“Maswivo! Lexi I Xikwembu Xa Hina”

Rungula leri nga eka swihloko leswi swimbirhi leswi dyondziwaka ri sekeriwe ebukwini leyi nge Tshinela Eka Yehovha, leyi humesiweke emintsombanweni ya muganga leyi khomiweke emisaveni hinkwayo hi 2002/03.—Vona xihloko lexi nge “Yi Enerise Xilaveko Xa Mbilu Ya Mina,” eka tluka 20.

“Maswivo! Lexi i Xikwembu xa hina. Hi tshembe xona, naswona xi ta hi ponisa. Loyi i Yehovha.”—ESAYA 25:9.

1, 2. (a) Yehovha u n’wi vitanise ku yini kokwa wa hina Abrahama, naswona sweswo swi nga endla leswaku hi tivutisa xivutiso xihi? (b) Bibele yi hi tiyisekisa njhani leswaku swa koteka ku va ni vuxaka lebyikulu na Xikwembu?

“NAKULORHI.” Leyi i ndlela leyi Yehovha, Muvumbi wa tilo ni misava, a vitaneke kokwa wa hina Abrahama ha yona. (Esaya 41:8) Anakanya—munhu wa nyama a va nakulobye wa Hosi Leyikulu ya vuako hinkwabyo! U nga ha tivutisa, ‘Xana swi nga koteka leswaku ndzi va ni vuxaka byo tano na Xikwembu?’

² Bibele ya hi tiyisekisa leswaku swa koteka ku va ni vuxaka lebyikulu na Xikwembu. Abrahama u kume lunghelo ro tano hikuva “u ve ni ripfumelo eka Yehovha.” (Yakobo 2:23) Ni namuntlha Yehovha “u rhandza lavo lulama.” (Swivuriso 3:32) Eka Yakobo 4:8, Bibele ya hi khutaza yi ku: “Tshinelani eka Xikwembu, kutani xi ta tshinela eka n’wina.” Ina, loko hi endla matshalatshala ya ku tshinela eka Yehovha, na yena u ta teka goza ro karhi. Kunene, u ta tshinela eka hina. Kambe xana marito wolawo lama huhuteriweke ma vula leswaku hi hina hi tekaka goza ku sungula, kasi hi vanhu lava nga ni xidyoho, lava nga hetisekangiki? Doo! Ku va ni vuxaka na Yehovha swi koteka hileswi Xikwembu xa hina xa rirhandzu ana se xi tekeke magoza mambirhi ya nkoka.—Pisalema 25:14.

3. Hi wahi magoza mambirhi lawa Yehovha a ma tekeke leswaku a hi pfulela ndlela ya ku va vanghana vakwe?

³ Xo sungula, Yehovha u endle lunghiselelo ra leswaku Yesu a “nyikela moya-xiviri wakwe wu va nkutsulo wa lavo tala.” (Matewu 20:28) Gandzelo rero ra nkutsulo ri endla leswaku hi swi kota ku tshinela eka Xikwembu. Bibele yi ri: “Loko ku ri hina, hi ni rirhandzu, hikuva hi xona xi nga sungula xi hi rhandza.” (1 Yohane 4:19) Ina, leswi Xikwembu xi nga “sungula xi hi rhandza,” xi veke xisekelo xa leswaku  hi va vanghana va xona. Xa vumbirhi, Yehovha u tipaluxile eka hina. Eka vunghana hambi byi ri byihi, vuxaka lebyi vaka kona byi tiya hi ku n’wi tiva kahle munghana wa wena ni ku tsakela mahanyelo yakwe. Anakanya hi leswi sweswo swi vulaka swona. Loko Yehovha a a ri Xikwembu xa xihundla lexi swi nga kotekiki ku xi tiva, a hi nga ta tshinela eka yena. Kambe ematshan’weni yo titumbeta, Yehovha u lava leswaku hi n’wi tiva. (Esaya 45:19) ERitweni rakwe, ku nga Bibele, u tihlavutela hi marito lawa hi ma twisisaka—ku nga vumbhoni bya leswaku wa hi rhandza naswona u lava leswaku hi n’wi tiva ni ku n’wi rhandza tanihi Tata wa hina wa le tilweni.

