. Makwerhu Jaracz u kandziyise ntirho lowukulu wa murhumiwa la leteriweke eGilead—ku nga ku “endla ntirho wa muevhangeli,” a sekela marito ya yena eka 2 Timotiya 4:5. Varhumiwa va nyikela vumbhoni eka ntiyiso hi ku dyondzisa vanhu Bibele.

Swichudeni Swi Kuma Ndzetelo Wo Hetelela

John Larson, la nga xirho xa Komiti ya Rhavi ya le United States, loyi a veke wo sungula ku nyikela nxaxamelo wa tinkulumo to koma u vulavule hi nhloko-mhaka leyi tiyisaka ripfumelo leyi nge “Loko Xikwembu Xi Ri Xa Hina, I Mani Loyi A Nga Ta Lwa Na Hina?” (Varhoma 8:31) Xivulavuri lexi xi hlamusele xivangelo xa le Bibeleni xa leswaku swichudeni swi ma tshemba hilaha ku tiyeke matimba ya Yehovha yo swi pfuna leswaku swi hlula xihinga xihi na xihi lexi swi nga ha langutanaka na xona eswiavelweni swa swona. Makwerhu Larson u tirhise Varhoma 8:38, 39, a tsundzuxa swichudeni a ku: “Anakanyisisani hi matimba lawa Xikwembu xi ma tirhisaka eka n’wina, kutani mi tsundzuka leswaku a ku na nchumu lowu nga endlaka leswaku Yehovha a nga ha vi na mhaka na n’wina.”

Xivulavuri lexi landzeleke a ku ri Guy Pierce, xirho xa Huvo leyi Fumaka. U hlawule nhloko-mhaka leyi nge “Hlayisa Mahlo Ya Wena Ma Tsakile!” (Luka 10:23) U hlamusele leswaku ntsako wa xiviri wu katsa ku tiva Yehovha ni ku twisisa xikongomelo xa yena lexi nga heriki swin’we ni ku vona ku hetiseka ka vuprofeta bya Bibele. Swichudeni leswi swi nga tshama swi tsakile hakunene kun’wana ni kun’wana laha swi yaka kona loko swi hlayisa mahlo ya swona ma tsakile. Makwerhu Pierce u khutaze mathwasana leswaku ma anakanyisisa hi vunene bya Yehovha ni ku dzikisa mianakanyo ni timbilu ta wona eku endleni ka ku rhandza ka Yena. (Pisalema 77:12) Mathwasana ma nga hlula swiphiqo swin’wana ni swin’wana leswi ma nga ha hlanganaka na swona loko ma tshama ma ri ni langutelo lerinene.

Kutani ntlawa lowu wu leriwe hi marito lama khutazaka lama humaka eka valeteri vambirhi lava a va wu dyondzisa siku na siku. Nhloko-mhaka ya Lawrence Bowen a ku ri xivutiso lexi nge “Xana U Lava Ku Vangamisiwa?” Vanhu vo tala va anakanya leswaku ku vangamisiwa i ku fundzhiwa ni ku hlawuleka. Hambiswiritano, mupisalema Asafa u sungule ku twisisa ku vangama ka xiviri—ku nga ndzalama ya risima ya ku va ni vuxaka lebyi xiximekaka  na Yehovha. (Pisalema 73:24, 25) Swichudeni leswi a swi thwasa swi khutaziwe ku tshama swi ri ni vuxaka lebyikulu na Yehovha hi ku hambeta swi dyondza Bibele hi vuenti. Tintsumi ti “navela ku nyangisisa” vuxokoxoko bya malunghana ni ku hetiseka ka xikongomelo xa Yehovha ha Kreste. (1 Petro 1:12) Ti lava ku dyondza swilo swo tala swinene malunghana ni Tata wa tona leswaku ti ta kombisa ku vangama ka yena. Kutani xivulavuri lexi xi khutaze swichudeni leswaku swi vangamisa Yehovha eswiavelweni swa swona swa vurhumiwa hi ku pfuna van’wana leswaku na vona va kuma ndzalama ya risima.

