Langutelo Ra Xikwembu Hi Vafi

HAKUNENE ku fa ka munhu la rhandzekaka swi twisa ku vava. Munhu u titwa a nga pfuni nchumu, a ri ni xivundza a tlhela a titwa a lahlekeriwile swinene. Ku feriwa hi munhu la rhandzekaka swi nga endla munhu a titwa a nga pfuni nchumu, hikuva ku nga khathariseki leswaku u ni rifuwo ro tanihi kwihi kumbe vulawuri, a nga kona munhu wa la misaveni loyi a nga pfuxaka munhu la feke.

Hambiswiritano, Muvumbi wa hina u ni vonelo leri hambaneke emhakeni leyi. Leswi a vumbeke munhu wo sungula hi ntshuri wa misava, wa swi kota ku tlhela a vumba munhu la feke. Hikwalaho ka sweswo, Xikwembu xi nga languta vanhu lava feke tanihi lava hanyaka. Malunghana ni malandza yo tshembeka ya khale lama feke, Yesu u te: “Eka [Xikwembu] hinkwavo va hanya.”—Luka 20:38.

Loko a ha ri emisaveni, Yesu a a nyikiwe matimba yo pfuxa vafi. (Yohane 5:21) Hikwalaho, u ni langutelo leri fanaka ni ra Tata wakwe malunghana ni lava feke va tshembekile. Hi xikombiso, loko munghana wakwe Lazaro a file, Yesu u byele vadyondzisiwa vakwe a ku: ‘Ndzi ya eku n’wi pfuxeni evurhongweni.’ (Yohane 11:11) Hi ku ya hi langutelo ra vanhu, Lazaro a a file, kambe eka Yehovha na Yesu, Lazaro a a etlele.

Ehansi ka Mfumo wa Yesu, ku ta va ni “ku pfuxiwa ka lava lulameke ni ka lava nga lulamangiki.” (Mintirho 24:15) Eku heteleleni, lava pfuxiweke va ta dyondzisiwa hi Xikwembu naswona va ta va ni ntshembo wo hanya hilaha ku nga heriki emisaveni.—Yohane 5:28, 29.

Ina, ku fa ka munhu loyi hi n’wi rhandzaka ku nga ha hi vangela gome ni nhlomulo, leswi nga ha hetaka malembe. Nilokoswiritano, loko hi languta lava feke hi ndlela leyi Xikwembu xi va langutaka ha yona hi nga chaveleleka swinene hi tlhela hi va ni ntshembo.—2 Vakorinto 1:3, 4.