4. Hi ta titwa njhani hi Yehovha loko hi ya hi tiva timfanelo ta yena ku antswa?

⁴ Xana u tshama u vona n’wana lontsongo a khwenuta vanghana va yena ivi a kombetela eka tata wakwe hi ntsako ni hi ku tinyungubyisa ka vuhlangi, a ku, “Hi yena tata wa mina loyi”? Vagandzeri va Xikwembu va ni xivangelo lexinene xa ku titwa hi ndlela leyi fanaka hi Yehovha. Bibele yi profete nkarhi lowu vanhu vo tshembeka va nga ta huwelela va ku: “Maswivo! Lexi i Xikwembu xa hina.” (Esaya 25:8, 9) Loko hi ya hi twisisa timfanelo ta Yehovha, hi ta titwa hi ri ni Tatana lonene ngopfu ni Munghana lonkulu ku tlula hinkwavo. Ina, ku twisisa timfanelo ta Yehovha swi hi nyika swivangelo swo tala swa ku tshinela eka yena. Kutani a hi kambisiseni ndlela leyi Bibele yi ti hlamuselaka ha yona timfanelo letikulu ta Yehovha—ku nga matimba, vululami, vutlhari ni rirhandzu. Eka xihloko lexi, hi ta hlamusela timfanelo tinharhu to sungula.

“U Tlakukile Hi Matimba”

5. Ha yini swi fanerile leswaku ku va Yehovha ntsena la vitaniwaka wa “Matimba Hinkwawo,” naswona matimba yakwe lama chavisaka u ma tirhisa hi tindlela tihi?

⁵ Yehovha “u tlakukile hi matimba.” (Yobo 37:23) Yeremiya 10:6 yi ri: “Oho Yehovha, a nga kona nikatsongo la fanaka na wena. U nkulu, naswona vito ra wena ri ni matimba lamakulu.” Ku hambana ni xivumbiwa xihi ni xihi, Yehovha u ni matimba lama nga hikiwangiki. Hikwalaho, hi yena ntsena la vuriwaka wa “Matimba Hinkwawo.” (Nhlavutelo 15:3) Yehovha u tirhisa matimba yakwe lama chavisaka leswaku a tumbuluxa, a lovisa, a sirhelela ni ku kondletela. Xiya swikombiso swimbirhi ntsena—matimba yakwe ya ku tumbuluxa ni matimba yakwe ya ku sirhelela.

6, 7. Dyambu ri ni matimba yo tanihi kwihi, naswona sweswo swi tiyisekisa mhaka yihi ya nkoka?

⁶ Loko u yima edyambyini ra ximumu hi siku leri nga siviwangiki hi mapapa, xana u twa yini enhlongeni ya wena? U twa ku hisa ka dyambu. Kambe kahle-kahle u twa vuyelo bya matimba ya Yehovha yo tumbuluxa. Xana dyambu ri hisa ku fikela kwihi? Enkaveni wa rona, ri hisa kwalomu ka 15 000 000°C. Loko wo teka nhlahle wunene wa nkava wa dyambu u wu veka laha misaveni, u nga twa ku hisa hambi u tlhenguke ekule na wona hi tikhilomitara ta 150! Eka sekoni yin’wana ni yin’wana, dyambu ri humesa ndzilo lowu ringanaka ni ku buluka ka tibomo ta nyutliya ta madzana yo tala ya timiliyoni. Kambe misava yi rhendzeleka ni xitiko xo tano xo hisa yi ri empfhukeni lowu faneleke. Loko misava a yi ri ekusuhi swinene, mati a ma ta phya ma hela; loko a yi ri ekule ngopfu, a ma ta sala ma ri gwitsi ntsena. Loko misava a yi ri ekule ngopfu  kumbe yi ri ekusuhi swinene, a ku nga ta va ni lexi hanyaka eka yona.