Mutsarisi wa le xikolweni lexi ku nga Wallace Liverance hi yena a nga gimeta nxaxamelo lowu wa tinkulumo hi nhloko-mhaka leyi nge “Vulavula Vutlhari Bya Xikwembu Bya Xihundla Xo Kwetsima.” (1 Vakorinto 2:7) I yini vutlhari lebyi bya Xikwembu lebyi muapostola Pawulo a vulavuleke ha byona loko a ri karhi a endla ntirho wa yena wa vurhumiwa? I ndlela ya Yehovha ya vutlhari ni ya matimba yo tisa ku rhula ni vun’we evuakweni hinkwabyo. Vutlhari lebyi byi sekeriwe eka Yesu. Ematshan’weni yo chumayela evhangeli yo hlanganisa vanhu, Pawulo u pfune vanhu leswaku va vona ndlela leyi Xikwembu xi nga ta byi herisa ha yona vuyelo bya xidyoho xa Adamu. (Vaefesa 3:8, 9) Xivulavuri lexi xi khutaze vayingiseri va xona xi ku: “Tirhisani lunghelo ra n’wina ra ntirho ku fana na Pawulo, loyi a tekeke xiavelo xa yena xa  vurhumiwa tanihi nkarhi wa ku pfuna vanhu leswaku va vona ndlela leyi Yehovha a nga ta xi hetisisa ha yona xikongomelo xa yena.”

Ku landzele Mark Noumair, muleteri un’wana wa le Gilead, loyi a fambiseke bulo leri a ri hisa loko a vulavula ni swichudeni swi nga ri swingani swa ntlawa lowu. Nhloko-mhaka leyi nge “Ku Dyondza Rito Ra Xikwembu Swi Tswala Vatirheli Lava Hisekaka” yi kandziyise marito ya Pawulo lama nga eka Varhoma 10:10. Ntlawa lowu wu rungule mintokoto yo hlayanyana leyi wu veke na yona loko wu ri ensin’wini loko wa ha ri exikolweni. Mintokoto ya wona yi kombise leswaku loko hi dyondza Rito ra Xikwembu hi tlhela hi anakanyisisa ha rona, swilo leswinene malunghana na Yehovha Xikwembu ni Mfumo wa yena swi ta tata timbilu ta hina naswona hi ta swi byela van’wana. Eka tin’hweti ta ntlhanu leti swichudeni swi ti heteke swi ri eNtsindza wa Dyondzo wa Watchtower, swi sungule tidyondzo ta le kaya ta Bibele to tlula 30 ni vanhu lava tsakelaka ensin’wini leyi tirhiwaka nkarhi na nkarhi emavandlheni ya le kusuhi.

Vanhu Lava Wupfeke Va Nyikela Ndzayo Leyinene

Loko swichudeni swa ha ri exikolweni swi vuyeriwe swinene hi ku burisana ni swirho swa ndyangu wa Bethele wa le United States. Robert Ciranko na Robert P. Johnson lava nga swirho swa rhavi va burisane ni malandza yo hlayanyana lawa se ma nga ni malembe ma tirhela Yehovha hi ku tshembeka, ku katsa ni valanguteri lava famba-fambaka lava a va ri ekhosweni le Ntsindza wa Dyondzo wa Watchtower. Vanhu hinkwavo lava ku buriweke na vona va thwase eGilead naswona va tshame va va varhumiwa. Swichudeni ni mindyangu ya swona ni vanghana va chavelelekile loko va twa marito ya vutlhari ya vavanuna lava nga ni ntokoto naswona va wupfeke hi tlhelo ra moya.

