Rirhandzu I Ra Nkoka

VANHU hinkwavo va swi navela ku rhandziwa, ku nga khathariseki leswaku va ni malembe mangani, i va ndhavuko wihi, va vulavula ririmi rihi kumbe i va rixaka rihi. Loko ku navela koloko ku nga enerisiwi, a va tsaki. Mulavisisi wa ta vutshunguri u tsarile: “Rirhandzu i xisekelo xa swin’wana leswi hi vabyisaka ni leswi hi endlaka hi hanya kahle, leswi hi vangelaka gome ni leswi hi tiselaka ntsako, leswi hi endlaka hi xaniseka ni leswi hi horisaka. Loko a ku ri ni murhi lowuntshwa lowu pfunaka hi ndlela yoleyo, kwalomu ka dokodela un’wana ni un’wana etikweni a a ta bumabumela leswaku vavabyi va yena va tikumela wona. Dokodela la nga wu bumabumeriki murhi wo tano a a ta va a endla xihoxo.”

Kambe, namuntlha swihaxi swa mahungu ni vanhu va ndhuma va ndhundhuzela ngopfu rifuwo, xikhundlha, ndhuma ni ku tinyiketela etimhakeni ta rimbewu, ematshan’weni ya xilaveko xa vanhu xa ku khathalelana ni ku rhandzana. Vadyondzisi vo tala va kandziyisa tipakani ta swilo swa nyama ni mintirho ya xiyimo xa le henhla, va hlamusela leswaku munhu la humelelaka evuton’wini hi loyi a fikelelaka tipakani to tano. I ntiyiso leswaku dyondzo ni ku hlakulela vuswikoti i swa nkoka, kambe xana swi fanele swi hlongorisiwa swinene lerova munhu a nga ha vi na nkarhi wa ndyangu wa yena ni vanghana va yena? Mutsari wa khale la dyondzekeke, loyi a a ri muxiyisisi lonkulu wa vutomi bya vanhu u vule leswaku munhu la nga ni vuswikoti kambe a nga ri na rirhandzu u fana ni “xingelengele lexi baka pongo kumbe xiphambati lexi ketlaketlaka.” (1 Vakorinto 13:1) Vanhu vo tano va nga ha va ni rifuwo, va tlhela va va ni ndhuma, kambe a va nge pfuki va kume ntsako wa xiviri.

Yesu Kreste, loyi a a va twisisa swinene vanhu a tlhela a va rhandza hi ndlela yo hlawuleka, a a kandziyisa ngopfu ku rhandza Xikwembu ni muakelani loko a ri karhi a dyondzisa. U te: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo. . . . U fanele u rhandza warikwenu kukota loko u tirhandza.” (Matewu 22:37-39) Lava landzelaka marito lawa hi vona ntsena va nga vaka valandzeri va Yesu va ntiyiso. Hikwalaho, u te: “Hinkwavo va ta tiva leswaku mi vadyondzisiwa va mina, loko mi rhandzana.”—Yohane 13:35.

Kambe, xana munhu a nga ri hlakulela njhani rirhandzu emisaveni ya namuntlha? Naswona vatswari va nga va dyondzisa njhani vana va vona leswaku va kombisa rirhandzu? Xihloko lexi landzelaka xi ta hlamula swivutiso leswi.

[Swifaniso leswi nga eka tluka 3]

Swa tika ku hlakulela rirhandzu emisaveni leyi lawuriwaka hi makwanga