⁷ Vanhu vo tala a va na mhaka na rona dyambu, hambileswi vutomi bya vona byi titshegeke ha rona. Kutani va kayela leswi dyambu ri hi dyondzisaka swona. Loko yi vulavula ha Yehovha, Pisalema 74:16 yi ri: “U lunghiselele rivoningo, [ku nga] dyambu.” Ina, dyambu ri dzunisa Yehovha, loyi a nga “Muendli wa tilo ni misava.” (Pisalema 146:6) Hambiswiritano, dyambu i xin’wana xa swilo swo tala leswi tumbuluxiweke, leswi hi dyondzisaka hi ta matimba lamakulu ya Yehovha. Loko hi dyondza swo tala hi matimba ya Yehovha yo tumbuluxa, ni xichavo xa hina eka yena xi ta ya xi kula.

8, 9. (a) I xifaniso xihi lexinene xo kombisa ndlela leyi Yehovha a tiyimiseleke ha yona ku sirhelela ni ku khathalela vagandzeri vakwe? (b) Murisi wa le nkarhini wa ku tsariwa ka Bibele a a ti khathalela njhani tinyimpfu ta yena, naswona sweswo swi hi dyondzisa yini malunghana ni Murisi wa hina Lonkulu?

⁸ Nakambe Yehovha u tirhisa matimba yakwe lamakulu leswaku a sirhelela malandza yakwe ni ku ma khathalela. Bibele yi tirhisa tinhlamuselo leti twisisekaka ni leti khumbaka loko yi vulavula hi switshembiso swa Yehovha swa ku hi khathalela. Hi xikombiso xiya marito ya Esaya 40:11. Kwalaho Yehovha u tifanisa ni murisi, kasi vanhu vakwe u va fanisa ni tinyimpfu. Ha hlaya: “U ta risa ntlhambi wa yena ku fana ni murisi. Hi voko ra yena u ta hlengeleta swinyimpfana; u ta swi rhwala exifuveni xa yena. Leswi an’wisaka u ta swi byisa hi nkhathalelo.” Xana u kota ku swi vona hi mahlo ya mianakanyo leswi hlamuseriwaka eka ndzimana leyi?

⁹ A swi talanga swiharhi leswi nga swi kotiki ku tisirhelela ku fana ni tinyimpfu. Murisi wa le minkarhini ya ku tsariwa ka Bibele a a fanele a va ni xivindzi leswaku a ta kota ku sirhelela tinyimpfu takwe eka mahlolwa, tibere ni tinghala. (1 Samuwele 17:34-36; Yohane 10:10-13) Kambe minkarhi yin’wana tinyimpfu a ti lava ku sirheleriwa ni ku khathaleriwa hi ndlela yo hlawuleka. Hi xikombiso, loko nyimpfu yi tswalela ekule ni tshanga, xana murisi a a ta xi sirhelela njhani xinyimpfana lexa ha ku velekiwaka, lexi nga kotiki ku tisirhelela? Kumbexana a ku hela masiku a xi vukarhe “exifuveni xakwe”—a xi phutsele hi nguvu ya yena ya le handle. Kambe a swi tisa ku yini leswaku xinyimpfana xi va exifuveni xa murisi? Kumbexana xinyimpfana a xi ya eka murisi, xi fika xi tlanga-tlanga enengeni wakwe. Hambiswiritano, i murisi loyi a a fanele a korhama, a tlakula xinyimpfana kutani a xi vukarha exifuveni. Vona xikombiso lexinene swonghasi xa ndlela leyi Murisi wa hina Lonkulu a tiyimiseleke ha yona ku sirhelela ni ku khathalela malandza yakwe!

