“Vanhu Vambirhi Va Fika eKaya”

“SE KU hundze malembe mambirhi hi ri ni gome lerikulu ra ku feriwa hi xinhwanyetana xa hina.” Xolexo a ku ri xingheniso xa papila leri a ri tsaleriwe mani na mani eka phepha-hungu leri vuriwaka Le Progrès, leri kandziyisiweke eSaint-Étienne, le Furwa.

“Mélissa a a ri ni tinh’weti tinharhu hi vukhale naswona a khomiwe hi vuvabyi lebyi dlayaka lebyi vuriwaka trisomy 18, lebyi hlaselaka byongo, mbilu, longo, byi tlhela byi cinca ni xivumbeko xa nhloko. Rifu leri a ri rivaleki hi ku olova. Hambileswi hi kuleke hi ri Makhatoliki, minkarhi hinkwayo a hi tivutisa leswaku ‘Xikwembu, loko u ri kona, ha yini u pfumelela swilo swo tano swi humelela?’” Swi le rivaleni leswaku manana loyi a tsaleke papila leri a a tshikilelekile naswona a a titwa a nga pfuni nchumu. Papila ra yena ri ya emahlweni ri ku:

“Endzhakunyana ka swiendlakalo leswi, hiloko vanhu vambirhi va fika ekaya. Ndzi hatle ndzi swi xiya leswaku a va ri Timbhoni ta Yehovha. A ndzi tiyimisele ku va hlongola hi ndlela ya kahle, hiloko ndzi vona broxara leyi a va ndzi fambisela yona. A yi vulavula hileswaku ha yini Xikwembu xi pfumelela ku xaniseka. Ndzi va yingiserile, kambe xikongomelo xa mina a ku ri ku va kombisa leswaku leswi va swi vulaka swi hoxile. Ndzi anakanye leswaku loko swi ta emhakeni ya maxangu, ndyangu wa ka hina wu langutane na wona hilaha swi ringaneke, naswona se a hi korwile hi marito yo tlhava lama fanaka ni lama nge ‘Xikwembu xi hi nyike yena kutani Xikwembu xi tlhele xi n’wi teka.’ Timbhoni teto ti tshame nkarhi wo tlula awara. Ti ndzi yingisele hi ntwela-vusiwana lowukulu naswona loko ti ndzi lela, ndzi titwe ndzi antswa swinene lerova ndzi pfumele leswaku ti tlhela ti ndzi endzela. Sweswo swi endleke emalembeni mambirhi lama hundzeke. A ndzi si va Mbhoni ya Yehovha, kambe ndzi sungule ku dyondza Bibele na tona naswona ndzi ya eminhlanganweni ya tona hilaha ndzi nga kotaka hakona.”