Swivutiso Swa Vahlayi

Yehovha u pfumelele malandza ya yena ya khale, ku nga Vaisrayele leswaku va teka tshengwe, kambe sweswi a nga ha swi pfumeleli. Xana sweswo swi vula leswaku milawu ya yena ya cinca-cinca?

Yehovha a nga ri cincanga langutelo ra yena hi tshengwe. (Pisalema 19:7; Malakiya 3:6) Xolexo a ku nga ri xikongomelo xa yena leswaku vanhu va endla tano ku sukela eku sunguleni naswona swa ha ri tano nisweswi. Loko Yehovha a vumbela Adamu nsati, ku nga Evha, u simeke nawu wa leswaku wanuna a va ni nsati un’we. U te: “Hikokwalaho wanuna u ta siya tata wakwe ni mana wakwe naswona u fanele ku namarhela nsati wakwe, kutani va fanele va va nyama yin’we.”—Genesa 2:24.

Loko Yesu Kreste a ri emisaveni, u tlhele a vula nawu lowu loko a hlamula lava a va vutisa hi ku dlaya vukati kutani va tekana ni un’wana. U te: “Xana a mi hlayanga leswaku loyi a va tumbuluxeke eku sunguleni u va endle va va waxinuna ni waxisati kutani a ku, ‘Hikwalaho ka sweswo, wanuna u ta siya tata wakwe ni mana wakwe naswona u ta namarhela nsati wakwe, kutani lavambirhi va ta va nyama yin’we’? Kutani a va ha ri vambirhi, kambe i nyama yin’we.” Yesu u engeterile: “Mani na mani la tshikaka nsati wakwe, a teka un’wana, ku nga ri hi xivangelo xa vumbhisa, u endla vuoswi.” (Matewu 19:4-6, 9) Mhaka leyi yi swi veka erivaleni leswaku ku teka tshengwe na kona i vuoswi.

Kutani ha yini tshengwe a ri pfumeleriwa eminkarhini ya khale? Tsundzuka leswaku mukhuva lowu a wu sunguriwanga hi Yehovha. Munhu wo sungula loyi Bibele yi vulaka leswaku a a teke tshengwe i Lameke, ntukulu wa Kayini. (Genesa 4:19-24) Loko Yehovha a tisa Ndhambi esikwini ra Nowa, Nowa a a ri ni nsati un’we naswona a swi ri tano ni hi vana va yena vanharhu. Hinkwavo lava a va teke tshengwe va herisiwe hi Ndhambi.

Endzhakunyana ka malembe-xidzana loko Yehovha a hlawule Vaisrayele tanihi vanhu vakwe, van’wana ana se a va teke tshengwe, hambileswi a swi tikomba swi tolovelekile swinene leswaku vavanuna va va ni nsati un’we ntsena. Xikwembu a xi kalanga xi lava leswaku mindyangu leyi nga ni tshengwe yi hahluriwa. Ematshan’weni ya sweswo, a xi va tshikanga vanhu va tiendlela ku rhandza ka vona emhakeni leyi.—Eksoda 21:10, 11; Deteronoma 21:15-17.

Leswaku ku teka tshengwe a swi pfumeleriwe swa xinkarhana swi kombisiwa hi leswi vuriweke hi Yesu malunghana ni nawu wa Yehovha wo sungula wa vukati kun’we ni marito ya muapostola Pawulo lawa moya lowo kwetsima wa Xikwembu wu n’wi huhuteleke ku ma tsala. U te: “Wanuna un’wana ni un’wana a a ve ni nsati wa yena, ni wansati un’wana ni un’wana a a ve ni nuna wa yena.” (1 Vakorinto 7:2) Pawulo u tlhele a huhuteriwa ku tsala leswaku wanuna un’wana ni un’wana loyi a vekiweke tanihi mulanguteri kumbe nandza wa vutirheli evandlheni ra Vukreste u fanele a va “nuna la nga ni nsati un’we.”—1 Timotiya 3:2, 12; Tito 1:6.

Yehovha u herise ku teka tshengwe loko ku simekiwa vandlha ra Vukreste kwalomu ka malembe ya 2 000 lama hundzeke. Hi nkarhi wolowo, nawu wa vukati wu tlhelele eka leswi a wu ri xiswona eku sunguleni loko Xikwembu xi vumba wanuna ni wansati: hi leswaku wanuna un’we a va ni nsati un’we ntsena. I nawu lowu vanhu va Xikwembu emisaveni hinkwayo va hanyaka hi wona namuntlha.—Marka 10:11, 12; 1 Vakorinto 6:9, 10.