10. I nsirhelelo wihi lowu Yehovha a wu nyikelaka namuntlha, naswona ha yini nsirhelelo wo tano wu ri wa nkoka swinene?

¹⁰ Yehovha a ngo tshembisa ntsena leswaku u ta hi sirhelela. Eminkarhini ya ku tsariwa ka Bibele, u tirhise masingita lama kombisaka leswaku u kota ku “va kutsula endzingweni vanhu lava nga ni ku tinyiketela loku nga ni vukwembu.” (2 Petro 2:9) Ku vuriwa yini hi hina namuntlha? Ha swi tiva leswaku a nga hi sirheleli eka timhangu hinkwato hi matimba ya yena. Kambe u hi sirhelela hi ndlela ya nkoka swinene—u sirhelela vumoya bya hina. Xikwembu xa hina lexi nga ni rirhandzu xa hi sirhelela ekhombyeni ra moya hi ku hi hlomisa hi leswi hi swi lavaka leswaku hi tiyiselela miringo ni ku hlayisa vuxaka bya hina na xona lebyi nga bya risima. Hi xikombiso, Luka 11:13 yi ri: “Loko n’wina, hambiloko mi hombolokile mi tiva ndlela ya ku nyika vana va n’wina tinyiko letinene, Tatana la nge tilweni u ta nyika moya lowo kwetsima hilaha ku tlurisaka swinene eka lava n’wi kombelaka!” Moya wolowo wa matimba wu nga hi pfuna ku langutana ni ndzingo kumbe xiphiqo xihi ni xihi lexi taka. (2 Vakorinto 4:7) Hikwalaho, Yehovha u teka goza leswaku a sirhelela vutomi bya hina, ku nga ri swa malembenyana ntsena, kambe hilaha ku nga heriki. Loko hi tsundzuka sweswo, hakunene hi nga languta ku xaniseka kwihi ni kwihi emafambiselweni lawa ku ri ka ‘nkarhinyana naswona ku ri loku vevukaka.’ (2 Vakorinto 4:17) Xana a hi titwi hi navela ku va ekusuhi ni Xikwembu lexi tirhisaka matimba ya xona hi ndlela ya rirhandzu swonghasi leswaku xi pfuna hina?

“Yehovha U Rhandza Vululami”

11, 12. (a) Ha yini vululami bya Yehovha byi hi tshineta eka yena? (b) Hi wahi makumu lawa Davhida a ma fikeleleke malunghana ni vululami bya Yehovha, naswona marito wolawo lama huhuteriweke ma nga hi chavelela njhani?

¹¹ Yehovha u endla leswi lulameke ni leswi faneleke, naswona u swi endla hi ndlela leyi nga hundzukiki, handle ka xihlawuhlawu. Vululami bya Xikwembu a hi mfanelo yo pfumala ntwela-vusiwana, yo tikisa voko, leyi hi susumetelaka ku fambela  ekule na xona, kambe i mfanelo leyi rhandzekaka leyi hi tshinetaka eka Yehovha. Bibele yi yi hlamusela kahle ndlela leyi mfanelo leyi yi rhandzekaka ha yona. Kutani a hi kambisiseni tindlela tinharhu leti Yehovha a tirhisaka vululami byakwe ha tona.

¹² Xo sungula, vululami bya Yehovha byi endla leswaku a kombisa vutshembeki eka malandza ya yena. Mupisalema Davhida u byi vone kahle vululami lebyi bya Yehovha. Hi ku ya hi leswi a swi tokoteke ni mukhuva lowu a ti dyondzeke ha wona tindlela ta Xikwembu, xana Davhida u fikelele makumu wahi? U te: “Yehovha u rhandza vululami, naswona a nge va siyi lava tshembekeke vakwe. Kunene va ta rindziwa hilaha ku nga riki na makumu.” (Pisalema 37:28) Mawaku xitiyisekiso lexi chavelelaka swonghasi! Xikwembu xa hina xi nga ka xi nga va tshiki nikatsongo lava tshembekaka eka xona. Hikwalaho, hi nga tiyiseka hi rirhandzu ra xona ni nkhathalelo wa xona lowukulu. Vululami bya xona bya swi tiyisekisa leswi!—Swivuriso 2:7, 8.