Xitsundzuxo xin’wana xa vona hi lexi nge: “Tshamani mi khomekile swinene evutirhelini ni le vandlheni.” “Mi nga titeki mi ri va nkoka swinene. Mianakanyo ya n’wina a yi tshame yi ri eka ntirho wa n’wina wa vurhumiwa, naswona tekani xiavelo xa n’wina tanihi kaya ra n’wina.” Tinhlamuselo tin’wana leti pfunaka ti kombise ndlela leyi ndzetelo wa le Gilead wu hlomisaka mutirheli ha yona leswaku a ya endla ntirho lowunene, ku nga khathariseki leswaku u averiwe kwihi. Tin’wana ta tona hi leti: “Hi dyondze ku khomisana ni ku tirha swin’we.” “Xikolo lexi xi hi pfune leswaku hi amukela vanhu va mindhavuko yin’wana.” “Hi dyondzisiwe ndlela leyintshwa ya ku tirhisa Matsalwa.”

John E. Barr, xirho xa Huvo leyi Fumaka lexi se xi nga ni malembe, u nyikele nkulumo-nkulu enongonokweni lowu. Nhloko-mhaka ya yena leyi sekeriweke eMatsalweni a yi ku “Mpfumawulo Wa Vona Wu Twakale eMisaveni Hinkwayo.” (Varhoma 10:18) U vutise xivutiso lexi nge, Xana vanhu va Xikwembu va swi kotile ku endla ntirho lowu namuntlha? Va swi kotile hakunene! Hi 1881 vahlayi va magazini wa Xihondzo xo Rindza va vutisiwile: “Xana ma chumayela?” Kutani xivulavuri lexi xi tsundzuxe vayingiseri hinkwavo hi xirhambo lexi nga rivalekiki lexi endliweke entsombanweni wa 1922 wa le Cedar Point, Ohio, le U.S.A.: “Twarisani Hosi ni Mfumo wa yona!” Loko nkarhi wu ri karhi wu famba, ku hiseka ka malandza ya Xikwembu lama tshembekaka ku ma susumetele ku twarisa ntiyiso lowu hlamarisaka wa Mfumo ematikweni hinkwawo. Mahungu lamanene ma fike emakun’wini ya misava leyi akiweke hi ku tirhisa minkandziyiso ni hi ku vulavula hi nomu—leswi tisaka ku dzuneka eka Yehovha. Loko a gimeta nkulumo ya yena hi ndlela leyi nyanyulaka, Makwerhu Barr u khutaze mathwasana leswaku ma tlangela mikateko ya wona, a ku: “Siku na siku loko mi khongela eka Yehovha loko mi ri exiavelweni xa n’wina, n’wi nkhenseni swi suka embilwini hikwalaho ka leswi na n’wina mi hetisisaka marito lama nge, ‘Mpfumawulo wa vona wu twakale emisaveni hinkwayo.’”

Endzhaku ka nkulumo leyi, ku hlayiwe marungula kutani mutshama-xitulu a nyika mathwasana tidiploma ta wona. Kutani, muyimeri wa ntlawa u hlaye xiboho lexi humaka embilwini lexi kongomisiweke eka Huvo leyi Fumaka ni ndyangu wa Bethele, a ri ni ntsako lowu hlanganeke ni gome hikwalaho ka leswi a va ta siya xikolo lexi rhandzekaka, a phofula ku tiyimisela ka mathwasana ku dzunisa Yehovha “ku sukela sweswi ku ya fika enkarhini lowu nga riki na makumu.”—Pisalema 115:18.

Hi khongelela leswaku mathwasana lawa ma tolovela makaya ya wona lamantshwa naswona ma pfuneta leswaku ntirho wa ku chumayela emisaveni hinkwayo wu ya emahlweni, tanihi leswi lava thwaseke emahlweni ka wona va endleke tano ku ringana malembe ya kwalomu ka 60.

[Bokisi leri nga eka tluka 23]

TINHLAYO TA NTLAWA

Nhlayo ya matiko lama yimeriweke: 12

Nhlayo ya matiko lawa va averiweke eka wona: 16

Nhlayo ya swichudeni: 48

Xiringaniso xa malembe: 34,4

Xiringaniso xa malembe entiyisweni: 17,6

Xiringaniso xa malembe evutirhelini bya nkarhi hinkwawo: 13,5

[Xifaniso lexi nga eka tluka 24]

Ntlawa Wa Vu-114 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.