“Mi Amukele Mahala, Nyikani Mahala”

“MI AMUKELE mahala, nyikani mahala.” (Matewu 10:8) Hi wona marito lawa Yesu a ma leriseke vaapostola va yena loko a va rhuma leswaku va ya chumayela mahungu lamanene. Xana vaapostola va xi yingisile xileriso xexo? Ina, va xi yingisile naswona va ye emahlweni va endla tano niloko Yesu a nga ha ri kona emisaveni.

Hi xikombiso, loko Simoni loyi eku sunguleni a a endla masalamusi a vona leswaku muapostola Petro na Yohane va ni matimba yo endla masingita, u kombele leswaku va n’wi xavisela wona. Kambe Petro u tshinye Simoni a ku: “Silivhere ya wena a yi love na wena, hikuva u ehlekete ku kuma nyiko ya mahala ya Xikwembu hi mali.”—Mintirho 8:18-20.

Muapostola Pawulo a a ri ni langutelo leri fanaka ni ra Petro. Pawulo a a ta va a endle leswaku Vakreste-kulobye va le Korinto va n’wi seketela hi timali. Kambe a nga endlanga tano, u tiwundle hi ku tirha hi mavoko ya yena. (Mintirho 18:1-3) Xisweswo u ve ni xivindzi xo vula leswaku u chumayele mahungu lamanene eka Vakorinto “handle ka nxavo.”—1 Vakorinto 4:12; 9:18.

Lexi twisaka ku vava hileswaku vo tala lava tivulaka valandzeri va Kreste a va na wona moya lowu fanaka ni wolowo wa ku ‘nyika mahala.’ Entiyisweni, vafundhisi vo tala va vukhongeri bya Vujagana va “letela hi nxavo ntsena.” (Mikiya 3:11) Varhangeri van’wana va vukhongeri va kale va va swigwili hi mali leyi va yi kumaka eka swirho swa tikereke ta vona. Hi 1989, mufundhisi un’wana wa le United States u gweviwe malembe ya 45 ekhotsweni. Ha yini? U “dyelele swirho swa kereke ya yena timiliyoni ta tidolara naswona u tirhise yin’wana ya mali yoleyo ku xava tiyindlu, mimovha, ku ya eku wiseni hambi ku ri ku nghenisa fambiselo leri lawulaka mahiselo ni matitimelelo exiyindlwanini xa mbyana ya yena.”—People’s Daily Graphic, October 7, 1989.

Hi ku ya yi phepha-hungu leri vuriwaka Ghanaian Times, ra March 31, 1990, siku rin’wana le Ghana muprista wa kereke ya Rhoma Khatoliki u teke mali leyi hlengiweke ekerekeni a yi lahlela eka swirho swa kereke. Phepha-hungu leri ri te “u vule leswaku u endle sweswo hileswi tanihi vatswatsi, a va fanele va humese mali yo nyawula swinene.” A swi hlamarisi leswi tikereke to tala ti ringetaka ku kucetela swirho swa tona ku va ni makwanga, naswona ti hisekela ku hlohlotela mikhuva ya ku gembula ni marhengu man’wana yo endla mali.

Kambe, Timbhoni ta Yehovha a ti endli tano, ti tikarhatela ku tekelela Yesu ni vadyondzisiwa vo sungula. A ti na vafundhisi lava hakeriwaka. Mbhoni yin’wana ni yin’wana i mutirheli la byarhisiweke vutihlamuleri bya ku chumayela van’wana ‘mahungu lamanene ya mfumo.’ (Matewu 24:14) Hi yona mhaka leyi Timbhoni leti tlulaka tsevu wa magidi emisaveni hinkwayo ti khomekeke entirhweni wa ku nyika vanhu “mati ya vutomi” mahala. (Nhlavutelo 22:17) Hi ndlela yoleyo, ni vanhu “lava nga riki na mali” va swi kota ku kuma rungula ra Bibele. (Esaya 55:1) Hambileswi ntirho wa tona wu sekeriwaka hi minyikelo ya ku tirhandzela, a ti si tshama ti famba ti kombela mali. Leswi ti nga vatirheli va Xikwembu va xiviri, a hi “vaxavisi va rito ra Xikwembu,” kambe ti vulavula hi “vutshembeki, ina, leswi [ti] rhumiweke hi Xikwembu.”—2 Vakorinto 2:17.

Kambe, ha yini Timbhoni ta Yehovha ti tsakela ku pfuna van’wana naswona ti va pfuna hi mali ya tona? Xana ti susumetiwa hi yini? Xana ku nyika  ka tona mahala swi vula leswaku ntirho wa tona ko va nyuku wa mbyana?