13. Nawu lowu Yehovha a wu nyikeke Vaisrayele wu yi kombisa njhani ndlela leyi a khathalaka ha yona hi vanhu lava pfumalaka?

¹³ Xa vumbirhi, vululami bya Xikwembu byi xi susumetela ku khathala hi swilaveko swa lava xanisekaka. Ndlela leyi Yehovha a khathalaka ha yona hi lava pfumalaka yi kombisiwa hi Nawu lowu a wu nyikeke Vaisrayele. Hi xikombiso, Nawu a wu koxa leswaku ku khathaleriwa swisiwana ni tinoni. (Deteronoma 24:17-21) Hi ku xiya leswaku vutomi a byi ta tikela mindyangu leyi, Yehovha hi byakwe u ve Muavanyisi ni Musirheleri wa yona. (Deteronoma 10:17, 18) U tsundzuxe Vaisrayele leswaku loko vo xanisa vavasati ni vana lava nga kotiki ku tisirhelela, yena u ta xi twa xirilo xa vona. Hi ku ya hi Eksoda 22:22-24 u te: “Kunene ku hlundzuka ka mina ku ta va kukulu.” Hambileswi vukarhi byi nga riki yin’wana ya timfanelo ta Xikwembu letikulu, xa hlundzuka hi ndlela leyi faneleke loko vanhu va xanisa van’wana hi vomu, ngopfu-ngopfu lava nga riki na ndlela ya ku tisirhelela.—Pisalema 103:6.

14. Hi xihi xikombiso lexi xiyekaka ngopfu xa leswaku Yehovha a nga yi hi nghohe?

¹⁴ Xa vunharhu, eka Deteronoma 10:17, Bibele ya hi tiyisekisa leswaku Yehovha ‘a nga hlawuli munhu hambi ku ri ku amukela xifumbarheriso.’ Ku hambana ni vanhu vo tala lava nga ni vulawuri kumbe nhlohlotelo, Yehovha a nga na mhaka ni rifuwo ra munhu kumbe ku languteka ka yena. A nga hlawuli ndluwa a siya hove. Xikombiso lexi xiyekaka ngopfu xa leswaku a nga yi hi nghohe hi lexi: Lunghelo ra ku va mugandzeri wa yena wa ntiyiso, leri fambisanaka ni ntshembo wa ku kuma vutomi lebyi nga heriki, a hi ra vanhu vo karhi vo hlawuleka ntsena. Ematshan’weni ya sweswo, Mintirho 10:34, 35 yi ri: “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” Ntshembo lowu wu pfulekele vanhu hinkwavo, ku nga khathariseki xiyimo xa vona, muvala wa vona kumbe tiko leri va tshamaka eka rona. Xana byi nga va kona vululami byo antswa ku tlula lebyi? Kunene, ku va ni matwisiselo lamanene hi vululami bya Yehovha swi hi tshineta eka yena!

‘Mawaku Ku Enta Ka Vutlhari Bya Xikwembu!’

15. Vutlhari i yini, naswona Yehovha u byi kombisa njhani?

¹⁵ Hi ku ya hi Varhoma 11:33, muapostola Pawulo u hlamarile a ku: “Mawaku ku enta ka . . . vutlhari ni vutivi bya Xikwembu!” Ina, loko hi anakanyisisa hi swikombiso swo hambana-hambana swa vutlhari lebyikulu bya Yehovha, hi sala hi hlamele. Kambe, xana hi nga yi hlamusela njhani mfanelo leyi? Vutlhari i ku tirhisa vutivi ni ku twisisa. Hi ku tirhisa vutivi ni ku twisisa kakwe loku enteke, minkarhi hinkwayo Yehovha u endla swiboho leswinene ngopfu, a swi hetisisa hi ku teka goza leri lavekaka.

