Xiviko Xa Vahuweleri Va Mfumo

Vuyelo Lebyi Tsakisaka Hikwalaho Ka Ku Lehisa Mbilu Ni Ku Phikelela

YESU KRESTE u profete leswaku emasikwini ya makumu “rirhandzu ra vo tala [a] ri ta hola.” Hikwalaho, eswiphen’wini swo tala swa misava namuntlha vanhu hi ntolovelo a va ma tsakeli mahungu lamanene ya Mfumo. Van’wana va byi tekela ehansi vukhongeri.—Matewu 24:12, 14.

Hambiswiritano, hikwalaho ka ripfumelo ni ku lehisa mbilu, vahuweleri va Mfumo va humelela hambiloko vanhu va nga tsakeli, hilaha ntokoto lowu landzelaka wa le Rhiphabliki ya Czech wu kombisaka hakona.

Timbhoni timbirhi ti vulavule ni wansati loyi a a tipfalele endlwini. Endzhakunyana, wansati loyi u pfule nyangwa switsongo, a humesa voko kutani a teka timagazini ta Xihondzo xo Rindza ni Xalamuka! leti Timbhoni a ti n’wi fambisela tona. U te, “ndza nkhensa,” kutani a pfala nyangwa. Timbhoni ti tivutisile, “Xana hi nga tlhela hi vuya?” Un’wana wa tona, ku nga phayona kumbe mutirheli wa nkarhi hinkwawo, u kunguhate ku tlhelela, kambe loko a fika ku endleke nchumu lowu fanaka naswona swi endlekise xisweswo kukondza ku hela lembe.

Loko phayona ri endle xiboho xa leswaku ri fanele ri cinca mavulavulelo ya rona, ri khongele Yehovha leswaku a ri pfuna. Enkarhini lowu landzeleke, loko ri n’wi nyika timagazini, ri vutise wansati loyi swivutiso leswi kombisaka vunghana ri ku: “Ku njhani? Xana u ti kume ti ri njhani timagazini letiya?” Eku sunguleni a a nga hlamuli kambe endzhaku ka loko ri n’wi endzele ko hlayanyana wansati loyi u sungule ku va ni xinghana. Siku rin’wana u pfule nyangwa hinkwawo kambe a va vulavulanga nkarhi wo leha.

Leswi wansati loyi a a nga ntshunxeki ku vulavula na rona, phayona ri endle xiboho xo n’wi tsalela papila ro hlamusela xikongomelo xa rona xo n’wi endzela ni leswaku ri lava ku n’wi fambisela dyondzo ya le kaya ya Bibele. Endzhaku ka lembe ni hafu phayona ri ri karhi ri lehisa mbilu, ri hetelele ri swi kotile ku sungula dyondzo ya Bibele ni wansati loyi. Ri hlamarile kambe a ri tsakile loko hi ku famba ka nkarhi wansati loyi a ku eka rona: “Ndzi sungule ku va ni ripfumelo eka Xikwembu ku sukela loko u sungule ku ndzi tisela timagazini.”

Hakunene, ku lehisa mbilu ni ku phikelela swi nga tisa vuyelo lebyi tsakisaka entirhweni wo chumayela hi Mfumo ni le ntirhweni wo endla vadyondzisiwa.—Matewu 28:19, 20.