Ku Hlamula Ntlhontlho Wa Sathana

Vakreste va ntiyiso namuntlha va susumetiwa swinene hi ku rhandza ku tsakisa Yehovha—ku nga ri ku tiendla swigwili. Hi ndlela yoleyo, ti kota ku nyika nhlamulo eka ntlhontlho lowu Sathana Diyavulosi a wu pfuxeke eka malembe-xidzana lama hundzeke. Malunghana ni wanuna wo lulama la vuriwaka Yobo, Sathana u tlhontlhe Yehovha hi xivutiso lexi nge: “Xana Yobo wo chava Xikwembu swa ntsena-ntsena?” Sathana u hehle Yobo hi leswaku u tirhela Xikwembu ntsena hi leswi xi n’wi sirheleleke. Sathana u vule leswaku loko Yobo o tekeriwa rifuwo ra yena, a a ta rhukana Xikwembu xi n’wi langutile!—Yobo 1:7-11.

Loko Xikwembu xi angula ntlhontlho lowu, xi pfumelele Sathana leswaku a ringa Yobo, xi ku: “Hinkwaswo leswi a nga na swona swi le vokweni ra wena.” (Yobo 1:12) Vuyelo bya kona byi ve byihi? Yobo u swi veke erivaleni leswaku Sathana i muhembi. Eka maxangu hinkwawo lawa Yobo a langutaneke na wona, u tshame a tshembekile. U te: “Ndzi nga ka ndzi nga tshiki vutshembeki bya mina kukondza ndzi timeka!”—Yobo 27:5, 6.

Vagandzeri va ntiyiso namuntlha va ni langutelo leri fanaka ni ra Yobo. Loko va tirhela Xikwembu a va langutelanga ku vuyeriwa hi swilo leswi vonakaka.

Nyiko Ya Xikwembu Ya Mahala Ya Musa Lowu Nga Faneriwiki

Xivangelo xin’wana lexi endlaka leswaku Vakreste va ntiyiso va tsakela ku “nyika mahala” hi leswaku Xikwembu xi va ‘nyike mahala’ na vona. Vanhu va le vuhlongeni bya xidyoho ni rifu hikwalaho ka xidyoho lexi vangiweke hi tata wa hina Adamu. (Varhoma 5:12) Hi rirhandzu, Yehovha u lunghiselele leswaku N’wana wa yena a fa rifu ra xitlhavelo—ku nga nyiko leyi koxeke Xikwembu swinene. Entiyisweni, xiendlo lexi a xi va faneli vanhu. I nyiko leyi humaka eka Xikwembu.—Varhoma 4:4; 5:8; 6:23.

Hi yona mhaka leyi Pawulo a tsaleleke Vakreste lava totiweke hilaha swi tsariweke hakona eka Varhoma 3:23, 24, a ku: “Hinkwavo va dyohile, naswona va kayivela ku vangama ka Xikwembu, kutani i nyiko ya mahala leyi endleke leswaku va vuriwa lava lulameke hi musa lowu nga faneriwiki, hi ku ntshunxiwa hi nkutsulo lowu hakeriweke hi Kreste Yesu.” Hilaha ku fanaka, ni lava nga ni ntshembo wa ku hanya hilaha ku nga heriki emisaveni va nyikiwe ‘nyiko leyi ya mahala.’ Nyiko leyi yi katsa lunghelo ra leswaku va vuriwa lava lulameke tanihi vanakulobye va Yehovha.—Yakobo 2:23; Nhlavutelo 7:14.

Nakambe, xitlhavelo xa nkutsulo wa Kreste xi endla leswaku Vakreste hinkwavo va kota ku va vatirheli va Xikwembu. Muapostola Pawulo u tsale a ku: “Ndzi ve mutirheli wa [xihundla lexi xo kwetsima] hi ku ya hi nyiko ya mahala ya musa lowu nga faneriwiki wa Xikwembu.” (Vaefesa 3:4-7) Vatirheli va ntiyiso va Xikwembu a va langutelanga ku holeriwa entirhweni wa ku vulavula ni van’wana hi mahungu ya lunghiselelo leri, hikuva va nyikiwe lunghelo rero swi nga va fanelanga.

Xana Vutomi Lebyi Nga Heriki Byi Hi Kucetela Ku Va Ni Vutianakanyi?

Kutani ke, xana leswi swi vula leswaku Xikwembu xi lava leswaku Vakreste va xi tirhela va nga  ri na ntshembo wo kuma hakelo yo karhi? A swi tano, hikuva muapostola Pawulo u byele vapfumeri-kulobye a ku: “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona.” (Vaheveru 6:10) Nakambe Yehovha a hi munhu wo homboloka. (Deteronoma 32:4) Ematshan’weni ya sweswo, Yehovha i ‘muhakeri wa lava n’wi lavaka hi mbilu hinkwayo.’ (Vaheveru 11:6) Kambe, xana xitshembiso xa vutomi lebyi nga heriki eparadeyisini a xi hi kuceteli ku va ni vutianakanyi?—Luka 23:43.