16, 17. Swilo leswi Yehovha a swi tumbuluxeke swi byi tiyisekisa njhani vutlhari bya yena lebyikulu? Nyika xikombiso.

¹⁶ Hi byihi vumbhoni lebyi kongomeke bya vutlhari lebyikulu bya Yehovha? Pisalema 104:24 yi ri: “Mintirho ya wena yi tele swinene, Wena Yehovha! Hinkwayo ka yona u yi endle hi vutlhari. Misava yi tele rifuwo ra wena.” Kunene, loko hi dyondza swinene hi swilo leswi Yehovha a swi endleke, ni vutlhari bya yena byi ta hi hlamarisa swinene. Phela, vativi va sayense va dyondze swo tala hi ku kambisisa swilo leswi Yehovha a swi tumbuluxeke! Ku ni sayense leyi vitaniwaka biomimetics, leyi ringetaka ku kopela swilo swa ntumbuluko.

¹⁷ Hi xikombiso, u nga ha va u hlamarile loko u vona ku saseka ka vulwembu bya pume. Byi endliwe hi ndlela yo hlamarisa swinene. Tincinda tin’wana ta byona leti langutekaka ti nga tiyanga,  loko to hlanganisiwa ti nga tlula ni nsimbi hi ku tiya, kasi ni xiambalo xo tisirhelela ha xona eka makulu a xi nge voni nchumu eka tona. Kahle-kahle sweswo swi vula yini? Anakanya hi vulwembu lebyi hlanganisiweke byi ringana ni rikoka leri tirhisiwaka ebyatsweni byo phasa tinhlampfi. Vulwembu byebyo byi tiye ngopfu lerova byi nga yimisa xihaha-mpfhuka xo rhwala vanhu, lexi fambaka hi rivilo lerikulu! Ina, Yehovha u endle swilo sweswo hinkwaswo “hi vutlhari.”

18. Vutlhari bya Yehovha byi kombisiwa njhani hi ku va a tirhise vanhu ku tsala Rito rakwe, ku nga Bibele?

¹⁸ Xikombiso lexikulu ngopfu xa vutlhari bya Yehovha xi kumeka eRitweni ra yena, ku nga Bibele. Xitsundzuxo xa vutlhari lexi kumekaka eka yona xi hi komba ndlela leyinene ya ku hanya. (Esaya 48:17) Kambe vutlhari bya Yehovha lebyi nga ringanisiwiki na nchumu byi kombisiwa ni hi ndlela leyi Bibele yi tsariweke ha yona. Njhani? Hi vutlhari bya yena, Yehovha u tirhise vanhu leswaku ku va vona va tsalaka Rito rakwe. Loko a a lo tirhisa tintsumi leswaku ti tsala Rito leri huhuteriweke, xana Bibele a yi ta tsakeriwa hilaha yi tsakeriwaka hakona sweswi? Entiyisweni, tintsumi a ti ta va ti hlamusele Yehovha hi ku ya hi langutelo ra tona leri tlakukeke, ti phofula ku tinyiketela ka tona eka yena. Kambe, xana a hi ta swi kota ku twisisa langutelo ra swivumbiwa swa moya leswi hetisekeke, leswi vutivi bya swona, ntokoto wa swona ni matimba ya swona, ma tlakukeke swinene ku tlula ya hina?—Vaheveru 2:6, 7.

19. I yini lexi kombisaka leswaku ku tirhisiwa ka vatsari va Bibele lava nga vanhu va nyama swi endla leswaku hi yi tsakela swinene?

