“Tshinelani Eka Xikwembu, Kutani Xi Ta Tshinela Eka N’wina”

Emahlweni Ni Le Ndzhaku U Kume Matimba Ya Ku Hundzuka

SANDRA, wansati un’wana wa le Mexico, u tihlamusele a ri loyi a a hanya byakwe endyangwini wa ka vona. Ku honisiwa ka yena ni ku nga kombisiwi rirhandzu swi onhe malembe ya yena ya kondlo-a-ndzi-dyi. U ri: “Loko ndzi ri eka malembe ya kondlo-a-ndzi-dyi a ndzi titwa ndzi nga pfuni nchumu naswona a ndzi tivutisa leswaku ndzi hanyela yini.”

Loko a ha ri exikolweni xa le henhla, Sandra u sungule ku nwa vhinyo ya tata wakwe ekaya. Hi ku famba ka nkarhi, u sungule ku tixavela byala hi yexe kutani a va xindzendzele. U ri: “A ndzi nga ha swi lavi ku hanya.” Tanihi leswi a a nga ha ri ni xin’wana xo xi endla, Sandra u sungule ku tirhisa swidzidzirisi. U ri: “Nchumu wun’we lowu ndzi pfuneke ku rivala swiphiqo swa mina a ku ri leswi a ndzi tshama ndzi ri na swona exinkwamanini: ku nga byala, swidzidzirisi kumbe mbanginyana.”

Endzhaku ka loko Sandra a hete tidyondzo ta yena ta swa vutshunguri, u godzomberiwe swinene hi byala. U ringete ku tidlaya. Kambe a nga fanga.

Sandra u lave ku pfuniwa hi tlhelo ra moya ni le mintlhavekweni eka tikereke to hambana-hambana kambe a tsandzeka. Leswi a heleriwe hi ntshembo naswona a ri ni gome, u khongele hi ku phindha-phindha eka Xikwembu, a ku: “U kwihi xana? Ha yini u nga ndzi pfuni?” A a titwa a nga ha ri na xindzhuti loko Mbhoni yin’wana ya Yehovha yi vulavula na yena. Sweswo swi endle leswaku ku sunguriwa dyondzo ya Bibele na yena. Sandra u khumbeke ngopfu loko a tiva leswaku “Yehovha u le kusuhi ni lava va tshovekeke mbilu.”—Pisalema 34:18.

Loyi a a dyondza Bibele na Sandra u n’wi pfune ku twisisa leswaku Yehovha Xikwembu wa swi tiva leswaku hi hlaseleka hi ku olova hikwalaho ka xidyoho ni ku nga hetiseki loku hi ku kumeke eka Adamu. Sandra u swi xiyile leswaku Xikwembu xa swi twisisa leswaku a hi nge swi koti ku yi landzelela hi ku helela mimpimanyeto ya xona leyinene. (Pisalema 51:5; Varhoma 3:23; 5:12, 18) A a tsakile loko a tiva leswaku Yehovha a nga languti ku tsana ka hina, naswona a nga languteli leswaku hi endla swilo swo tlula leswi hi nga kotaka ku swi endla. Mupisalema u vutisile: “Loko a wu languta swihoxo, Wena Yah, Oho Yehovha, i mani loyi a a ta yima?”—Pisalema 130:3.

Dyondzo ya nkoka ya Bibele leyi tsakiseke Sandra a ku ri ya gandzelo ra nkutsulo ra Yesu Kreste. Hi ku tirhisa rona, Yehovha u endle leswaku vanhu lava n’wi yingisaka va amukeleka eka yena hambileswi va nga hetisekangiki. (1 Yohane 2:2; 4:9, 10) Ina, hi nga kuma “ku rivaleriwa ka swivi swa hina” kutani hi pfuniwa ku hlula mintlhaveko ya ku titwa hi nga pfuni nchumu.—Vaefesa 1:7.

Sandra u kume tidyondzo ta nkoka eka xikombiso xa muapostola Pawulo. Muapostola loyi a a wu tlangela swinene musa wa Xikwembu hi ku va xi n’wi rivalele swidyoho swa yena ni ku n’wi seketela eku lweni ka nyimpi yo hlula ku tsana loku a a hambeta a ri na kona. (Varhoma 7:15-25; 1 Vakorinto 15:9, 10) Pawulo u hundzule vutomi bya yena, ‘a ba miri wa yena, a wu kongomisa tanihi hlonga,’ leswaku a hambeta a famba endleleni leyi amukeriwaka hi Xikwembu. (1 Vakorinto 9:27) A nga wu pfumelelanga mboyamelo  wakwe wa vudyoho leswaku wu n’wi endla hlonga.

Ku tsana ka Sandra ku n’wi karhatile, kambe u hambete a lwa na kona. U kombele mpfuno wa Yehovha hi mbilu hinkwayo leswaku a kota ku ku hlula a tlhela a kombela ku tsetseleriwa. (Pisalema 55:22; Yakobo 4:8) Loko a xiye ndlela leyi Xikwembu xi n’wi khathalelaka ha yona, Sandra u kote ku hundzula vutomi bya yena. U ri: “Ndzi ni lunghelo lerinene ra ku dyondzisa van’wana Bibele nkarhi hinkwawo.” Sandra u ve ni lunghelo ra ku pfuna sesi wakwe ni ndzisana yakwe leswaku va tiva Yehovha. Leswi a ‘endlaka leswinene,’ u tlhela a tirhisa vutivi bya yena bya swa vutshunguri emintsombanweni ya Timbhoni ta Yehovha.—Vagalatiya 6:10.

Ku vuriwa yini hi ku godzomberiwa ka Sandra? U vula hi ku tiyiseka a ku: “Se mianakanyo ya mina yi basile. A ndza ha nwi byala, a ndza ha dzahi naswona a ndza ha tirhisi swidzidzirisi. A ndza ha swi lavi ni ku swi vona. Ndzi kume leswi a ndzi lava swona.”

[Marito lama tshahiweke exihlokweni lama nga eka tluka 9]

“Ndzi kume leswi a ndzi lava swona”

[Bokisi leri nga eka tluka 9]

Ku Tirhisa Misinya Ya Milawu Ya Bibele

Hi leyi yin’wana ya misinya ya milawu ya Bibele leyi pfuneke vanhu vo tala leswaku va tshika ku godzomberiwa hi swilo leswi nyamisaka:

“A hi tibasiseni eka swilo hinkwaswo leswi nyamisaka nyama ni moya, hi hetisekisa vukwetsimi hi ku chava Xikwembu.” (2 Vakorinto 7:1) Xikwembu xi katekisa lava tibasiseke eka swilo leswi nyamisaka, lava papalataka mikhuva yo biha.

“Ku chava Yehovha swi vula ku venga swo biha.” (Swivuriso 8:13) Ku chava Xikwembu swi pfuna munhu leswaku a tshika mikhuva yo biha, ku katsa ni ku tirhisa swidzidzirisi. Handle ko tsakisa Yehovha, munhu la hundzukeke u sirheleleka emavabyini lama chavisaka.

“[Tivekeni] ehansi ka tihulumendhe ni valawuri.” (Tito 3:1) Etindhawini to tala, ku va ni swidzidzirisi swo karhi kumbe ku swi tirhisa i ku lwa ni nawu. Vakreste va ntiyiso a va hlayisi kumbe ku tirhisa swidzidzirisi leswi nga riki enawini.