Nikatsongo. Phela Xikwembu hi xona xi endleke leswaku hi navela ku hanya hilaha ku nga heriki emisaveni leyi nga Paradeyisi. Hi xona xi endleke leswaku vanhu vambirhi vo sungula va va ni ntshembo lowu. (Genesa 1:28; 2:15-17) Endzhaku ka loko Adamu na Evha va endle leswaku vana va vona va lahlekeriwa hi ntshembo lowu, hi xona xi tlheleke xi endla leswaku vana va vona va va na wona. Hikwalaho Xikwembu xi tshembisile eRitweni ra xona leswaku “ntumbuluko hi woxe na wona wu ta ntshunxiwa evuhlongeni bya ku onhaka kutani wu va ni ntshunxeko lowu vangamaka wa vana va Xikwembu.” (Varhoma 8:21) Hikokwalaho swi faneleka kahle leswaku Vakreste namuntlha va “languta swinene-nene eku nyikiweni ka hakelo,” ku fana na Muxe wa khale. (Vaheveru 11:26) Xikwembu a xi xaveleli vanhu loko xi va nyika nyiko leyi. Kambe, loko xi va nyika yona xi kombisa leswaku lava va xi tirhelaka xi va rhandza hi mbilu hinkwayo. (2 Vatesalonika 2:16, 17) Na hina ‘ha xi rhandza hikuva hi xona xi nga sungula xi hi rhandza.’—1 Yohane 4:19.

Ku Tirhela Xikwembu Hi Xikongomelo Lexinene

Nilokoswiritano, Vakreste namuntlha va fanele va kambisisa leswaku i yini lexi va endlaka va tirhela Xikwembu. Eka Yohane 6:10-13, hi hlaya leswaku Yesu u phamele ntshungu lowu tlulaka ntlhanu wa magidi hi singita. Xisweswo, van’wana va sungule ku landzela Yesu hikwalaho ka swivangelo swa vutianakanyi. Yesu u te eka vona: ‘Mi ndzi lava hileswi mi dyeke swinkwa mi xurha.’ (Yohane 6:26) Endzhaku ka loko ku hundze makume yo karhi ya malembe, Vakreste van’wana lava tinyiketeleke va endlele Xikwembu ntirho kambe ‘ku nga ri hi xikongomelo lexinene.’ (Vafilipiya 1:17) Van’wana lava nga ma ‘amukelangiki marito lama nga ni rihanyo ya Yesu Kreste,’ va kale va lava ni tindlela to dyelela Vakreste lava a va hlanganyela na vona.—1 Timotiya 6:3-5.

Namuntlha, swi nga ha endleka leswaku Mukreste la tirhelaka Xikwembu ntsena hi leswi a lavaka ku hanya hilaha ku nga heriki eParadeyisini, a va a kuceteriwa hi vutianakanyi. Hi ku famba ka nkarhi a nga wa emoyeni. Leswi mafambiselo ya swilo ya Sathana ma vonakaka ma teka nkarhi wo leha, a nga ha ‘karhala,’ a vona onge makumu ma hlwela. (Vagalatiya 6:9) Nakambe a nga ha hlundzuka loko a anakanya hi swilo leswi vonakaka leswi a swi tshikeke. Yesu u hi tsundzuxa a ku: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.” (Matewu 22:37) Ina, munhu loyi a tirhelaka Xikwembu hileswi a xi rhandzaka, a nga wu pimi nkarhi lowu a nga ta xi tirhela ha wona. U tiyimisele ku tirhela Yehovha hilaha ku nga heriki! (Mikiya 4:5) A nga tisoli hi leswi a swi tshikeke leswaku a ta tirhela Xikwembu. (Vaheveru 13:15, 16) Ku rhandza Xikwembu ku n’wi susumetela leswaku a rhangisa ku rhandza ka xona evuton’wini bya yena.—Matewu 6:33.

Namuntlha, vagandzeri va ntiyiso lava tlulaka tsevu wa magidi va “tinyikela hi ku tirhandzela” entirhweni wa Yehovha. (Pisalema 110:3) Xana u un’wana wa vona? Loko u nga ri yena, anakanyisisa hi tinyiko leti Xikwembu xi hananaka ha tona: vutivi lebyi tengeke bya ntiyiso; (Yohane 17:3) ku ntshunxiwa evuhlongeni bya vukhongeri bya mavunwa ni le tidyondzweni ta byona; (Yohane 8:32) ni ntshembo wa ku hanya hilaha ku nga heriki. (Nhlavutelo 21:3, 4) Timbhoni ta Yehovha ti nga ku pfuna u dyondza ndlela leyi u nga ti kumaka ha yona mahala tinyiko leti hinkwato leti humaka eka Xikwembu.

[Marito lama tshahiweke exihlokweni lama nga eka tluka 22]

Vakreste va ntiyiso namuntlha va susumetiwa swinene hi ku rhandza ku tsakisa Yehovha—ku nga ri ku tiendla swigwili

[Xifaniso lexi nga eka tluka 21]

Nyiko ya mahala ya Xikwembu ya xitlhavelo yi endla leswaku Vakreste va byela van’wana mahungu lamanene mahala