¹⁹ Ku tirhisiwa ka vatsari va Bibele lava nga vanhu va nyama swi endla leswaku hi yi tsakela swinene. Vatsari va yona a va ri vanhu lava nga ni mintlhaveko yo fana ni ya hina. Leswi a va nga hetisekanga, va langutane ni miringo ni mintshikilelo leyi fanaka ni ya hina. Minkarhi yin’wana a va tsala hi mintlhaveko ni swihinga swa vona vini. (2 Vakorinto 12:7-10) Kutani va tsale marito lawa tintsumi a ti nga ta ma phofula. Hi xikombiso, anakanya hi marito ya Davhida lama tsariweke eka Pisalema 51. Hi ku ya hi nhloko-mhaka ya kona, Davhida u tsale pisalema leyi endzhaku ka loko a endle xidyoho lexikulu. U phofule leswi nga embilwini yakwe, a kombisa nhlomulo wakwe lowukulu, a kombela Xikwembu leswaku xi n’wi rivalela. Tindzimana 2 na 3 ti ri: “Ndzi hlantswe xihoxo xa mina swinene, naswona ndzi basise eka xidyoho xa mina. Hikuva ndza ku tiva ku tlula ka mina nawu, naswona xidyoho xa mina xi le mahlweni ka mina nkarhi hinkwawo.” Xiya ndzimana 5: “Waswivo! Hi switlhavi swa ku veleka ndzi velekiwe ndzi ri ni xidyoho, naswona  manana u ndzi tikile exidyohweni.” Ndzimana 17 ya engetela: “Switlhavelo leswi yaka eka Xikwembu i moya lowu tshovekeke; Oho Xikwembu, mbilu leyi tshovekeke yi tlhela yi pfotloseka a wu nge yi languteli ehansi.” Xana a wu khumbeki hi ndlela leyi mutsari a a karhateke ha yona? Handle ka munhu la nga hetisekangiki, xana u kona munhu un’wana loyi a a ta kota ku phofula mintlhaveko yo tano?

20, 21. (a) Ha yini ku nga vuriwaka leswaku Bibele yi tamele vutlhari bya Yehovha, hambileswi a tirhiseke vanhu leswaku va yi tsala? (b) Ku ta vulavuriwa hi yini eka xihloko lexi landzelaka?

²⁰ Hi ku tirhisa vanhu vo tano lava nga hetisekangiki, Yehovha u hi nyike leswi swi hi faneleke—rungula leri ‘huhuteriweke hi Xikwembu’ leri fambisanaka ni xiyimo xa vanhu va nyama. (2 Timotiya 3:16) Ina, vatsari lava a va kongomisiwa hi moya lowo kwetsima. Xisweswo a va tsala vutlhari bya Yehovha, ku nga ri bya vona. Vutlhari byebyo byi tshembeka hi ku helela. Byi tlakukile swinene eka bya hina, lerova Xikwembu xi hi khutaza hi rirhandzu xi ku: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.” (Swivuriso 3:5, 6) Loko hi yingisa xitsundzuxo xexo xa vutlhari, hi ta tshinela ekusuhi ni Xikwembu xa hina lexi nga ni vutlhari lebyi heleleke.

²¹ Mfanelo yo xonga ku tlula timfanelo hinkwato ta Yehovha i rirhandzu. Ndlela leyi Yehovha a kombiseke rirhandzu ha yona yi ta hlamuseriwa eka xihloko lexi landzelaka.

Wa Tsundzuka Xana?

• I magoza wahi lawa Yehovha a ma tekeke leswaku a hi pfulela ndlela ya ku va ni vunghana na yena?

• Hi swihi swikombiso swin’wana swa matimba ya Yehovha ya ku tumbuluxa ni ya ku sirhelela?

• Yehovha u tirhisa vululami byakwe hi tindlela tihi?

• Vutlhari bya Yehovha byi vonaka njhani eka leswi a swi tumbuluxeke ni le Bibeleni?

[Swivutiso Swa Dyondzo]

[Xifaniso lexi nga eka tluka 10]

Ku fana ni murisi la vukarhaka xinyimpfana exifuveni xakwe, Yehovha u ti khathalela swinene tinyimpfu ta Yena

[Xifaniso lexi nga eka tluka 13]

Vutlhari bya Yehovha byi kombisiwa hi ndlela leyi Bibele yi tsariweke ha yona